Ditilɔnomi 2:1-37
2 “Akee yɛhakyile yɛ nye yɛhɔvale Nyevile Kɔkɔlɛ ne anloa yɛhɔle fienemgbole ne anu kɛ mɔɔ Gyihova hanle hilele me la,+ na yɛvale mekɛ dɔɔnwo yɛkpɔsale Siyɛ Boka ne anwo.
2 Akee Gyihova zele me kɛ,
3 ‘Bɛkpɔsa boka ɛhye anwo bɛhyɛ somaa. Bɛhakyi bɛ nye wɔ sɔlɔ.
4 Na ka edwɛkɛ ɛhye kile menli ne: “Bɛlɛkɔ bɛahɔva bɛ mediema, Yisɔ abozoamra+ mɔɔ bɛde Siyɛ+ la ɛweɛne zo, na ɛkɛ ne amra bazulo bɛ,+ yemɔti ɔwɔ kɛ bɛnea bɛ nwo boɛ kpalɛ.
5 Bɛmmagyegye bɛ,* ɔluakɛ menrɛva bɛ azɛlɛ ne bie menrɛmaa bɛ, bɛnrɛnyia ekyi mɔɔ le kɛ bɛ gyakɛ abo zo la bɔbɔ, ɔluakɛ meva Siyɛ Boka ne memaa Yisɔ kɛ ye agyapadeɛ.+
6 Ɔwɔ kɛ bɛfa ezukoa bɛtɔ aleɛ mɔɔ bɛbali la na bɛtua nzule mɔɔ bɛbanlo la kakɛ.+
7 Ɔluakɛ Gyihova bɛ Nyamenle ne ɛyila bɛ wɔ debie biala mɔɔ bɛyɛ la anu. Ɔze ye bɔbɔ kɛ bɛlua fienemgbole kpole ɛhye anu. Ɛvolɛ 40 ɛhye anu, Gyihova bɛ Nyamenle ne nee bɛ lua yɛɛ bɛtɛkyianle ɛhwee.”’+
8 Yemɔti yɛhɔpɛle nu wɔ yɛ mediema Yisɔ abozoamra+ mɔɔ bɛde Siyɛ la anwo ɛkɛ, yɛanva Alaba, Yilate yɛɛ Yizeɔn-gibɛ+ adenle ne azo.
“Akee yɛhakyile yɛ nye na yɛhɔvale Mowabe fienemgbole ne+ adenle ne azo.
9 Akee Gyihova zele me kɛ, ‘Bɛmmagyegye Mowabema anzɛɛ bɛmmafa konle bɛtoa bɛ, ɔluakɛ menrɛva bɛ azɛlɛ ne bie menrɛmaa bɛ kɛ bɛdɛnla zo, ɔluakɛ meva Aale memaa Lɔɔto abozoamra kɛ bɛ agyapadeɛ.+
10 (Dɛba ne ɛnee Yimemma+ de ɛkɛ, bɛle menli mgbole, bɛ nwo zonle yɛɛ bɛle ndendenle kɛ Anakema la.
11 Ɛnee bɛbu Relɛfeeyemma+ kɛ Anakema+ la, na ɛnee Mowabema fɛlɛ bɛ Yimemma.
12 Dɛba ne ɛnee Hɔlaema+ de Siyɛ, noko Yisɔ abozoamra lile bɛ nwo zo konim na bɛzɛkyele bɛ na bɛdɛnlanle bɛ bo zo ne+ kɛ mɔɔ Yizilayɛma bayɛ azɛlɛ ne mɔɔ le bɛ agyapadeɛ mɔɔ Gyihova bava amaa bɛ la.)
13 Akee bɛhɔpɛ Zilɛde Bɔnza* ne.’ Yemɔti yɛhɔpɛle Zilɛde Bɔnza* ne.+
14 Mekɛ mɔɔ yɛvale yɛdiale yɛvile Keedɛhye-baanea yɛhɔpɛle Zilɛde Bɔnza* ne la le ɛvolɛ 38, kɔkpula kɛ menli mɔɔ kɔ konle la awolɛndoazo ne kɔsɔɔti wule, kɛ mɔɔ Gyihova hanle nwolɛ ndane la.+
15 Gyihova maanle ɔ sa zo tiale bɛ kɛ ɔku bɛ muala yɛavi menli ne avinli kɔkpula kɛ bɛ bo badu.+
16 “Mekɛ mɔɔ menli mɔɔ kɔ konle la amuala wule ala la,+
17 Gyihova zele me bieko kɛ,
18 ‘Ɛnɛ, bɛbahɔpɛ nu wɔ Mowabe azɛlɛ ne, mɔɔ le Aale la azo.
19 Saa bɛdwu Amɔnoma ɛkɛ a, bɛmmagyegye bɛ anzɛɛ bɛmmaka bɛ ɛya, ɔluakɛ menrɛva Amɔnoma azɛlɛ ne bie menrɛmaa bɛ, ɔboalekɛ meva memaa Lɔɔto abozoamra kɛ bɛ agyapadeɛ.+
20 Ɛnee bɛbu ɛhye noko kɛ ɔle Relɛfeeyemma azɛlɛ.+ (Dɛba ne ɛnee Relɛfeeyemma de ɛkɛ, na ɛnee Amɔnoma fɛlɛ bɛ Zamezɛmemma.
21 Bɛle menli mgbole, bɛ nwo zonle yɛɛ bɛle ndendenle kɛ Anakema la;+ noko Gyihova zɛkyele bɛ wɔ Amɔnoma anyunlu, na bɛvoanle bɛ na bɛdɛnlanle bɛ bo zo ne.
22 Kɛ ɔyɛle ɔmaanle Yisɔ abozoamra mɔɔ kɛkala de Siyɛ+ wɔ mekɛ mɔɔ ɔzɛkyele Hɔlaema+ wɔ bɛ nyunlu amaa bɛahola bɛavoa bɛ na bɛadɛnla bɛ bo zo ne too badwu ɛnɛ la ɛne.
23 Avemma ɛdeɛ, bɛdɛnlanle namunamu mɔɔ wɔ Gaza+ maanzinli nu la azo hɔkpulale kɛ Kafetɔlemma+ mɔɔ vi Kafetɔ* la razɛkyele bɛ na bɛdɛnlanle bɛ bo zo ne la.)
24 “‘Bɛdwazo bɛhɔpɛ Anɔn Bɔnza* ne.+ Bɛnlea, meva Amɔlenli Saehɔn,+ Hɛhyebɔn belemgbunli ne mewula bɛ sa nu. Yemɔti bɛhɔva ye azɛlɛ ne na bɛ nee ye ɛho.
25 Ɛnɛ kenle ye, mebabɔ ɔ bo meamaa menli mɔɔ wɔ azɛlɛ ye azo la amuala mɔɔ bade bɛ nwo edwɛkɛ la ahonle adu na bɛazulo bɛ. Bɛdabɛ ti, bɛ adwenle bazɛkye na bɛ nwo awoso bɛ.’*+
26 “Akee menzoanle menli wɔ Kidɛmɔto fienemgbole+ ne anu kɛ bɛhɔha anzodwolɛ edwɛkɛ ɛhye bɛhile Hɛhyebɔn Belemgbunli Saehɔn,+
27 ‘Maa menlua wɔ azɛlɛ ne azo. Mebava adenle ne azo ala, menrɛmakyi fema zo anzɛɛ bɛne zo.+
28 Mebali aleɛ na meanlo nzule mɔɔ ɛbadɔne ye wɔamaa me la ala. Maa mendia mempɛ nu wɔ ɛkɛ ne ala
29 —ɛhye a Yisɔ abozoamra mɔɔ de Siyɛ nee Mowabema mɔɔ de Aale la yɛle maanle me a—kɔkpula kɛ mekɛpɛ Dwɔdan ne mekɛhɔ azɛlɛ ne mɔɔ Gyihova yɛ Nyamenle ne ɛva ɛmaa yɛ la azo.’
30 Noko Hɛhyebɔn Belemgbunli Saehɔn ammaa yɛanva ɛkɛ ɔluakɛ Gyihova yɛ Nyamenle ne maanle ɔyɛle anyetele+ na ye ahonle yɛle se amaa yeava ye yeawula bɛ sa nu kɛ mɔɔ ɔde ye kɛkala la.+
31 “Akee Gyihova zele me kɛ, ‘Nea, meva Saehɔn nee ye azɛlɛ ne memaa wɔ dɛbadɛba. Bɛbɔ ɔ bo bɛva ye azɛlɛ ne.’+
32 Mɔɔ Saehɔn nee ye menli ne vale konle rayiale yɛ wɔ Gyeehaze la,+
33 Gyihova yɛ Nyamenle ne yele ye maanle yɛ, yemɔti yɛlile ɔdaye, ɔ mra mrenyia ne mɔ nee ye menli ne amuala anwo zo konim.
34 Mekɛ zɔhane, yɛhonle yɛvale ye azuamgbole ne amuala na yɛzɛkyele suakpole biala, yɛhunle mrenyia, mraalɛ nee ngakula. Yɛangyakyi sonla ko bɔbɔ.+
35 Yɛvale nyɛmoa ne mɔ angomekye nee ninyɛne mɔɔ yɛnyianle ye wɔ azuamgbole mɔɔ yɛhonle yɛvale bɛ la azo.
36 Ɔvi Alowɛ+ mɔɔ wɔ Anɔn Bɔnza* ne anloa la (nee suakpole ne mɔɔ wɔ bɔnza ne anu), too kɔdwu Geleade, ɛnee sua biala ɛmbo yɛ nwo zo. Gyihova yɛ Nyamenle ne yele bɛ muala maanle yɛ.+
37 Noko bɛangɔ Amɔnoma azɛlɛ zo,+ Gyabɔko Bɔnza*+ ne anloa amuala nee azuamgbole mɔɔ wɔ awoka ne mɔ azo la, anzɛɛ ɛleka biala mɔɔ Gyihova yɛ Nyamenle ne ɛdua yɛ kɛ yɛmmakɔ la.
Ɔbodwɛkɛ
^ Anzɛɛ “Bɛmmaka bɛ ɛya.”
^ Anzɛɛ “Azudenle.”
^ Anzɛɛ “Azudenle.”
^ Anzɛɛ “Azudenle.”
^ Ɛhye kile, Kiliti.
^ Anzɛɛ “Azudenle.”
^ Anzɛɛ “na bɛade nyane kɛ bɛvo awolɛ zo la.”
^ Anzɛɛ “Azudenle.”
^ Anzɛɛ “Azudenle.”
