Mɔɔ Tɔ Zo Nwiɔ Kɔmaa Kɔlentema 9:1-15
9 Akee mɔɔ fale moalɛ* gyima ne mɔɔ bɛyɛ bɛmaa nwuanzanwuanzama ne anwo la,+ ɔngyia kɛ mebahɛlɛ bɛ wɔ nwolɛ,
2 ɔluakɛ meze kɛ bɛkulo kɛ bɛboa, na meva bɛ medu me nloa anu mehile Masidoneama, kɛ ye ɛvolɛ ko ɛne, bɛdabɛ mɔɔ bɛwɔ Akaya la ɛziezie bɛ nwo kɛ bɛboa, na bɛ mɔdenlebɔlɛ ne ɛha bɛ nuhua* dɔɔnwo.
3 Noko melɛsoa mediema ne mɔ, amaa yɛ nloa anu mɔɔ yɛvale bɛ yɛdule wɔ edwɛkɛ ɛhye anwo la anyɛ mgbane, na bɛaboɔboa bɛ nwo kpalɛ, kɛ mɔɔ menganle kɛ bɛbayɛ la.
4 Yeamba ye zɔ na saa Masidoneama nee me ba na bɛbanwu kɛ bɛtɛboɔboale bɛ nwo a, yɛ nee bɛ yɛ muala yɛ nyunlu bagua aze kɛ yɛnyianle anwodozo ɛhye wɔ bɛ nu la.
5 Ɔti medwenle nwolɛ kɛ ɔhyia kɛ memaa mediema ne mɔ anwosesebɛ memaa bɛdimoa bɛbadie bɛ ahyɛlɛdeɛ ne mɔɔ bɛvale bɛbɔle ɛwɔkɛ la, amaa yeala ali kɛ bɛvile bɛ ɛhulolɛ nu a bɛvale ahyɛlɛdeɛ ne bɛmaanle a, na tɛ kɛ asɛɛ bɛgyinlanle bɛ nwo zo la ati ɔ.
6 Na wɔ ɛhye anwo, awie biala mɔɔ dua ye akyɛbɛ nu la babu ye akyɛbɛ nu, na awie biala mɔɔ dua dɔɔnwo la noko babu dɔɔnwo.+
7 Bɛmaa awie biala ɛyɛ mɔɔ yezuzu nwo wɔ ye ahonle nu la, ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ,+ ɔluakɛ Nyamenle kulo mɔɔ te ɔ nyunlu kyɛ debie la.+
8 Eza Nyamenle kola maa bɛnyia ye ɛlolɛ kpole ne amuala bɛmaa ɔbo zo, yemɔti mekɛ biala bɛbanyia ninyɛne mɔɔ sa bɛ la dɔɔnwo; yɛɛ eza bɛbanyia ninyɛne mɔɔ bɛhyia nwo na bɛahola bɛayɛ gyima kpalɛ la dɔɔnwo.+
9 (Kɛ mɔɔ bɛhɛlɛ ala la: “Yehyɛ ninyɛne dɔɔnwo;* yeva yemaa ehyiavolɛma. Ye tenleneyɛlɛ ne wɔ ɛkɛ ne dahuu.”+
10 Na Mɔɔ maa ɛyazonlɛnli ma dɔɔnwo na ɔmaa menli aleɛ bɛdi la bamaa bɛanyia ma dɔɔnwo bɛalua na bɛabu tenleneyɛlɛ ma dɔɔnwo.)
11 Bɛnyia bɛ nwo wɔ debie biala anu, amaa bɛavi atiakunlukɛnlɛma nu bɛahyɛ ninyɛne wɔ ndenle muala anu, na ɔlua yɛ nwo zo bɛayɛ Nyamenle mo;
12 ɔluakɛ moalɛ* gyima ɛhye mɔɔ yɛyɛ la ɛmmaa nwuanzanwuanzama ne ɛnnyia mɔɔ bɛkpondɛ la angome,+ emomu eza ɔmaa bɛnyia edwɛkɛ dɔɔnwo bɛka bɛfa bɛda Nyamenle ase.
13 Ɔlua daselɛ mɔɔ moalɛ ɛzonlenlɛ gyima ɛhye di la ati, bɛwula Nyamenle anyunlunyia ɔluakɛ bɛbɛlɛ bɛ nwo aze bɛmaa Kelaese anwo edwɛkpa ne, kɛ mɔɔ bɛbɔle ye nolo la, ɔboalekɛ bɛfi bɛ ahonle nu bɛye ndoboa bɛmaa bɛ nee awie biala.+
14 Na bɛyɛ modolɛ nzɛlɛlɛ bɛmaa bɛ, bɛda ɛlɔlɛ ali bɛkile bɛ ɔlua Nyamenle ɛlolɛ molozo ne mɔɔ wɔ bɛ nwo zo la ati.
15 Yɛyɛ Nyamenle mo wɔ ye ahyɛlɛdeɛ ne mɔɔ bɛngola bɛngilehile nu la anwo.
Ɔbodwɛkɛ
^ Giliki aneɛ nu, “ɛzonlenlɛ.”
^ Anzɛɛ “Masidoneama.”
^ Anzɛɛ “wɔ atiakunlukɛnlɛmayɛlɛ nu.”
^ Anzɛɛ “ɛzonlenlɛ.”
