Ditilɔnomi 17:1-20
17 “Bɛmmafa ɛnlankɛ anzɛɛ boane mɔɔ anwo lɛ dɛne anzɛɛ yeboda la bɛbɔ afɔle bɛmaa Gyihova bɛ Nyamenle ne, ɔluakɛ ɔle Gyihova bɛ Nyamenle ne kyibadeɛ.+
2 “Saa bɛnwu nrenyia anzɛɛ raalɛ bie wɔ bɛ avinli wɔ azua mɔɔ Gyihova bɛ Nyamenle ne ɛlɛfa amaa bɛ la azo kɛ ɔlɛyɛ mɔɔ le ɛtane wɔ Gyihova bɛ Nyamenle ne anye zo yɛɛ ɔnli ye ngyekyeleɛ ne azo,+
3 na ɔkɔsonle nyamenle gyɛne na ɔbɔ ɔ ti aze ɔmaa bɛ anzɛɛ ɔbɔ ɔ ti aze ɔmaa sɛnzɛne ne anzɛɛ siane ne anzɛɛ anwuma ɛlɔne kɔsɔɔti,+ debie mɔɔ meanga kɛ bɛyɛ la,+
4 na bɛbaka bɛkile bɛ anzɛɛ bɛte nwolɛ bie a, ɔwɔ kɛ bɛneɛnlea edwɛkɛ ne anu kpalɛ. Saa bɛnwu kɛ ɔle nɔhalɛ+ kɛ bɛkyi debie zɛhae ɛzi wɔ Yizilayɛ a,
5 ɔwɔ kɛ bɛfa nrenyia ne anzɛɛ raalɛ ne mɔɔ ɛyɛ ɛtane ɛhye la bɛkɔ suakpole ne nlenkɛ mgbole ne anloa, na bɛsi nrenyia ne anzɛɛ raalɛ ne awolɛ bɛku ye.+
6 Ɔwɔ kɛ bɛgyinla alasevolɛ nwiɔ anzɛɛ nsa edwɛkɛ* zo+ a bɛku ahenle mɔɔ ɔwɔ kɛ ɔwu la a. Ɔnle kɛ bɛgyinla dasevolɛ ko edwɛkɛ zo bɛku ye.+
7 Ɔwɔ kɛ alasevolɛ ne mɔ a dimoa fa bɛ sa ka ye kɛ bɛku ye a, na akee menli ne amuala ava bɛ sa aha ye. Ɔwɔ kɛ bɛye debie mɔɔ ɛnle kpalɛ la bɛfi bɛ avinli.+
8 “Saa edwɛkɛ bie si bɛ azuamgbole ne mɔ bie azo, kɛ awie ɛhu sonla+ anzɛɛ bɛlɛsu debie nwo kpolera anzɛɛ awie ɛboda ɔ gɔnwo anzɛɛ edwɛkɛ gyɛne mɔɔ ɔmmaa bɛ nloa ɛnzɛ bɛ nwo la, na ɔyɛ se ɔmaa bɛ kɛ bɛkɛbua nwolɛ ndɛne a, ɔwɔ kɛ bɛdwazo na bɛkɔ ɛleka mɔɔ Gyihova bɛ Nyamenle ne kɛhile la.+
9 Bɛhɔ Livae ɛsɔfo ne mɔ nee ndɛnebuavolɛ+ mɔɔ ɛlɛyɛ gyima wɔ zɔhane mekɛ ne anu la ɛkɛ bɛhɔbiza na bɛbabua bɛamaa bɛ.+
10 Bɛva ndɛne mɔɔ bɛbabua bɛamaa bɛ wɔ ɛleka mɔɔ Gyihova kɛhile la bɛli gyima. Bɛnlea boɛ na bɛyɛ mɔɔ bɛkɛha bɛkɛhile bɛ la amuala.
11 Bɛli mɛla mɔɔ bɛbaha bɛahile bɛ nee ndɛnebualɛ mɔɔ bɛbava bɛado bɛ nyunlu la azo.+ Bɛmmafi ndɛne mɔɔ bɛbabua bɛamaa bɛ la anwo bɛkɔ fema zo anzɛɛ bɛne zo.+
12 Ɔwɔ kɛ awie mɔɔ memaa ɔ nwo zo* na ɔndie ɛsɔfo ne mɔɔ ɛlɛsonle wɔ Gyihova bɛ Nyamenle ne anyunlu anzɛɛ ndɛnebuavolɛ ne la wu.+ Ɔwɔ kɛ bɛye debie mɔɔ ɛnle kpalɛ la bɛfi Yizilayɛ.+
13 Akee menli ne amuala bade na bɛazulo na bɛnrɛmemaa bɛ nwo zo* bieko.+
14 “Saa bɛkɔfa azɛlɛ ne mɔɔ Gyihova bɛ Nyamenle ne bava amaa bɛ la bɛtɛnla zo na bɛka kɛ, ‘Bɛmaa yɛye belemgbunli yɛmaa ɔnlea yɛ nwo zo kɛ maanle maanle mɔɔ ɛbɛnga yɛ ɛyia la amuala la’+ a,
15 ɛnee bɛye awie mɔɔ Gyihova bɛ Nyamenle ne kɛkpa ye la.+ Bɛye bɛ mediema mrenyia ne mɔ bie bɛzie ye belemgbunli. Bɛnrɛhola bɛnrɛye ɛyɛvolɛ mɔɔ ɔnle bɛ diema la kɛ ɔnlea bɛ nwo zo.
16 Noko ɔnle kɛ ɔkpondɛ mgbɔnwɔ dɔɔnwo ɔmaa ɔ nwo+ anzɛɛ ɔmaa menli ne sia kɔ Yigyibiti kɛ bɛkakpondɛ mgbɔnwɔ dɔɔnwo,+ ɔluakɛ Gyihova hanle hilele bɛ kɛ, ‘Bɛmmasia bɛkɔfa adenle ɛhye azo bieko ɛlɛ.’
17 Ɔnle kɛ ɔgya mraalɛ dɔɔnwo, amaa ye ahonle anvi me nwo;+ yɛɛ ɔnle kɛ ɔkpondɛ dwɛtɛ fufule nee nvutuke dɔɔnwo ɔmaa ɔ nwo.+
18 Saa ɔtɛnla ye belemgbunli ebia ne azo wɔ ye belemgbunlililɛ ne anu a, ɔwɔ kɛ ɔkɛlɛ Mɛla ɛhye mɔɔ wɔ Livae ɛsɔfo ne mɔ ɛkɛ la+ bie wɔ buluku* nu ɔfa.
19 “Ɔwɔ kɛ ɔfa ɔsie ɔ nwo na ɔkenga ye wɔ ye ngoane mekɛ kɔsɔɔti anu,+ amaa yeazukoa kɛ ɔbazulo Gyihova ye Nyamenle ne na yeali Mɛla ɛhye anu edwɛkɛ ne kɔsɔɔti nee adehilelɛ ɛhye mɔ azo.+
20 Saa ɔyɛ ɛhye a ɔnrɛmemaa ɔ nwo zo wɔ ɔ mediema ne mɔ anwo zo yɛɛ ɔnrɛvi mɛla ne anwo ɔnrɛhɔ fema zo anzɛɛ bɛne zo, amaa yeali tumi wɔ ye belemgbunlililɛ ne azo yeahyɛ wɔ Yizilayɛma avinli, ɔdaye nee ɔ mra mrenyia.
Ɔbodwɛkɛ
^ Hibulu aneɛ nu, “anloa.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ “nwomamobɔleɛ.”
