Ditilɔnomi 10:1-22
10 “Mekɛ zɔhane Gyihova zele me kɛ, ‘Se awolɛ ndɛbandɛba nwiɔ kɛ alimoa ɛdeɛ ne la+ na fa bɛla me nwo ɛke wɔ boka ye azo; eza fa baka bobɔ ɛlɛka.
2 Na mebahɛlɛ edwɛkɛ mɔɔ ɛnee wɔ alimoa awolɛ ndɛbandɛba ne mɔ mɔɔ ɛbubule bɛ la azo la meagua zolɛ, na ɔwɔ kɛ ɛfa ɛgua ɛlɛka ne anu.’
3 Yemɔti menvale akasea baka membobɔle ɛlɛka na menzele awolɛ ndɛbandɛba nwiɔ kɛ alimoa ɛdeɛ ne la na menlɛle awolɛ ndɛbandɛba nwiɔ ne wɔ me sa nu mengɔle boka ne azo.+
4 Akee Gyihova hɛlɛle edwɛkɛ ne mɔɔ ɔlimoale ɔhɛlɛle la,+ Mɛla Bulu ne*+ mɔɔ Gyihova vi senle ne anu hanle hilele bɛ wɔ boka ne azo+ wɔ kenle mɔɔ menli* ne rayiale ɛkɛ ne la+ wɔ awolɛ ndɛbandɛba ne azo, na ɔvale ɔmaanle me.
5 Akee mengakyile me nwo na mevi boka ne azo+ mendwule na menvale awolɛ ndɛbandɛba ne mɔ menguale ɛlɛka ne mɔɔ membobɔle la anu, ɛleka mɔɔ bɛtɛgua la, kɛ mɔɔ Gyihova hanle hilele me la.
6 “Akee Yizilayɛma vile Biyɛlɔto Bɛne-gyeeyakan na bɛhɔle Mosila. Ɛkɛ ne a Aalɔn wule na bɛziele ye a,+ na ɔ ra Ɛlieza lile ye agya yɛle ɛsɔfo.+
7 Bɛvi ɛkɛ ne la bɛhɔle Gɛdegoda, yɛɛ bɛvi Gɛdegoda bɛhɔle Dwɔtobata,+ azɛlɛ mɔɔ nzule dɔɔnwo se zolɛ* la azo.
8 “Mekɛ zɔhane Gyihova yele Livae abusua ne+ ziele ahane kɛ bɛzoa Gyihova ngyekyeleɛ ɛlɛka ne+ na bɛgyinla Gyihova anyunlu bɛzonle ye, na bɛva ye duma bɛyila menli+ kɛ mɔɔ bɛyɛ too yeradwu ɛnɛ la.
9 Ɛhye ati a Livae ɛnlɛ kyɛfoa anzɛɛ agyapadeɛ biala wɔ ɔ mediema ne mɔ avinli la. Gyihova a le ye agyapadeɛ a, kɛ mɔɔ Gyihova bɛ Nyamenle ne hanle hilele ye la.+
10 Menlile alehyenlɛ nee aledwolɛ kenle 40 wɔ boka ne azo kɛ alimoa ne la,+ na mekɛ zɔhane noko Gyihova diele me.+ Ɛnee Gyihova ɛngulo kɛ ɔsɛkye bɛ.
11 Akee Gyihova zele me kɛ, ‘Siezie ɛ nwo di menli ne anyunlu maa bɛdu bɛ bo, amaa bɛahɔva azɛlɛ ne mɔɔ menganle ndane mengilele bɛ nenyia mɔ kɛ mebava meamaa bɛ la.’+
12 “O Yizilayɛ, duzu a akee Gyihova wɔ Nyamenle ne kpondɛ avi wɔ ɛkɛ a?+ Yemɔ ala a le kɛ: ɛbazulo Gyihova wɔ Nyamenle ne,+ wɔalua ye ndenle kɔsɔɔti anu,+ wɔahulo ye, wɔava wɔ ahonle muala nee wɔ ɛkɛla* muala wɔazonle Gyihova wɔ Nyamenle ne,+
13 na wɔali Gyihova mɛla nee ngyehyɛleɛ mɔɔ melɛfa meamaa wɔ ɛnɛ la azo wɔ wɔ boɛyɛlɛ ti.+
14 Nea, anwuma, anwuma anwuma lɔ* bɔbɔ nee azɛlɛ ye yɛɛ debie biala mɔɔ wɔ zo la le Gyihova wɔ Nyamenle ne ɛdeɛ.+
15 Noko bɛ nenyia mɔ ala a Gyihova maanle bɛbikyele ye na ɔlale ye ɛlɔlɛ ne ali ɔhilele bɛ a, na yekpa bɛmɛ mɔɔ bɛle bɛ bo zo amra la yevi menli kɔsɔɔti anu,+ kɛ mɔɔ bɛde ye ɛnɛ la.
16 Ɔwɔ kɛ bɛte bɛ ahonle nu*+ na bɛgyakyi anzosesebɛyɛlɛ.*+
17 Ɔluakɛ Gyihova bɛ Nyamenle ne le nyamenle kɔsɔɔti bɛ Nyamenle+ nee awulae mɔ Awulae, ɔle Nyamenle kpole, ɔle tumivolɛ yɛɛ ɔ nwo yɛ ɛzulolɛ, ɔnli mɔguazo+ yɛɛ ɔnlie belaebo.
18 Ɔbua ndɛne pɛlepɛle ɔmaa arisa nee kunlavolɛ+ yɛɛ ɔkulo ɛyɛvolɛ,+ ɔmaa ye aleɛ nee adɛladeɛ.
19 Ɔwɔ kɛ bɛdabɛ noko bɛkulo nyɛvolɛ, ɔluakɛ ɛnee bɛle nyɛvolɛ wɔ Yigyibiti azɛlɛ zo.+
20 “Bɛzulo Gyihova bɛ Nyamenle ne, bɛzonle ye,+ bɛbeta ɔ nwo na bɛva ye duma bɛha ndane.
21 Ɔdaye a ɔwɔ kɛ bɛye ye ayɛlɛ a.+ Yemɔ a ɔle bɛ Nyamenle mɔɔ yeyɛ ninyɛne mgbole nee nwanwane ninyɛne ɛhye mɔ amuala yemaa bɛ mɔɔ bɛdabɛ bɛnwu ye bɛ nye zo a.+
22 Bɛ nenyia mɔ kɔ Yigyibiti la, ɛnee bɛle menli* 70,+ noko kɛkala Gyihova bɛ Nyamenle ne ɛmaa bɛ nwo ɛzo kɛ anwomanyunlu nwɔlɔra.+
Ɔbodwɛkɛ
^ Hibulu aneɛ nu, “Edwɛkɛ Bulu ne.”
^ Anzɛɛ “asafo.”
^ Anzɛɛ “mbɔnza mɔɔ nzule se nu.”
^ Nea Edwɛkɛbohilelɛ.
^ Anzɛɛ “anwuma hwehwe.”
^ Hibulu aneɛ nu, “bɛye nwoma ne mɔɔ heda bɛ ahonle nwo la.”
^ Hibulu aneɛ nu, “na bɛmmayɛ bɛ kɔme ketee bieko.”
^ Anzɛɛ “ɛkɛla.”
