Awolɛyelɛ 2:1-22
א [Aleph]
2 Nea kɛzi Gyihova ɛva ye ɛya ne ɛheda Zayɔnoma* anwo zo kɛ amungu a!
Yevuandi Yizilayɛ anwofɛlɛko ne yevi anwuma yedo aze.+
Yeangakye ɔ gyakɛ abo ebia ne+ wɔ ye ɛya kenle ne.
ב [Beth]
2 Gyihova ɛme Gyekɔbo tɛnlabelɛ ne mɔ kɔsɔɔti, ɔ kunlu anyelɛyela ye fee.
Yebubu Dwuda* aranemgbole ne mɔ yegua wɔ ye ɛyavalɛ nu.+
Yedo ye aze na yemaa belemgbunlililɛ ne nee ye mgbanyima anyunlu ɛgua aze.+
ג [Gimel]
3 Yeva ɛya kpole yebubu Yizilayɛ anwosesebɛ* kɔsɔɔti yegua.
Mɔɔ kpɔvolɛ ne tetale yɛ la yeamboa yɛ,+Na ɔzɔle kɛ senle mɔɔ yela debie biala mɔɔ ɛbɔ ye ɛyia la wɔ Gyekɔbo anu.+
ד [Daleth]
4 Yekpo* ye ɛda ne kɛ kpɔvolɛ; yeziezie ɔ sa fema ne kɛ sɛkyevolɛ;+Yehu bɛdabɛ mɔɔ yɛ nye die bɛ nwo la amuala.+
Na yewola ye ɛya ne kɛ senle+ la yegua Zayɔnoma ɛdanlɛsua ne azo.+
ה [He]
5 Gyihova ɛyɛ kɛ kpɔvolɛ;+Yeme Yizilayɛ.
Yeme ye tawa ne mɔ amuala;Yezɛkye ye aranemgbole ne mɔ amuala.
Na yemaa Dwudama* nyanelilɛ nee bɛ awolɛyelɛ ɛyɛ kpole.
ו [Waw]
6 Yebubu ye kpɔda ne mɔ dwɔkɔdwɔkɔ+ kɛ tola nu ebuo.
Yemaa ye ɛvoyialilɛ ɛra awieleɛ.*+
Gyihova ɛmaa bɛ rɛle ɛvi ɛvoyialilɛ nee ɛnwomenlelielɛ kenle wɔ Zayɔn,Na wɔ ye ɛya kpole ne anu, yeambu belemgbunli nee ɛsɔfo.+
ז [Zayin]
7 Gyihova ɛkpo ye afɔlemokyea ne;Yɛɛ yekpo ye ɛzonlenlɛsua ne.+
Yeva ye tawa mgbole ne bane ne mɔ yewula kpɔvolɛ ne asa anu.+
Bɛkpogya bɛ ne zo wɔ Gyihova sua nu ɛkɛ+ ne kɛ ɛvoyialilɛ kenle la.
ח [Heth]
8 Gyihova ɛzi kpɔkɛ kɛ ɔsɛkye Zayɔnoma bane ne.+
Yeza ɛzuzunyɛma ne anu.+
Ɔtɛyele ɔ sa ɔtɛfile ɛzɛkyelɛ nwo.
Ɔmaa aranemgbole nee bane di nyane.
Bɛ anwosesebɛ ɛwie.
ט [Teth]
9 Ye nlenkɛ mgbole ne mɔ ɛmi ɛhɔ azɛlɛ ne abo.+
Yezɛkye mbulalɛ mɔɔ gua ye nlenkɛ mgbole ne mɔ anzi la na yebubu nu.
Ye belemgbunli ne nee ye mgbanyima wɔ maanle maanle ne mɔ anu.+
Mɛla* biala ɛnle ɛkɛ; ye ngapezoma bɔbɔ, bɛnnyia ɛnyelɛzodeɛnwunlɛ biala bɛnvi Gyihova ɛkɛ.+
י [Yod]
10 Zayɔn mgbanyima dede azɛlɛ ne anwo ngungoonwu.+
Bɛfa ndɛtɛlɛ bɛgua bɛ ti zo na bɛkeda ɛrele.+
Gyɛlusalɛm mbɛlɛra ɛsisi bɛ ti aze.
כ [Kaph]
11 Me nye ɛvɛ wɔ monle ɛhwinlɛ nu.+
Me kunlu* ɛlɛtete me.
Me ɛbolɛ ɛde,* ɔlua me menli ne azedɔlɛ ne ati,+Ɔluakɛ ngakula nee mbɔdɔma anye zo ɛbulu bɛ wɔ suakpole ne gua ne mɔ azo.+
ל [Lamed]
12 Bɛbiza bɛ mame mɔ kɛ, “Aleɛ nee nwanye wɔ nienwu?”+
Bɛ nye zo ɛbulu bɛ kɛ awie mɔɔ bɛboda ye wɔ suakpole ne gua ne mɔ azo la,Bɛ ngoane fi bɛ nu wɔ bɛ mame mɔ asa anu.
מ [Mem]
13 O Gyɛlusalɛmma, duzu a menva menyɛ daselɛ mengile bɛ a,Anzɛɛ duzu a menva wɔ mendo nwo a?
O Zayɔnoma,* duzu a menva bɛ mendo nwo, amaa meakyekye bɛ rɛle a?
Ɔluakɛ bɛ azedɔlɛ ne le kpole kɛ nyevile la.+ Nwane a kɛhola kɛyɛ bɛ ayile a?+
נ [Nun]
14 Adalɛ nee mɛlɛbɛla ɛnyelɛzodeɛnwunlɛ a wɔ ngapezoma ne nwunle ye maanle wɔ a,+Saa bɛlale wɔ nvonleɛ ne mɔ ali a, anrɛɛ wɔangɔ akɛlɛzonlenlɛ nu,+Emomu bɛhanle adalɛ ɛnyelɛzodeɛnwunlɛ nee mɛlɛbɛla nrɛlaleɛ a bɛhilele wɔ a.+
ס [Samekh]
15 Menli mɔɔ se adenle ne azo la kɔsɔɔti bɔ bɛ sa nu golo ɛ nwo.+
Ɔyɛ bɛ azibɛnwo na bɛbɔ nvonloma+ bɛkpusu bɛ ti wɔ Gyɛlusalɛmma anwo na bɛka kɛ:
“Tɛ sua ne mɔɔ bɛka nwolɛ edwɛkɛ kɛ, ‘Ye kɛnlɛma di munli, azɛlɛ ye kɔsɔɔti anyelielɛ’ la ɛne?”+
פ [Pe]
16 Wɔ kpɔvolɛma kɔsɔɔti ɛbuke bɛ nloa wɔ ɛ nwo.
Bɛbɔ nvonloma na bɛtwi bɛ gye bɛka kɛ: “Yɛme ye bɔkɔɔ.”+
Kenle ne mɔɔ ɛnee yɛlɛkendɛ la ɛne!+ Yedwu, na yɛnwu ye!+
ע [Ayin]
17 Gyihova ɛyɛ mɔɔ ɔyɛle ye adwenle kɛ ɔbayɛ la;+ yeli ye edwɛkɛ zo,+Mɔɔ ɔhanle ye dɛbadɛba la.+
Yebubu ye yegua, ɔ kunlu anyelɛyela ye.+
Yemaa wɔ kpɔvolɛ ne ɛli ɛ nwo zo konim na ɔ nye ɛlie; yekpogya wɔ sɛkyevolɛma anwosesebɛ* zo.
צ [Tsade]
18 O Zayɔnoma bane, bɛ ahonle su fɛlɛ Gyihova.
Maa monle ɛze kɛ azudenle alehyenlɛ nee aledwolɛ.
Mmadie ɛ menle fee, mmamaa ɛ nye* die ɔ menle.
ק [Qoph]
19 Dwazo! Su nɔsolɛ nu, mekɛ mɔɔ ɛzinzalɛ mekɛ ne kɛbɔ ɔ bo la.
Wola wɔ ahonle gua kɛ nzule la wɔ Gyihova anyunlu.
Ɛ mra ngoanelielɛ ti, maa ɛ sa zo kile ye,Ɛhɔne ti, bɛ nye zo ɛbulu bɛ wɔ awɔdenle biala azo.*+
ר [Resh]
20 O Gyihova, nea na nwu ahenle mɔɔ ɛ nee ye ɛli ye atisesebɛ nu la.
Asoo ɔwɔ kɛ mraalɛ di bɛdabɛ mumua ne bɛ kunlu mralɛ, bɛ mra mɔɔ bɛte kpɔkɛ la,+Anzɛɛ ɔwɔ kɛ bɛku ɛsɔfoma nee ngapezoma wɔ Gyihova ɛzonlenlɛsua ne anu ɔ?+
ש [Shin]
21 Ngakula nee mgbanyinli avunli gugua awɔdenle ne mɔ azo.+
Me mbɛlɛra nee me mgbavolɛ ɛwu konle dadeɛ nloa.+
Wɔhu bɛ wɔ wɔ ɛya kenle ne anu; wɔhu bɛ mɔɔ ɛ kunlu anyelɛyela wɔ a.+
ת [Taw]
22 Ɛvɛlɛle mɔɔ ka me ɛzulolɛ la ɛvile ɛleka ngakyile ɛmaanle bɛrale kɛ asɛɛ ɛvoyialilɛ kenle la.+
Wɔ Gyihova ɛya kenle ne anu, awie biala anvi ɛsalɛ anzɛɛ annyia ngoane;+Bɛdabɛ mɔɔ menwole bɛ na mentetele bɛ la, me kpɔvolɛ ne ɛbɔ bɛ bo zo bɔkɔɔ.+
Ɔbodwɛkɛ
^ Hibulu aneɛ nu, “Zayɔn ara raalɛ ne.”
^ Hibulu aneɛ nu, “Dwuda ara raalɛ ne.”
^ Hibulu aneɛ nu, “mɛne.”
^ Anzɛɛ “Yezua.”
^ Hibulu aneɛ nu, “Dwuda ara raalɛ ne.”
^ Anzɛɛ “ɛzɛkye.”
^ Anzɛɛ “Adehilelɛ.”
^ Hibulu aneɛ nu, “Bɛwola me ɛbolɛ bɛgua aze.”
^ Hibulu aneɛ nu, “anyalɛ.”
^ Hibulu aneɛ nu, “Zayɔn ara raalɛ mɔɔ ɛnze nrenyia.”
^ Hibulu aneɛ nu, “mɛne.”
^ Hibulu aneɛ nu, “ɛ nye ara raalɛ ne.”
^ Hibulu aneɛ nu, “ayia zo.”
