Arelemgbunli Mɔɔ Tɔ Zo Nwiɔ 21:1-26
21 Manasɛ+ lile ɛvolɛ 12 la yɛɛ ɔrayɛle belemgbunli a, na ɔlile tumi ɛvolɛ 55 wɔ Gyɛlusalɛm.+ Ye mame duma a le Hafezeba.
2 Ɔyɛle ɛtane wɔ Gyihova anye zo, ɔlile bɛkyi nyɛleɛ ne mɔ mɔɔ maanle maanle ne mɔ+ yɛle mɔɔ Gyihova voanle bɛ vile Yizilayɛma anye zo la anzi.+
3 Ɔsisile ɛzonlenlɛ ɛleka ne mɔ* mɔɔ ye papa Hɛzikaya zɛkyele bɛ la bieko,+ na ɔsisile afɔlemokyea ɔmaanle Beeyale, na ɔyɛle ɛzonlenlɛ baka,*+ kɛ mɔɔ Yizilayɛ Belemgbunli Ehabe yɛle ala la.+ Na ɔbɔle ɔ ti aze ɔmaanle anwuma ɛlɔne ne mɔ kɔsɔɔti na ɔzonlenle bɛ.+
4 Eza ɔsisile afɔlemokyea wɔ Gyihova sua nu ɛkɛ,+ ɛleka mɔɔ Gyihova hanle nwolɛ edwɛkɛ kɛ: “Gyɛlusalɛm a me duma badɛnla” la.+
5 Na ɔsisile afɔlemokyea wɔ Gyihova sua ne alienwo nwiɔ ɛkɛ ɔmaanle anwuma ɛlɔne ne mɔ amuala.+
6 Na ɔmaanle ɔdaye mumua ne ɔ ra vale senle nu; ɔyele ngonyia, ɔkpondɛle mɔɔ bazi kenle bie la anwo sɛkɛlɛneɛ,+ na ɔkpale menli mɔɔ tendɛ sunsum ɛtane nloa azo nee menli mɔɔ ka kenle bie edwɛkɛ la.+ Ɔyɛle ɛtane kpole wɔ Gyihova anye zo ɔvale ɔhanle ye ɛya.
7 Ɔvale ɛzonlenlɛ baka*+ ananze ne mɔɔ ɔzele la ɔhɔziele sua ne anu, ɛleka mɔɔ Gyihova hanle nwolɛ edwɛkɛ hilele Devidi nee ɔ ra Sɔlɔmɔn kɛ: “Sua ɛhye nee Gyɛlusalɛm, mɔɔ meye mevi Yizilayɛ mbusua ne mɔ amuala anu la azo a, mebava me duma ne meado ye dahuu a.+
8 Na saa Yizilayɛma di mɔɔ meha mehile bɛ la amuala, Mɛla ne amuala mɔɔ me sonvolɛ Mosisi hanle hilele bɛ kɛ bɛli zo la azo pɛpɛɛpɛ a, menrɛye bɛ gyakɛ menrɛvi azɛlɛ ne mɔɔ menvale memaanle bɛ nenyia mɔ la azo bieko ɛlɛ.”+
9 Noko bɛanyɛ tieyɛ, na Manasɛ hɔle zo maanle bɛvonle adenle, na ɔmaanle bɛyɛle ɛtane kpole bɛdɛlale maanle maanle mɔɔ Gyihova zɛkyele bɛ wɔ Yizilayɛma anyunlu la.+
10 Gyihova hɔle zo luale ye azonvolɛ ngapezoma ne mɔ anwo zo+ hanle kɛ:
11 “Dwuda Belemgbunli Manasɛ ɛyɛ bɛkyi ninyɛne ɛhye mɔ amuala; yeyɛ amumuyɛ dɔɔnwo yedɛla Amɔlema+ mɔɔ limoale ɔ nyunlu la amuala+ yɛɛ yemaa Dwudama ɛlua ye kyibadeɛ ananze* ne mɔ azo ɛyɛ ɛtane.
12 Ɛhye ati mɔɔ Gyihova, Yizilayɛ Nyamenle ne ɛha la ɛne: ‘Nea melɛmaa munzule ado Gyɛlusalɛm+ nee Dwuda mɔɔ saa awie biala anzo nwiɔ te a ɔ nwo babubu ye a.+
13 Na mebava ɛzuzunyɛma ne mɔɔ bɛvale bɛdole Samɛlea+ anwo la nee ɛzuzudeɛ* ne+ mɔɔ bɛvale bɛdole Ehabe sua nu amra+ anwo la meado Gyɛlusalɛm anwo, na mebakyikyi Gyɛlusalɛm anwo meamaa ɔ nwo ade, kɛ mɔɔ bɛkyikyi kyɛnze nwo bɛmaa nwolɛ te, bɛkyikyi nwo na bɛbutu ɔ nye aze la.+
14 Mebakpo me agyapadeɛ ne mɔɔ ɛha la+ na meava bɛ meawula bɛ kpɔvolɛma asa anu, na bɛ kpɔvolɛma kɔsɔɔti bawua bɛ na bɛave bɛ nwo ninyɛne,+
15 ɔluakɛ bɛyɛle mɔɔ le ɛtane wɔ me nye zo la, na bɛhɔ zo bɛha me ɛya ɔvi kenle mɔɔ menyele bɛ nenyia mɔ menvile Yigyibiti la too a yeradwu ɛnɛ a.’”+
16 Eza Manasɛ hanle menli mɔɔ ɛnze nwolɛ bie la mogya dɔɔnwo kpalɛ guale too ɔyile Gyɛlusalɛm tɛkɛɛ, ɔvi ɔ ti kɔdwu ɔ bo,+ yeanga ye zɔ ɔyɛle ɛtane na ɔmaanle Dwuda yɛle ɛtane wɔ Gyihova anye zo.
17 Na Manasɛ anwo tetedwɛkɛ mɔɔ ɛha nee mɔɔ ɔyɛle la kɔsɔɔti yɛɛ ɛtane ne mɔ mɔɔ ɔyɛle la, asoo bɛtɛkɛlɛle bɛ wɔ Dwuda arelemgbunli ne mɔ mekɛ zo tetedwɛkɛ buluku ne anu ɔ?
18 Akee bɛmaanle Manasɛ nee ye nenyia mɔ hɔlale na ɔliele ɔ menle na bɛziele ye wɔ tola mɔɔ wɔ ye sua nu ɛkɛ ne la anu, wɔ Ɛza tola ne anu;+ na ɔ ra Emɔn ralile ye agya lile belemgbunli.
19 Emɔn+ lile ɛvolɛ 22 la yɛɛ ɔrayɛle belemgbunli a, na ɔlile tumi ɛvolɛ nwiɔ wɔ Gyɛlusalɛm.+ Ye mame a le Heelɛse mɔɔ vi Dwɔtoba la ara raalɛ Mɛhyɛlɛmɛte.
20 Ɔhɔle zo ɔyɛle ɛtane wɔ Gyihova anye zo, kɛ mɔɔ ye papa Manasɛ yɛle ala la.+
21 Ɔhɔle zo ɔluale ndenle mɔɔ ye papa luale nu la amuala anu, na ɔhɔle zo ɔzonlenle kyibadeɛ ananze ne mɔ mɔɔ ye papa zonlenle bɛ la na ɔbɔle ɔ ti aze ɔmaanle bɛ.+
22 Ɔti ɔkpole Gyihova, ye nenyia mɔ Nyamenle ne, na yeanlua Gyihova adenle ne anu.+
23 Awieleɛ bɔkɔɔ ne, Emɔn sonvolɛma vale ɔ nwo adwenle ɛtane na bɛhunle belemgbunli ne wɔ ɔdaye mumua ne ye sua nu.
24 Noko menli mɔɔ wɔ azɛlɛ ne azo la hunle bɛdabɛ mɔɔ bɛvale Belemgbunli Emɔn anwo adwenle ɛtane ne la amuala, na bɛyɛle ɔ ra Dwosaya belemgbunli bɛziele ɔ gyakɛ anu.+
25 Na Emɔn anwo tetedwɛkɛ mɔɔ ɛha la, mɔɔ ɔyɛle la, asoo bɛtɛkɛlɛle bɛ wɔ Dwuda arelemgbunli ne mɔ mekɛ zo tetedwɛkɛ buluku ne anu ɔ?
26 Ɔti bɛziele ye wɔ ye nla ne mɔɔ wɔ Ɛza tola ne anu la anu,+ na ɔ ra Dwosaya+ ralile ye agya lile belemgbunli.
Ɔbodwɛkɛ
^ Hibulu aneɛ nu, “ɛleka mɔɔ wɔ anwuma.”
^ Nea Edwɛkɛbohilelɛ.
^ Nea Edwɛkɛbohilelɛ.
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Anzɛɛ “suasivoma nyɛma.”
