Edwɛkɛsisilɛ Mɔɔ Tɔ Zo Nwiɔ 25:1-28
25 Amazaya lile ɛvolɛ 25 la yɛɛ ɔrayɛle belemgbunli a, na ɔlile tumi ɛvolɛ 29 wɔ Gyɛlusalɛm. Ye mame a le Gyɛhɔwadan mɔɔ vi Gyɛlusalɛm la.+
2 Ɔhɔle zo ɔyɛle mɔɔ le kpalɛ wɔ Gyihova anye zo la, noko yeanva ahonle mɔɔ di munli la yeanyɛ zɔ.
3 Mɔɔ belemgbunlililɛ ne gyinlanle wɔ ye tumililɛ bo ala la, ɔhunle ye sonvolɛma ne mɔ mɔɔ hunle ye papa mɔɔ ɛnee le belemgbunli la.+
4 Noko yeangu bɛ mra ne mɔ, ɔluakɛ ɔyɛle mɔɔ nee mɔɔ bɛhɛlɛ ye wɔ Mɛla ne anu, mɔɔ wɔ Mosisi buluku ne anu yia la, ɛleka mɔɔ Gyihova hanle kɛ: “Ɔnle kɛ selɛma wu wɔ bɛ mra ɛtane ti, yɛɛ ɔnle kɛ mralɛ wu wɔ bɛ papa mɔ ɛtane ti; emomu, ɔwɔ kɛ awie ko biala wu wɔ ɔdaye mumua ne ye ɛtane ti” la.+
5 Na Amazaya boɔboale Dwudama anloa na ɔmaanle bɛgyinlegyinlanle ɛkɛ ne kɛ mɔɔ bɛ papa mɔ awuke ne mɔ de la, menli apenle apenle nwo zo mgbanyima nee menli ɛya ɛya nwo zo mgbanyima mɔɔ bɛvi Dwuda nee Bɛngyaman amuala la.+ Ɔhɛlɛle menli mɔɔ ɛli ɛvolɛ 20 mɔɔ kɔ la aluma,+ na ɔnwunle kɛ bɛle kovolɛma mɔɔ bɛtete* bɛ mɔɔ bɛkola bɛfa atwɛ nee enyinlike mgbole bɛdi gyima la 300,000.
6 Eza ɔvale dwɛtɛ fufule talɛnte* 100 ɔhɔbɔle Yizilayɛ konle nu katakyiema 100,000 ɛkpa.
7 Noko nɔhalɛ Nyamenle ne sonla bie rale ɔ nwo ɛkɛ na ɔzele ye kɛ: “O belemgbunli, mmamaa Yizilayɛ ɛlɔne ne nee wɔ kɔ, ɔluakɛ Gyihova ɛmboka Yizilayɛma anwo,+ ɔmboka Yifelaemma anu biala anwo.
8 Noko ɛ ngomekye kɔ, keha ɛ nwo na nyia akɛnrasesebɛ wɔ konle ne anu. Anrɛɛ nɔhalɛ Nyamenle ne bamaa wɔadɔ aze wɔ kpɔvolɛ ne anyunlu, ɔluakɛ Nyamenle lɛ tumi ɔfa ɔboa+ yɛɛ ɔkola ɔmaa awie tɔ aze.”
9 Ɛhye ati, Amazaya bizale nɔhalɛ Nyamenle ne sonla ne kɛ: “Na talɛnte 100 ne mɔɔ meva memaa Yizilayɛ sogyama ne la ɛ?” Nɔhalɛ Nyamenle ne sonla ne buale ye kɛ: “Gyihova lɛ adenle mɔɔ ɔbalua zo yeamaa wɔanyia bie dɔɔnwo wɔadɛla yemɔ bɔbɔ a.”+
10 Ɔti Amazaya maanle ɛlɔnema mɔɔ vi Yifelaem rale la ziale hɔle, ɔmaanle bɛhɔle bɛ sua zo. Noko bɛvale Dwudama anwo ɛya kpole, yemɔti bɛsia bɛahɔ bɛ sua zo la ɛnee bɛva ɛya kpole kpalɛ.
11 Akee Amazaya nyianle akɛnrasesebɛ na ɔlile ye ɛlɔnema ne anyunlu bɛhɔle Ngyenle Bɔnza ne anu,+ na ɔhunle Siyɛma 10,000.+
12 Na Dwudama hyele bɛ nuhua 10,000 anyewɔzo. Yemɔti bɛvale bɛ bɛrale bodane ne azo na bɛvuandinle bɛ bɛvile bodane ne azo bɛguale bɛ aze, na bɛ muala bɛtetele nzokanzoka.
13 Noko ɛlɔnema ne mɔɔ Amazaya ammaa bɛangɔ konle ne bie na ɔzianenle bɛ la+ hɔtetale Dwuda azuamgbole ne mɔ bie, ɔvi Samɛlea+ too kɔdwu Bɛte-hɔlɔn;+ bɛhunle bɛ nuhua menli 3,000 na bɛvale ninyɛne dɔɔnwo bɛhɔle.
14 Noko mɔɔ Amazaya hɔhuhunle Yidɔmma na ɔlɛsia yeara la, ɔvale Siyɛma nyamenle ne mɔ ɔrale na ɔvale bɛ ɔzieziele ɛkɛ ne ɔyɛle bɛ ye nyamenle,+ na ɔbɔle ɔ bo kɛ ɔbɔ ɔ ti aze wɔ bɛ nyunlu na yeabɔ afɔle yeamaa ye esike ne ahɔ bɛ ɛkɛ.
15 Ɔti Gyihova vale Amazaya anwo ɛya kpole kpalɛ, na ɔzoanle ngapezonli bie ɔmaanle ɔhɔbizale ye kɛ: “Duzu ati a ɛli menli ne nyamenle ne mɔ mɔɔ bɛanlie bɛdabɛ mumua ne bɛ menli ne bɛanvi ɛ sa nu la anzi ɛ?”+
16 Mɔɔ ɔ nee belemgbunli ne ɛlɛtendɛ la, ɔbizale ye kɛ: “Yɛkpa wɔ kɛ belemgbunli ne folɛtuvolɛ ɔ?+ Gyakyi!+ Duzu ati a ɛyɛ wɔamaa bɛahu wɔ a?” Akee ngapezonli ne pɛle zolɛ, noko ɔvale ɔbokale nwolɛ kɛ: “Meze kɛ Nyamenle ɛzi kpɔkɛ kɛ ɔsɛkye wɔ, ɔluakɛ wɔyɛ ɛhye yɛɛ wɔandie me folɛdulɛ ne.”+
17 Mɔɔ Dwuda Belemgbunli Amazaya nee ye folɛtuvolɛma vale adwenle wiele la, ɔzoanle ɔmaanle bɛhɔhanle bɛhilele Gyihu ara Gyɛhɔwahaze ara Gyɛhowahye mɔɔ le Yizilayɛ belemgbunli la kɛ: “Bɛla, maa yɛbɔ ye zo* wɔ konle nu.”+
18 Yizilayɛ Belemgbunli Gyɛhowahye vale nrɛlaleɛ ɛhye hɔmaanle Dwuda Belemgbunli Amazaya kɛ: “Mbowunyɛma ne mɔɔ wɔ Lɛbanɔn la vale nrɛlaleɛ hɔmaanle Lɛbanɔn sida baka kɛ, ‘Fa ɛ ra raalɛ maa me ra nrenyia ɛgya ye.’ Noko, Lɛbanɔn nane anwo ɛzulolɛ bie razenle ɛkɛ ne na ɔtietiale mbowunyɛma ne azo.
19 Ɛse, ‘Nea! Mezɛkye* Yidɔm.’+ Yemɔti a wɔ ahonle ɛmemaa ɔ nwo zo la, ɔkulo kɛ bɛwula ye anyunlunyia. Noko kɛkala ɛdeɛ, tɛnla wɔ sua nu.* Duzu ati a ɔwɔ kɛ ɛtwehwe ngyegyelɛ ɛmaa ɛ nwo na bɛsɛkye wɔ nee Dwudama ɛ?”
20 Noko Amazaya andie,+ ɔluakɛ ɛnee ɛhye vi nɔhalɛ Nyamenle ne ɛkɛ ne kɛ ɔfa bɛ yeawula kpɔvolɛ ne asa anu,+ ɔluakɛ bɛhɔlile Yidɔm nyamenle ne mɔ anzi.+
21 Ɔti Yizilayɛ Belemgbunli Gyɛhowahye hɔle, na ɔ nee Dwuda Belemgbunli Amazaya vale konle hɔbɔle zolɛ wɔ Bɛte-hyimɛhye+ mɔɔ wɔ Dwuda la.
22 Yizilayɛma lile Dwudama anwo zo konim, yemɔti bɛ nuhua ko biala nriandile hɔle ye sua* nu.
23 Yizilayɛ Belemgbunli Gyɛhowahye hyele Dwuda Belemgbunli Amazaya, Gyɛhɔwahaze* ara Gyɛhowahye ara ne wɔ Bɛte-hyimɛhye. Akee ɔvale ye ɔrale Gyɛlusalɛm na ɔbubule Gyɛlusalɛm bane ne mɔɔ vi Yifelaem Anlenkɛ Kpole ne+ anwo kɔdwu Muleɛ Anlenkɛ Kpole ne+ anwo la ɔguale aze, ɔle kubit* 400.
24 Ɔvale nvutuke nee dwɛtɛ fufule ne amuala yɛɛ ninyɛne mɔɔ ɔnwunle bɛ wɔ nɔhalɛ Nyamenle ne sua ne anu mɔɔ Obɛde-yidɔm nea zo la yɛɛ ninyɛne mɔɔ bɛva bɛzie belemgbunli sua nu ɛkɛ ne la amuala,+ eza ɔhyele menli ne bie mɔ ɔbokale nwolɛ. Akee ɔziale ɔhɔle Samɛlea.
25 Yizilayɛ Belemgbunli Gyɛhɔwahaze+ ara Gyɛhowahye+ wule la anzi, Gyɛhowahye ara Amazaya,+ Dwuda belemgbunli ne dɛnlanle aze ɛvolɛ 15.
26 Na Amazaya anwo tetedwɛkɛ mɔɔ ɛha la, ɔvi mɔlebɛbo kɔdwu awieleɛ, nea! asoo bɛtɛkɛlɛle bɛ wɔ Dwuda nee Yizilayɛ Arelemgbunli Buluku ne anu?
27 Ɔvi mekɛ mɔɔ Amazaya hwenle ɔ nwo vile Gyihova anwo la, bɛvale ɔ nwo adwenle ɛtane+ wɔ Gyɛlusalɛm, na ɔnriandile ɔhɔle Leekehye, noko bɛzoanle menli bɛmaanle bɛdoale ye wɔ Leekehye na bɛhɔhunle ye wɔ nehane.
28 Ɔti bɛvale ye bɛdole mgbɔnwɔ zo bɛziale bɛrale na bɛziele ye bɛbokale ye nenyia mɔ anwo wɔ Dwuda suakpole ne azo.
Ɔbodwɛkɛ
^ Hibulu aneɛ nu, “bɛkpa.”
^ Anzɛɛ “yɛ nye ɛyɛ nna.”
^ Hibulu aneɛ nu, “Wɔzɛkye.”
^ Anzɛɛ “belemgbunli sua nu.”
^ Hibulu aneɛ nu, “ye ɛdanlɛsua.”
^ Eza bɛfɛlɛ ye Ehazaya.
