Samoɛle Mɔɔ Limoa 3:1-21
-
Bɛvɛlɛ Samoɛle kɛ ɔrayɛ ngapezonli (1-21)
3 Mekɛ zɔhane, ɛnee kakula Samoɛle ɛlɛsonle+ Gyihova wɔ Yilae anyunlu noko ɛnee edwɛkɛ ɛnda ɛnvi Gyihova ɛkɛ ne ɛmba; ɛnee ɛnyelɛzodeɛnwunlɛ+ anzo biala.
2 Kenle ko bie ɛnee Yilae la ɛleka mɔɔ ɔta ɔda la; ɛnee ɔ nye ɛyɛ monzomonzo yɛɛ ɔnnwu debie kpalɛ.+
3 Ɛnee bɛtɛnuanle Nyamenle kɛnlaneɛ ne,+ yɛɛ ɛnee Samoɛle la Gyihova ɛzonlenlɛsua ne*+ ɛleka mɔɔ Nyamenle Ɛlɛka ne gyi la.
4 Na Gyihova vɛlɛle Samoɛle. Ɔliele zolɛ kɛ: “Mewɔ ɛke.”
5 Ɔnriandile ɔhɔle Yilae ɛkɛ na ɔhanle kɛ: “Medame ɛne, ɛvɛlɛle me.” Noko ɔhanle kɛ: “Metɛfɛlɛle wɔ. Sia kɔla.” Ɔti ɔziale ɔhɔlale.
6 Gyihova vɛlɛle ye bieko kɛ: “Samoɛle!” Na Samoɛle dwazole na ɔhɔle Yilae anwo ɛkɛ na ɔhanle kɛ: “Medame ɛne, ɛvɛlɛle me.” Noko ɔhanle kɛ: “Me ra, metɛfɛlɛle wɔ. Sia kɔla.”
7 (Ɛnee Samoɛle ɛtɛnwunle Gyihova kpalɛ, yɛɛ ɛnee bɛtɛyele Gyihova edwɛkɛ ne bɛtɛkilele ye.)+
8 Ɔti Gyihova vɛlɛle ye fane nsa ne azo kɛ: “Samoɛle!” Na ɔdwazole ɔhɔle Yilae anwo ɛkɛ na ɔhanle kɛ: “Medame ɛne, ɛvɛlɛle me.”
Akee Yilae nwunle kɛ Gyihova a ɛlɛfɛlɛ kakula ne a.
9 Yemɔti Yilae zele Samoɛle kɛ: “Kɔ kɔla, saa ɔfɛlɛ wɔ a, ka kɛ, ‘Gyihova tendɛ na wɔ sonvolɛ ɛlɛtie.’” Na Samoɛle ziale hɔlale ɔ bo zo ne.
10 Gyihova ragyinlanle ɛkɛ na ɔvɛlɛle ye kɛ alimoa ne la kɛ: “Samoɛle, Samoɛle!” Na Samoɛle hanle kɛ: “Tendɛ na wɔ sonvolɛ ɛlɛtie.”
11 Gyihova zele Samoɛle kɛ: “Nea! Melɛyɛ debie wɔ Yizilayɛ, na ɔbalielie awie biala mɔɔ kɛde la anzo nwiɔ ne anu.+
12 Kenle zɔhane, mebamaa debie biala mɔɔ meha wɔ Yilae nee ye abusua ne anwo la ara nu, ɔvi mɔlebɛbo kɔdwu awieleɛ.+
13 Ka kile ye kɛ melɛbua ye abusua ne ndɛne dahuu wɔ ɛtane ne mɔɔ yede la anwo,+ ɔluakɛ ɔ mra ne mɔ ɛlɛtendɛ atia Nyamenle,+ noko ɔtɛteanle bɛ.+
14 Ɛhye ati a meha ndane mehile Yilae abusua ne kɛ, bɛnrɛhola bɛnrɛva afɔlebɔlɛ anzɛɛ afɔlebɔdeɛ bɛnrɛkpɔda Yilae abusua ne ɛtane ne ɛlɛ la.”+
15 Samoɛle lale too nwonlomɔ; akee ɔbukebukele Gyihova sua ne nlenkɛ ne mɔ. Ɛnee Samoɛle sulo kɛ ɔbaha ɛnyelɛzodeɛnwunlɛ ne yeahile Yilae.
16 Noko Yilae vɛlɛle Samoɛle kɛ: “Me ra Samoɛle!” Na ɔhanle kɛ: “Mewɔ ɛke.”
17 Ɔbizale ye kɛ: “Duzu edwɛkɛ a ɔhanle ɔhilele wɔ a? Mesɛlɛ wɔ mmafa ɛfea me. Saa ɛfa edwɛkɛ mɔɔ ɔhanle ɔhilele wɔ la anu ko bɔbɔ ɛfea me a, Nyamenle ɛdua wɔ kakɛ na ɔgua wɔ bie zo.”
18 Yemɔti Samoɛle hanle debie biala hilele ye na yeanva bie yeanvea ye. Yilae buale kɛ: “Gyihova ɔ. Maa ɔyɛ mɔɔ le kpalɛ wɔ ɔ nye zo la.”
19 Samoɛle hɔle zo nyinle na ɛnee Gyihova nee ye lua,+ na ye edwɛkɛ ko bɔbɔ ɛnle ɛkɛ mɔɔ Nyamenle ammaa yeamba nu a.*
20 Ɔti Yizilayɛma kɔsɔɔti, ɔvi Dan kɔdwu Biyɛ-hyiba nwunle kɛ bɛlie Samoɛle bɛdo nu kɛ Gyihova ngapezonli.
21 Na Gyihova hɔle zo yele ɔ nwo hilele wɔ Hyaelo, ɔluakɛ Gyihova luale Gyihova edwɛkɛ zo lale ɔ nwo ali hilele Samoɛle wɔ Hyaelo.+
