Ditilɔnomi 1:1-46
1 Ɛhye a le edwɛkɛ mɔɔ Mosisi hanle hilele Yizilayɛma kɔsɔɔti wɔ fienemgbole ne anu wɔ Dwɔdan maanzinli ne anu, wɔ ɛsɛlɛ ne mɔɔ nee Sɛfe anye bɔ zo na ɔla Peelan, Tofɛle, Leeban, Hazilɔto yɛɛ Daezahabe avinli la azo a.
2 Saa ɛfa Siyɛ Boka ne anwo wɔavi Hɔlɛbe wɔahɔ Keedɛhye-baanea+ a, ɔdi kenle 11.
3 Ɛvolɛ 40 ne+ siane 11 ne kenle mɔɔ limoa la azo, Mosisi hanle debie biala mɔɔ Gyihova hanle hilele ye kɛ ɔha ɔhile Yizilayɛma* la ɔhilele bɛ.
4 Ɔyɛle ɛhye wɔ mekɛ mɔɔ ɔlile Amɔlema Belemgbunli Saehɔn+ mɔɔ ɛnee de Hɛhyebɔn nee Beehyan Belemgbunli Ɔɔgo+ mɔɔ ɛnee de Ahyetalɔto la anwo zo konim wɔ Ɛdelɛyae+ ɔwiele la.
5 Wɔ Mowabe azɛlɛ zo wɔ Dwɔdan maanzinli nu, Mosisi hilehilele Mɛla+ ɛhye anu kɛ:
6 “Gyihova yɛ Nyamenle ne zele yɛ wɔ Hɔlɛbe kɛ, ‘Bɛdɛnla awoka ye azo bɛhyɛ somaa.+
7 Bɛhakyi bɛ nye na bɛhɔ Amɔlema+ awoka ne mɔ azo nee bɛ gɔnwo mɔ maanle maanle mɔɔ wɔ Alaba+ ɛkɛ ne la, awoka ne mɔ azo, Hyifɛla, Nɛgɛbe, nee ɛnweazo,+ Keenama azɛlɛ ne yɛɛ Lɛbanɔn*+ bɛhɔdwu azule kpole ne, mɔɔ le Yufileti+ azule ne la anloa.
8 Bɛnlea, megyakyi azɛlɛ ne medo bɛ nyunlu ɛkɛ. Bɛhɔva azɛlɛ ne mɔɔ Gyihova hanle nwolɛ ndane hilele bɛ papa mɔ, Ebileham, Ayezeke+ yɛɛ Gyekɔbo+ kɛ ɔbava yeamaa bɛ nee bɛ bo zo amra la.’+
9 “Mekɛ zɔhane menganle mengilele bɛ kɛ, ‘Me ngomekye menrɛhola bɛ nwo zo nea.+
10 Gyihova bɛ Nyamenle ne ɛmaa bɛyɛ dɔɔnwo, na ɛnɛ bɛ nwo ɛzo kɛ anwomanyunlu nwɔlɔra.+
11 Gyihova, bɛ nenyia mɔ Nyamenle ne ɛmaa bɛ dodo ne ɛyɛ mɔnwo+ apenle, na ɔyila bɛ kɛ mɔɔ yebɔ bɛ ɛwɔkɛ la.+
12 Kɛ ɔkɛyɛ na me ngomekye meazoa bɛ adesoa ne nee bɛ ngyegyelɛ ne yɛɛ bɛ butule ne ɛ?+
13 Bɛye bɛ mbusua ne mɔ anu menli mɔɔ ze nrɛlɛbɛ, bɛle badwema na bɛbɔ mɔdenle la na memkpa bɛ memaa bɛli bɛ nyunlu.’+
14 Bɛbuale me kɛ, ‘Mɔɔ ɛse yɛyɛ la le kpalɛ.’
15 Yemɔti menyele bɛ mbusua mgbanyima ne mɔ mɔɔ ze nrɛlɛbɛ na bɛbɔ mɔdenle la, na memkpale bɛ kɛ bɛ mgbanyima mɔɔ nea menli apenle apenle, menli ɛya ɛya, menli abulanlu abulanlu yɛɛ menli bulu bulu nwo zo, yɛɛ memkpale menli titili wɔ bɛ mbusua ne mɔ anu.+
16 “Mekɛ zɔhane, menganle mengilele bɛ ndɛnebuavolɛma ne kɛ, ‘Saa bɛlɛdi bɛ mediema edwɛkɛ a, bɛbua awie nee ɔ diema anzɛɛ ɔ nee ɛyɛvolɛ ndɛne fɔɔnwo.+
17 Bɛmmadi mɔguazo wɔ ndɛnebualɛ nu.+ Bɛdie koahweabane nee mgbolema edwɛkɛ.+ Bɛmmasulo sonla,+ ɔluakɛ Nyamenle a bua ndɛne a;+ na saa edwɛkɛ bie yɛ se maa bɛ a, bɛva bɛrɛlɛ me na mebali.’+
18 Mekɛ zɔhane, menganle debie biala mɔɔ ɔwɔ kɛ bɛyɛ la mengilele bɛ.
19 “Akee yɛdule yɛ bo yɛvile Hɔlɛbe na yɛluale fienemgbole kpole anu ɛzulolɛ ne+ mɔɔ bɛnwunle ye la anu wɔ mekɛ mɔɔ yɛlua adenle zo yɛlɛkɔ Amɔlema+ awoka ne mɔ azo kɛ mɔɔ Gyihova yɛ Nyamenle ne hanle hilele yɛ la, na akee yɛradwule Keedɛhye-baanea.+
20 Akee menzele bɛ kɛ, ‘Bɛra Amɔlema awoka ne mɔɔ Gyihova yɛ Nyamenle ne ɛlɛfa amaa yɛ la azo.
21 Bɛnlea, Gyihova bɛ Nyamenle ne ɛva azɛlɛ ne ɛmaa bɛ. Bɛhɔva bɛdɛnla zolɛ kɛ mɔɔ Gyihova, bɛ nenyia mɔ Nyamenle ne ɛha ɛhile bɛ la.+ Bɛmmasulo yɛɛ bɛmmamaa bɛ ahonle tu.’
22 “Noko bɛ muala bɛrazele me kɛ, ‘Bɛmaa yɛzoa menli yɛmaa bɛhɔnleɛnlea azɛlɛ ne azo bɛmaa yɛ na bɛraha adenle mɔɔ ɔwɔ kɛ yɛdua nu yɛkɔ yɛɛ azuamgbole mɔɔ yɛbahɔdo bɛ la bɛhile yɛ.’+
23 Me nye liele nzuzulɛ ne anwo, ɔti memkpale mrenyia 12, abusua biala anu sonla ko.+
24 Bɛhɔle awoka ne mɔ azo+ na bɛhɔdwule Ɛhyekɔlo Bɔnza ne anu* na bɛnleɛnleanle ɛkɛ.
25 Bɛzoale azɛlɛ ne azo ma ne bie bɛrɛlɛle yɛ, na bɛrahanle bɛhilele yɛ kɛ, ‘Azɛlɛ ne mɔɔ Gyihova yɛ Nyamenle ne ɛlɛfa amaa yɛ la le kpalɛ.’+
26 Noko bɛkpole kɛ bɛkɛhɔ ɛkɛ na bɛdele edwɛkɛ mɔɔ Gyihova bɛ Nyamenle ne hanle la anwo atua.+
27 Bɛhɔle zo bɛdendɛle bɛ nzo abo wɔ bɛ ɛdanlɛ azua ne mɔ anu na bɛhanle kɛ, ‘Kɛmɔ Gyihova kpɔ yɛ la ati a ɔyele yɛ ɔvile Yigyibiti azɛlɛ zo kɛ ɔfa yɛ yeawula Amɔlema asa anu yeamaa bɛazɛkye yɛ a.
28 Nienwu a yɛlɛkɔ a? Yɛ mediema ne mɔ maanle yɛ rɛle bɔle*+ na bɛhanle kɛ, “Menli ne le mgbole nee ndendenle tɛla yɛ, yɛɛ bɛ azuamgbole ne mɔ le mgbole yɛɛ bɛlie nwolɛ bane bɛmaa yehɔ anwuma,*+ eza yɛnwunle Anakema+ wɔ ɛkɛ.”’
29 “Ɔti menzele bɛ kɛ, ‘Bɛmmamaa bɛ ahonle tu yɛɛ bɛmmasulo bɛ.+
30 Gyihova bɛ Nyamenle ne bali bɛ nyunlu na yeaho yeamaa bɛ+ kɛ mɔɔ ɔyɛle ye wɔ Yigyibiti wɔ bɛdabɛ bɛ nye zo la.+
31 Na bɛnwunle ye wɔ fienemgbole ne anu kɛzi Gyihova bɛ Nyamenle ne viale bɛ kɛ mɔɔ nrenyia fia ɔ ra la wɔ ɛleka biala mɔɔ bɛhɔle la kɔkpula kɛ bɛrale ɛke la.’
32 Noko ɛhye mɔ amuala anzi, bɛannyia Gyihova bɛ Nyamenle ne anu diedi,+
33 yemɔ mɔɔ ɔlile bɛ nyunlu kɛ ɔkakpondɛ ɛleka yeamaa bɛayɛ bɛ azokoɛleɛ la. Ɔluale senle nu nɔɔzo, yɛɛ ɔluale amungu nu alehyenlɛ nu ɔhilele bɛ ɛleka mɔɔ ɔwɔ kɛ bɛdua la.+
34 Na Gyihova dele mɔɔ bɛhanle la na ɔvale ɛya ɔhanle ndane kɛ,+
35 ‘Awolɛndoazo munzule ɛhye anu sonla ko bɔbɔ ɛnrɛnwu azɛlɛ kpalɛ ne mɔɔ menganle ndane kɛ mebava meamaa bɛ papa mɔ la,+
36 kyesɛ Gyɛfɛna ara Keelɛbe ala. Ɔbanwu ye, yɛɛ mebava azɛlɛ ne mɔɔ ɔluale zo la meamaa ɔdaye nee ɔ mra, ɔboalekɛ ɔvale ye ahonle muala ɔlile Gyihova anzi.*+
37 (Bɛdabɛ ti Gyihova bɔbɔ vale me nwo ɛya na ɔhanle kɛ, “Ɛdawɔ noko ɛnrɛhɔ ɛkɛ ne bie.+
38 Nɛn ara Dwɔhyua,+ wɔ sonvolɛ ne, a le awie mɔɔ bahɔ azɛlɛ ne azo a.+ Maa ɔnyia anwosesebɛ,*+ ɔluakɛ ɔbamaa Yizilayɛma ava azɛlɛ ne.”)
39 Na bɛ mra mɔɔ bɛhanle kɛ bɛbahye bɛ bɛahɔ+ yɛɛ bɛ mra mɔɔ ɛnɛ bɛnze kpalɛ anzɛɛ ɛtane la, bɛmɛ a bɛbahɔ ɛkɛ a, na mebava azɛlɛ ne meamaa bɛadɛnla zolɛ.+
40 Noko bɛmɛ, bɛzia bɛ nzi na bɛlua Nyevile Kɔkɔlɛ ne anloa bɛhɔ fienemgbole ne anu.’+
41 “Na bɛzele me kɛ, ‘Yɛyɛ ɛtane yɛtia Gyihova. Akee yɛkaho kɛ mɔɔ Gyihova yɛ Nyamenle ne hanle hilele yɛ la!’ Yemɔti bɛ nuhua ko biala vale ye akodeɛ na bɛzuzule kɛ ɔnyɛ se kɛ bɛkɛhɔ boka ne azo.+
42 Noko Gyihova zele me kɛ, ‘Ka kile bɛ kɛ, “Bɛmmakɔko, ɔluakɛ me nee bɛ ɛnrɛhɔ.+ Saa bɛkɔ a, bɛ kpɔvolɛma bali bɛ nwo zo konim.”’
43 Ɔti menganle mengilele bɛ noko bɛandie. Emomu, bɛdele Gyihova edwɛkɛ ne anwo atua na bɛlile bɛ ti anwo kɛ bɛkɔ boka ne azo.
44 Akee Amɔlema mɔɔ de zɔhane boka ne azo la vindele rayiale bɛ na bɛvoanle bɛ kɛ wolɛ la, na bɛmaanle bɛbɔle asande wɔ Siyɛ too bɛhɔdwule Hɔɔma.
45 Yemɔti bɛziale bɛrazunle wɔ Gyihova anyunlu, noko Gyihova andie bɛ yɛɛ yeanyɛ ɛnzolɛ yeammaa bɛ.
46 Ɛhye ati a bɛdɛnlanle Keedɛhye bɛhyɛle kpalɛ la.
Ɔbodwɛkɛ
^ Hibulu aneɛ nu, “Yizilayɛ amra mrenyia ne mɔ.”
^ Ɔbayɛ Lɛbanɔn awoka ne mɔ.
^ Anzɛɛ “Azudenle ne anloa.”
^ Hibulu aneɛ nu, “maanle yɛ ahonle holole.”
^ Ɛhye kile, bane mgbole ndendenle.
^ Hibulu aneɛ nu, “ɔlile Nyamenle anzi bɔkɔɔ.”
^ Anzɛɛ ɔkola ɔkile, “Nyamenle ɛmaa yenyia anwosesebɛ.”
