Ditilɔnomi 12:1-32
12 “Ɛhye mɔ a le mɛla nee ngyehyɛleɛ mɔɔ ɔwɔ kɛ bɛnea bɛdi zo wɔ mekɛ kɔsɔɔti mɔɔ bɛde ngoane nu wɔ azɛlɛ ne mɔɔ Gyihova, bɛ nenyia mɔ Nyamenle ne bava amaa bɛadɛnla zo la azo a.
2 Bɛzɛkye ɛleka biala mɔɔ maanle maanle mɔɔ bɛbali bɛ nwo zo konim la zonlenle bɛ nyamenle ne mɔ la bɔkɔɔ,+ saa awoka mgbole zo o, awoka ngyikyi zo o, baka buzuu biala abo o.
3 Bɛbubu bɛ afɔlemokyea ne mɔ, bɛzɛkye bɛ ɛzonlenlɛ mpila ne mɔ,+ bɛva senle bɛyela bɛ ɛzonlenlɛ mbaka* ne mɔ, na bɛpepɛ bɛ nyamenle ne mɔ ananze ne mɔ mɔɔ bɛgua la,+ bɛkyikyi bɛ aluma bɛvi ɛkɛ ne bɔkɔɔ.+
4 “Bɛmmasonle Gyihova bɛ Nyamenle ne wɔ adenle zɔhane azo.+
5 Emomu bɛkpondɛ Gyihova bɛ Nyamenle ne wɔ ɛleka biala mɔɔ ɔkɛkpa ɔkɛva ye duma ɔkɛdo zolɛ yɛɛ ɛleka mɔɔ ɔkɛyɛ ye tɛnlabelɛ wɔ bɛ mbusua ne mɔ kɔsɔɔti avinli la na bɛhɔ ɛkɛ.+
6 Ɛkɛ ne a ɔwɔ kɛ bɛfa bɛ ɛyelalɛ afɔlebɔdeɛ,+ bɛ afɔlebɔlɛ ne mɔ, bɛ taete,*+ bɛ sa nu ndoboa,+ ɛwɔkɛ afɔlebɔlɛ, afɔle mɔɔ bɛfi bɛ ɛhulolɛ nu bɛbɔ+ nee bɛ nlankɛ yɛɛ bɛ mboane belamunli mralɛ+ bɛkɔ a.
7 Bɛ nee bɛ sua nu amra ɛli aleɛ wɔ ɛkɛ wɔ Gyihova bɛ Nyamenle ne+ anyunlu na bɛli fɛlɛko wɔ bɛ gyima kɔsɔɔti anwo,+ ɔluakɛ Gyihova bɛ Nyamenle ne ɛyila bɛ.
8 “Bɛmmayɛ mɔɔ yɛlɛyɛ ye ɛke ɛnɛ la bie, mɔɔ awie biala ɛlɛyɛ mɔɔ le kpalɛ wɔ ɔdaye ɔ nye zo la,*
9 ɔluakɛ bɛtɛnyianle bɛtɛkɔle bɛ ɛnwomenlelielɛ ɛleka ne+ nee agyapadeɛ mɔɔ Gyihova bɛ Nyamenle ne ɛlɛfa amaa bɛ la azo.
10 Saa bɛpɛ Dwɔdan+ ne bɛkɔtɛnla azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo a, ɔbamaa bɛ nwo adɔ bɛ avi bɛ agbɔvolɛ mɔɔ ɛbɛnga bɛ ɛyia la anwo, na bɛbadɛnla anzodwolɛ nu.+
11 Bɛbava debie biala mɔɔ melɛka meahile bɛ la bɛahɔ ɛleka mɔɔ Gyihova bɛ Nyamenle ne bakpa ava ye duma ado zolɛ la+—bɛ ɛyelalɛ afɔlebɔdeɛ, bɛ afɔlebɔlɛ ne mɔ, bɛ taete,+ bɛ sa nu ndoboa, ɛwɔkɛ afɔlebɔdeɛ biala mɔɔ bɛva bɛbɔ Gyihova ɛwɔkɛ la.
12 Bɛlie bɛ nye wɔ Gyihova bɛ Nyamenle ne+ anyunlu, bɛdabɛ nee bɛ mra mrenyia, bɛ mra mraalɛ, bɛ ngɛkɛlɛ mrenyia nee mraalɛ yɛɛ Livaenli mɔɔ wɔ bɛ azuamgbole ne mɔ azo* la, ɔluakɛ ɔnlɛ kyɛfoa anzɛɛ agyapadeɛ biala wɔ bɛ avinli.+
13 Bɛnlea boɛ na bɛambɔ bɛ afɔle wɔ ɛleka gyɛne biala mɔɔ bɛkɛnwu ye la.+
14 Ɔwɔ kɛ bɛbɔ bɛ ɛyelalɛ afɔle ne mɔ wɔ abusua ko mɔɔ Gyihova kɛye la azɛlɛ ne azo ala, na ɛkɛ ne a ɔwɔ kɛ bɛyɛ debie biala mɔɔ melɛka meahile bɛ la a.+
15 “Noko mekɛ biala mɔɔ bɛ ti akunlu kɛra nane zo la,* bɛbahola bɛahu bie bɛali+ kɛ mɔɔ Gyihova bɛ Nyamenle ne ɛyila bɛ wɔ bɛ azuamgbole kɔsɔɔti azo la.* Sonla mɔɔ anwo te nee mɔɔ anwo ɛnde la bahola ali bie kɛ mɔɔ bɛdi kɛtɛboɛ anzɛɛ weɛlɛ la.
16 Noko ɔnle kɛ bɛdi mogya ne;+ ɔwɔ kɛ bɛwola bɛgua aze kɛ nzule la.+
17 Bɛnrɛmaa bɛnrɛli bɛ ma ngyɛnu bulu anu ko, bɛ nwanye fofolɛ, bɛ nwole, bɛ nlankɛ nee mboane belamunli mralɛ,+ afɔlebɔdeɛ biala mɔɔ bɛbɔ nwolɛ ɛwɔkɛ, bɛ afɔle mɔɔ bɛfi bɛ ɛhulolɛ nu bɛbɔ, anzɛɛ bɛ sa nu ndoboa wɔ bɛ azuamgbole ne mɔ azo.*
18 Ɔwɔ kɛ bɛdi ninyɛne ɛhye mɔ wɔ Gyihova bɛ Nyamenle ne anyunlu wɔ ɛleka mɔɔ Gyihova bɛ Nyamenle ne bahile la+—bɛdabɛ nee bɛ mra mrenyia, bɛ mra mraalɛ, bɛ azonvolɛ mrenyia nee mraalɛ yɛɛ Livaenli mɔɔ wɔ bɛ azuamgbole ne mɔ azo la,* na bɛli fɛlɛko wɔ Gyihova bɛ Nyamenle ne anyunlu wɔ bɛ gyima kɔsɔɔti anwo.
19 Bɛnlea boɛ na bɛambu bɛ nye bɛangua Livaenli nwo zo+ wɔ mekɛ ala mɔɔ bɛde bɛ azɛlɛ ne azo la.
20 “Saa Gyihova wɔ Nyamenle ne maa wɔ azɛlɛ ne tɛlɛ,+ kɛ mɔɔ yeva yebɔ wɔ ɛwɔkɛ la,+ na ɛka kɛ, ‘Mekulo kɛ medi nane,’ kɛmɔ ɛ ti akunlu* ɛra nane zo la ati a, ɛbahola wɔali nane wɔ mekɛ biala mɔɔ ɛ ti akunlu kɛra zolɛ la.*+
21 Saa ɛleka mɔɔ Gyihova wɔ Nyamenle ne kɛkpa kɛva ye duma kɛdo zolɛ la+ wɔ moa a, ɔwɔ kɛ ɛku wɔ nlankɛ anzɛɛ wɔ mboane ne mɔɔ Gyihova ɛva ɛmaa wɔ la bie, kɛ mɔɔ meha mehile wɔ la, na ɛdi ye wɔ bɛ azuamgbole ne mɔ azo* wɔ mekɛ biala mɔɔ ɛ ti akunlu kɛra zo la.*
22 Ɛbahola wɔali kɛ mɔɔ ɛdi kɛtɛboɛ nee weɛlɛ la;+ sonla mɔɔ anwo te nee mɔɔ anwo ɛnde la bahola ali bie.
23 Noko bɔ kpɔkɛ kpundii kɛ ɛnrɛli mogya ne,+ ɔluakɛ mogya ne a le ngoane* ne,+ na ɔnle kɛ ɛdi ngoane* ne ɛboka nane ne anwo.
24 Ɔnle kɛ ɛdi. Ɔwɔ kɛ ɛwola ɛgua aze kɛ nzule la.+
25 Mmadi, amaa yeawie ɛdawɔ nee ɛ mra boɛ, ɔluakɛ ɛlɛyɛ mɔɔ le kpalɛ wɔ Gyihova anye zo la.
26 Ɔwɔ kɛ ɛfa ninyɛne nwuanzanwuanza mɔɔ le wɔ ɛdeɛ la ala nee wɔ ɛwɔkɛ afɔlebɔdeɛ ne mɔ ɛkɔ ɛleka mɔɔ Gyihova wɔ Nyamenle ne bahile la.
27 Ɛkɛ ne a ɛbabɔ wɔ ɛyelalɛ afɔle ne mɔ, nane ne nee mogya ne+ a, wɔ Gyihova wɔ Nyamenle ne afɔlemokyea+ ne azo, na wɔawola wɔ afɔlebɔdeɛ ne mɔ mogya ne wɔagua Gyihova wɔ Nyamenle ne afɔlemokyea ne anwo, noko ɛbahola wɔali nane ne.
28 “Nea boɛ na di edwɛkɛ ɛhye mɔɔ melɛka meahile wɔ la amuala azo amaa yeawie ɛdawɔ nee ɛ mra mɔɔ bali ɛ nzi ara la boɛ dahuu, ɔluakɛ ɛlɛyɛ mɔɔ le kpalɛ na ɔtenrɛ wɔ Gyihova wɔ Nyamenle ne anye zo la.
29 “Saa Gyihova wɔ Nyamenle ne sɛkye maanle maanle mɔɔ ɛbavoa bɛ+ la na ɛfa bɛ azɛlɛ ne ɛtɛnla zo a,
30 nea boɛ na ɛsɛkye bɛ a bɛanzua wɔ ɛhane. Mmabiza bɛ nyamenle ne mɔ anwo edwɛkɛ kɛ, ‘Kɛzi ɛnee maanle maanle ɛhye mɔ sonle bɛ nyamenle ne mɔ ɛ? Medame noko mebayɛ zɔ.’+
31 Mmayɛ ɛhye ɛkile Gyihova wɔ Nyamenle ne, ɔluakɛ bɛyɛ ninyɛne mɔɔ Gyihova kyi la bɛmaa bɛ nyamenle ne mɔ, bɛyela bɛ mra mrenyia nee bɛ mra mraalɛ bɔbɔ wɔ senle nu bɛmaa bɛ nyamenle ne mɔ.+
32 Bɛnlea bɛli edwɛkɛ biala mɔɔ melɛka meahile bɛ la azo.+ Bɛmmafa bie bɛboka nwo yɛɛ bɛmmaye bie bɛfi nu.+
Ɔbodwɛkɛ
^ Nea Edwɛkɛbohilelɛ.
^ Anzɛɛ “ngyɛnu bulu anu ko.”
^ Anzɛɛ “ɛlɛyɛ mɔɔ ɔsuzu kɛ ɔle kpalɛ la.”
^ Hibulu aneɛ nu, “bɛ nlenkɛ mgbole ne mɔ anu.”
^ Hibulu aneɛ nu, “bɛ nlenkɛ mgbole kɔsɔɔti anu la.”
^ Anzɛɛ “bɛ ɛkɛla kɛhulo la.”
^ Hibulu aneɛ nu, “bɛ nlenkɛ mgbole ne mɔ anu.”
^ Hibulu aneɛ nu, “bɛ nlenkɛ mgbole ne mɔ anu la.”
^ Anzɛɛ “wɔ ɛkɛla ati akunlu.”
^ Anzɛɛ “mɔɔ wɔ ɛkɛla kɛhulo la.”
^ Hibulu aneɛ nu, “bɛ nlenkɛ mgbole ne mɔ anu.”
^ Anzɛɛ “wɔ ɛkɛla kɛhulo la.”
^ Anzɛɛ “ɛkɛla.”
^ Anzɛɛ “ɛkɛla.”
