Samoɛle Mɔɔ Limoa 6:1-21
-
Filisitiama ɛva Ɛlɛka ne ɛzia ɛra Yizilayɛ (1-21)
6 Gyihova Ɛlɛka ne+ lile siane nsuu wɔ Filisitiama azɛlɛ zo.
2 Filisitiama vɛlɛle ɛsɔfoma nee menli mɔɔ ka kenle bie edwɛkɛ la+ na bɛbizale bɛ kɛ: “Kɛ yɛyɛ Gyihova Ɛlɛka ne ɛ? Bɛmaa yɛnwu kɛzi ɔwɔ kɛ yɛfa yɛsia yɛkɔ ɔ bo zo ne la.”
3 Bɛbuale kɛ: “Saa bɛfa Gyihova, Yizilayɛ Nyamenle ne ngyekyeleɛ ɛlɛka ne bɛahɔ a, bɛmmafa bɛkɔ mɔɔ afɔlebɔdeɛ ɛmboka nwo a. Kɛ ɔde ye biala la, ɔwɔ kɛ bɛfa fɔlɛlilɛ afɔlebɔdeɛ+ bɛboka nwo bɛsia bɛkɔ. Saa bɛyɛ ɛhye a yɛɛ bɛbade kpɔkɛ a, na ɔbamaa bɛanwu deɛmɔti ɔtɛyele ɔ sa ɔtɛfile bɛ nwo zo la.”
4 Ɔti bɛbizale kɛ: “Fɔlɛlilɛ afɔlebɔdeɛ boni a yɛva yɛhɔmaa ye a?” Bɛhanle kɛ: “Bɛnlea Filisitia arelemgbunli ne mɔ+ dodo ne anwo bɛyɛ nvutuke ekoko* nnu yɛɛ nvutuke ahila nnu bɛva bɛhɔ, ɔluakɛ ewulenzane ko ne ala a ɛha bɛdabɛ nee bɛ arelemgbunli ne mɔ a.
5 Bɛyɛ bɛ ekoko ne ɛsaso nee bɛ ahila ne mɔ+ mɔɔ ɛlɛsɛkye bɛ azɛlɛ ne la ɛsaso na bɛli Yizilayɛ Nyamenle ne eni. Bie a ɔbamaa ɔ sa ɛlomboɛ ne mɔɔ yera bɛdabɛ nee bɛ nyamenle ne yɛɛ bɛ azɛlɛ ne azo la azo ade.+
6 Duzu ati a ɔwɔ kɛ bɛmaa bɛ ahonle yɛ se kɛ mɔɔ Yigyibiti nee Falo maanle bɛ ahonle yɛle se la ɛ?+ Mekɛ mɔɔ Nyamenle duale bɛ kakɛ la,+ akee bɛgyakyile Yizilayɛma na bɛmaanle bɛhɔle.+
7 Akee bɛyɛ ehwili fofolɛ na bɛva nlankɛ mbelɛ nwiɔ mɔɔ bɛlɛ mralɛ na bɛtɛfale gyɛnvayile bɛtɛtole bɛ kɔme zo ɛlɛ la. Bɛva ehwili ne bɛhenda nlankɛ ne mɔ na bɛye bɛ mra ne mɔ bɛvi bɛ nwo bɛva bɛhɔ sua nu.
8 Bɛva Gyihova Ɛlɛka ne bɛzie ehwili ne azo na bɛva nvutuke ninyɛne ne mɔ mɔɔ bɛfa bɛahɔmaa ye kɛ fɔlɛlilɛ afɔlebɔdeɛ la bɛgua ɛlɛka nu bɛzie nwolɛ.+ Akee bɛgyakyi ye bɛmaa ɔhɔ
9 na bɛnlea: Saa ɔdua adenle ne azo ɔkɔ Bɛte-hyimɛhye,+ ɔkɔ ye sua zo a, ɛnee ɔdaye a ɔle ahenle mɔɔ maanle munzule kpole ɛhye dole yɛ a. Noko saa yeamba ye zɔ a, yɛbanwu kɛ tɛ ɔdaye a ɔvale ɔ sa ɔhanle yɛ a; esiane ala a dole yɛ a.”
10 Menli ne yɛle ye zɔ pɛpɛɛpɛ. Bɛvale nlankɛ mbelɛ nwiɔ mɔɔ lɛ mralɛ la na bɛvale ehwili ne bɛhendanle bɛ, na bɛvale bɛ mra ne mɔ bɛguale tunli nu wɔ sua nu.
11 Akee bɛvale Gyihova Ɛlɛka ne nee ɛlɛka ne mɔɔ nvutuke ahila ne mɔ nee bɛ ekoko ɛsaso ne mɔ wɔ nu la bɛziele ehwili ne azo.
12 Nlankɛ ne mɔ luale adenle ne azo fɔɔnwo hɔle Bɛte-hyimɛhye.+ Bɛluale ademgbole ko ne ala azo, bɛlɛkɔ la ɛnee bɛlɛsu; bɛammakyi bɛangɔ bɛne zo anzɛɛ fema zo. Mekɛ zɔhane, Filisitia arelemgbunli ne mɔ lile bɛ nzi too bɛhɔdwule Bɛte-hyimɛhye ɛweɛne zo.
13 Ɛnee Bɛte-hyimɛhyema ɛlɛte hwiiti wɔ bɔnza ne anu. Mɔɔ bɛmaanle bɛ nye zo na bɛnwunle Ɛlɛka ne la, bɛ nye liele kpole kɛ bɛnwunle ye la.
14 Ehwili ne rale Bɛte-hyimɛhyenli Dwɔhyua azɛlɛ ne azo na ɔgyinlanle bolɛ kpole bie anwo. Ɔti bɛpepɛle taboa ne mɔɔ wɔ ehwili ne anwo la na bɛvale nlankɛ ne mɔ+ bɛbɔle ɛyelalɛ afɔle bɛmaanle Gyihova.
15 Livaema ne+ yele Gyihova Ɛlɛka ne nee ɛlɛka ne mɔɔ boka nwo mɔɔ nvutuke ninyɛne ne mɔ wɔ nu la na bɛvale bɛziele bolɛ kpole ne azo. Menli mɔɔ wɔ Bɛte-hyimɛhye+ la bɔle ɛyelalɛ afɔle nee afɔle gyɛne maanle Gyihova wɔ kenle zɔhane.
16 Mɔɔ Filisitia arelemgbunli nnu ne nwunle ye la, bɛziale bɛrale Ɛkelɔn kenle ko zɔhane.
17 Ɛhye mɔ a le nvutuke ekoko ne mɔ mɔɔ Filisitiama vale rale kɛ bɛfa bɛabɔ fɔlɛlilɛ afɔle bɛamaa Gyihova la:+ Ahyedɔdo ɛdeɛ ko,+ Gaza ɛdeɛ ko, Ahyekɛlɔn ɛdeɛ ko, Gate ɛdeɛ ko+ yɛɛ Ɛkelɔn ɛdeɛ ko.+
18 Nvutuke ahila ne mɔ dodo nee Filisitia arelemgbunli nnu ne azua ne mɔ le ko—azua mɔɔ bɛlie nwolɛ bane nee namunamu mɔɔ wɔ maanle ne anu la.
Na bolɛ kpole ne mɔɔ bɛvale Gyihova Ɛlɛka ne bɛziele zolɛ la yɛle daselɛ badwu ɛnɛ wɔ Bɛte-hyimɛhyenli Dwɔhyua azɛlɛ zo.
19 Noko Nyamenle hunle Bɛte-hyimɛhye mrenyia ɔluakɛ bɛnleanle Gyihova Ɛlɛka ne. Ɔhunle menli 50,070,* na menli ne bɔle ɔ bo zunle, ɔluakɛ Gyihova ɛhu bɛ nuhua dɔɔnwo.+
20 Ɔti Bɛte-hyimɛhyema bizale kɛ: “Nwane a bahola agyinla Gyihova, Nyamenle nwuanzanwuanza ɛhye anyunlu,+ na nwane mɔ ɛkɛ a ɔvi yɛ nwo ɛke a ɔbahɔ a?”+
21 Ɔti bɛzoanle menli bɛmaanle bɛhɔle Keleate-gyialem+ bɛhɔzele bɛ kɛ: “Filisitiama ɛva Gyihova Ɛlɛka ne ɛzia ɛra. Bɛrɛla bɛrava bɛhɔ.”+
