Ditilɔnomi 28:1-68
28 “Na saa bɛtie Gyihova bɛ Nyamenle ne ane na bɛnea bɛdi ye mɛla kɔsɔɔti mɔɔ melɛfa meamaa bɛ ɛnɛ la azo a, Gyihova bɛ Nyamenle ne bakpogya bɛ zo adɛla maanle maanle kɔsɔɔti mɔɔ wɔ azɛlɛ ye azo la.+
2 Bɛbanyia nyilalɛ ɛhye mɔ amuala na bɛanyia ye molozo,+ ɔluakɛ bɛtie Gyihova bɛ Nyamenle ne ane:
3 “Nyilalɛ baha bɛ wɔ sua zo, yɛɛ nyilalɛ baha bɛ wɔ ɛbɔ nu.+
4 “Nyilalɛ baha bɛ mra*+ nee bɛ ɛya nu ma yɛɛ bɛ nyɛmoa ne mɔ amra, bɛ nlankɛ nee mboane mralɛ.+
5 “Nyilalɛ baha bɛ kɛndɛne+ nee bɛ kyɛnze mɔɔ bɛfa bɛfete ɛdɔkɛ la.+
6 “Nyilalɛ baha bɛ wɔ bɛ ɛralɛ nu, yɛɛ nyilalɛ baha bɛ wɔ bɛ ɛhɔlɛ nu.
7 “Gyihova bamaa bɛ kpɔvolɛma mɔɔ badwazo bɛ nwo zo la aho adɔ wɔ bɛ nyunlu.+ Bɛbalua adenle ko azo bɛara bɛ nwo zo noko bɛbalua ndenle ngakyile nsuu azo bɛanriandi.+
8 Gyihova bayila bɛ ninyɛnezielɛ ɛleka+ nee bɛ gyima biala azo, na ɔbayila bɛ bɔkɔɔ wɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo.
9 Gyihova bayɛ bɛ menli nwuanzanwuanza amaa ɔ nwo,+ kɛ mɔɔ ɔhanle nwolɛ ndane ɔhilele bɛ la,+ ɔluakɛ bɛkɔ zo bɛdi Gyihova bɛ Nyamenle ne mɛla ne mɔ azo na bɛdua ye ndenle nu.
10 Azɛlɛ ye azo amra kɔsɔɔti banwu kɛ Gyihova duma la bɛ nwo zo na bɛazulo bɛ.+
11 “Gyihova bamaa bɛawo mralɛ dɔɔnwo na bɛanyia nyɛmoa dɔɔnwo yɛɛ azɛlɛ mɔɔ kye aleɛ+ wɔ azɛlɛ ne mɔɔ Gyihova hanle ndane hilele bɛ nenyia mɔ kɛ ɔbava yeamaa bɛ la azo.+
12 Gyihova babuke ye ninyɛnezielɛ ɛleka kpalɛ ne, mɔɔ le anwuma la, yeamaa bɛ na yeamaa ezule adɔ agua bɛ azɛlɛ ne azo wɔ ye ɛlobɔ nloa+ na yeayila debie biala mɔɔ bɛbayɛ la azo. Bɛbabɔ maanle maanle dɔɔnwo bosea, noko bɛmɛ, ɔnrɛhyia kɛ bɛkɛbiza bosea.+
13 Saa bɛdi Gyihova bɛ Nyamenle ne mɛla mɔɔ melɛfa meamaa bɛ ɛnɛ la azo na bɛyɛ a, Gyihova bamaa bɛayɛ tile, na bɛnrɛyɛ dualɛ; bɛbala anwuma,+ na bɛnrɛla aze.
14 Bɛmmatwe bɛ nwo bɛfi edwɛkɛ kɔsɔɔti mɔɔ melɛka meahile bɛ ɛnɛ la anwo bɛkɔ fema zo anzɛɛ bɛne zo+ bɛkɔdi nyamenle gyɛne nzi na bɛsonle bɛ.+
15 “Noko saa bɛandie Gyihova bɛ Nyamenle ne ane na bɛannea bɛanli ye mɛla nee ye ngyehyɛleɛ kɔsɔɔti mɔɔ melɛfa meamaa bɛ ɛnɛ la azo a, munzule ɛhye mɔ kɔsɔɔti bado bɛ na bɛanyia ye molozo:+
16 “Munzule bado bɛ wɔ sua zo, yɛɛ munzule bado bɛ wɔ ɛbɔ nu.+
17 “Munzule bado bɛ kɛndɛne+ yɛɛ bɛ kyɛnze mɔɔ bɛfa bɛfete ɛdɔkɛ la.+
18 “Munzule bado bɛ mra*+ nee bɛ ɛya nu ma yɛɛ bɛ nlankɛ nee mboane mralɛ.+
19 “Munzule bado bɛ wɔ bɛ ɛralɛ nu, yɛɛ munzule bado bɛ wɔ bɛ ɛhɔlɛ nu.
20 “Gyihova bamaa munzule, anyezota nee anzohwenlɛ aha gyima biala mɔɔ bɛbayɛ la kɔkpula kɛ ɔbazɛkye bɛ na yeabɔ bɛ bo zo ndɛndɛ ɔlua ninyɛndane mɔɔ bɛyɛ na bɛkpo ye* la ati.+
21 Gyihova bamaa ewule ne aha bɛ nwo kɔkpula kɛ ɔbabɔ bɛ bo zo yeavi azɛlɛ ne mɔɔ bɛlɛkɔ bɛahɔdɛnla zolɛ la azo la.+
22 Gyihova bamaa avinliwule nee ebunlu+ aha bɛ, bɛ nwo banwunwu, bɛ nwo balɔ, konle dadeɛ+ bara bɛ nwo zo, anwoma wuluwulu nee ewule bazɛkye bɛ aleɛ;+ na bɛbagyegye bɛ kɔkpula kɛ bɛ bo zo kɛbɔ la.
23 Bɛ anwomanyunlu bayɛ kɔbele yɛɛ azɛlɛ ne bayɛ bulalɛ.+
24 Gyihova bamaa anwea nee munlutu avi anwuma adɔ agua bɛ azɛlɛ ne azo kɛ ezule kɔkpula kɛ bɛ bo zo kɛbɔ la.
25 Gyihova bamaa bɛaho bɛadɔ wɔ bɛ kpɔvolɛma anyunlu.+ Bɛbalua adenle ko azo bɛahɔ bɛ nwo zo noko bɛbalua ndenle ngakyile nsuu azo bɛanriandi bɛ; na bɛ nwo bayɛ azɛlɛ ye azo arelemgbunlililɛ kɔsɔɔti ɛzulolɛ.+
26 Na bɛ avunli bayɛ anwomanyunlu nloma nee ɛbɔ nu nane aleɛ, na awie biala ɛnrɛvoa bɛ.+
27 “Gyihova bamaa Yigyibiti nyila ne bie abobɔ bɛ, ekoko, ehulike nee azenra bagua bɛ nwo mɔɔ bɛnrɛhola ye ayile yɛ a.
28 Gyihova bamaa bɛabɔ ɛlane na bɛ nye azi+ na bɛ nye zo ada bɛ.*
29 Bɛbali nvuovua ewiazo henlema kɛ mɔɔ anyenzinliravolɛ di nvuovua wɔ awozinli nu la,+ na debie biala mɔɔ bɛbayɛ la ɛnrɛyɛ boɛ; na bɛbasisi bɛ na bɛawua bɛ dahuu noko awie biala ɛnrɛlie bɛ.+
30 Bɛbava bɛ nloa bɛado raalɛ nwo zo noko awie gyɛne bahye ye mialeranu ɔ nee ye ala. Bɛbazi sua, noko bɛnrɛdɛnla nu.+ Bɛbayɛ vanye egyinli noko bɛnrɛli nuhua ma ne bie.+
31 Bɛbahu bɛ ɛnlankɛ wɔ bɛ nye zo, noko bɛnrɛli bie. Bɛbawua bɛ asoaso wɔ bɛ nyunlu ɛkɛ ne ala, noko bɛ sa ɛnrɛha ye bieko. Bɛbava bɛ mboane bɛamaa bɛ kpɔvolɛma, noko bɛnrɛnyia dievolɛ biala.
32 Bɛbava bɛ mra mrenyia nee bɛ mra mraalɛ bɛamaa awie mɔ gyɛne+ wɔ mekɛ mɔɔ bɛ nye dua bɛ la, yɛɛ bɛ nwo balɔ bɛ dahuu, noko bɛnrɛhola bɛnrɛyɛ nwolɛ ɛhwee.
33 Menli mɔɔ bɛnze bɛ la bali bɛ ɛya nu aleɛ nee debie biala mɔɔ bɛbayɛ la,+ na bɛbasisi bɛ na bɛayɛ bɛ amumuyɛ dahuu.
34 Mɔɔ bɛbava bɛ nye bɛanwu ye la bamaa bɛabɔ ɛlane.
35 “Gyihova bamaa nyila mɔɔ yɛ nyane na bɛyɛ ye ayile a ɔngɔ la abobɔ bɛ gyakɛ agbɔkɛ nee bɛ gyakɛ anwo, ɔvi bɛ gyakɛ akunlu too yeahɔdwu bɛ ti zo.
36 Gyihova bavoa bɛ nee bɛ belemgbunli mɔɔ bɛbamaa yeali bɛ nwo zo la yeahɔ maanle mɔɔ bɛdabɛ nee bɛ nenyia mɔ ɛnze nu la anu,+ na ɛkɛ ne, bɛbazonle nyamenle gyɛne mɔɔ bɛva mbaka nee awolɛ bɛyɛ la.+
37 Na bɛ nwo bayɛ menli kɔsɔɔti mɔɔ Gyihova bavoa bɛ ahɔ bɛ avinli la ɛzulolɛ, na bɛbazele bɛ* na bɛagolo bɛ nwo.+
38 “Bɛbalua ma dɔɔnwo wɔ bɛ ɛya nu, noko ekyi bie ala a bɛbanyia a,+ ɔluakɛ abɛbɛ bali ɔ muala.
39 Bɛbayɛ vanye egyinli na bɛadodɔ nwolɛ, noko bɛnrɛnlo nwanye yɛɛ bɛnrɛnyia ɛhwee wɔ zolɛ,+ ɔluakɛ sonlɛ* bali.
40 Bɛbanyia ɔlivi mbaka dɔɔnwo wɔ bɛ azɛlɛ ne azo ɛleka biala, noko bɛnrɛnyia nwole bɛnrɛkpokpa bɛ nwo, ɔluakɛ bɛ ɔlivi ne mɔ bakpolo agua.
41 Bɛbawo mralɛ mrenyia nee mraalɛ, noko bɛnrɛyɛ bɛ ɛdeɛ, ɔluakɛ bɛbahɔ akɛlɛzonlenlɛ nu.+
42 Ngɛkɛba dɔɔnwo* bali bɛ mbaka nee bɛ ɛbɔ nu aleɛ kɔsɔɔti.
43 Ɛyɛvolɛ mɔɔ wɔ bɛ avinli la banyia tumi kpole adɛla bɛ, na bɛmɛ bɛ tumi ne aha aze bɔkɔɔ.
44 Ɔbabɔ bɛ bosea, noko bɛmɛ bɛnrɛbɔ ye bosea.+ Ɔbali bɛ ti, na bɛmɛ bɛadoa ye.+
45 “Munzule ɛhye mɔ kɔsɔɔti+ bado bɛ na yeali bɛ nzi na bɛanyia ye molozo kɔkpula kɛ bɛ bo zo babɔ la,+ ɔluakɛ bɛandie Gyihova bɛ Nyamenle ne ane, bɛanli ye mɛla nee ye ngyehyɛleɛ mɔɔ ɔvale ɔmaanle bɛ la azo.+
46 Na ɔbahɔ zo yeayɛ dahuu sɛkɛlɛneɛ nee kɔkɔbɔlɛ yeala bɛdabɛ nee bɛ bo zo amra anwo zo,+
47 ɔluakɛ bɛanva anyelielɛ nee ahonle nu fɛlɛkolilɛ bɛanzonle Gyihova bɛ Nyamenle ne wɔ mekɛ mɔɔ bɛnyianle debie biala molozo la.+
48 Gyihova bamaa bɛ kpɔvolɛma ara bɛ nwo zo, na bɛbazonle bɛ+ wɔ mekɛ mɔɔ ɛhɔne+ nee nzuhɔne ɛlɛku bɛ na bɛlɛ bɛ nwo zɔ na bɛnlɛ ɛhwee la. Ɔbava bulalɛ gyɛnvayile yeado bɛ kɔme zo kɔkpula kɛ bɛ bo zo kɛbɔ la.
49 “Gyihova bamaa maanle bie mɔɔ wɔ azɛlɛ ne anloa moamoa lɔ la ara bɛ nwo zo;+ ɔbara ndɛndɛ kɛ kɔleɛ la,+ maanle mɔɔ bɛnde bɛ aneɛ,+
50 maanle mɔɔ anwo yɛ ɛzulolɛ na ɔnrɛbu kpanyinli anzɛɛ ɔnrɛze kakula anwunvɔne la.+
51 Bɛbali bɛ nyɛmoa ne mɔ amra nee bɛ ɛbɔ nu aleɛ kɔkpula kɛ bɛ bo zo kɛbɔ la. Bɛnrɛgyakyi ma, nwanye fofolɛ anzɛɛ nwole, ɛnlankɛ anzɛɛ boaneralɛ bɛnrɛmaa bɛ kɔkpula kɛ bɛkɛzɛkye bɛ la.+
52 Bɛbabɛnga bɛ bɛayia, bɛatoto bɛ azuamgbole* kɔsɔɔti anu bɛamaa bɛaha zo wɔ bɛ azɛlɛ ne amuala azo kɔkpula kɛ bɛ bane ndendenle mɔɔ bɛlie na bɛfa bɛ nwo bɛto zo la babubu agua aze la. Ɛhɛe, bɛbabɛnga bɛ bɛayia wɔ bɛ azuamgbole kɔsɔɔti mɔɔ wɔ bɛ azɛlɛ ne mɔɔ Gyihova bɛ Nyamenle ne ɛva ɛmaa bɛ la amuala azo.+
53 Akee bɛbali bɛ mra mrenyia nee bɛ mra mraalɛ* mɔɔ Gyihova bɛ Nyamenle ne ɛva ɛmaa bɛ la nwonane+ ɔluakɛ kɛzi bɛ kpɔvolɛ ne babɛnga bɛ ayia na yeahile bɛ nyane la anu bayɛ se kpalɛ.
54 “Nrenyia bɔbɔ mɔɔ le bɛtɛɛ na ɔse anwunvɔne wɔ bɛ avinli la ɛnrɛze ɔ diema nrenyia anzɛɛ ɔ ye mɔɔ ɔkulo ye anzɛɛ ɔ mra mɔɔ kɛha la anwunvɔne,
55 na ɔnrɛmaa bɛ ɔ mra ne mɔ mɔɔ ɔbali bɛ nwonane ne la bie, ɔluakɛ kɛmɔ bɛ kpɔvolɛ ne bɛnga bɛ yia a ɔbahile bɛ nyane mɔɔ anu yɛ se kpalɛ la ati, ɔnrɛnyia ɛhwee bieko.+
56 Na raalɛ mɔɔ le bɛtɛɛ na ɔse anwunvɔne wɔ bɛ avinli na ɔndwenle nwo bɔbɔ kɛ ɔfa ɔ gyakɛ yeazie azɛlɛ nwo ɔluakɛ ɔ ti anu yɛ ye fɛ+ la ati la ɛnrɛze ɔ hu mɔɔ ɔkulo ye anzɛɛ ɔ ra nrenyia anzɛɛ ɔ ra raalɛ anwunvɔne,
57 ɔnrɛze anziama mɔɔ finde ye ɛzɔlɛ nu nee ɔ mra mɔɔ yewo bɛ bɔbɔ la anwunvɔne, ɔluakɛ ɔbavea yeali, ɔboalekɛ kɛzi bɛ kpɔvolɛ ne babɛnga bɛ ayia na yeahile bɛ nyane wɔ azuamgbole ne mɔ azo la anu bayɛ se kpalɛ.
58 “Saa bɛannea bɛanli Mɛla ɛhye anu edwɛkɛ mɔɔ bɛhɛlɛ ye wɔ buluku ɛhye anu la azo+ na bɛanzulo Gyihova+ bɛ Nyamenle ne anyunlunyia duma ɛhye mɔɔ yɛ ɛzulolɛ la a,+
59 Gyihova bamaa ewulenzane mɔɔ anloa yɛ se la aha bɛdabɛ nee bɛ bo zo amra, ewulenzane mgbole mɔɔ baha bɛ nwo,+ yɛɛ anwodolɛ mɔɔ yɛ nyane mɔɔ bɛyɛ ye ayile a ɔngɔ la.
60 Ɔbamaa Yigyibiti ewule mɔɔ ɛnee bɛsulo ye la kɔsɔɔti ara bɛ nwo zo na ɔbaha bɛ nwo.
61 Eza Gyihova bamaa anwodolɛ anzɛɛ ewulenzane biala mɔɔ bɛangɛlɛ ye wɔ Mɛla buluku ɛhye anu la ara bɛ nwo zo kɔkpula kɛ bɛ bo zo kɛbɔ la.
62 Bɛ nwo ɛzo kɛ anwomanyunlu nwɔlɔra+ ɛdeɛ, noko bɛ nuhua ekyi bie ala a baha a,+ ɔluakɛ bɛandie Gyihova bɛ Nyamenle ne ane.
63 “Na kɛ mɔɔ ɛnee Gyihova anye die nwo kɛ ɔbamaa bɛakpazi na bɛ nwo azo la, zɔhane ala a Gyihova anye balie nwo kɛ ɔbazɛkye bɛ na yeabɔ bɛ bo zo a; na bɛbaye bɛ bɛavi azɛlɛ ne mɔɔ ɔka ekyii bɛkɔ zolɛ la azo.
64 “Gyihova babɔ bɛ asande wɔ maanle maanle kɔsɔɔti anu, ɔvi azɛlɛ ye ati kɔdwu ɔ bo,+ na ɛkɛ ne, bɛbazonle nyamenle mɔɔ bɛva mbaka nee awolɛ bɛyɛ mɔɔ bɛdabɛ anzɛɛ bɛ nenyia mɔ ɛnze bɛ la.+
65 Bɛnrɛnyia anzodwolɛ wɔ maanle maanle ɛhye mɔ anu+ yɛɛ bɛnrɛnyia ɛleka bɛnrɛva bɛ gyakɛ bɛnrɛzie na bɛ nwo adɔ bɛ. Emomu Gyihova bamaa ahunlundetelɛ adɔ bɛ nwo+ na bɛ nye azi na bɛ rɛle abɔ.*+
66 Bɛ ngoane bala esiane kpole nu, na aledwolɛ nee alehyenlɛ bɛ ahonle badu; na bɛnrɛnwu ye saa bɛbanyia ngoane bɔbɔ a.
67 Saa ɔdwu nwonlomɔ a bɛbaha kɛ, ‘Me kunlu a anrɛɛ aleɛ ɛdwo!’ yɛɛ ɔdwu nɔsolɛ a bɛbaha kɛ, ‘Me kunlu a anrɛɛ aleɛ ɛhye!’ ɔlua bɛ ahonle mɔɔ badu nee mɔɔ bɛ nye banwu ye la ati.
68 Na Gyihova bawula bɛ meli nu ava bɛ alua adenle mɔɔ menganle mengilele bɛ kɛ, ‘Bɛ nye ɛnrɛnwu ye bieko ɛlɛ’ la azo ava bɛ azia ara Yigyibiti, na ɛkɛ ne, bɛbadɔne bɛ nwo kɛ ngɛkɛlɛ mrenyia nee mraalɛ bɛamaa bɛ kpɔvolɛma, noko awie biala ɛnrɛdɔ bɛ.”
Ɔbodwɛkɛ
^ Hibulu aneɛ nu, “bɛ awodeɛ nu ma.”
^ Hibulu aneɛ nu, “bɛ awodeɛ nu ma.”
^ Hibulu aneɛ nu, “me.”
^ Anzɛɛ “bɛ adwenle aha abɔ nu.”
^ Hibulu aneɛ nu, “bɛbava bɛ bɛabu ɛrɛlɛ.”
^ Anzɛɛ “nvuba.”
^ Anzɛɛ “Ngɛkɛba mɔɔ tu.”
^ Hibulu aneɛ nu, “bɛ nlenkɛ mgbole.”
^ Hibulu aneɛ nu, “bɛ awodeɛ nu ma.”
^ Anzɛɛ “na ɛkɛla rɛle abɔ.”
