Awolɛyelɛ 5:1-22
5 O Gyihova, kakye mɔɔ ɛdo yɛ la.
Nea na nwu yɛ anyiemgba ne.+
2 Bɛlie yɛ agyapadeɛ bɛmaa nyɛvolɛ, yɛ azua ɛyɛ menli mɔɔ vi maanle gyɛne zo la ɛdeɛ.+
3 Yɛyɛ nrisa, yɛnlɛ yɛ papa; yɛ mame mɔ ɛyɛ kɛ ahunlanvolɛ.+
4 Ɔwɔ kɛ yɛtua yɛdayɛ mumua ne yɛ nzule mɔɔ yɛno la anwo kakɛ,+ yɛɛ yɛtɔ ɛyɛne mɔɔ le yɛdayɛ mumua ne yɛ ɛdeɛ la.
5 Asɛɛ bɛdabɛ mɔɔ bɛdoa yɛ bɛlɛkye yɛ la asa ɛha yɛ;Yɛvɛ, noko bɛmmaa yɛnlie yɛ menle.+
6 Yɛdɛlɛ yɛ sa nu yɛhile Yigyibiti+ nee Aselea+ amaa yɛanyia aleɛ yɛali yɛ ko ayi.
7 Yɛ nenyia mɔ mɔɔ yɛle ɛtane la ɛnle ɛkɛ ne bieko, noko bɛ nvonleɛ ne zo yɛ.
8 Ngɛkɛlɛ a kɛkala sie yɛ a; awie ɛnle ɛkɛ mɔɔ ɔbalie yɛ yeavi bɛ sa nu a.
9 Yɛfa yɛ ngoane* yɛto esiane nu kolaa na yɛanyia aleɛ yɛali,+ ɔlua bɛdabɛ mɔɔ bɛdedɛ konle dadeɛ wɔ fienemgbole ne anu la ati.
10 Ɔlua ɛhɔne kpole ne ati, yɛ nwo ɛlɔ katukatu kɛ fonlomo.+
11 Bɛgua yelɛma mɔɔ wɔ Zayɔn nee mbɛlɛra mɔɔ wɔ Dwuda azuamgbole ne mɔ azo la anyunlu aze.*+
12 Bɛkyekyele tumivolɛma asa bɛhendanle bɛ,+ yɛɛ bɛambu mgbanyima.+
13 Mgbavolɛ soa ɛdibolɛ, yɛɛ ngakula mrenyia tɔ aze wɔ mekɛ mɔɔ bɛzo ɛyɛne la.
14 Mgbanyima ne mɔ ɛvi suakpole ne anlenkɛ kpole ne anloa;+ mgbavolɛ ɛmbɔ bɛ edwɛne ne.+
15 Fɛlɛkolilɛ ɛvi yɛ ahonle nu; yɛ agolezilɛ ɛhakyi nyanelilɛ.+
16 Yɛ abotile vi yɛ ti zo ɛdɔ aze. Yɛ gyakɔ, ɔluakɛ yɛyɛ ɛtane!
17 Ɛhye ati yɛ ahonle di nyane,+Na ɔlua ɛhye mɔ ati, yɛ nye ɛyɛ monzomonzo,+
18 Kɛmɔ Zayɔn Boka ɛdɔ mgbane la ati;+ ɛnɛ ɛzonlɛ a duolua ɛkɛ a.
19 Noko wɔmɔ, O Gyihova, ɛde wɔ belemgbunli ebia nu dahuu.
Wɔ belemgbunli ebia ne wɔ ɛkɛ ɔvi awolɛndoazo zo kɔdwu awolɛndoazo zo.+
20 Duzu ati a ɛ rɛle ɛvi yɛ bɔkɔɔ* na wɔkpo yɛ mekɛ tendenle ɛ?+
21 O Gyihova, fa yɛ sia bɛla ɛ nwo ɛkɛ, na yɛbavi yɛ ɛhulolɛ nu yɛazia yɛara.+
Maa debie biala ɛyɛ kɛ dɛba ne la.+
22 Noko wɔkpo yɛ bɔkɔɔ.
Yɛ nwo ɛya kpole tɛbɔ wɔ nu.+