Edwɛkɛsisilɛ Mɔɔ Tɔ Zo Nwiɔ 21:1-20
21 Akee bɛmaanle Gyɛhɔhyafate nee ye nenyia mɔ hɔlale na ɔliele ɔ menle na bɛziele ye bɛbokale ye nenyia mɔ anwo wɔ Devidi Suakpole zo; na ɔ ra Gyɛholam ralile ye agya lile belemgbunli.+
2 Ɔ mediema mrenyia, Gyɛhɔhyafate amra ne mɔ a le Azalaya, Gyɛhayɛle, Zɛkalaya, Azalaya, Maekeɛle yɛɛ Hyɛfataya; bɛ muala bɛle Yizilayɛ Belemgbunli Gyɛhɔhyafate amra.
3 Na bɛ papa vale ahyɛlɛdeɛ dɔɔnwo maanle bɛ, dwɛtɛ fufule nee nvutuke yɛɛ ninyɛne mɔɔ sonle bolɛ la nee Dwuda azuamgbole mɔɔ bɛlie nwolɛ bane la;+ noko ɔvale belemgbunlililɛ ne ɔmaanle Gyɛholam+ ɔluakɛ ɔdaye a ɔle belamunli ralɛ a.
4 Mɔɔ Gyɛholam papa belemgbunlililɛ ne ralile ɔ sa nu ala la, ɔvale konle dadeɛ ɔhunle ɔ mediema ne mɔ amuala+ nee Yizilayɛ mgbanyima bie mɔ amaa yeahɔ zo yeayɛ belemgbunli.
5 Gyɛholam lile ɛvolɛ 32 la yɛɛ ɔrayɛle belemgbunli a, na ɔlile tumi ɛvolɛ mɔtwɛ wɔ Gyɛlusalɛm.+
6 Ɔluale Yizilayɛ arelemgbunli ndenle ne mɔ anu,+ kɛ mɔɔ Ehabe sua nu amra yɛle ala la, ɔluakɛ ɔgyale Ehabe ara raalɛ;+ na ɔhɔle zo ɔyɛle ɛtane wɔ Gyihova anye zo.
7 Noko ɛnee Gyihova ɛngulo kɛ ɔkɛzɛkye Devidi awuke ne ɔlua ngyekyeleɛ mɔɔ ɔ nee Devidi yɛle la ati,+ ɔluakɛ ɔbɔle ɛwɔkɛ kɛ ɔbamaa ɔ nee ɔ mra anyia kɛnlaneɛ dahuu.+
8 Wɔ ye mekɛ zo, Yidɔmma dele atua tiale Dwudama+ na bɛziele bɛ belemgbunli ɛdeɛ.+
9 Ɔti Gyɛholam nee ye mgbanyima vale bɛ ehwili ne mɔ amuala na bɛhɔle ɛkɛ, na ɔlile Yidɔmma mɔɔ ɛbɛnga ye ɛyia la nee mgbanyima mɔɔ nea ehwili zo la anwo zo konim.
10 Noko Yidɔmma ɛhɔ zo ɛde Dwudama anwo atua too a yeradwu ɛnɛ a. Lebenama+ noko dele atua wɔ mekɛ zɔhane, ɔluakɛ ɔkpole Gyihova, ye nenyia mɔ Nyamenle ne.+
11 Eza ɔyɛle ɛzonlenlɛ ɛleka*+ wɔ Dwuda awoka ne mɔ azo na ɔmaanle menli mɔɔ de Gyɛlusalɛm la bɔle sunsum nu tuutuu ɛbɛla, na ɔmaanle Dwudama vonle adenle ne.
12 Awieleɛ bɔkɔɔ ne, ɔnyianle kɛlata ɔvile ngapezonli Yilaegya+ ɛkɛ ne kɛ: “Mɔɔ Gyihova, wɔ nenyia Devidi Nyamenle ne ɛha la ɛne, ‘Wɔanlua wɔ papa Gyɛhɔhyafate+ ndenle ne mɔ anu anzɛɛ Dwuda Belemgbunli Esa+ ndenle ne mɔ anu.
13 Emomu, wɔlua Yizilayɛ arelemgbunli+ adenle ne anu na wɔmaa Dwuda nee menli mɔɔ de Gyɛlusalɛm la ɛbɔ sunsum nu tuutuu+ ɛbɛla kɛ tuutuu ɛbɛla ne mɔɔ bɛbɔ ye wɔ Ehabe sua nu+ la, na wɔhu ɛdawɔ mumua ne ɛ mediema+ bɔbɔ, wɔ papa sua nu amra mɔɔ bɛle kpalɛ bɛtɛla wɔ la.
14 Ɛhye ati, Gyihova bamaa ngyegyelɛ kpole ara wɔ menli ne, ɛ mra, ɛ ye mɔ nee wɔ agyapadeɛ kɔsɔɔti azo.
15 Ewule ngakyile dɔɔnwo baha wɔ, bie baha wɔ anyalɛ ne kenle ko biala kɔkpula kɛ wɔ ewule ne ati wɔ anyalɛ bavinde la.’”
16 Akee Gyihova maanle Filisitiama*+ nee Arelabema+ mɔɔ bikye Yiteyopeama la hɔle Gyɛholam anwo zo.+
17 Ɔti bɛhɔle Dwuda anwo zo na bɛwolole sua ne azo, na bɛvale agyapadeɛ mɔɔ bɛnwunle ye wɔ belemgbunli sua nu ɛkɛ ne la amuala,+ nee ɔ mra yɛɛ ɔ ye mɔ; na ɔ ra kokye mɔɔ bɛgyakyile ye ɛkɛ ne la a le Gyɛhɔwahaze,*+ ɔ ra ekyi kpalɛ ne.
18 Na ɛhye mɔ amuala anzi, Gyihova maanle ewule mɔɔ ɛnlɛ ye ayile la hanle ye anyalɛ.+
19 Mekɛ bie anzi mɔɔ ɛvolɛ nwiɔ ɛpɛ nu la, ewule ne ati ye anyalɛ vindele na ɔwule wɔ mekɛ mɔɔ ewule ne ɛlɛmaa yeanwu nyane kpalɛ la; na ye menli ne anwuda senle biala ammaa ye kɛ mɔɔ bɛwudale bie bɛmaanle ye nenyia mɔ la.+
20 Ɔrayɛle belemgbunli la, ɛnee yeli ɛvolɛ 32 na ɔlile tumi ɛvolɛ mɔtwɛ wɔ Gyɛlusalɛm. Ɔwule la yeanyɛ awie biala nyane. Yemɔti bɛziele ye wɔ Devidi Suakpole ne azo,+ noko bɛanzie ye wɔ ɛleka mɔɔ bɛsie arelemgbunli ne mɔ la.+
Ɔbodwɛkɛ
^ Hibulu aneɛ nu, “ɛleka mɔɔ wɔ anwuma.”
^ Hibulu aneɛ nu, “Filisitiama sunsum.”
^ Eza bɛfɛlɛ ye Ehazaya.
