Mɔɔ Limoa Kɔmaa Kɔlentema 9:1-27
9 Menlɛ me nwo ɔ? Menle ɛzoanvolɛ ɔ? Metɛnwunle yɛ Awulae Gyisɛse ɔ?+ Bɛnle me sa anloa gyima wɔ Awulae anu ɔ?
2 Saa bɔbɔ menle ɛzoanvolɛ memmaa awie mɔ a, nɔhalɛ nu, mele memaa bɛ! Ɔluakɛ bɛmɛ a bɛle daselɛ* mɔɔ kile kɛ mele ɛzoanvolɛ wɔ Awulae anu a.
3 Mɔɔ meka meahile bɛdabɛ mɔɔ bɛbua me ndɛne la a le ɛhye:
4 Yɛlɛ adenle* yɛdi na yɛno, ɔnle zɔ ɔ?
5 Yɛlɛ adenle kɛ yɛ nee yelɛ mɔɔ le diedinli la balua,*+ kɛ mɔɔ ɛzoanvolɛma mɔɔ ɛha nee Awulae amediema ne mɔ+ yɛɛ Sifase*+ yɛ ye la, ɔnle zɔ ɔ?
6 Anzɛɛ me nee Baanabase+ angome a yɛnlɛ adenle yɛngyakyi nwonane afoa nu gyima mɔɔ yɛyɛ yɛnea yɛ nwo la ɔ?
7 Sogyanli boni a yɛ gyima na ɔtua ɔ nwo kakɛ a? Nwane a yɛ vanye egyinli na ɔnli nuhua ma ne bie a?+ Anzɛɛ nwane a nea mboane na ɔnno bɛ nyɛfonzule ne bie a?
8 Asoo sonla adwenle a melɛfa meaha ɛhye a? Anzɛɛ asoo tɛ mɔɔ Mɛla ne noko ka la ɛne?
9 Ɔluakɛ bɛhɛlɛ ye wɔ Mosisi Mɛla ne anu kɛ: “Mmakyekye ɛnlankɛ nyinli mɔɔ ɛlɛwoso ma la anloa.”+ Asoo nlankɛ nyinli a Nyamenle dwenle bɛ nwo a?
10 Anzɛɛ yɛdayɛ ti a ɔhanle a? Nɔhalɛ nu, yɛdayɛ ti a bɛhɛlɛle a, ɔluakɛ ɔwɔ kɛ sonla mɔɔ dua nee sonla mɔɔ woso la nyia anyelazo kɛ bɛbanyia bɛ afoa nu ɛdeɛ.
11 Saa yɛlua sunsum nu ninyɛne wɔ bɛ nu a, asoo ɔle nvonleɛ kɛ yɛbanyia nwonane afoa nu moalɛ yɛavi bɛ ɛkɛ ɔ?+
12 Saa awie mɔ gyɛne lɛ adenle die debie fi bɛ ɛkɛ a, asoo yɛmɛ yɛnlɛ adenle yɛndɛla bɛ ɔ? Noko yɛtɛfale tumi ɛhye yɛtɛyɛle gyima,+ emomu yɛgyinla ninyɛne kɔsɔɔti anloa amaa yɛanzi Kelaese anwo edwɛkpa ne adenle wɔ debie biala anu.+
13 Asoo bɛnze kɛ menli mɔɔ yɛ gyima nwuanzanwuanza la di ɛzonlenlɛsua ne anu ninyɛne ne bie, yɛɛ bɛdabɛ mɔɔ bɛyɛ gyima wɔ afɔlemokyea ne azo dahuu la nyia bɛ kyɛfoa fi afɔlemokyea ne azo ɔ?+
14 Zɔhane ala noko a Awulae hanle kɛ bɛdabɛ mɔɔ bɛka edwɛkpa ne la ɔwɔ kɛ dua edwɛkpa ne azo nea bɛ nwo a.+
15 Noko metɛfale nziezielɛ ɛhye mɔ anu ko bɔbɔ metɛdile gyima.+ Nɔhalɛ nu, meangɛlɛ ɛhye kɛ bɛyɛ ninyɛne ɛhye mɔ bɛmaa me, ɔluakɛ ɔle kpalɛ kɛ mekɛwu tɛla kɛ awie kɛmaa mɔɔ megyinla zo metu me nwo la kɛyɛ mgbane!+
16 Na saa melɛka edwɛkpa ne a ɔnle kɛ mefa metu me nwo, ɔluakɛ ɔle me gyima. Nɔhalɛ nu, saa menga edwɛkpa ne a, anrɛɛ me gyakɔ!+
17 Saa mefi me ɛhulolɛ nu meyɛ ɛhye a, melɛ ahatualɛ; noko saa meanvi me ɛhulolɛ nu meanyɛ bɔbɔ a, ɔle gyima mɔɔ bɛva bɛwula me sa nu a.+
18 Ɛnee duzu ahatualɛ a mebanyia a? Me ahatualɛ a le kɛ mebaha edwɛkpa ne mɔɔ menlie ɛhwee a, amaa meanzɛkye adenle* mɔɔ melɛ ye meka edwɛkpa ne la.
19 Menle awie biala akɛlɛ ɛdeɛ, noko meyɛ me nwo akɛlɛ memaa menli kɔsɔɔti, amaa meanyia menli dɔɔnwo.
20 Menyɛle me nwo kɛ Dwuunli memaanle Dwuuma amaa meanyia Dwuuma;+ menyɛle me nwo kɛ mewɔ mɛla bo memaanle bɛdabɛ mɔɔ bɛwɔ mɛla bo la wɔ mekɛ mɔɔ medame mumua ne menle mɛla bo la, amaa meanyia bɛdabɛ mɔɔ bɛwɔ mɛla bo la.+
21 Menyɛle me nwo kɛ menle mɛla bo memaanle bɛdabɛ mɔɔ bɛnle mɛla bo la, ɔnva nwo kɛ medi Nyamenle mɛla zo na mewɔ Kelaese mɛla bo la,+ amaa meanyia bɛdabɛ mɔɔ bɛnle mɛla bo la.
22 Menyɛle me nwo kɛ mele bɛtɛɛ memaanle bɛdabɛ mɔɔ bɛle bɛtɛɛ la amaa meanyia bɛdabɛ mɔɔ bɛle bɛtɛɛ la.+ Meyɛ me nwo debie biala memaa menli ngakyile kɔsɔɔti, amaa mealua adenle biala azo mealie bie mɔ ngoane.
23 Noko edwɛkpa ne ati a meyɛ ninyɛne kɔsɔɔti a, amaa meabɔ ye nolo meahile awie mɔ.+
24 Asoo bɛnze kɛ bɛdabɛ mɔɔ bɛsu ɛnriandilɛ la kɔsɔɔti a nriandi a, noko bɛ nuhua ko ala a nyia ahatualɛ ne ɔ? Bɛnriandi zɔhane ala, amaa bɛanyia ahatualɛ ne.+
25 Na awie biala mɔɔ kazu ɛnriandilɛ* la komo ɔ nwo zo wɔ ninyɛne kɔsɔɔti anu. Nɔhalɛ nu, bɛyɛ ye zɔhane amaa bɛanyia abotile mɔɔ sɛkye la,+ noko yɛmɛ yɛbanyia abotile mɔɔ ɛnzɛkye ɛlɛ la.+
26 Ɛhye ati, kɛmɔ me ɛnriandilɛ ne gyi kpɔkɛ zo la ati, dahuu menriandi fɔɔnwo;+ mele kɛ sonla mɔɔ ko la na mentoto me sa kɛ melɛbolo anwoma la;
27 emomu mekile me nwonane ne nyane*+ na meyɛ ye kɛ akɛlɛ, amaa meka edwɛkɛ ne mekile awie mɔ a, mame meandɔ sinli* wɔ adenle bie anu.
Ɔbodwɛkɛ
^ Anzɛɛ “nzonlɛyɛlɛ.”
^ Giliki aneɛ nu, “tumi.”
^ Anzɛɛ “yɛbava adiema raalɛ bie yɛayɛ yɛ ye na yɛ nee ye alua.”
^ Eza bɛfɛlɛ ye Pita.
^ Anzɛɛ “tumi.”
^ Anzɛɛ “nwɔhoalilɛ biala.”
^ Anzɛɛ “metwe ɔ nzo; metete ye kpalɛ.”
^ Anzɛɛ “meamfɛta.”
