Ɛzela 9:1-15
9 Yɛwiele ɛhye mɔ yɛ ala la, mgbanyima ne mɔ rale me nwo ɛkɛ ne na bɛhanle kɛ: “Yizilayɛma nee ɛsɔfo ne mɔ yɛɛ Livaema ne ɛtɛtwenle bɛ nwo ɛtɛfile menli mɔɔ wɔ azɛlɛ ne azo la nee bɛ bɛkyi nyɛleɛ ne mɔ anwo,+ menli ɛhye mɔ a le Keenama, Hɛtema, Pilɛzema, Gyibɛsema, Amɔnoma, Mowabema, Yigyibitima+ nee Amɔlema.+
2 Bɛgya bɛ mra mraalɛ ne mɔ bie yɛɛ bɛgya bie bɛmaa bɛ mra mrenyia.+ Yemɔti yemaa menli nwuanzanwuanza ɛhye mɔ+ ɛfonla menli mɔɔ wɔ azɛlɛ ne azo la anu.+ Mgbanyima ne mɔ nee maanle boavolɛma ne a limoa wɔ mɛladonlɛ ɛhye anu a.”
3 Mɔɔ mendele edwɛkɛ ɛhye ala la, mensuosuanle me tɛladeɛ ne nee me aguzo ne anu na mendudule me ti nee me kɛsa enrinli ne bie; me nwo bubule me na mendɛnlanle aze.
4 Akee awie biala mɔɔ Yizilayɛ Nyamenle ne edwɛkɛ ne maanle ɛzulolɛ hanle ye la rabɔle yiale me ɔlua menli mɔɔ hɔle akɛlɛzonlenlɛ nu la mɛladonlɛ ne ati, wɔ mekɛ mɔɔ ɛnee me nwo ɛbubu me la, na mendɛnlanle aze too ɔhɔdwule nɔsolɛ ma afɔlebɔlɛ mekɛ ne.+
5 Mɔɔ nɔsolɛ ma afɔlebɔlɛ mekɛ ne dwule la,+ mendwazole menvile me anyiemgba ne anu, ɛnee mesuosua me tɛladeɛ ne nee me aguzo ne anu, na mengotole me gyakɛ abonyi zo na mendɛlɛle me sa nu mengilele Gyihova me Nyamenle ne.
6 Na menganle kɛ: “O me Nyamenle, ɔyɛ me anyiemgba nee nyiane kɛ mebamaa me nye zo meahile wɔ, O me Nyamenle, ɔluakɛ yɛ ɛtane ne mɔ ɛzo wɔ yɛ ti zo yɛɛ yɛ mɛladonlɛ ne mɔ ɛhɔdwu anwuma.+
7 Ɔvi yɛ nenyia mɔ mekɛ zo badwu ɛnɛ, yɛ mɛladonlɛ ɛyɛ kpole;+ na ɔlua yɛ ɛtane ne mɔ ati, bɛva yɛdayɛ, yɛ arelemgbunli nee yɛ ɛsɔfo ne mɔ bɛwula arelemgbunli mɔɔ wɔ azɛlɛ ne azo la asa anu, yɛwu dadeɛ nloa,+ bɛ nee yɛ kɔ akɛlɛzonlenlɛ nu,+ bɛfe yɛ nwo ninyɛne+ yɛɛ bɛbɔ yɛ anyiemgba kɛ mɔɔ ɔde ye ɛnɛ la.+
8 Noko kɛkala Gyihova yɛ Nyamenle ne ɛlo yɛ ekyii, yemaa yɛ nuhua bie mɔ ɛnyia yɛ ti na yemaa yɛ ɛleka kpalɛ* wɔ ye ɛleka nwuanzanwuanza+ ne amaa yɛ nye alie, O yɛ Nyamenle, na yealie yɛ ekyi yeavi yɛ akɛlɛzonlenlɛ nu.
9 Yɛle ngɛkɛlɛ ɛdeɛ,+ noko yɛ Nyamenle ne ɛtɛkpole yɛ wɔ yɛ akɛlɛzonlenlɛ nu; emomu yela ye ɛlɔlɛ kpundii ne ali yehile yɛ wɔ Pɛhyea arelemgbunli nyunlu,+ amaa yeamaa yɛ anwosesebɛ yeamaa yɛazi yɛ Nyamenle ne sua ne,+ yɛayɛ mɔɔ ɛzɛkye la boɛ na yɛanyia bane mɔɔ bɛva awolɛ bɛdo* la wɔ Dwuda nee Gyɛlusalɛm.
10 “Noko kɛkala, O yɛ Nyamenle, duzu a yɛbahola yɛaha wɔ ɛhye anzi a? Ɔluakɛ yɛgyakyi wɔ mɛla ne mɔ,
11 mɔɔ ɛluale wɔ azonvolɛ ngapezoma ne anwo zo ɛvale ɛmaanle yɛ kɛ: ‘Azɛlɛ ne mɔɔ bɛlɛkɔ bɛahɔva la anwo ɛgua evinli ɔluakɛ menli mɔɔ wɔ azɛlɛ ne azo la anwo ɛnde, ɔlua bɛ bɛkyi nyɛleɛ ne mɔ ati. Bɛva bɛ ɛbɛla mɔɔ nwolɛ ɛnde la bɛyi zolɛ ɔvi ɔ ti kɔdwu ɔ bo.+
12 Yemɔti bɛmmafa bɛ mra mraalɛ bɛmaa bɛ mra mrenyia agyalɛ yɛɛ bɛmmagya bɛ mra mraalɛ bɛmaa bɛ mra mrenyia;+ yɛɛ bɛmmayɛ debie biala mɔɔ bamaa menli zɔhane mɔ anyia anzodwolɛ na bɛali boɛ la,+ amaa bɛ nwo ayɛ se na bɛali ninyɛne mgbalɛ mɔɔ wɔ azɛlɛ ne azo la bie na bɛava azɛlɛ ne bɛamaa bɛ mra dahuu.’
13 Na mɔɔ yɛ nyɛleɛ ɛtane ne mɔ nee yɛ mɛladonlɛ kpole ne ɛmaa yera yɛ nwo zo la amuala anzi—wɔmɔ, O yɛ Nyamenle, ɛ nee yɛ anli kɛ mɔɔ yɛ ɛtane ne mɔ de la,+ na wɔmaa yɛdayɛ mɔɔ yɛwɔ ɛke la ɛnyia yɛ ti+—
14 asoo ɔwɔ kɛ yɛto wɔ mɛla ne mɔ bieko na yɛ nee menli mɔɔ yɛ bɛkyi ninyɛne ɛhye mɔ la yɛ agyalɛ ngyehyɛleɛ* ɔ?+ Asoo anrɛɛ ɛnrɛva yɛ nwo ɛya too ɛnrɛzɛkye yɛ bɔkɔɔ mɔɔ sonla ko bɔbɔ ɛnrɛha anzɛɛ ɛnrɛnyia ɔ ti ɔ?
15 O Gyihova, Yizilayɛ Nyamenle, ɛle tenlenenli,+ ɔluakɛ wɔmaa yɛdayɛ mɔɔ yɛha la ɛnyia yɛ ti too yeradwu ɛnɛ. Akee yɛra ɛ nyunlu wɔ yɛ fɔlɛlilɛ ne ati, ɔluakɛ edwɛkɛ ɛhye ati, yɛngola yɛngyinla ɛ nyunlu.”+
Ɔbodwɛkɛ
^ Hibulu aneɛ nu, “yɛ bo ɛsosɔ.”
^ Anzɛɛ “mɔɔ bɔ yɛ nwo bane.”
^ Anzɛɛ “ɛhye mɔ la gya yɛ nwo.”
