Ɛzela 7:1-28
7 Ɛhye mɔ anzi, wɔ Pɛhyea Belemgbunli Atazɛzɛse mekɛ zo,+ Ɛzela*+ ziale rale. Ɔle Sɛlaya+ ara, Azalaya ara, Helekaya+ ara,
2 Hyalɛm ara, Zeedɔko ara, Ahaetɛbe ara,
3 Amalaya ara, Azalaya+ ara, Mɛlayɔto ara,
4 Zɛlahaya ara, Ɛzae ara, Bɛkae ara,
5 Abehyua ara, Fenɛhaze+ ara, Ɛlieza+ ara, ɛsɔfo kpanyinli Aalɔn+ ara.
6 Ɛzela ɛhye vi Babelɔn rale. Ɔle kɛlɛhɛlɛvolɛ mɔɔ ɛnee yebe wɔ Mosisi Mɛla ne+ mɔɔ Gyihova, Yizilayɛ Nyamenle ne vale maanle bɛ la anu. Belemgbunli ne vale debie biala mɔɔ ɔbizale la ɔmaanle ye ɔluakɛ ɛnee Gyihova ye Nyamenle ne asa wɔ ɔ nwo zo.
7 Yizilayɛma, ɛsɔfo ne mɔ, Livaema,+ edwɛndolɛma,+ nlenkɛ mgbole sinzavolɛma,+ nee ɛzonlenlɛsua ne anu sonvolɛma ne*+ bie mɔ hɔle Gyɛlusalɛm wɔ Belemgbunli Atazɛzɛse ɛvolɛ ne mɔɔ tɔ zolɛ nsuu la azo.
8 Ɛzela noko rale Gyɛlusalɛm wɔ belemgbunli ne ɛvolɛ mɔɔ tɔ zo nsuu la siane nnu ne azo.
9 Wɔ siane ne mɔɔ limoa la kenle mɔɔ limoa la anu, ɔdule ɔ bo ɔvile Babelɔn na ɔradwule Gyɛlusalɛm wɔ siane ne mɔɔ tɔ zolɛ nnu la kenle mɔɔ limoa la anu, ɔluakɛ ɛnee ye Nyamenle ne kpalɛyɛlɛ ɛsalɛ ne wɔ ɔ nwo zo.+
10 Ɛnee Ɛzela ɛziezie ye ahonle* kɛ ɔbanleɛnlea Gyihova Mɛla ne anu na yeali zo,+ na yeahilehile nuhua mɛla ne mɔ nee nuhua ndɛnebualɛ ne mɔ wɔ Yizilayɛ.+
11 Kɛlata mɔɔ Belemgbunli Atazɛzɛse vale maanle ɛsɔfo nee kɛlɛhɛlɛvolɛ Ɛzela mɔɔ ɛbe wɔ Gyihova mɛla ne nee ye adehilelɛ ne mɔ mɔɔ ɔvale ɔmaanle Yizilayɛ la ɛzukoalɛ* nu la anu edwɛkɛ ne ɛne:
12 * “Atazɛzɛse,+ arelemgbunli belemgbunli, kɔmaa ɛsɔfo Ɛzela mɔɔ le anwuma Nyamenle ne Mɛla kɛlɛhɛlɛvolɛ la: Anzodwolɛ ɛha wɔ. Kɛkala
13 meli mɛla kɛ, me belemgbunlililɛ ne anu sonla biala mɔɔ le Yizilayɛnli nee bɛ ɛsɔfoma yɛɛ Livaema mɔɔ kulo kɛ bɛ nee wɔ kɔ Gyɛlusalɛm la nee wɔ ɛhɔ.+
14 Ɔluakɛ belemgbunli ne nee ye folɛtuvoma nsuu ne ɛzoa wɔ kɛ ɛhɔ Dwuda nee Gyɛlusalɛm ɛhɔnlea saa bɛlɛdi wɔ Nyamenle ne Mɛla ne mɔɔ ɛlɛ* la azo a,
15 na ɛva dwɛtɛ fufule nee nvutuke mɔɔ belemgbunli ne nee ye folɛtuvoma ɛvi bɛ ahonle nu ɛva ɛmaa Yizilayɛ Nyamenle ne mɔɔ ye sua wɔ Gyɛlusalɛm la,
16 yɛɛ dwɛtɛ fufule nee nvutuke mɔɔ ɛ sa kɛha* ye wɔ Babelɔn maanzinli ne mɔ amuala anu, nee ahyɛlɛdeɛ mɔɔ menli ne nee ɛsɔfo ne mɔ kɛvi bɛ ahonle nu kɛva kɛmaa bɛ Nyamenle ne sua ne mɔɔ wɔ Gyɛlusalɛm la ɛhɔ.+
17 Na ɔwɔ kɛ ɛfa ezukoa ɛhye ɛtɔ nlankɛ nyinli,+ mboane nyinli,+ mboane mralɛ+ nee ninyɛne mɔɔ bɛbahyia nwolɛ bɛava bɛabɔ ma afɔle+ nee nza afɔle+ ne la ndɛndɛ, na ɛfa ɛkɔbɔ afɔle wɔ afɔlemokyea ne mɔɔ wɔ bɛ Nyamenle ne sua nu wɔ Gyɛlusalɛm la azo.
18 “Na debie biala mɔɔ le kpalɛ wɔ ɛ nee ɛ mediema mrenyia ne mɔ anye zo la, bɛva dwɛtɛ fufule nee nvutuke ne mɔɔ kɛha la bɛli nwolɛ gyima kɛ mɔɔ bɛ Nyamenle ne kulo la.
19 Na ahyɛnze mɔɔ bɛva bɛmaa wɔ kɛ bɛva bɛyɛ wɔ Nyamenle ne sua nu ɛzonlenlɛ gyima la amuala, fa kɔ wɔ Nyamenle ne anyunlu wɔ Gyɛlusalɛm.+
20 Yɛɛ ninyɛne gyɛne mɔɔ hyia mɔɔ ɔwɔ kɛ ɛfa ɛkɔ wɔ Nyamenle ne sua nu la, ɛbalie wɔavi belemgbunli ne gya nu.+
21 “Medame Belemgbunli Atazɛzɛse, meli mɛla memaa gyazoneavolɛma kɔsɔɔti mɔɔ wɔ maanzinli mɔɔ wɔ Azule Ne Anzi lɔ* la kɛ, debie biala mɔɔ ɛsɔfo Ɛzela,+ anwuma Nyamenle ne Mɛla kɛlɛhɛlɛvolɛ ne kɛbiza la, bɛva bɛmaa ye ndɛndɛ,
22 bɛmaa ye dodo ɛhɔdwu dwɛtɛ fufule talɛnte* 100, hwiiti ɛzuzudeɛ kɔɔ* 100, nwanye+ ɛzuzudeɛ baate* 100, nwole+ ɛzuzudeɛ baate 100 yɛɛ ngyenle+ dodo biala mɔɔ bɛhyia nwo la.
23 Debie biala mɔɔ anwuma Nyamenle ne kɛha la, bɛyɛ ye anyebolo zo bɛmaa anwuma Nyamenle ne sua ne,+ amaa ye ɛya amba belemgbunli ne belemgbunlililɛ ne nee ɔ mra mrenyia ne mɔ anwo zo.+
24 Eza yɛmaa bɛade kɛ ɔnle kɛ bɛmaa ɛsɔfo ne mɔ nee Livaema, edwɛndolɛma,+ nlenkɛ sinzavolɛma, ɛzonlenlɛsua ne anu sonvolɛma*+ nee Nyamenle sua ɛhye anwo gyimayɛvoma biala tua adwule,+ ninyɛne nwo adwule anzɛɛ adenle zo adwule biala.
25 “Na wɔmɔ Ɛzela, dua nrɛlɛbɛ mɔɔ wɔ Nyamenle ne ɛva ɛmaa wɔ* la azo ye edwɛkɛdivolɛma nee ndɛnebuavolɛma maa bɛbua menli mɔɔ wɔ maanzinli mɔɔ wɔ Azule Ne Anzi lɔ la, menli mɔɔ ze wɔ Nyamenle ne mɛla ne mɔ la kɔsɔɔti ndɛne; na kilehile awie biala mɔɔ ɛnze mɛla ne mɔ la.+
26 Na awie biala mɔɔ anli wɔ Nyamenle ne Mɛla nee belemgbunli ne mɛla zo la, ɔwɔ kɛ bɛbua ye ndɛne ndɛndɛ, saa ɔwɔ kɛ bɛku ye, bɛtu ye bɛfi maanle ne anu, bɛbɔ ye kakɛ anzɛɛ bɛto ye efiade bɔbɔ a.”
27 Ayɛlɛyelɛ ɛha Gyihova, yɛ nenyia mɔ Nyamenle ne mɔɔ vale wulale belemgbunli ne ahonle nu kɛ ɔziezie Gyihova sua ne mɔɔ wɔ Gyɛlusalɛm la!+
28 Yela ɛlɔlɛ kpundii ali yehile me wɔ belemgbunli ne+ nee ye folɛtuvoma+ yɛɛ belemgbunli ne mgbanyima katakyiema ne kɔsɔɔti anyunlu. Kɛmɔ ɛnee Gyihova, me Nyamenle ne asa wɔ me nwo zo la ati, menyianle akɛnrasesebɛ* na memboɔboale Yizilayɛ mgbanyima* ne mɔ anloa me nee bɛ hɔle.
Ɔbodwɛkɛ
^ Ɔ bo kile “Moalɛ.”
^ Anzɛɛ “Nɛtinɛmma.” Hibulu aneɛ nu, “bɛdabɛ mɔɔ bɛva bɛ bɛmaa.”
^ Anzɛɛ “ɛbɔ kpɔkɛ wɔ ye ahonle nu.”
^ Anzɛɛ “ɛhɛlɛlɛ.”
^ Bɛlimoale bɛhɛlɛle Ɛze 7:12 mɔɔ kɔ 7:26 la wɔ Elam aneɛ nu.
^ Elam aneɛ nu, “mɔɔ ɛlɛ ye ɛ sa nu.”
^ Elam aneɛ nu, “mɔɔ ɛkɛnwu.”
^ Anzɛɛ “Yufileti Ne Anzi lɔ.”
^ Anzɛɛ “Nɛtinɛmma.” Elam aneɛ nu, “bɛdabɛ mɔɔ bɛva bɛ bɛmaa.”
^ Elam aneɛ nu, “dua nrɛlɛbɛ mɔɔ wɔ Nyamenle ne ɛva ɛwula ɛ sa nu.”
^ Anzɛɛ “memianle me nwo.”
^ Hibulu aneɛ nu, “mbusua tile.”
