Samoɛle Mɔɔ Limoa 24:1-22
24 Mɔɔ Sɔɔlo hɔle Filisitiama ɛvoanlɛ na ɔziale ɔrale ala la, bɛhanle bɛhilele ye kɛ: “Nea! Devidi wɔ Ɛn-gidae fienemgbole nu lɔ.”+
2 Ɔti Sɔɔlo vale mrenyia 3,000 mɔɔ bɛkpa bɛ bɛvi Yizilayɛma kɔsɔɔti anu la na ɔhɔle kɛ ɔkakpondɛ Devidi nee ye menli ne wɔ boka zo mbɔnkye awolɛ ne mɔ azo.
3 Sɔɔlo hɔdwule awolɛ mboane tunli ne mɔ mɔɔ wɔ adenle ne anloa la anwo, ɛleka mɔɔ ɛnee bolɛ bɔne bie wɔ la na ɔwolole nu kɛ ɔkazɔho ɔ gyakɛ,* ɛnee Devidi nee ye menli ne dede bolɛ bɔne ne akunlu lɔ.+
4 Devidi menli ne zele ye kɛ: “Ɛnɛ kenle ye, Gyihova ɛlɛka ahile wɔ kɛ, ‘Nea! Melɛfa wɔ kpɔvolɛ meawula ɛ sa nu,+ na ɛbahola wɔayɛ ye debie biala mɔɔ ɛnea a ɔle kpalɛ ɔmaa wɔ la.’” Ɔti Devidi dwazole na ɔyɛle ye bɛtɛɛ ɔhɔpɛle Sɔɔlo tɛladeɛ tendenle ne mɔɔ ɛnlɛ ɔ sa la anloa.
5 Ɛhye anzi, Devidi adwenle buale ye fɔlɛ*+ kɛ yepɛ Sɔɔlo tɛladeɛ tendenle ne mɔɔ ɛnlɛ ɔ sa la anloa la.
6 Ɔzele ye menli ne kɛ: “Ɔnrɛzi ɛlɛ wɔ Gyihova anye zo kɛ mekɛyɛ me menle mɔɔ Gyihova ɛkpokpa ye la debie zɛhae, na mekɛva me sa mekɛha ye ɔluakɛ ɔle awie mɔɔ Gyihova ɛkpokpa ye.”+
7 Yemɔti Devidi hanle edwɛkɛ ɛhye ɔvale ɔzile ye menli ne adenle* na yeammaa bɛanva bɛ sa bɛanga Sɔɔlo. Sɔɔlo ɛdeɛ, ɔdwazole ɔvile bolɛ bɔne ne anu na ɔhɔle ye ɛleka bie.
8 Akee Devidi dwazole na ɔvi bolɛ bɔne ne anu ɔvindele na ɔdeanle nu ɔvɛlɛle Sɔɔlo kɛ: “Me menle belemgbunli!”+ Mɔɔ Sɔɔlo dole ɔ nye ɔ nzi la, Devidi hotole na ɔbutule ɔ nyunlu aze.
9 Devidi zele Sɔɔlo kɛ: “Duzu ati a ɛtie menli mɔɔ keha kɛ ‘Nea! Devidi ɛlɛkpondɛ wɔ ayɛ wɔ ɛtane’ la ɛ?+
10 Ɛnɛ kenle ye, ɛdawɔ mumua ne wɔva ɛ nye wɔnwu kɛzi Gyihova vale wɔ wulale me sa nu wɔ bolɛ bɔne ne anu la. Noko mekɛ mɔɔ awie hanle kɛ mengu wɔ la,+ menzele wɔ anwunvɔne na menganle kɛ, ‘Menrɛva me sa menrɛha me menle, ɔluakɛ ɔle awie mɔɔ Gyihova ɛkpokpa ye.’+
11 Na nea, me papa, nea wɔ tɛladeɛ tendenle ne mɔɔ ɛnlɛ ɔ sa la anloa ne mɔɔ melɛ ye me sa nu la; mekɛ mɔɔ mempɛle wɔ tɛladeɛ ne anloa la, meangu wɔ. Ɛbahola wɔanwu ye na wɔade ɔ bo kɛ metɛnyianle adwenle kɛ meyɛ wɔ ɛtane anzɛɛ mete atua yɛɛ metɛyɛle ɛtane metɛtiale wɔ,+ noko ɛdoa me kɛ ɛkpondɛ me wɔahu me.*+
12 Gyihova ɛbua me nee wɔ avinli ndɛne,+ na Gyihova ɛli wɔ nzenralɛ ɛmaa me,+ na mame, menrɛva me sa menrɛha wɔ.+
13 Kɛ mɔɔ tete ɛrɛlɛ ne ka la, ‘Amumuyɛma a bɛyɛ bɛ amumuyɛ a,’ noko menrɛva me sa menrɛha wɔ ɛlɛ.
14 Nwane a Yizilayɛ belemgbunli ne doa ye a? Nwane a ɛlɛfoa ye a? Twea funli ɛhye? Ɛzozoa ɛhye?+
15 Gyihova ɛyɛ yɛ ndɛnebuavolɛ na ɔbua me nee wɔ avinli ndɛne, ɔbanwu ye na yeali me edwɛkɛ yeamaa me+ na yeabua me ndɛne na yealie me yeavi ɛ sa nu.”
16 Mɔɔ Devidi hanle edwɛkɛ ɛhye mɔ amuala hilele Sɔɔlo wiele la, Sɔɔlo hanle kɛ: “Me ra Devidi, ɛ ne a mete la ɔ?”+ Na Sɔɔlo zunle kpole kpalɛ.
17 Ɔzele Devidi kɛ: “Ɛle tenlenenli ɛtɛla me, ɔluakɛ ɛ nee me ɛli ye boɛ, na mame meva ɛtane medua wɔ kakɛ.+
18 Ɛnɛ, wɔha kpalɛ mɔɔ ɛyɛle ɛmaanle me kɛ wɔangu me wɔ mekɛ mɔɔ Gyihova yele me wulale ɛ sa nu la wɔhile me.+
19 Ɔluakɛ, nwane a kɛnwu ye kpɔvolɛ na ɔkagyakyi ye ɔkɛmaa ɔkɛhɔ mgbane a? Gyihova bava kpalɛ adua wɔ kakɛ+ ɔlua mɔɔ wɔyɛ wɔmaa me ɛnɛ la ati.
20 Noko kɛkala nea! Meze kɛ amgba ɛbayɛ belemgbunli,+ na Yizilayɛ belemgbunlililɛ ne bagyinla wɔ ɛ sa nu.
21 Akee fa Gyihova ka ndane kile me+ kɛ ɛnrɛbɔ me bo zo amra* abo zo yɛɛ ɛnrɛkyikyi me duma ɛnrɛvi me papa sua nu.”+
22 Yemɔti Devidi hanle ndane hilele Sɔɔlo, na Sɔɔlo hɔle sua nu.+ Noko Devidi nee ye menli ne hɔle ɛvealeka ne.+
Ɔbodwɛkɛ
^ Hibulu aneɛ nu, “ɔkaheda ɔ gyakɛ anwo.”
^ Hibulu aneɛ nu, “ye ahonle bole ye.”
^ Anzɛɛ ɔkola ɔkile, “ɔbɔle ye menli ne asande.”
^ Anzɛɛ “ɛkpondɛ me ɛkɛla.”
^ Hibulu aneɛ nu, “me ma.”
