Dwɔn Mɔɔ Tɔ Zo Nwiɔ 1:1-13
1 Nrenyia kpanyinli ne,* melɛkɛlɛ meahɔmaa awulaba ne mɔɔ bɛkpa ye la nee ɔ mra ne mɔ mɔɔ mekulo bɛ nɔhalɛ nu la, na tɛ me ngome, emomu bɛdabɛ noko mɔɔ bɛnwu nɔhalɛ ne la amuala,
2 ɔlua nɔhalɛ ne mɔɔ de yɛ nu na ɔ nee yɛ badɛnla dahuu la ati.
3 Akee yɛbanyia ɛlolɛ kpole, anwunvɔnezelɛ nee anzodwolɛ yɛavi Nyamenle Selɛ ne nee Gyisɛse Kelaese, Selɛ ne Ara ne ɛkɛ, wɔ nɔhalɛ nee ɛlɔlɛ nu.
4 Medi fɛlɛko kpole ɔluakɛ menwu kɛ ɛ mra ne mɔ bie lua nɔhalɛ ne anu,+ kɛ mɔɔ mɛla ne mɔɔ yɛnyianle yɛvile Selɛ ne ɛkɛ ne de la.
5 Ɔti kɛkala, awulaba, mesɛlɛ wɔ bɛmaa yɛhulo yɛ nwo ngoko. (Mengɛlɛ mɛla fofolɛ membɛlɛ wɔ, emomu ko ne mɔɔ yɛnyianle ye wɔ mɔlebɛbo ne la ala.)+
6 Na ɛhye a ɛlɔlɛ kile a, kɛ yɛkɛhɔ zo yɛkɛlua kɛ mɔɔ ye mɛla ne kile la.+ Kɛ mɔɔ bɛdele ye wɔ mɔlebɛbo ne la, ye mɛla ne a le kɛ bɛhɔ zo bɛlua ɛlɔlɛ nu.
7 Na mɛlɛbɛlama dɔɔnwo ɛra ewiade,+ bɛdabɛ mɔɔ bɛnlie bɛndo nu kɛ Gyisɛse Kelaese rale nwonane nu la.+ Ɛhye a le mɛlɛbɛlanli ne nee mɔɔ dwazo tia Kelaese la.+
8 Bɛnlea bɛ nwo boɛ na mɔɔ yɛyɛ gyima yɛnyia la anvi bɛ sa, emomu bɛanyia ahatualɛ ne amuala.+
9 Awie biala mɔɔ ɛnli Kelaese ngilehilelɛ ne azo na ɔkilehile debie gyɛne la, Nyamenle ɛnlie ye ɛndo nu.+ Awie mɔɔ kɔ zo di ngilehilelɛ ɛhye azo la, yemɔ a Selɛ ne nee Ralɛ ne die ye to nu a.+
10 Saa awie ba bɛ nwo na ɔnlɛ ngilehilelɛ ɛhye a, bɛmmadie ye bɛkɔ bɛ azua nu+ yɛɛ bɛmmabiza ye ahye.
11 Na awie biala mɔɔ kɛbiza ye ahye la nee ye yɛ adwenle wɔ ye ninyɛndane ne anwo.
12 Melɛ ninyɛne dɔɔnwo mekɛlɛ mebɛlɛ bɛ ɛdeɛ, noko memkpondɛ kɛ mefa kɛlata nee ɛnke mekɛlɛ, emomu me nye la kɛ mebara bɛ nwo lɔ amaa menwu bɛ nyunlu a yɛadendɛ, na bɛ fɛlɛkolilɛ ne ali munli bɔkɔɔ.
13 Ɛ diema raalɛ ne mɔɔ bɛkpa ye la amra ne mɔ biza wɔ.
Ɔbodwɛkɛ
^ Anzɛɛ “Asafo nu kpanyinli ne.”
