Ditilɔnomi 20:1-20
20 “Saa bɛ nee bɛ agbɔvolɛ kaho na bɛnwu kɛ bɛ mgbɔnwɔ, bɛ konle ehwili yɛɛ bɛ sogyama zonle tɛla bɛ ɛdeɛ ne a, bɛmmasulo bɛ, ɔluakɛ Gyihova bɛ Nyamenle ne mɔɔ yele bɛ vile Yigyibiti azɛlɛ zo la nee bɛ lua.+
2 Saa ɔka ekyii bɛdwu konle ne anloa a, ɔwɔ kɛ ɛsɔfo ne batendɛ kile menli ne.+
3 Ɔwɔ kɛ ɔka ɔkile bɛ kɛ, ‘O Yizilayɛma, bɛdie, ɔka ekyii bɛ nee bɛ agbɔvolɛ kɔko. Bɛmmamaa bɛ nwo bubu bɛ. Bɛmmasulo anzɛɛ bɛmmamaa bɛ ahonle tu anzɛɛ bɛ nwo woso bɛ wɔ bɛdabɛ ti,
4 ɔluakɛ Gyihova bɛ Nyamenle ne nee bɛ lua kɛ ɔko yeatia bɛ agbɔvolɛ yeamaa bɛ na yealie bɛ.’+
5 “Ɔwɔ kɛ sogya mgbanyima ne mɔ noko ka kile menli ne kɛ, ‘Nwane a ɛzi sua fofolɛ na ɔtɛbukele a? Ɔzia ɔhɔ sua nu. Tɛ ye zɔhane a, bie a ɔbawu wɔ konle ne anu na awie gyɛne abuke ye sua ne.
6 Nwane a ɛyɛ vanye egyinli na ɔtɛdile nuhua ma ne bie a? Ɔzia ɔhɔ sua nu. Tɛ ye zɔhane a, bie a ɔbawu wɔ konle ne anu na awie gyɛne ava.
7 Nwane a ɛva ɔ nloa ɛdo raalɛ bie anwo zo na ɔtɛgyale ye a? Ɔzia ɔhɔ sua nu.+ Tɛ ye zɔhane a, bie a ɔbawu wɔ konle ne anu na awie gyɛne agya ye.’
8 Eza ɔwɔ kɛ sogya mgbanyima ne mɔ biza menli ne kɛ, ‘Nwane a ɛzulolɛ ɛha ye na ye ahonle ɛdu a?+ Ɔzia ɔhɔ sua nu, amaa yeammaa ɔ mediema ne mɔ ahonle andu kɛ ɔdaye la.’+
9 Saa sogya mgbanyima ne mɔ nee menli ne tendɛ wie a, ɔwɔ kɛ bɛkpa mgbanyima bɛmaa bɛdi ɛlɔne ne anyunlu.
10 “Saa bɛ nee sua bie azo amra kaho a, ɔwɔ kɛ bɛdimoa bɛka ninyɛne mɔɔ ɔbava anzodwolɛ yeara la anwo edwɛkɛ bɛkile bɛ.+
11 Saa bɛbua bɛ anzodwolɛ nu na bɛbuke bɛ nlenkɛ ne mɔ bɛmaa bɛ a, menli mɔɔ bɛbanwu bɛ wɔ ɛkɛ ne la amuala bayɛ bɛ ɛdeɛ na bɛayɛ akɛlɛ gyima na bɛazonle bɛ.+
12 Noko saa bɛambua bɛ anzodwolɛ nu na bɛfa konle bɛtoa bɛ a, ɔwɔ kɛ bɛbɛnga bɛ bɛyia,
13 na Gyihova bɛ Nyamenle ne bava bɛ awula bɛ sa nu, na bɛava konle dadeɛ bɛahu nrenyia biala mɔɔ wɔ sua ne azo la.
14 Noko bɛva zolɛ ninyɛne kɔsɔɔti,+ mraalɛ, ngakula, nyɛmoa yɛɛ debie biala mɔɔ wɔ sua ne azo la, na bɛbali bɛ agbɔvolɛ ninyɛne mɔɔ Gyihova bɛ Nyamenle ne ɛva ɛmaa bɛ la.+
15 “Mɔɔ bɛbava bɛayɛ azuamgbole kɔsɔɔti mɔɔ wɔ moamoa mɔɔ bɛmboka maanle maanle mɔɔ zuozua bɛ la azuamgbole ne mɔ anwo la ɛne.
16 Noko wɔ menli ɛhye mɔ azuamgbole mɔɔ Gyihova bɛ Nyamenle ne ɛlɛfa amaa bɛ kɛ bɛ agyapadeɛ la azo ɛdeɛ, bɛmmamaa debie biala mɔɔ die ɛnwomenle la tɛnla ngoane nu.+
17 Emomu, ɔwɔ kɛ bɛsɛkye bɛ bɔkɔɔ, Hɛtema, Amɔlema, Keenama, Pilɛzema, Havaema yɛɛ Gyibɛsema,+ kɛ mɔɔ Gyihova bɛ Nyamenle ne ɛha ɛhile bɛ la;
18 amaa bɛangilehile bɛ bɛammaa bɛanyɛ bɛ bɛkyi ninyɛne ne mɔ mɔɔ bɛyɛle bɛmaanle bɛ nyamenle ne mɔ la bie na bɛammaa bɛanyɛ ɛtane bɛantia Gyihova bɛ Nyamenle ne.+
19 “Saa bɛbɛnga suakpole bie bɛyia kenle dɔɔnwo na bɛko bɛfa a, ɔnle kɛ bɛfa akuma bɛbu zolɛ mbaka ne mɔ bɛsɛkye bɛ. Bɛbahola bɛali zolɛ ma ne bie noko ɔnle kɛ bɛbu bɛgua bɛ lɔ.+ Asoo ɔwɔ kɛ bɛbɛnga bɛyia baka kɛ mɔɔ bɛbɛnga bɛyia sonla la ɔ?
20 Bɛbahola bɛazɛkye baka mɔɔ bɛze kɛ bɛnli zolɛ ma ne la ala. Bɛbahola bɛapɛ na bɛava bɛalie bane bɛabɛnga suakpole ne mɔɔ ɛlɛfa konle adoa bɛ la bɛayia kɔkpula kɛ bɛbazɛkye ye bɔkɔɔ la.
