Samoɛle Mɔɔ Limoa 9:1-27
-
Samoɛle nee Sɔɔlo yiale (1-27)
9 Ɛnee Bɛngyamanenli bie mɔɔ bɛfɛlɛ ye Kehye+ la wɔ ɛkɛ, ɔle Afaya ara Bikɔlate ara Zilɔ ara Abayɛle ara, ɔle Bɛngyamanenli+ yɛɛ ɔle sukoavolɛ kpole.
2 Ɛnee ɔlɛ ɔ ra nrenyia bie mɔɔ bɛfɛlɛ ye Sɔɔlo,+ ɔle kpavolɛ yɛɛ ɔ nwo yɛ fɛ—ɛnee Yizilayɛnli biala ɛnle ɛkɛ mɔɔ ɔ nwo yɛ fɛ tɛla ye a—saa ɔgyi ɛkɛ ne a, ɔwale ɔtɛla menli ne kɔsɔɔti, ɔvi ye awane zo kɔdwu ɔ ti zo.
3 Mekɛ mɔɔ Sɔɔlo papa Kehye asoaso* ne mɔ minlinle la, Kehye zele ɔ ra Sɔɔlo kɛ: “Mesɛlɛ wɔ, fa sonvolɛma ne mɔ ko na ɛ nee ye bɛhɔkpondɛ asoaso ne mɔ.”
4 Bɛhɔvale Yifelaem awoka ne mɔ azo na bɛhɔle Hyalehya azɛlɛ zo noko bɛannwu bɛ. Bɛhɔvale Hyeeyalem azɛlɛ zo, noko ɛnee asoaso ne mɔ ɛnle ɛkɛ. Bɛkpɔsale Bɛngyamanema azɛlɛ ne kɔsɔɔti azo noko bɛannwu bɛ.
5 Mɔɔ bɛhɔdwule Zɛfe azɛlɛ zo la, Sɔɔlo zele ye sonvolɛ ne mɔɔ boka ɔ nwo la kɛ: “Bɛla maa yɛzia yɛhɔ, na me papa ambɔ ɔ bo andwenle yɛ nwo andɛla asoaso ne mɔ.”+
6 Noko sonvolɛ ne buale kɛ: “Nea, Nyamenle sonla bie wɔ sua ɛhye azo, ɔle awie mɔɔ bɛdi ye eni. Edwɛkɛ biala mɔɔ ɔka la ba nu.+ Maa yɛhɔ ye ɛkɛ ne kɛkala. Bie a ɔbahola yeahile yɛ ɛleka mɔɔ ɔwɔ kɛ yɛfa la.”
7 Na Sɔɔlo zele ye sonvolɛ ne kɛ: “Saa yɛkɔ a, duzu a yɛbava yɛamaa nrenyia ne a? Yɛnlɛ paano wɔ yɛ bɔlɛ nu; yɛɛ yɛnlɛ debie biala mɔɔ yɛbava yɛahyɛ Nyamenle sonla ne a. Duzu a yɛlɛ a?”
8 Ɔti sonvolɛ ne buale Sɔɔlo bieko kɛ: “Nea! Melɛ dwɛtɛ fufule hyikɛle* ekyi ko* wɔ me sa nu. Mebava meamaa Nyamenle sonla ne na ɔbahile yɛ ɛleka mɔɔ ɔwɔ kɛ yɛfa la.”
9 (Wɔ tete Yizilayɛ, ɛnee saa awie ɛlɛkɔ ahɔbiza debie wɔ Nyamenle ɛkɛ a, ɔka kɛ: “Bɛla maa yɛhɔnwu ɛnyelɛzodeɛnwunlɛnli ne.”+ Ɔluakɛ awie mɔɔ bɛfɛlɛ ye ngapezonli ɛnɛ la, ɛnee bɛfɛlɛ ye ɛnyelɛzodeɛnwunlɛnli wɔ dɛba ne.)
10 Ɔti Sɔɔlo zele ye sonvolɛ ne kɛ: “Mɔɔ wɔha la le kpalɛ. Maa yɛhɔ.” Yemɔti bɛhɔle sua ne mɔɔ nɔhalɛ Nyamenle sonla ne wɔ zolɛ la azo.
11 Mekɛ mɔɔ bɛlɛfo bɛahɔ sua ne azo la, bɛyiale mbɛlɛra bie mɔɔ bɛlɛkɔ bɛahɔza nzule la. Ɔti bɛbizale bɛ kɛ: “Ɛnyelɛzodeɛnwunlɛnli ne+ wɔ ɛke ɔ?”
12 Bɛbuale kɛ: “Ɔwɔ ɛke. Nea, ɔwɔ bɛ nyunlu. Bɛha bɛ nwo, ɔluakɛ ɛnɛ yera sua ye azo, ɔboalekɛ menli ne ɛlɛbɔ afɔle+ ɛnɛ wɔ ɛzonlenlɛ ɛleka ne.+
13 Saa bɛdwu sua ne azo ala a, bɛbanwu ye kolaa na yeahɔ ɛzonlenlɛ ɛleka ne kɛ ɔkali debie. Menli ne ɛnrɛli aleɛ kɔkpula kɛ ɔkɛra, ɔluakɛ ɔdaye a ɔyila afɔlebɔlɛ ne azo a. Saa ɔyila zo ɔwie a, menli mɔɔ bɛdo ɛsalɛ bɛvɛlɛ bɛ la akee di bie. Yemɔti bɛha bɛ nwo bɛhɔ na bɛbanwu ye.”
14 Ɔti bɛvole bɛhɔle sua ne azo. Mɔɔ ɔka ekyii bɛdwu sua ne avinli lɔ la, ɛnee Samoɛle ɛlɛba arayia bɛ ɔ nee bɛ ahɔ ɛzonlenlɛ ɛleka ne.
15 Kenle mɔɔ aleɛ kye a Sɔɔlo kɛra la, Gyihova hanle hilele Samoɛle* kɛ:
16 “Ɛhyema mekɛ zɛhae, mebazoa nrenyia bie mɔɔ vi Bɛngyaman azɛlɛ zo la+ wɔ wɔ ɛkɛ. Kpokpa ye maa ɔyɛ me menli Yizilayɛma adekilevolɛ,+ na ɔbalie me menli ne yeavi Filisitiama asa anu. Ɔluakɛ menwu me menli ne amaneɛnwunlɛ ne yɛɛ bɛ ɛzunlɛ ne ɛdwu me ɛkɛ.”+
17 Mɔɔ Samoɛle nwunle Sɔɔlo la, Gyihova zele ye kɛ: “Nrenyia ne mɔɔ menganle ɔ nwo edwɛkɛ mengilele wɔ kɛ, ‘Yemɔ a ɔbanlea me menli ne anwo zo’* la ɛne.”+
18 Akee Sɔɔlo hɔle Samoɛle anwo ɛkɛ wɔ anlenkɛ kpole ne anloa na ɔhanle kɛ: “Mesɛlɛ wɔ, ka kile me, nienwu a ɛnyelɛzodeɛnwunlɛnli ne sua ne wɔ a?”
19 Samoɛle buale Sɔɔlo kɛ: “Medame a mele ɛnyelɛzodeɛnwunlɛnli ne a. Dimoa me nyunlu kɔ ɛzonlenlɛ ɛleka ne, ɔluakɛ ɛnɛ me nee wɔ bali debie.+ Ɛhyema nwonlomɔ mebamaa wɔahɔ, na mebaha debie biala mɔɔ ɛkulo kɛ ɛnwu ye la* meahile wɔ.
20 Asoaso ne mɔ mɔɔ minlinle ɛnɛ kenle nsa la,+ mmadwenle bɛ nwo, ɔluakɛ bɛnwu bɛ. Na nwane a debie kpalɛ biala mɔɔ wɔ Yizilayɛ la le ye ɛdeɛ a? Asoo tɛ ɛdawɔ nee wɔ papa sua nu amra amuala ɛdeɛ ɔ?”+
21 Na Sɔɔlo buale kɛ: “Asoo tɛ Bɛngyaman, abusua ekyi ne mɔɔ wɔ Yizilayɛ la anu a mevi a,+ yɛɛ tɛ me abusua ne a le ekyi kpalɛ wɔ Bɛngyaman abusua ne anu ɔ? Duzu ati a wɔha edwɛkɛ zɛhae wɔhile me a?”
22 Akee Samoɛle vale Sɔɔlo nee ye sonvolɛ ne hɔle ɛleka mɔɔ bɛdi aleɛ la na ɔmaanle bɛdɛnlanle ɛleka kpalɛ ne wɔ menli mɔɔ bɛdo ɛsalɛ bɛvɛlɛ bɛ la anyunlu; ɛnee bɛle mrenyia kɛyɛ 30.
23 Samoɛle zele ahenle mɔɔ to aleɛ ne la kɛ: “Fa nane ne mɔɔ menvale memaanle wɔ na menganle kɛ, ‘Fa sie ahane’ la bɛla.”
24 Ɔti ahenle mɔɔ to aleɛ ne la maanle ɔ gyakɛ ne nee mɔɔ wɔ nwolɛ la zo na ɔvale ɔziele Sɔɔlo anyunlu. Na Samoɛle hanle kɛ: “Bɛva mɔɔ bɛvale bɛziele la bɛzie ɛ nyunlu. Di, ɔluakɛ mekɛ ɛhye ati a bɛvale bɛziele bɛmaanle wɔ a. Ɔluakɛ menganle mengilele bɛ kɛ, ‘Medo ɛsalɛ mevɛlɛ nyɛvolɛ.’” Yemɔti Sɔɔlo nee Samoɛle lile debie kenle zɔhane.
25 Akee bɛvi ɛzonlenlɛ ɛleka ne+ bɛdwule bɛrale sua zo, na ɔ nee Sɔɔlo hɔle zo dendɛle wɔ sua ne ati zo.
26 Bɛdwazole aleɛbahye ne, na Samoɛle vɛlɛle Sɔɔlo wɔ sua ne ati zo na ɔhanle kɛ: “Siezie ɛ nwo maa mengyakyi wɔ adenle.” Ɔti Sɔɔlo zieziele ɔ nwo na ɔ nee Samoɛle vindele alienwo.
27 Mɔɔ bɛlɛtolo bɛahɔ sua ne kandiba la, Samoɛle zele Sɔɔlo kɛ: “Ka kile sonvolɛ ne+ maa ɔlimoa yɛ nyunlu,” yemɔti ɔlimoale. “Noko wɔmɔ, gyinla ɛkɛ maa menga edwɛkɛ mɔɔ Nyamenle ɛha la mengile wɔ.”
Ɔbodwɛkɛ
^ Hibulu aneɛ nu, “asoaso mbelɛ.”
^ Hibulu aneɛ nu, “dwɛtɛ fufule hyikɛle ngyɛnu nna anu ko.”
^ Hibulu aneɛ nu, “bukele Samoɛle anzo maanle ɔdele.”
^ Anzɛɛ “Yemɔ a ɔbazie me menli ne a.”
^ Hibulu aneɛ nu, “mɔɔ wɔ wɔ ahonle nu la.”
