Mɔɔ Tɔ Zo Nwiɔ Kɔmaa Kɔlentema 4:1-18
4 Zɔhane ati, kɛmɔ bɛze yɛ anwunvɔne bɛva ɛzonlenlɛ gyima ɛhye bɛwula yɛ sa nu la ati, yɛmkpo aze.*
2 Na yɛkpo anyiemgba nee awozinli nu nyɛleɛ muala, yɛmmaa mɛlɛbɛla ɛmba yɛ ɛbɛlabɔlɛ nu anzɛɛ yɛnfonla Nyamenle edwɛkɛ ne anu;+ emomu yɛda nɔhalɛ ne ali yɛfa yɛdi yɛ nwo daselɛ yɛkile menli kɔsɔɔti adwenle wɔ Nyamenle anyunlu.+
3 Nɔhalɛ nu, saa edwɛkpa ne mɔɔ yɛbɔ ye nolo la azo ɛheda a, ɛnee zolɛ ɛheda ɛmaa bɛdabɛ mɔɔ bɛlɛminli la,
4 menli ɛhye anu a ewiade ɛhye* nyamenle ne+ ɛzi bɛdabɛ mɔɔ bɛnlie bɛnli la adwenle ne anye a,+ amaa Kelaese mɔɔ le Nyamenle ɛsaso la anwo anyunlunyia edwɛkpa ne wienyi ne+ anda bɛ nwo zo.+
5 Na tɛ yɛ nwo nolo a yɛbɔ a, emomu yɛbɔ Gyisɛse Kelaese anwo nolo kɛ ɔle Awulae na yɛmɛ yɛle bɛ ngɛkɛlɛ ɔlua Gyisɛse ati.
6 Ɔluakɛ Nyamenle a hanle kɛ: “Wienyi vi awozinli nu ɛda” a,+ na yemaa Nyamenle anwo anyunlunyia ndelebɛbo ne ɛda yɛ ahonle nu+ wienyi wɔ Kelaese anyunlu.
7 Noko, yɛlɛ anwonyia ɛhye+ wɔ mbuakɛ nu,+ amaa yeala ali kɛ tumi bedevinli ne le Nyamenle ɛdeɛ na ɔnvi yɛ ɛkɛ.+
8 Yɛyia ngyegyelɛ ngakyile wɔ ndenle dɔɔnwo anu, noko tɛ kɛ asɛɛ yɛnnyia adenle yɛmpɛ yɛ nwo; yɛ nye zo ta yɛ, noko tɛ kɛ asɛɛ yɛngola yɛnvi nu fee ɔ;*+
9 bɛyɛ yɛ kpɔdekpɔde, noko bɛtɛkpole yɛ;+ bɛbɔ yɛ bɛto aze, noko bɛtɛsɛkyele yɛ.+
10 Dahuu yɛgyinla ewule nyane ne mɔɔ dole Gyisɛse la anloa wɔ yɛ sonlabaka ne anu,+ amaa Gyisɛse ngoane ne noko ala ali wɔ yɛ sonlabaka ne anu.
11 Ɔluakɛ yɛdayɛ mɔɔ yɛde aze la, Gyisɛse ati yɛ nee ewule yia dahuu,+ amaa Gyisɛse ngoane ne noko ala ali wɔ yɛ sonlabaka ne anu.
12 Yemɔti ewule yɛ gyima wɔ yɛ nu, noko bɛmɛ, ngoane yɛ gyima wɔ bɛ nu.
13 Na kɛmɔ yɛlɛ diedi sunsum ko ne ala mɔɔ bɛhɛlɛ nwolɛ edwɛkɛ kɛ: “Menliele menlile, yemɔti mendendɛle” la ati;+ yɛdayɛ noko yɛdie yɛdi yemɔti yɛtendɛ,
14 na yɛze kɛ Ahenle mɔɔ dwazole Gyisɛse la badwazo yɛdayɛ noko yeaboka Gyisɛse anwo na yeava yɛ nee bɛ yeahile.+
15 Bɛdabɛ ti a bɛyɛle ninyɛne ɛhye mɔ amuala a, amaa menli dɔɔnwo anyia Nyamenle ɛlolɛ kpole ne ɔluakɛ menli dɔɔnwo ɛlɛda Nyamenle ase na bɛlɛdua zo bɛawula ye anyunlunyia.+
16 Ɛhye ati yɛmkpo aze,* noko saa kɛzi yɛde wɔ menli nye zo la ɛlɛsɛkye bɔbɔ a, kɛzi yɛde wɔ yɛ nu la ɛdeɛ, ɔlɛyɛ fofolɛ alehyenlɛ biala.
17 Ɔluakɛ amaneɛnwunlɛ* ne le mekɛ ezinra nu debie yɛɛ ɔnyɛ ɛlomboɛ bɔbɔ ɛdeɛ, noko ɔfa anyunlunyia mɔɔ le kpole kpalɛ* na ɔwɔ ɛkɛ ne dahuu la ɔbɛlɛ yɛ;+
18 na yɛnva yɛ nye yɛndo ninyɛne mɔɔ bɛnwu bɛ la azo, emomu ninyɛne mɔɔ bɛnnwu bɛ la azo.+ Ɔluakɛ ninyɛne mɔɔ bɛnwu bɛ la le mekɛ ezinra nu ɛdeɛ, na ninyɛne mɔɔ bɛnnwu bɛ la wɔ ɛkɛ ne dahuu.
Ɔbodwɛkɛ
^ Anzɛɛ “yɛ sa nu ɛndo.”
^ Anzɛɛ “mekɛ ɛhye.” Nea Edwɛkɛbohilelɛ.
^ Anzɛɛ ɔkola ɔkile, “noko yɛ anyelazo ɛnwie.”
^ Anzɛɛ “yɛ sa nu ɛndo.”
^ Anzɛɛ “sɔnea.”
^ Giliki aneɛ nu, “ɔyɛ ɛlomboɛ.”
