Mɔɔ Limoa Kɔmaa Kɔlentema 4:1-21
4 Ɔwɔ kɛ menli bu yɛ kɛ yɛle Kelaese sonvolɛma nee Nyamenle fealeranu edwɛkɛ nwuanzanwuanza ne azo neavolɛma.*+
2 Wɔ ɛhye anu, mɔɔ bɛkpondɛ bɛavi awuke zo neavolɛma ɛkɛ la a le kɛ bɛkɛnwu kɛ bɛdi nɔhalɛ.
3 Na mame ɔngyia me kɛ bɛdabɛ anzɛɛ awie biala* kɛbua me ndɛne. Nɔhalɛ nu, medame bɔbɔ membua me nwo ndɛne.
4 Ɔluakɛ menze debie biala mɔɔ tia me a. Noko ɛhye ɛngile kɛ medi benle; mɔɔ bua me ndɛne la a le Gyihova.*+
5 Ɛhye ati, bɛmmabua debie biala anwo ndɛne+ kolaa na mekɛ ne adwu, kɔkpula kɛ Awulae kɛra. Ɔbaye fealeranu debie biala mɔɔ wɔ awozinli nu la yeavinde wienyi nu na yeamaa ahonle nu nzuzulɛ muala ala ali, na akee awie biala banyia ye nganvolɛ avi Nyamenle ɛkɛ.+
6 Mediema, meva me nwo nee Apɔlɔso+ meyɛ neazo memaa bɛ amaa bɛalua yɛ nwo zo bɛazukoa ngyinlazo ɛhye: “Bɛmmayɛ debie bɛmaa ɔtɛla mɔɔ bɛhɛlɛ la,” amaa bɛammemaa bɛ nwo zo+ bɛambu awie kɛ ɔle kpalɛ ɔtɛla ɔ gɔnwo.
7 Na nwane a maa ɛyɛ ngakyile ɛfi ɛ gɔnwo anwo a? Nɔhalɛ nu, duzu a ɛlɛ ye mɔɔ wɔannyia ye a?+ Na saa ɛnyianle ye amgba a, ɛnee duzu ati a ɛmemaa ɛ nwo zo kɛ asɛɛ wɔannyia ye ɛ?
8 Bɛ ko ɛyi ɛwie ɔ? Bɛnyia bɛ nwo bɛwie ɔ? Bɛbɔ ɔ bo bɛyɛ arelemgbunli+ bɛgyakyi yɛ ɔ? Me kunlu a anrɛɛ bɛbɔ ɔ bo bɛlɛdi arelemgbunli amgba, amaa yɛdayɛ noko yɛahola yɛ nee bɛ ali arelemgbunli.+
9 Na ɔyɛ me kɛ Nyamenle ɛmaa yɛdayɛ ɛzoanvolɛma ne yɛha bɛ nzi, na yeva yɛ yezie bama zo kɛ menli mɔɔ bɛbua bɛ ewule fɔlɛ la,+ ɔluakɛ bɛlɛfa yɛ bɛahile ewiade ne,+ anwumabɔvolɛma yɛɛ menli.
10 Kelaese ati yɛle ahoasea,+ na bɛmɛ, bɛle nrɛlɛbɛvolɛma wɔ Kelaese anu; yɛle bɛtɛɛ, na bɛmɛ bɛ nwo yɛ se; bɛdi bɛ eni, na yɛmɛ bɛnli yɛ eni.
11 Ɛnɛ nee ɛnɛ ala ɛhɔne nee nzuhɔne tɛku yɛ,+ yɛnlɛ adɛladeɛ dɔɔnwo,* bɛbo yɛ+ yɛɛ yɛnlɛ dabelɛ
12 na yɛfɛ, yɛfa yɛ sa yɛyɛ gyima ɛsesebɛ.+ Saa bɛbɔ yɛ aholoba a, yɛyila bɛ;+ bɛyɛ yɛ kpɔdekpɔde a, yɛsi abotane yɛgyinla nu;+
13 saa bɛsɛkye yɛ duma a, yɛbua bɛ bɛtɛɛ nu;*+ yɛyɛ kɛ ewiade fovolɛ* la, yɛyɛ ewula wɔ debie biala anu too badwu ɛnɛ.
14 Mengɛlɛ ɛhye kɛ mefa meagua bɛ nyunlu aze, emomu mefa meadu bɛ folɛ kɛ bɛle me mra alɔvolɛ.
15 Nɔhalɛ nu, saa bɛlɛ kilehilevolɛma* 10,000 wɔ Kelaese anu bɔbɔ a, bɛnlɛ selɛma dɔɔnwo; ɔluakɛ melua edwɛkpa ne azo merayɛ bɛ ze+ wɔ Kelaese Gyisɛse anu.
16 Ɛhye ati, metu bɛ folɛ* kɛ bɛzukoa me.+
17 Ɛhye ati a melɛsoa Timote wɔ bɛ nwo lɔ a, ɔluakɛ ɔle me ra kulovolɛ mɔɔ di nɔhalɛ wɔ Awulae anu a. Ɔbahakyehakye bɛ ndenle mɔɔ melua zo wɔ Kelaese Gyisɛse anu,+ kɛ mɔɔ melɛkilehile wɔ ɛleka biala wɔ asafo ne mɔ anu la.
18 Bɛ nuhua bie mɔ suzu kɛ menrɛra bɛ nwo lɔ, yemɔti bɛlɛmemaa bɛ nwo zo.
19 Noko saa ɔyɛ Gyihova* ɛhulolɛ a, ɔnrɛhyɛ mebara bɛ nwo lɔ, na meanwu bɛdabɛ mɔɔ bɛlɛmemaa bɛ nwo zo la tumi ne, na tɛ mɔɔ bɛlɛkeha la angome.
20 Ɔluakɛ Nyamenle Belemgbunlililɛ ne ɛngyi ɛdendɛlɛ zo, emomu ɔgyi tumi zo.
21 Boni a bɛkulo a? Menva baka membɛla bɛ nwo lɔ+ anzɛɛ menva ɛlɔlɛ nee bɛtɛɛyɛlɛ sunsum membɛla?
Ɔbodwɛkɛ
^ Anzɛɛ “awuke zo neavolɛma.”
^ Anzɛɛ “kɔɔto.”
^ Giliki aneɛ nu, “yɛ nwo la zo.”
^ Giliki aneɛ nu, “yɛsɛlɛ bɛ.”
^ Anzɛɛ “bɔla.”
^ Anzɛɛ “adekilevolɛma.”
^ Anzɛɛ “mesɛlɛ bɛ.”
