Ditilɔnomi 25:1-19
25 “Saa menli nwiɔ nyia edwɛkɛ a, bɛbahola bɛahɔ ndɛnebuavolɛma anyunlu,+ bɛbali bɛ edwɛkɛ na bɛabua mɔɔ ye edwɛkɛ yɛ fɛ la benle na bɛabua mɔɔ ye edwɛkɛ ɛnyɛ fɛ la fɔlɛ.+
2 Saa ɔfɛta kɛ bɛbo mɔɔ di fɔlɛ la a,+ ndɛnebuavolɛ ne bamaa yeala yeabutu ɔ nyunlu aze, na bɛabo ye wɔ ɔ nyunlu ɛkɛ. Ɔwɔ kɛ bɛbila ye mbaka dodo mɔɔ fɛta ye ɛtane mɔɔ yeyɛ la.
3 Bɛbahola bɛabila ye mbaka 40,+ noko ɔnle kɛ ɔbo. Saa bɛkɔ zo bɛbila ye mbaka dɔɔnwo bɛtɛla zɔ a, ɛ diema ne babɔ anyiemgba wɔ ɛ nyunlu.
4 “Mmakyekye ɛnlankɛ nyinli mɔɔ ɛlɛwoso ma la anloa.+
5 “Saa mediema mrenyia de ɛleka ko na bɛ nuhua ko anwo ralɛ na ɔwu a, ɔnle kɛ mɔɔ ɛwu la aye ne gya awie gyɛne mɔɔ ɛnvi abusua ne anu la. Ɔwɔ kɛ ɔ hu adiema nrenyia ne kɔ ɔ nwo, na ɔyɛ bɛ hu adiema gyima na ɔgya ɔ diema ne aye ne.+
6 Kakula mɔɔ raalɛ ne balimoa awo ye la, ɔbava ɔ diema ne mɔɔ ɛwu la duma yeado ye,+ amaa ye duma amminli anvi Yizilayɛ.+
7 “Na saa nrenyia ne ɛngulo kɛ ɔgya ɔ diema ne mɔɔ ɛwu la aye ne a, ɔwɔ kɛ ɔ diema ne aye ne kɔ mgbanyima ne mɔ ɛkɛ wɔ suakpole ne anlenkɛ kpole ne anloa na ɔka kɛ, ‘Me hu adiema ne ɛkpo kɛ ɔkɛmaa ɔ diema ne duma kɛha Yizilayɛ. Yeamkponle zo kɛ ɔbayɛ bɛ hu adiema gyima ne na yeagya me.’
8 Ɔwɔ kɛ mgbanyima mɔɔ wɔ ye suakpole ne azo la fɛlɛ ye na bɛtendɛ bɛkile ye. Saa yeamkponle na ɔka kɛ, ‘Memkpondɛ kɛ megya ye’ a,
9 ɛnee ɔwɔ kɛ ɔ diema ne aye ne kɔ ɔ nwo ɛkɛ wɔ mgbanyima ne mɔ anyunlu, ɔye nrenyia ne mgbɔlaboa ne wɔ ɔ gyakɛ,+ ɔto nyɛlɛ ɔ nyunlu, na ɔka kɛ, ‘Kɛ ɔwɔ kɛ bɛyɛ nrenyia mɔɔ ɔngulo kɛ ɔkyekye ɔ diema awuke la ɛne.’
10 Ɛhye anzi, duma mɔɔ bɛbava bɛavɛlɛ ye abusua ne* wɔ Yizilayɛ la a le, ‘Ahenle mɔɔ bɛyele ye mgbɔlaboa la sua nu.’
11 “Saa mrenyia nwiɔ ɛlɛko na ko aye ba kɛ ɔbalie ɔ hu yeavi ahenle mɔɔ ɛlɛbo ye la asa anu na ɔsɔ ye mrenyianu a,
12 ɔwɔ kɛ bɛpɛ ɔ sa. Bɛmmase* ye anwunvɔne.
13 “Ɔnle kɛ ɛnyia tone awolɛ ngakyile nwiɔ,+ kpole ko yɛɛ ekyi ko, wɔ wɔ baage nu.
14 Ɔnle kɛ ɛnyia ɛzuzudeɛ ngakyile nwiɔ,*+ kpole ko yɛɛ ekyi ko, wɔ wɔ sua nu.
15 Ɔwɔ kɛ ɛnyia tone mɔɔ le kpalɛ na ɔle pɛpɛɛpɛ yɛɛ ɛzuzudeɛ mɔɔ le kpalɛ na ɔle pɛpɛɛpɛ la, amaa wɔadɛnla azɛlɛ ne mɔɔ Gyihova wɔ Nyamenle ne ɛlɛfa amaa wɔ la azo wɔahyɛ.+
16 Ɔluakɛ Gyihova wɔ Nyamenle ne kyi awie biala mɔɔ ɛnli nɔhalɛ na ɔyɛ ninyɛne ɛhye mɔ la.+
17 “Bɛhakye mɔɔ Amalɛkema vale yɛle bɛ wɔ mekɛ mɔɔ bɛvi Yigyibiti bɛlɛba la,+
18 kɛzi bɛrayiale bɛ wɔ adenle nu na bɛholole menli mɔɔ ɛha bɛ nzi la anwo zo wɔ mekɛ mɔɔ ɛnee bɛvɛ na bɛ nwo ɛbɛlɛ bɛ la. Bɛanzulo Nyamenle.
19 Saa Gyihova bɛ Nyamenle ne maa bɛ nwo tɔ bɛ wɔ bɛ agbɔvolɛ kɔsɔɔti mɔɔ ɛbɛnga bɛ ɛyia la anwo wɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ kɛ bɛdɛnla zolɛ la azo a,+ ɔwɔ kɛ bɛkyikyi Amalɛkema duma bɛfi ewiade ye anu.+ Bɛmmamaa bɛ rɛle fi.
