Awolɛyelɛ 3:1-66
-
Gyɛlɛmaya da ye nganeɛdelɛ nee anyelazo ali
א [Aleph]
3 Mame a mele nrenyia ne mɔɔ ye ɛyavalɛ kpɔma ne ati menwu amaneɛ la.
2 Yedu me na yemaa melua awozinli nu, tɛ wienyi nu.+
3 Nɔhalɛ nu, dahuu ɔ sa gyi me nwo wɔ alehyenlɛ biala anu.+
ב [Beth]
4 Yemaa menwa na me nwonane ɛwie;Yebubu me mbowule nu.
5 Yelie me nwo bane; yemaa pɔezen ɛnwonle+ nee ngyegyelɛ ɛbɔ me ɛyia.
6 Yetinlitinli me nwo zo yemaa medɛnla awozinli nu, kɛ mowuamra ala la.
ג [Gimel]
7 Yelie me nwo bane, amaa meangola nriandi;Yeva kɔbele kyeenyi ɛlomboɛ yegua me.+
8 Saa mesu ɛsesebɛ kɛ mekpondɛ moalɛ a, ɔndie me asɔneyɛlɛ ne.*+
9 Yeva awolɛ mɔɔ bɛkpukekpuke la yedua me ndenle;Yemaa me ndenle ɛhyeɛhyea.+
ד [Daleth]
10 Yeyɛ kɛ ezizile la yebu yezia me, yeyɛ kɛ awenade mɔɔ ɛhɔvea la.+
11 Yepia me yevi adenle ne azo na yetete me nu azinli azinli;*Yemaa medɔ mgbane.+
12 Yekpo* ye ɛda ne, yedende ye ɛda baka ne wɔ me nwo zo.
ה [He]
13 Yeye ɛda mbaka* wɔ ye kodoku ne anu yeva yewowɔ me kilenzia ne anu.
14 Me nwo ɛyɛ ɛzelekɛ ɛmaa menli kɔsɔɔti, bɛfa me bɛto edwɛne alehyenlɛ biala.
15 Yemaa ninyɛne ɛnwonle ɛyi me ko na menlo ɛnwonle.+
ו [Waw]
16 Yeva awozaka yebubu me gye;Yezuhu me yedo nzonle nu.+
17 Ɛmmaa mennyia anzodwolɛ; me rɛle ɛvi debie kpalɛ.
18 Ɔti meka kɛ: “Me anyunlunyia nee me anyelazo mɔɔ wɔ Gyihova anu la ɛwie.”
ז [Zayin]
19 Kakye me amaneɛnwunlɛ nee sua mɔɔ menlɛ ye la,+ ɛnwonle ne yɛɛ pɔezen ɛnwonle ne.+
20 Ɛbahakye na wɔara me nwo ɛkɛ wɔaraboa me.+
21 Mekakye ɛhye wɔ me ahonle nu; ɛhye ati a mebazi abotane meahendɛ wɔ la.+
ח [Heth]
22 Gyihova ɛlɔlɛ kpundii ne ati a yɛtɛminlinle a,+Ɔluakɛ ye anwunvɔnezelɛ ɛnwie.+
23 Bɛyɛ fofolɛ alehyenlɛ biala;+ wɔ nɔhalɛlilɛ zonle.+
24 Meha kɛ,* “Gyihova le me kyɛfoa,+ ɛhye ati a mebazi abotane meahendɛ ye la.”+
ט [Teth]
25 Gyihova le kpalɛ maa awie mɔɔ fa ɔ nye to ɔ nwo zo la,+ awie* mɔɔ kɔ zo kpondɛ ye la.+
26 Ɔle kpalɛ kɛ ɛkɛyɛ koonwu* ɛkɛhendɛ+ Gyihova ngoanelielɛ ne.+
27 Ɔle kpalɛ kɛ nrenyia kɛzoa gyɛnvayile ne wɔ ye mgbavolɛ nu.+
י [Yod]
28 Saa Ɔfa adesoa ɛhye ɔsoa ye a, maa ɔ ngome ɔdɛnla aze koonwu.+
29 Maa ɔhwi ɔ nloa aze;+ bie a anyelazo wɔ ɛkɛ.+
30 Maa ɔva ɔ nzo ɔmaa ahenle mɔɔ bɔ nu la; maa ɔdie ye aholoba ne amuala.
כ [Kaph]
31 Ɔluakɛ Gyihova ɛnrɛkpo yɛ dahuu.+
32 Yemaa yɛli nyane ɛdeɛ, noko ɔbaze yɛ anwunvɔne kɛ mɔɔ ye ɛlɔlɛ kpundii ne bebelebe de la.+
33 Ɔluakɛ ɔnle ye ahonle nu kɛ ɔmaa alesama anwu amaneɛ anzɛɛ ɔkile bɛ nyane.+
ל [Lamed]
34 Kɛ awie bɛtɛ azɛlɛ ye azo pilizama kɔsɔɔti wɔ ɔ gyakɛ abo,+
35 Kɛ bɛnrɛbua awie ndɛne fɔɔnwo wɔ Anwuma Anwumanli ne anyunlu,+
36 Kɛ awie sisi sonla wɔ ye edwɛkɛlilɛ nu—Gyihova ɛnlie ninyɛne ɛhye mɔ ɛndo nu.
מ [Mem]
37 Akee, nwane a kola ka edwɛkɛ maa ɔba nu mɔɔ Gyihova ɛtɛkanle a?
38 Ninyɛne ɛtane nee ninyɛne mgbalɛ,Ɛmbɔ nu ɛnvinde Anwuma Anwumanli ne anloa anu.
39 Duzu ati a ɔwɔ kɛ sonla mɔɔ de ngoane nu la tendɛ ɔ nzo abo wɔ mɔɔ vi ye ɛtane nu kɛra la anwo ɛ?+
נ [Nun]
40 Bɛmaa yɛnleɛnlea yɛ ndenle nu na yɛvedevede nu,+ na yɛzia yɛhɔ Gyihova ɛkɛ.+
41 Bɛmaa yɛmaa yɛ ahonle nee yɛ sa zo yɛhile Nyamenle wɔ anwuma:+
42 “Yɛyɛ ɛtane yɛɛ yɛde atua,+ na ɛtɛfale ɛtɛkyɛle yɛ.+
ס [Samekh]
43 Wɔva ɛya wɔzi yɛ adenle;+Wɔvoa yɛ ndinlizo* wɔhu yɛ mɔɔ ɛ kunlu anyelɛyela wɔ a.+
44 Wɔva amungu wɔzi* ɛ nwo ɛkɛ ne ɛralɛ adenle, amaa yɛ asɔneyɛlɛ anva nu amba.+
45 Wɔmaa yɛyɛ ewula nee fovolɛ wɔ maanle maanle ne mɔ anu.”
פ [Pe]
46 Yɛ kpɔvolɛma kɔsɔɔti tendɛ tia yɛ.+
47 Ɛzulolɛ nee ahuma, ɛzɛkyelɛ nee azedɔlɛ ɛva yɛ aze.+
48 Me menli ne azedɔlɛ ne ati, me nye la monle nu.+
ע [Ayin]
49 Ɛzunlɛ ala a mesu a, menrɛgyakyi,+
50 Kɔkpula kɛ Gyihova vi anwuma kɛzi ɔ ti aze kɛnwu ye.+
51 Ɔlua me suakpole ne amra mraalɛ ne mɔ ati, me nye ɛmaa meli nyane.+
צ [Tsade]
52 Mgbane gyɛne nu ala, me kpɔvolɛma ɛhye me kɛ aloma la.
53 Bɛpɛ me ngoane zo wɔ kuma nu; bɛtoto awolɛ bɛbɔ me.
54 Nzule bule vale me ti zo na menganle kɛ: “Mewie!”
ק [Qoph]
55 O Gyihova, membɔle wɔ duma menvɛlɛle wɔ wɔ kuma ne abo lɔ.+
56 Tie me ne; mmatuodua ɛ nzo kɛ ɛnrɛdie me ɛzunlɛ, ɛnrɛlie me.
57 Ɛhwenle ɛbikyele me wɔ kenle mɔɔ menvɛlɛle wɔ la. Ɛhanle kɛ: “Mmasulo.”
ר [Resh]
58 O Gyihova, wɔli me edwɛkɛ wɔmaa me, wɔlie me ngoane.+
59 O Gyihova, wɔnwu ɛtane mɔɔ bɛva bɛyɛ me la, mesɛlɛ wɔ bua ndɛne fɔɔnwo maa me.+
60 Wɔnwu bɛ nzenralɛlilɛ ne amuala, adwenle ɛtane mɔɔ bɛva ye me nwo la amuala.
ש [Sin] anzɛɛ [Shin]
61 O Gyihova, wɔde bɛ aholoba ɛbɔlɛ ne, adwenle ɛtane ne mɔɔ bɛva ye me nwo la amuala,+
62 Menli mɔɔ dwazo tia me la anloa anu edwɛkɛ nee bɛ nvonloma ɛbɔlɛ tia me alehyenlɛ ne anu amuala.
63 Nea bɛ; saa bɛde aze anzɛɛ bɛgyi nzisi a, bɛgolo me nwo wɔ bɛ edwɛne ɛdolɛ nu!
ת [Taw]
64 O Gyihova, ɛbanlea bɛ nyɛleɛ nwo wɔadua bɛ kakɛ.
65 Munzule mɔɔ ɛbamaa yeado bɛ la a le kɛ ɛbamaa bɛ ahonle ayɛ se.
66 Gyihova, ɛbava ɛya wɔavoa bɛ na wɔazɛkye bɛ wɔavi aleɛabo.
Ɔbodwɛkɛ
^ Anzɛɛ “ɔsi me asɔneyɛlɛ ne adenle.”
^ Anzɛɛ ɔkola ɔkile, “yemaa meyɛ mgbane.”
^ Anzɛɛ “Yezua.”
^ Hibulu aneɛ nu, “mralɛ mrenyia.”
^ Anzɛɛ “Me ɛkɛla se.”
^ Anzɛɛ “ɛkɛla.”
^ Anzɛɛ “ɛkɛzi abotane.”
^ Anzɛɛ “Wɔdoa yɛ.”
^ Anzɛɛ “wɔdua.”
