Awolɛyelɛ 4:1-22
א [Aleph]
4 Nea kɛzi nvutuke kpalɛ ne ɛlu, nvutuke ne mɔɔ ta la!+
Nea kɛzi awolɛ nwuanzanwuanza ne mɔ*+ ɛkponde awɔdenle ne mɔ azo a!+
ב [Beth]
2 Zayɔn amra mrenyia mɔɔ ɛnee sonle bolɛ kɛ nvutuke mɔɔ bɛdu nuhua evinli la,Nea kɛzi bɛbu bɛ kɛ mbuakɛ,Nwovolɛ asa anloa gyima ɛ!
ג [Gimel]
3 Ɛzonlɛ bɔbɔ maa bɛ mra nyɛfonlɛ fa di bɛ adane,Noko me menli ne ati ɛyɛ se+ kɛ fienemgbole nu soholo.+
ד [Daleth]
4 Nzuhɔne maa kakula mɔɔ no nyɛfonlɛ la atafinlima beta ye talɛ.*
Ngakula sɛlɛzɛlɛ aleɛ,+ noko awie ɛmmaa bɛ bie.+
ה [He]
5 Bɛdabɛ mɔɔ ɛnee bɛdi aleɛ kpalɛ la, ɛhɔne ku bɛ wɔ awɔdenle ne mɔ azo.+
Bɛdabɛ mɔɔ bɛvale ɛdanlɛ kpalɛ ɛhedalɛ bɛtetele bɛ la+ ɛnɛ da fovolɛ zo.
ו [Waw]
6 Me menli ne anzohwenlɛ le kpole tɛla Sodɔm ɛtane nwo anzohwenlɛ ne,+Bɛzɛkyele ye arɛlevilɛ nu, awie biala amboa ye.+
ז [Zayin]
7 Ɛnee ye Nazalaema+ anwo te tɛla ezukɔtweaba, bɛle nwohyee bɛtɛla nyɛfonzule.
Bɛbolo bɛtɛla ezukoa bolɛ kɔkɔlɛ; na ɛnee bɛle kɛ safaya mɔɔ bɛhwi nwo la.
ח [Heth]
8 Akee bɛlu bɛdɛla emunlike;Bɛlua awɔdenle ne mɔ azo a, bɛnnwu bɛ menli holɛ.
Bɛ nwonane ɛbetɛbeta bɛ mbowule ne mɔ anwo;+ yeyɛ kɛ baka wulera la.
ט [Teth]
9 Bɛdabɛ mɔɔ bɛvale konle dadeɛ bɛhunle bɛ la ɛdeɛ ne le kpalɛ tɛla bɛdabɛ mɔɔ ɛhɔne maanle bɛwule la,+Bɛdabɛ mɔɔ bɛannyia aleɛ bɛanli la ati bɛwule kɛ asɛɛ bɛva dadeɛ bɛwɔ bɛ kunlu bɛmaa yevinde la.
י [Yod]
10 Mraalɛ mɔɔ bɛ kunlu yelɛyela bɛ bɔbɔ la ɛva bɛ sa ɛdo bɛ kunlu mralɛ.+
Bɛrayɛle bɛ nyanelilɛ aleɛ wɔ me menli ne ɛzɛkyelɛ mekɛ nu.+
כ [Kaph]
11 Gyihova ɛla ye ɛya ne ali;Yewola ye ɛya wuluwulu ne yegua.+
Ɔdole senle wɔ Zayɔn na ɔyelale ye adiabo ne mɔ.+
ל [Lamed]
12 Azɛlɛ ye azo arelemgbunli nee bɛdabɛ mɔɔ bɛde azɛlɛ mɔɔ kye aleɛ kɔsɔɔti azo la anlie anliKɛ sɛkyevolɛ nee kpɔvolɛ kɛwolo Gyɛlusalɛm nlenkɛ mgbole ne mɔ anu.+
מ [Mem]
13 Ɔlua ye ngapezoma ne mɔ ɛtane, ye ɛsɔfoma ne mɔ nvonleɛ ti,+Bɛdabɛ a bɛhanle tenlenema mɔɔ wɔ ye avinli la mogya bɛguale a.+
נ [Nun]
14 Bɛluoluale awɔdenle ne mɔ azo kɛ anyezinlirama+ la.
Mogya ɛgua bɛ nwo evinli,+Ɔti awie biala ɛngola ɛnzɔ bɛ adɛladeɛ nu.
ס [Samekh]
15 Bɛtea nu bɛse bɛ kɛ: “Bɛvi ɛke bɛhɔ! Bɛ nwo ɛnde! Bɛvi ɛke bɛhɔ! Bɛvi ɛke bɛhɔ! Bɛmmasɔ yɛ!”
Ɔluakɛ bɛnlɛ azua, bɛluolua nu.
Menli ɛha ye wɔ maanle maanle ne mɔ anu kɛ: “Bɛnrɛhola bɛ nee yɛ ɛnrɛdɛnla ɛke.*+
פ [Pe]
16 Gyihova mumua ne a ɛbɔ bɛ asande a;+Bɛnrɛnyia ɔ nyunlu ɛlolɛ bieko.
Menli ɛnrɛbu ɛsɔfo ne mɔ,+ bɛnrɛze mgbanyima noko anwunvɔne.”+
ע [Ayin]
17 Kɛkala bɔbɔ, yebu yɛ nye ɔluakɛ yɛhendɛle moalɛ mgbane.+
Yɛhendɛle moalɛ yɛvile maanle mɔɔ ɛnrɛhola ɛnrɛlie yɛ la ɛkɛ ne too.+
צ [Tsade]
18 Saa yɛtu yɛ gyakɛ biala a bɛsua yɛ ɛhane+ yemɔti yɛngola yɛnvinde yɛ gua ne mɔ azo.
Yɛ awieleɛ ɛbikye; yɛ mekɛ ɛwie, ɔluakɛ yɛ awieleɛ ɛra.
ק [Qoph]
19 Menli mɔɔ doa yɛ ɛlɛkye yɛ la anwo yɛ ndɛ tɛla kɔleɛ mɔɔ lua anwomanyunlu la.+
Bɛvoanle yɛ wɔ awoka ne mɔ azo; bɛhɔle yɛ nwo nzia wɔ fienemgbole nu.
ר [Resh]
20 Yɛ bonyi nu anwoma ne, mɔɔ Gyihova ɛkpokpa ye la,+ bɛhye ye wɔ bɛ kuma kpole ne anu,+Mɔɔ yɛhanle ɔ nwo edwɛkɛ kɛ: “Yɛbadɛnla ye alubo bo wɔ maanle maanle ne mɔ avinli” la.
ש [Sin]
21 O Yidɔmma+ mɔɔ bɛde Ɛɛze azɛlɛ zo la, bɛmaa bɛ nye ɛlie na bɛli fɛlɛko.
Ɛdawɔ noko bɛbava kanrɛlɛ ne bɛamaa wɔ,+ ɛbanlo wɔabo na wɔayeye ɛ nwo.+
ת [Taw]
22 O Zayɔnoma, bɛ nvonleɛ ne anwo anzohwenlɛ ne ɛra ye awieleɛ.
Ɔnrɛva bɛ ɔnrɛhɔ akɛlɛzonlenlɛ nu bieko.+
O Yidɔmma, ɔbava ɔ nye yeazie bɛ nvonleɛ ne mɔ azo.
Ɔbamaa bɛ ɛtane ne mɔ ala ali.+
Ɔbodwɛkɛ
^ Anzɛɛ “ɛzonlenlɛ sua ne anu awolɛ ne mɔ.”
^ Ɛhye kile bɛ nloa anu anwuma.
^ Anzɛɛ “bɛnrɛdɛnla ɛke kɛ nyɛvolɛ.”
