Edwɛkɛsisilɛ Mɔɔ Tɔ Zo Nwiɔ 4:1-22
4 Akee ɔyɛle kɔbele afɔlemokyea ne,+ ye tendenle le kubit 20, ye tɛtɛlɛ le kubit 20 yɛɛ ye anwumahɔlɛ le kubit 10.
2 Ɔyɛle kɔbele Angola Kpole* ne.+ Ɔle kutukpunli, ɔvi ɔ nloa kɔdwu ɔ nloa le kubit 10 yɛɛ ye anwumahɔlɛ le kubit 5, na ɛzuzunyɛma kubit 30 a bahola abɛnga ye ayia a.+
3 Na ɛnee awolandoba* agudeɛ+ wɔ ɔ bo bɔ ye yia, kubit ko biala ɛdeɛ bulu wɔ Angola Kpole ne anwo amuala. Awolandoba ne mɔ solo zo nwiɔ, na ɔ nee Angola ne bɔ nu ko.
4 Ɔgyi kɔbele nlankɛ nyinli 12 azo,+ 3 anye kile sɔlɔ, 3 anye kile adɔleɛ, 3 anye kile nyiakɛ yɛɛ 3 anye kile aduduleɛ; na Angola Kpole ne gyi bɛ nwo zo, yɛɛ bɛ nzi vea ɔ bo.
5 Na ye ɛzamo le kɛ bɛ sa mrɛlɛsɛka nna tɛtɛlɛ;* na bɛyɛle ɔ nloa ne kɛ kanrɛlɛ nloa, ɔle kɛ aloa ndotolo la. Angola ne kola fa* nzule baate ɛzuzudeɛ* 3,000.
6 Eza ɔyɛle ahyɛnze mgbole bulu mɔɔ bɛfa bɛwowo ninyɛne nwo la, ɔvale nnu ɔziele fema zo yɛɛ nnu wɔ bɛne zo.+ Bɛwowo ninyɛne mɔɔ bɛfa bɛbɔ ɛyelalɛ afɔle la anwo wɔ nu.+ Noko ɛsɔfo ne mɔ fa Angola Kpole ne anu nzule ne wowo bɛ nwo.+
7 Akee ɔvale nvutuke ɔyɛle kɛnlaneɛ mbaka bulu+ kɛ mɔɔ bɛhilele la,+ na ɔvale ɔzieziele ɛzonlenlɛsua ne anu, nnu wɔ fema zo yɛɛ nnu wɔ bɛne zo.+
8 Eza ɔyɛle ɛkponle bulu na ɔvale bɛ ɔzieziele ɛzonlenlɛsua ne anu, nnu wɔ fema zo yɛɛ nnu wɔ bɛne zo;+ na ɔyɛle nvutuke ahyɛnze 100.
9 Akee ɔyɛle ɛsɔfo ne mɔ+ alienwo ɛkɛ ne+ yɛɛ alienwo kpole ne+ nee ye nlenkɛ ne mɔ, na ɔholole kɔbele ɔguale bɛ nlenkɛ ne mɔ anwo.
10 Na ɔvale Angola Kpole ne ɔziele fema zo mɔɔ kɔne nyiakɛ aduduleɛ afoa nu la.+
11 Haelam noko yɛle ahyɛnze mɔɔ bɛfa bɛfula nzonle, sofi ne mɔ yɛɛ ahyɛnze ne mɔ.+
Ɔti Haelam wiele gyima mɔɔ ɔyɛle ɔmaanle Belemgbunli Sɔlɔmɔn wɔ nɔhalɛ Nyamenle ne sua ne anwo la:+
12 mpila nwiɔ ne mɔ+ nee bɛ ti zo ne mɔ mɔɔ le kɛ kyɛnze la; ninyɛne nwiɔ ne mɔɔ ɔvale kyeenyi ɔnwonle+ ɔhedale mpila ne mɔ ati zo ne mɔɔ le kɛ kyɛnze la anwo la;
13 pɔmegelanate 400 ne+ mɔɔ wɔ ninyɛne nwiɔ ne mɔɔ zɔho avonle la anwo la, ɔyɛle ko biala ɛdeɛ ɔsolole zo nwiɔ ɔvale ɔhedale mpila ne mɔ adile nwiɔ ne mɔɔ le kɛ kyɛnze la anwo;+
14 ehwili bulu* ne nee ahyɛnze bulu ne mɔɔ gyigyi ehwili ne mɔ azo la;+
15 Angola Kpole ne nee kɔbele nlankɛ nyinli 12 ne mɔɔ ɔgyi zolɛ la;+
16 na Haelam-ebive+ vale kɔbele mɔɔ bɛhwi nwolɛ la yɛle ahyɛnze mɔɔ bɛfa bɛfula nzonle, sofi, faka+ nee nwolɛ ninyɛne kɔsɔɔti ɔmaanle Belemgbunli Sɔlɔmɔn wɔ Gyihova sua ne anwo.
17 Belemgbunli ne guale bɛ wɔ Dwɔdan maanzinli ne anu wɔ ndɛtɛlɛ mɔɔ so mɔɔ wɔ Sɛkɔto+ nee Zɛlɛda avinli la anu.
18 Sɔlɔmɔn yɛle ninyɛne ɛhye mɔ dɔɔnwo kpalɛ; yemɔti bɛanzuzu kɔbele ne dodo bɛannwu ye ɛlomboɛ.+
19 Sɔlɔmɔn yɛle nɔhalɛ Nyamenle ne sua ne anwo ninyɛne ne mɔ amuala:+ nvutuke afɔlemokyea ne;+ ɛkponle ne mɔ+ mɔɔ paano ne mɔɔ bɛfa bɛkile la gua zolɛ la;+
20 kɛnlaneɛ mbaka ne mɔ nee bɛ ahɛnlaneɛ ne mɔ mɔɔ bɛva nvutuke tagyee bɛyɛ,+ mɔɔ bɛsɔ bɛsie suakunlu ne anyunlu kɛ mɔɔ bɛhile kɛ bɛyɛ ye la;
21 nee ndotolo ne mɔ, ahɛnlaneɛ ne mɔ, nvutuke dabekɛ* ne mɔ mɔɔ bɛva nvutuke tagyee kpalɛ bɛyɛ la;
22 ninyɛne mɔɔ bɛfa bɛnua senle, ahyɛnze ne, kanrɛlɛ ne mɔ yɛɛ senlevalɛ ahyɛnze ne, bɛvale nvutuke tagyee a bɛyɛle a; na sua ne anlenkɛ kpole ne, ɔ kunlu nehane nlenkɛ ne mɔ mɔɔ kɔ Nwuanzanwuanza Nu Nwuanzaanwu Ɛleka ne la+ yɛɛ ɛzonlenlɛsua ne nlenkɛ ne mɔ noko bɛvale nvutuke a bɛyɛle a.+
Ɔbodwɛkɛ
^ Hibulu aneɛ nu, “kɔbele Nyevile.”
^ Ɔle kɛ awa la na ye kpole bayɛ kɛ akutue.
^ Anzɛɛ “ɔfa.”
^ Anzɛɛ “ehwili mɔɔ bɛfa bɛsoa nzule.”
^ Anzɛɛ “fefadeɛ.” Ɔle kɛ akpaso, bɛfa bɛsɔ kɛnlaneɛ nu nyɛma nu.
