Edwɛkɛsisilɛ Mɔɔ Limoa 21:1-30
21 Akee Seetan* dwazole tiale Yizilayɛma na ɔpiepianle Devidi ɔmaanle ɔdianle Yizilayɛma.+
2 Ɔti Devidi zele Dwowabe+ nee maanle ne anu mgbanyima ne mɔ kɛ: “Bɛhɔdia Yizilayɛma bɛvi Biyɛ-hyiba too bɛhɔdwu Dan;+ na bɛraha bɛhile me amaa meanwu bɛ dodo.”
3 Noko Dwowabe hanle kɛ: “Gyihova ɛmaa ye menli ne ɛyɛ mɔnwo 100! Me menle belemgbunli, asoo bɛ muala bɛnle me menle sonvolɛma? Duzu ati a me menle kulo kɛ ɔyɛ ɛhye ɛ? Duzu ati a ɔwɔ kɛ ɛmaa Yizilayɛma di fɔlɛ a?”
4 Noko belemgbunli ne andie Dwowabe. Ɔti Dwowabe hɔkpɔsale Yizilayɛ amuala, na ɔwiele la ɔziale ɔrale Gyɛlusalɛm.+
5 Akee Dwowabe vale menli mɔɔ bɛdianle bɛ la dodo ne rɛlɛle Devidi. Ɛnee Yizilayɛma mrenyia mɔɔ kola fa konle dadeɛ ko la amuala dodo le 1,100,000 yɛɛ Dwuda mrenyia mɔɔ kola fa konle dadeɛ ko la dodo le 470,000.+
6 Noko bɛandia Livae nee Bɛngyaman mbusua ne mɔ bɛamboka nwo,+ ɔluakɛ Dwowabe anye anlie belemgbunli ne edwɛkɛ ne anwo.+
7 Na ɛhye anzɔ nɔhalɛ Nyamenle ne anye, ɔti ɔhwenle Yizilayɛma anzo.
8 Akee Devidi zele nɔhalɛ Nyamenle ne kɛ: “Meyɛ ɛtane+ kpole kɛ meyɛ ɛhye a. Ɔti mesɛlɛ wɔ, fa wɔ sonvolɛ ɛtane kyɛ ye,+ ɔluakɛ meli ngoaseasɛm kpole.”+
9 Akee Gyihova nee Gaade+ mɔɔ le Devidi ɛnyelɛzodeɛnwunlɛnli la dendɛle kɛ:
10 “Kɔha kile Devidi kɛ, ‘Edwɛkɛ mɔɔ Gyihova ɛha la ɛne: “Memaa wɔ ninyɛne nsa. Ye nuhua ko mɔɔ menva menyɛ wɔ la.”’”
11 Yemɔti Gaade rale Devidi ɛkɛ na ɔzele ye kɛ: “Mɔɔ Gyihova ɛha la ɛne, ‘Fa mɔɔ ɛkulo la
12 kɛ ɛhɔne ɛrɛla ɛvolɛ nsa,+ anzɛɛ siane nsa mɔɔ bɛ kpɔvolɛma bakpoa bɛ ahɔ na bɛava konle dadeɛ bɛavoa bɛ,+ anzɛɛ kenle nsa mɔɔ Gyihova bava konle dadeɛ ara bɛ nwo zo—ewulenzane bara azɛlɛ ne azo+—Gyihova anwumabɔvolɛ bava ɛzɛkyelɛ ara Yizilayɛ azɛlɛ ne amuala azo.’+ Akee suzu nwolɛ maa menwu kɛzi ɔwɔ kɛ mebua Ahenle mɔɔ zoanle me la.”
13 Yemɔti Devidi zele Gaade kɛ: “Ɔle ngyegyelɛ kpole ɔmaa me. Mesɛlɛ wɔ, maa mendɔ Gyihova asa anu, ɔluakɛ ye anwunvɔnezelɛ le kpole;+ na mmamaa metɔ sonla sa nu.”+
14 Akee Gyihova maanle ewulenzane+ dɔle Yizilayɛma anu, ɔti Yizilayɛma 70,000 wule.+
15 Eza nɔhalɛ Nyamenle ne zoanle anwumabɔvolɛ wɔ Gyɛlusalɛm kɛ ɔhɔzɛkye ye; noko mɔɔ ɔyɛle kɛ ɔbɔ ɔ bo ala la, Gyihova nwunle ye na ɔnlunle ɔ nwo* wɔ munzule ne anwo,+ na ɔzele anwumabɔvolɛ ne mɔɔ ɔfa ɛzɛkyelɛ ne yeara la kɛ: “Yeyɛ boɛ!+ Akee to ɛ sa aze.” Ɛnee Gyihova anwumabɔvolɛ ne gyi ɛleka mɔɔ bikye Gyibɛsenli Ɔnan ma ɛwosolɛ ɛleka ne+ la.
16 Mɔɔ Devidi maanle ɔ nye zo la, ɔnwunle Gyihova anwumabɔvolɛ ne kɛ ɔgyi azɛlɛ ye nee anwuma avinli* na yehwe ye dadeɛ ne ɔlɛ ye ɔ sa nu,+ na yeva yehile Gyɛlusalɛm anwo zo. Ɛkɛ ne ala Devidi nee mgbanyima ne mɔ mɔɔ bɛhedɛheda ɛrele+ la butubutule bɛ nyunlu aze.+
17 Devidi zele nɔhalɛ Nyamenle ne kɛ: “Asoo tɛ medame a menganle kɛ bɛdia menli ne a? Medame a meyɛ ɛtane a, yɛɛ medame a mevo a;+ na mboane ɛhye mɔ—duzu a bɛyɛ a? O Gyihova me Nyamenle, mesɛlɛ wɔ, maa ɛ sa ɛrɛla medame nee me papa sua nu amra anwo zo; emomu mmamaa ngyegyelɛ ɛhye ba wɔ menli ne anwo zo.”+
18 Akee Gyihova anwumabɔvolɛ ne zele Gaade+ kɛ ɔhɔha ɔhile Devidi kɛ ɔhɔzi afɔlemokyea ɔmaa Gyihova wɔ Gyibɛsenli Ɔnan ma ɛwosolɛ ɛleka ne.+
19 Ɔti Devidi hɔle, kɛ mɔɔ Gaade luale Gyihova duma nu hanle hilele ye la.
20 Mekɛ zɔhane ala anu, Ɔnan dole ɔ nye na ɔnwunle anwumabɔvolɛ ne, na ɔ mra nna ne mɔɔ ɛnee wɔ ɔ nwo ɛkɛ ne la hɔveale. Ɛnee Ɔnan ɛlɛkpogya hwiiti.
21 Mɔɔ Devidi hɔle ɔ nwo ɛkɛ ne la, Ɔnan maanle ɔ nye zo na ɔnwunle Devidi, na ɛkɛ ne ala ɔvile ma ɛwosolɛ ɛleka ne ɔhɔbɔle ɔ ti aze ɔmaanle Devidi na ɔbutule ɔ nyunlu aze.
22 Devidi zele Ɔnan kɛ: “Tɔne* ma ɛwosolɛ ɛleka ne maa me, amaa meazi afɔlemokyea wɔ zolɛ meamaa Gyihova. Ka ye bolɛ ne maa mendua ye kakɛ ne amuala amaa ewule ne mɔɔ ɛha menli ne la agyakyi.”+
23 Noko Ɔnan zele Devidi kɛ: “Wɔmɔ fa na maa me menle belemgbunli ɛyɛ mɔɔ ɔnea a ɔle kpalɛ la.* Nea, memaa wɔ nlankɛ mɔɔ bɛbava bɛabɔ ɛyelalɛ afɔle la nee ma ɛwosolɛ baka+ mɔɔ bɛbava bɛayɛ ɛyɛne yɛɛ hwiiti mɔɔ bɛbava bɛabɔ ma afɔle la. Mefa ɔ muala meamaa wɔ.”
24 Noko Belemgbunli Devidi zele Ɔnan kɛ: “Kyɛkyɛ, ɔwɔ kɛ metɔ metua ye kakɛ ne amuala, ɔluakɛ menrɛva debie mɔɔ le wɔ ɛdeɛ la menrɛmaa Gyihova anzɛɛ menrɛbɔ ɛyelalɛ afɔle mɔɔ mendua nwolɛ ɛhwee a.”+
25 Yemɔti Devidi zuzule nvutuke hyikɛle* 600 maanle Ɔnan na ɔliele azɛlɛ ne.
26 Na Devidi zile afɔlemokyea+ wɔ ɛkɛ ne maanle Gyihova na ɔbɔle ɛyelalɛ afɔle nee anzodwolɛ afɔle wɔ zolɛ, na ɔvɛlɛle Gyihova, na ɔbuale ye na ɔmaanle senle+ vile anwuma rayelale afɔlebɔdeɛ ne wɔ afɔlemokyea ne azo.
27 Akee Gyihova zele anwumabɔvolɛ ne kɛ+ ɔva ye konle dadeɛ ne ɔwula ye boa ne anu.
28 Mekɛ zɔhane mɔɔ Devidi nwunle kɛ Gyihova ɛbua ye wɔ Gyibɛsenli Ɔnan ma ɛwosolɛ ɛleka ne la, ɔhɔle zo ɔbɔle afɔle wɔ ɛkɛ.
29 Noko, zɔhane mekɛ ne ɛnee Gyihova ɛdanlɛsua ne mɔɔ Mosisi zile ye wɔ fienemgbole ne anu la nee ɛyelalɛ afɔlemokyea ne wɔ ɛzonlenlɛ ɛleka* ne mɔɔ wɔ Gebɛyɔn la.+
30 Noko Devidi angola angɔ ɛkɛ angɔmbiza Nyamenle debie, ɔluakɛ ɛnee Gyihova anwumabɔvolɛ ne konle dadeɛ ne ɛmaa ɛzulolɛ ɛha ye.
Ɔbodwɛkɛ
^ Anzɛɛ ɔkola ɔkile, “dwazotiavolɛ.”
^ Anzɛɛ “ɔlile nyane.”
^ Anzɛɛ “anwomanyunlu.”
^ Hibulu aneɛ nu, “Fa.”
^ Hibulu aneɛ nu, “mɔɔ le kpalɛ wɔ ɔ nye zo la.”
^ Hibulu aneɛ nu, “ɛleka mɔɔ wɔ anwuma.”
