Ditilɔnomi 13:1-18
-
Kɛzi ɔwɔ kɛ bɛyɛ menli mɔɔ ɛkpɔkye la (1-18)
13 “Saa ngapezonli bie anzɛɛ awie mɔɔ dua ɛlalɛ zo ka mɔɔ bazi kenle bie la finde bɛ avinli na ɔka sɛkɛlɛneɛ anzɛɛ nwanwane debie bie anwo edwɛkɛ ɔkile bɛ,
2 na sɛkɛlɛneɛ anzɛɛ nwanwane deɛ ne mɔɔ ɔhanle nwolɛ edwɛkɛ la ba nu na ɔka kɛ, ‘Bɛmaa yɛhɔli nyamenle gyɛne nzi, nyamenle mɔɔ bɛnze bɛ, na yɛzonle bɛ’ a,
3 bɛmmatie ngapezonli anzɛɛ ɛlalɛkavolɛ+ zɔhane edwɛkɛ ɔluakɛ Gyihova bɛ Nyamenle ne ɛlɛsɔ bɛ anlea+ amaa yeanwu ye saa bɛfa bɛ ahonle muala nee bɛ ɛkɛla* muala bɛkulo Gyihova bɛ Nyamenle ne a.+
4 Bɛli Gyihova bɛ Nyamenle ne anzi, bɛzulo ye, bɛli ye mɛla zo, bɛdie ɔ ne; ɔdaye a ɔwɔ kɛ bɛsonle ye na bɛbeta ɔ nwo a.+
5 Noko ɔwɔ kɛ bɛku ngapezonli anzɛɛ ɛlalɛkavolɛ zɔhane,+ ɔluakɛ yezi bɛ adua kɛ bɛde atua bɛtia Gyihova bɛ Nyamenle ne mɔɔ yele bɛ vile Yigyibiti azɛlɛ zo na ɔliele bɛ ɔvile akɛlɛzonlenlɛ sua nu la kɛ ɔtwe bɛ yeavi adenle ne mɔɔ Gyihova bɛ Nyamenle ne ɛha kɛ bɛlua zo la azo. Ɔwɔ kɛ bɛye mɔɔ le ɛtane la bɛfi bɛ avinli.+
6 “Saa ɛ diema nrenyia, mɔɔ le wɔ mame ara nrenyia, anzɛɛ ɛ ra nrenyia anzɛɛ ɛ ra raalɛ anzɛɛ ɛ ye mɔɔ ɛkulo ye anzɛɛ ɛ gɔnwo kpalɛ* bɔ mɔdenle kɛ ɔbɛlɛbɛla wɔ wɔ fealeranu kɛ, ‘Maa yɛhɔzonle nyamenle gyɛne,’+ nyamenle mɔɔ ɛdawɔ anzɛɛ wɔ nenyia mɔɔ ɛnze bɛ,
7 menli mɔɔ ɛbɛnga bɛ ɛyia la nyamenle ne mɔ, saa bɛbikye bɛ o, bɛwɔ moa o, ɔvi azɛlɛ ti kɔdwu ɔ bo o,
8 mmayɛ anzɛɛ mmatie ye,+ mmase ye anwunvɔne anzɛɛ mmamaa ɛ kunlu yelɛyela wɔ maa ye yɛɛ mmabɔ ɔ nwo bane;
9 emomu ɔwɔ kɛ ɛku ye.+ Ɛdawɔ ɛ sa a ɔwɔ kɛ dimoa wɔ ɔ nwo zo kɛ ɛku ye a na akee menli ne amuala asa ali ɛ nzi.+
10 Si ye awolɛ ku ye,+ ɔluakɛ yenyia adwenle kɛ ɔtwe wɔ yeavi Gyihova wɔ Nyamenle ne mɔɔ yele wɔ vile Yigyibiti azɛlɛ zo, wɔ akɛlɛzonlenlɛ sua nu la anwo.
11 Na Yizilayɛma kɔsɔɔti bade na bɛazulo, na bɛnrɛyɛ debie ɛtane zɛhae bieko wɔ bɛ avinli ɛlɛ.+
12 “Saa bɛte kɛ bɛlɛka ye wɔ azuamgbole mɔɔ Gyihova bɛ Nyamenle ne bava amaa bɛadɛnla zo la anu ko azo kɛ,
13 ‘Sonlamgbanema bie mɔɔ wɔ bɛ avinli la ɛlɛkakyi bɛ sua ne azo amra adwenle na bɛlɛka kɛ: “Bɛmaa yɛhɔzonle nyamenle gyɛne,” nyamenle mɔɔ bɛnze bɛ la a,’
14 ɔwɔ kɛ bɛneɛnlea edwɛkɛ ne anu, bɛyɛ nvedenvedenu na bɛbiza nu kpalɛ;+ na saa bɛnwu kɛ ɔle nɔhalɛ kɛ bɛyɛ kyibadeɛ zɛhae wɔ bɛ avinli a,
15 bɛva konle dadeɛ bɛhu menli mɔɔ wɔ suakpole ne azo la.+ Bɛva konle dadeɛ bɛzɛkye suakpole ne nee debie biala mɔɔ wɔ zo la yɛɛ zolɛ nyɛmoa bɔkɔɔ.+
16 Akee bɛboɔboa ninyɛne mɔɔ bɛbanyia ye wɔ zolɛ la anloa wɔ sua ne gua ne azo na bɛyela sua ne, na zolɛ ninyɛne ne bayɛ kɛ ɛyelalɛ afɔlebɔdeɛ amaa Gyihova bɛ Nyamenle ne. Ɔbayɛ ewula edukue mɔɔ wɔ ɛkɛ ne dahuu. Ɔnle kɛ bɛkyekye ye bieko ɛlɛ.
17 Bɛmmafa bɛ sa bɛka debie biala mɔɔ bɛye bɛzie ɛkɛ ne kɛ bɛsɛkye ye la,*+ amaa Gyihova ɛya wuluwulu ne aha aze na ɔ kunlu ayelɛyela ye na yeaze bɛ anwunvɔne na yeamaa bɛ nwo azo, kɛ mɔɔ ɔbɔle bɛ nenyia mɔ ɛwɔkɛ la.+
18 Ɔti ɔwɔ kɛ bɛtie Gyihova bɛ Nyamenle ne na bɛdi ye mɛla mɔɔ melɛfa meamaa bɛ ɛnɛ la amuala azo, amaa bɛayɛ mɔɔ le kpalɛ wɔ Gyihova bɛ Nyamenle ne anye zo+ la.
Ɔbodwɛkɛ
^ Nea Edwɛkɛbohilelɛ.
^ Anzɛɛ “ɛ gɔnwo mɔɔ le kɛ ɛdawɔ wɔ ɛkɛla la.”
^ Anzɛɛ “mɔɔ bɛva bɛ sa bɛdo zo bɛyɛ ye nwuanzanwuanza.”
