Ditilɔnomi 22:1-30
-
Bɛdwenle bɛ gɔnwo mɔ nane nwo (1-4)
-
Mrenyia mɔɔ wula mraalɛ adɛladeɛ yɛɛ mraalɛ mɔɔ wula mrenyia adɛladeɛ (5)
-
Bɛla atiakunlukɛnlɛma ali bɛhile nane (6, 7)
-
Bɛlie bane wɔ sua ti zo (8)
-
Ninyɛne mɔɔ ɔnle kɛ bɛfa bɛbɔ nu bɛyɛ debie (9-11)
-
Yɛ nyɛma sosɔkpɔɔ wɔ wɔ ɛdanlɛ ati nna ne (12)
-
Nla mɔɔ ɛnle ye adenle zo la anwo mɛla (13-30)
22 “Saa ɛnwu ɛ diema bie ɛnlankɛ anzɛɛ ye boane kɛ yeminli na ɔluolua nu a, mmayɛ kɛ wɔannwu ye.+ Ɔwɔ kɛ ɛfa ye ɛsia ɛkɔmaa ɛ diema ne.
2 Noko saa ɛ diema ne ɛnde ɛmbikye wɔ anzɛɛ ɛnze ye a, ɔwɔ kɛ ɛfa nane ne ɛkɔ sua nu na ɛfa ye ɛsie ɛ nwo kɔkpula kɛ ɛ diema ne barakpondɛ ye la. Akee ɔwɔ kɛ ɛfa ɛmaa ye.+
3 Saa ɛ diema asoaso, ye tɛladeɛ yɛɛ ye debie biala minli na ɛnwu ye a, zɔhane ala a ɔwɔ kɛ ɛyɛ ye a. Ɔnle kɛ ɛyɛ kɛ wɔannwu ye.
4 “Saa ɛnwu kɛ ɛ diema asoaso anzɛɛ ye ɛnlankɛ ɛdɔ aze wɔ adenle nu a, ɔnle kɛ ɛ nye fuu ɛyɛ kɛ wɔannwu ye. Ɔwɔ kɛ ɛboa ye ɛmaa ɔmaa nane ne zo.+
5 “Ɔnle kɛ raalɛ wula nrenyia tɛladeɛ, yɛɛ ɔnle kɛ nrenyia wula raalɛ tɛladeɛ. Ɔluakɛ Gyihova wɔ Nyamenle ne kyi awie biala mɔɔ yɛ ɛhye la.
6 “Saa ɛlua adenle nu na ɛnwu aloma sane mɔɔ ɔ mra anzɛɛ aholonvia gua nu la kɛ ɔhenda baka zo anzɛɛ ɔla azɛlɛ nwo na bɛ nli ne butu ɔ mra ne mɔ anzɛɛ aholonvia ne azo a, ɔnle kɛ ɛkye bɛ nli ne ɛboka ɔ mra ne mɔ anwo.+
7 Gyakyi bɛ nli ne maa ɔhɔ, noko ɛbahola wɔahye ɔ mra ne mɔ. Yɛ ɛhye amaa yeawie wɔ boɛ na wɔadɛnla ngoane nu wɔahyɛ.
8 “Saa ɛsi sua fofolɛ a, eza ɔwɔ kɛ ɛdie bane wɔ ɔ ti zo,+ amaa awie anvi zolɛ andɔ aze na wɔanva mogya nwo fɔlɛlilɛ wɔamba wɔ sua nu.
9 “Ɔnle kɛ ɛdua ma ngakyile nwiɔ wɔ wɔ vanye egyinli nu.+ Tɛ ye zɔ a, ma ne so a bɛbalie ɔ muala nee mɔɔ ɛbanyia wɔavi vanye egyinli ne anu la bɛahɔ ɛzonlenlɛsua ne anu.
10 “Mmafa ɛnlankɛ nee asoaso ɛbɔ nu ɛfunduvundu azɛlɛ.+
11 “Mmawula tɛladeɛ mɔɔ bɛva boane enrinli nee lenen bɛbɔ nu bɛnwo la.+
12 “Ɔwɔ kɛ ɛnwo nyɛma sosɔkpɔɔ wɔ wɔ ɛdanlɛ ne mɔɔ ɛfa ɛgua ɛ nwo la ati nna ne.+
13 “Saa nrenyia gya raalɛ na ɔ nee ye da na akee ɔkpɔ ye*
14 na ɔbɔ ye somolɛ kɛ ɔmbɔ ɛbɛla kpalɛ na ɔsɛkye ye duma ɔka kɛ: ‘Megya raalɛ ɛhye noko mɔɔ me nee ye lale la, meannwu daselɛ mɔɔ kile kɛ ɔnze nrenyia’ a,
15 ɔwɔ kɛ bɛlɛra ne papa nee ye mame fa daselɛ mɔɔ kile kɛ bɛlɛra ne ɛnze nrenyia la kɔkile mgbanyima ne mɔ wɔ suakpole ne anlenkɛ kpole ne anloa.
16 Ɔwɔ kɛ bɛlɛra ne papa ka kile mgbanyima ne mɔ kɛ, ‘Menvale me ra raalɛ memaanle nrenyia ɛhye gyale ye noko ɔkpɔ* ye
17 yɛɛ ɔlɛbɔ ye somolɛ kɛ ɔmbɔ ɛbɛla kpalɛ na ɔlɛka kɛ: “Menwu ye kɛ ɛ ra raalɛ ne ɛnlɛ daselɛ mɔɔ kile kɛ ɔnze nrenyia la.” Noko daselɛ mɔɔ kile kɛ me ra raalɛ ne ɛnze nrenyia la ɛne.’ Akee bɛbadɛlɛ ɛdanlɛ ne anu wɔ suakpole ne azo mgbanyima ne mɔ anyunlu.
18 Suakpole ne azo mgbanyima+ bahwe nrenyia ne anzo.+
19 Bɛbamaa yeadua dwɛtɛ fufule hyikɛle* 100 na bɛava bɛamaa bɛlɛra ne papa, ɔluakɛ nrenyia ne zɛkyele Yizilayɛnli bɛlɛra mɔɔ ɛnze nrenyia la duma,+ na ɔbahɔ zo yeayɛ ɔ ye. Ɔnrɛhola ɔnrɛbɔ ye ewole wɔ mekɛ ala mɔɔ ɔde ngoane nu la.
20 “Noko saa somolɛ ne le nɔhalɛ na bɛnlɛ daselɛ mɔɔ kile kɛ bɛlɛra ne ɛnze nrenyia a,
21 ɔwɔ kɛ bɛfa bɛlɛra ne bɛfinde bɛba ye papa sua ne anuhɔlɛ na sua ne azo mrenyia si ye awolɛ ku ye, ɔluakɛ yebɔ anyiemgba ɛbɛla+ wɔ Yizilayɛ kɛ yebɔ adwɔmane ɛbɛla* wɔ ye papa sua nu la.+ Ɔti ɔwɔ kɛ bɛye debie mɔɔ le ɛtane la bɛfi bɛ avinli.+
22 “Saa bɛnwu kɛ nrenyia bie nee ɔ gɔnwo aye ɛlɛda a, ɔwɔ kɛ bɛ mu nwiɔ bɛwu, nrenyia ne mɔɔ nee raalɛ ne lale la yɛɛ raalɛ ne.+ Ɔti ɔwɔ kɛ bɛye debie mɔɔ le ɛtane la bɛfi Yizilayɛ.
23 “Saa nrenyia bie fa ɔ nloa to bɛlɛra bie mɔɔ ɛnze nrenyia la anwo zo, na nrenyia gyɛne nee ye yia wɔ suakpole ne azo na ɔ nee ye da a,
24 ɔwɔ kɛ bɛfa bɛ mu nwiɔ bɛfinde bɛkɔ zɔhane suakpole ne anlenkɛ kpole ne anloa na bɛsi bɛ awolɛ bɛku bɛ; ɔwɔ kɛ bɛku bɛlɛra ne ɔluakɛ yeandeɛdea nu wɔ suakpole ne azo na bɛku nrenyia ne ɔluakɛ yegua ɔ gɔnwo aye anyunlu aze.+ Ɔti ɔwɔ kɛ bɛye debie mɔɔ le ɛtane la bɛfi bɛ avinli.
25 “Noko akee, saa nrenyia ne nee bɛlɛra ne mɔɔ bɛva bɛ nloa bɛdo ɔ nwo zo la yiale wɔ kpɔkɛ nu yɛɛ ɔhyele ye mialeranu ɔ nee ye lale a, ɔwɔ kɛ nrenyia ne mɔɔ nee ye lale la angomekye wu,
26 na ɔnle kɛ bɛyɛ bɛlɛra ne ɛhwee. Bɛlɛra ne ɛtɛyɛle ɛtane mɔɔ fɛta ewule a. Edwɛkɛ ɛhye le kɛ nrenyia mɔɔ ɛholo ɔ gɔnwo nrenyia anwo zo ɛhu ye* la.+
27 Ɔluakɛ ɔyiale ye wɔ kpɔkɛ nu, yɛɛ bɛlɛra ne mɔɔ bɛva bɛ nloa bɛdo ɔ nwo zo la deɛdeanle nu noko ɛnee awie ɛnle ɛkɛ mɔɔ ɔdie ye a.
28 “Saa nrenyia bie nee bɛlɛra mɔɔ ɛnze nrenyia mɔɔ bɛtɛfale bɛ nloa bɛtɛtole ɔ nwo zo la yia na ɔkye ye ɔ nee ye da na bɛnwu bɛ a,+
29 ɔwɔ kɛ nrenyia ne mɔɔ nee ye lale la fa dwɛtɛ fufule hyikɛle 50 maa bɛlɛra ne papa, na ɔbayɛ ɔ ye.+ Kɛmɔ ɔguale bɛlɛra ne anyunlu aze la ati, ɔnrɛhola ɔnrɛbɔ ye ewole wɔ mekɛ ala mɔɔ ɔde ngoane nu la.
30 “Ɔnle kɛ nrenyia biala fa ye papa aye, amaa yeambɔ ye papa anyiemgba.*+
Ɔbodwɛkɛ
^ Anzɛɛ “ɔkpo ye.”
^ Anzɛɛ “yekpo.”
^ Anzɛɛ “tuutuu.”
^ Anzɛɛ “ɛhu ye ɛkɛla.”
^ Hibulu aneɛ nu, “amaa yeanye ye papa tɛladeɛ.”
