Awolɛyelɛ 1:1-22
א [Aleph]*
1 Suakpole mɔɔ ɛnee menli ɛyi zo la, nea kɛ ɛnɛ yeha ɔ ngome ɛ!+
Ɔdaye mɔɔ ɛnee ɔlɛ menli dɔɔnwo ɔtɛla maanle maanle ne mɔ la, nea kɛ yeyɛ kɛ kunlavolɛ a!+
Ɔdaye mɔɔ ɛnee ɔle belemgbunli ara raalɛ wɔ maanzinli ne mɔ anu la, nea kɛ bɛlɛmaa yeayɛ akɛlɛ gyima a!+
ב [Beth]
2 Aleɛ dwo a ɔsu kpalɛ,+ na ɔ nye anwo le monle ngome.
Ye kulovolɛma amuala, ko bɔbɔ ɛnle ɛkɛ ne mɔɔ ɔbakyekye ɔ rɛle a.+
Ɔ gɔnwo mɔ kɔsɔɔti ɛye ye ɛmaa;+ bɛhakyi ye kpɔvolɛma.
ג [Gimel]
3 Amaneɛnwunlɛ nee nyanelilɛ ɛmaa Dwuda ɛhɔ akɛlɛzonlenlɛ nu.+
Ɔwɔ kɛ ɔtɛnla maanle maanle ne mɔ avinli;+ ɔnnyia ɛleka mɔɔ ɔbalie ɔ menle a.
Menli mɔɔ yɛ ye kpɔdekpɔde la kɔsɔɔti asa ɛha ye wɔ ye anwongyelelɛ nu.
ד [Daleth]
4 Zayɔn ndenle ne mɔ ɛlɛdi nyane, ɔluakɛ awie ɛmba ɛvoyialilɛ ne.+
Bɛzɛkye ye nlenkɛ mgbole ne mɔ amuala;+ ye ɛsɔfoma ne mɔ ɛlɛkponle.
Ye mbɛlɛra ne mɔ ɛlɛdi alɔbɔlɛ, na ɔlɛdi nyane kpole.
ה [He]
5 Ye sɛkyevolɛma a kɛkala le ɔ menle* a; ye kpɔvolɛma ne anwo ɛdɔ bɛ bɔkɔɔ.+
Ɔluakɛ Gyihova ɛmaa yeli alɔbɔlɛ ɔlua ye mɛladonlɛ dɔɔnwo ne ati.+
Kpɔvolɛ ne ɛva ɔ mra ɛhɔ akɛlɛzonlenlɛ nu.+
ו [Waw]
6 Zayɔnoma* anyunlunyia kɔsɔɔti ɛminli.+
Ye mgbanyima le kɛ weɛlɛ nyinli mɔɔ ɛnnyia adidileka la,Anwosesebɛ ɛnle bɛ ɛdialɛ nu, wɔ mɔɔ doa bɛ kye bɛ la anyunlu.
ז [Zayin]
7 Wɔ Gyɛlusalɛm amaneɛnwunlɛ nee sua mɔɔ ɔnlɛ ye ɔnla nu la anu,Ɔkakye ninyɛne mɔɔ sonle bolɛ mɔɔ ɛnee ɔlɛ bɛ dɛba ne la amuala.+
Mekɛ mɔɔ ye maanlema dɔle bɛ kpɔvolɛma asa anu na ɔnlɛ boavolɛ biala la,+Kpɔvolɛma nwunle ye na bɛzelele ye* wɔ ye azedɔlɛ ne anwo.+
ח [Heth]
8 Gyɛlusalɛm ɛyɛ ɛtane kpole.+
Ɛhye ati a yehakyi kyibadeɛ la.
Bɛdabɛ mɔɔ ɛnee bɛdi ye eni la kɔsɔɔti bu ye kɛ kyibadeɛ, ɔluakɛ bɛnwu kɛ ɔ nwo la zo.+
Ɔdaye mumua ne ɔkponle+ na ɔfa nyiane ɔkɔ.
ט [Teth]
9 Ye nyɛleɛ evinli ne ɛha ye adɛladeɛ ne mɔ anu.
Yeandwenle mɔɔ bado ye kenle bie la anwo.+
Ye azedɔlɛ ne yɛ azibɛnwo; ɔnlɛ awie mɔɔ bakyekye ɔ rɛle a.
O Gyihova, nea me amaneɛnwunlɛ, ɔluakɛ kpɔvolɛ ne ɛmaa ɔ nwo zo.+
י [Yod]
10 Kpɔvolɛ ne ɛva ɔ sa ɛdo ye ninyɛne mɔɔ sonle bolɛ la kɔsɔɔti azo.+
Yenwu kɛ maanle maanle ne mɔ ɛra ye ɛzonlenlɛsua ne anu,+Bɛdabɛ mɔɔ ɛhanle kɛ bɛmmaba wɔ asafo ne anu la.
כ [Kaph]
11 Ye menli ne mɔ amuala ɛlɛkponle; bɛlɛkpondɛ aleɛ.+
Bɛva bɛ ninyɛne mɔɔ sonle bolɛ la bɛzenza aleɛ, amaa bɛadɛnla ngoane nu.
O Gyihova, nea na nwu ye kɛ meyɛ kɛ raalɛ* mɔɔ nvasoɛ ɛnle ɔ nwo zo la.
ל [Lamed]
12 Bɛdabɛ mɔɔ bɛse adenle ne azo la kɔsɔɔti, ɔnvale bɛ nwo ɔ?
Bɛnlea na bɛnwu ye!
Asoo nyane bie tɛla nyane ne mɔɔ hanle me,Mɔɔ Gyihova maanle menwunle ye wɔ ye ɛya wuluwulu kenle ne anu la ɔ?+
מ [Mem]
13 Yemaa senle vi anwuma ɛrayela me mbowule,+ na yezɛkye nuhua ko biala.
Yeva avonle yezua me gyakɛ ɛhane; yemaa mezia me nzi.
Yemaa meyɛ raalɛ mɔɔ bɛkpo ye.
Me nwo to me wɔ alehyenlɛ ne anu amuala.
נ [Nun]
14 Yekyekye me mɛladonlɛ ne mɔ kɛ gyɛnvayile la, ɔvale ɔ sa a ɔkyekyele a.
Yeva yedo me kɔme zo, na me anwosesebɛ ɛwie.
Gyihova ɛva me ɛwula menli mɔɔ mengola bɛ la asa anu.+
ס [Samekh]
15 Gyihova ɛvoa me menli mɔɔ lɛ anwosesebɛ la kɔsɔɔti ɛvi me nwo.+
Yevɛlɛ ayia mɔɔ tia me la kɛ bɛrali me mgbavolɛ ne mɔ anwo zo konim.+
Gyihova ɛtietia Dwudama* anwo zo wɔ kuma mɔɔ bɛtwihwi nwanye wɔ nu la anu.+
ע [Ayin]
16 Ɛhye mɔ ati a melɛsu a;+ monle ɛbia me takaa.
Ɔluakɛ awie mɔɔ bakyekye me rɛle anzɛɛ ɔbakpɔda me* la ɛmbikye me.
Me mra mrenyia ɛnlɛ anyelazo, ɔluakɛ kpɔvolɛ ne ɛli yɛ nwo zo konim.
פ [Pe]
17 Zayɔn ɛdɛlɛ ɔ sa nu;+ ɔnlɛ awie mɔɔ bakyekye ɔ rɛle a.
Gyihova ɛha ɛhile bɛdabɛ mɔɔ bɛbɔ Gyekɔbo bɛyia la amuala kɛ bɛyɛ ye kpɔvolɛma.+
Gyɛlusalɛm ɛhakyi kyibadeɛ ɛmaa bɛ.+
צ [Tsade]
18 Gyihova di benle,+ ɔluakɛ mehakyi me nzi mezi ye mɛla ne mɔ.*+
Menli kɔsɔɔti, bɛdie na bɛnwu me nyane.
Me mbɛlɛra nee me mgbavolɛ ɛhɔ akɛlɛzonlenlɛ nu.+
ק [Qoph]
19 Menvɛlɛle me kulovolɛma, noko bɛyele me bɛmaanle.+
Me ɛsɔfoma nee me mgbanyima wule suakpole ne azo,Wɔ mekɛ mɔɔ bɛlɛkpondɛ aleɛ amaa bɛadɛnla ngoane nu la.+
ר [Resh]
20 O Gyihova, nea, mewɔ anwongyelelɛ kpole nu.
Me kunlu* ɛlɛtete me.
Me ahonle ɛlɛdi nyane, ɔluakɛ mede atua bɔkɔɔ.+
Konle dadeɛ ɛhu me mra wɔ alienwo; na sua nu noko menli ɛwu ɛkɛ.+
ש [Shin]
21 Menli ɛde me ɛkponlenlɛ ne; awie ɛnle ɛkɛ mɔɔ ɔbakyekye me rɛle a.
Me kpɔvolɛma kɔsɔɔti ɛde me amaneɛnwunlɛ ne.
Bɛlɛdi fɛlɛko, ɔluakɛ ɛdawɔ a ɛyɛle a.+
Kenle ko dedee ɛbayɛ mɔɔ wɔbɔ ɛwɔkɛ kɛ ɛbava wɔayɛ bɛ la.+ Kenle zɔhane bɛbayɛ kɛ medame la.+
ת [Taw]
22 Maa bɛ ɛtane kɔsɔɔti ɛdwu ɛ nyunlu, na ɛ nee bɛ ɛli ye wɔ atisesebɛ nu,+Kɛmɔ me mɛladonlɛ ne mɔ amuala ati ɛ nee me ɛli ye atisesebɛ nu la.
Ɔluakɛ me ɛkponlenlɛ ne zonle, yɛɛ me ahonle ɛlɛdi nyane.
Ɔbodwɛkɛ
^ Tile 1-4 la le awolɛyelɛ mɔɔ bɛvale Hibulu ngɛlɛleramgbɔkɛ ne mɔ a bɛhyehyɛ a.
^ Hibulu aneɛ nu, “ɔ ti.”
^ Hibulu aneɛ nu, “Zayɔn ara raalɛ ne.”
^ Anzɛɛ “bɛgolole ɔ nwo.”
^ Ɛhye gyi ɛkɛ maa Gyɛlusalɛm.
^ Hibulu aneɛ nu, “Dwuda ara raalɛ ne mɔɔ ɛnze nrenyia la.”
^ Anzɛɛ “me ɛkɛla.”
^ Hibulu aneɛ nu, “ɔ nloa.”
^ Hibulu aneɛ nu, “anyalɛ.”
