Ditilɔnomi 3:1-29
3 “Akee yɛhakyile yɛ nye yɛvale Beehyan Adenle ne azo. Na Beehyan Belemgbunli Ɔɔgo nee ye menli ne amuala vale konle rayiale yɛ wɔ Ɛdelɛyae.+
2 Ɔti Gyihova zele me kɛ, ‘Mmasulo ye, ɔluakɛ mebava ɔdaye nee ye menli ne amuala yɛɛ ye azɛlɛ ne meawula ɛ sa nu na wɔayɛ ye kɛ mɔɔ ɛyɛle Amɔlema Belemgbunli Saehɔn mɔɔ ɛnee de Hɛhyebɔn la.’
3 Yemɔti Gyihova yɛ Nyamenle ne eza vale Beehyan Belemgbunli Ɔɔgo nee ye menli ne amuala wulale yɛ sa nu, na yɛhunle bɛ muala mɔɔ ko bɔbɔ anga a.
4 Akee yɛhonle yɛvale ye azuamgbole ne mɔ amuala. Sua ko bɔbɔ ɛnle ɛkɛ mɔɔ yɛanlie yɛanvi bɛ sa nu a—bɛle azuamgbole 60, Aagɔbo maanzinli ne amuala, Ɔɔgo belemgbunlililɛ ne mɔɔ wɔ Beehyan la.+
5 Ɛnee bɛlie azuamgbole ɛhye mɔ amuala anwo bane ndendenle, bɛlɛ nlenkɛ mgbole yɛɛ mbulalɛ gugua bɛ nzi, yɛɛ yɛvale namunamu dɔɔnwo.
6 Noko yɛzɛkyele bɛ+ kɛ mɔɔ yɛyɛle Hɛhyebɔn Belemgbunli Saehɔn la, na yɛzɛkyele suakpole biala na yɛhunle mrenyia, mraalɛ nee ngakula.+
7 Na yɛvale nyɛmoa kɔsɔɔti nee ninyɛne mɔɔ yɛnyianle ye wɔ azuamgbole ne mɔ ɛzɛkyelɛ nu la.
8 “Mekɛ zɔhane, yɛliele Amɔlema arelemgbunli nwiɔ ne+ mɔɔ ɛnee wɔ Dwɔdan maanzinli nu la azɛlɛ ne, ɔvi Anɔn Bɔnza* ne anwo too kɔdwu Hɛmɔn Boka ne anwo+
9 (boka ne mɔɔ ɛnee Saedɛnema fɛlɛ ye Seleɔn na Amɔlema fɛlɛ ye Sinɛ la),
10 azuamgbole mɔɔ wɔ boka azo sɛsɛ ne azo la amuala, Geleade yɛɛ Beehyan amuala too kɔdwu Salɛka nee Ɛdelɛyae,+ azuamgbole mɔɔ wɔ Ɔɔgo belemgbunlililɛ ne anu wɔ Beehyan la.
11 Ɔluakɛ ɛnee Beehyan Belemgbunli Ɔɔgo a le Relɛfeeyemenli mɔɔ ɛha a. Bɛvale bulalɛ* a bɛyɛle ye ɛlɛka* ne a, na ɔtɛbɔ Amɔnoma sua Relaba azo. Ye tendenle le kubit* ngɔnla yɛɛ ye tɛtɛlɛ le kubit nna, kɛ mɔɔ bɛsuzu kubit la.
12 Mekɛ zɔhane, yɛvale azɛlɛ ɛhye: ɔvi Alowɛ+ mɔɔ wɔ Anɔn Bɔnza* ne anwo la, nee Geleade awoka ne mɔ foa ko, na meva azuamgbole mɔɔ wɔ ɛkɛ ne la memaa Wulubɛnema nee Gaadema.+
13 Meva Geleade ɛleka mɔɔ ɛha la nee Ɔɔgo belemgbunlililɛ ne mɔɔ wɔ Beehyan la amuala memaa Manasɛ abusua foa ko ne.+ Ɛnee bɛfɛlɛ Aagɔbo maanzinli ne amuala mɔɔ wɔ Beehyan la Relɛfeeyemma azɛlɛ.
14 “Manasɛ ara Gyeeyɛ+ vale Aagɔbo+ maanzinli ne amuala too ɔhɔdwule Gɛhyɛma nee Meeyakatema+ ɛweɛne zo na ɔvale ye duma ɔdonle Beehyan namunamu zɔhane mɔ azo, ɔvɛlɛle ye Havɔto-gyeeyɛ*+ too yɛradwu ɛnɛ.
15 Na meva Geleade memaa Meekɛ.+
16 Meva Geleade kɔdwu Anɔn Bɔnza* ne,+ mɔɔ bɔnza ne avinli le ye ɛweɛne la memaa Wulubɛnema nee Gaadema. Eza meva Gyabɔko, bɔnza ne mɔɔ le Amɔnoma ɛweɛne la
17 yɛɛ Alaba ne mɔɔ Dwɔdan ne a le ye ɛweɛne la, ɔvi Kyenɛlɛte kɔdwu Alaba Nyevile ne, mɔɔ le Ngyenle Nyevile ne* mɔɔ wɔ Pesega ndololeɛ nu wɔ aduduleɛ la memaa bɛ.+
18 “Akee menganle mengilele bɛ kɛ: ‘Gyihova bɛ Nyamenle ne ɛva azɛlɛ ɛhye ɛmaa bɛ. Bɛ menli mɔɔ ze konle nye zo la bava akodeɛ aze ali bɛ mediema Yizilayɛma anyunlu.+
19 Bɛ ye mɔ, bɛ mra yɛɛ bɛ nyɛmoa (meze kɛ bɛlɛ nyɛmoa dɔɔnwo) ala a bahɔ zo adɛnla azuamgbole mɔɔ meva memaa bɛ la azo a,
20 kɔkpula kɛ Gyihova bamaa bɛ mediema ne mɔ alie bɛ menle kɛ mɔɔ yeyɛ yemaa bɛ la, na bɛdabɛ noko bɛanyia azɛlɛ ne mɔɔ Gyihova bɛ Nyamenle ne bava amaa bɛ wɔ Dwɔdan ne anzi lɔ la. Akee bɛbazia bɛara na bɛ nuhua ko biala ahɔva ye agyapadeɛ ne mɔɔ meva memaa ye la.’+
21 “Mekɛ zɔhane menzele Dwɔhyua kɛ:+ ‘Ɛdawɔ wɔva ɛ nye wɔnwu mɔɔ Gyihova wɔ Nyamenle ne ɛva ɛyɛ arelemgbunli nwiɔ ɛhye mɔ la. Zɔhane ala a Gyihova bayɛ arelemgbunlililɛ kɔsɔɔti mɔɔ bɛbahɔdo bɛ la a.+
22 Bɛmmasulo bɛ, ɔluakɛ Gyihova bɛ Nyamenle ne baho amaa bɛ.’+
23 “Mekɛ zɔhane menzɛlɛle Gyihova kɛ,
24 ‘O Tumivolɛ Awulae Gyihova, wɔbɔ ɔ bo ɛlɛkile wɔ sonvolɛ wɔ kpoleyɛlɛ nee ɛ sa mɔɔ tumi wɔ nu la,+ ɔluakɛ nyamenle boni a wɔ anwuma anzɛɛ aze mɔɔ yɛ ninyɛne mgbole zɛhae kɛ ɛdawɔ a?+
25 Mesɛlɛ wɔ, maa mempɛ mengɔ na mengɔnwu azɛlɛ kpalɛ ne mɔɔ wɔ Dwɔdan ne anzi lɔ la, awoka zo ɛleka kpalɛ ɛhye nee Lɛbanɔn.’+
26 Noko bɛdabɛ ti ɛnee Gyihova ɛva me nwo ɛya,+ na yeandie me. Emomu Gyihova zele me kɛ, ‘Yeyɛ boɛ! Mmaka ɛhye anwo edwɛkɛ ɛkile me bieko.
27 Fo kɔgyinla Pesega azo+ na to ɛ nye nea azɛlɛ ne adɔleɛ nee sɔlɔ nee nyiakɛ yɛɛ aduduleɛ, ɔluakɛ ɛnrɛpɛ Dwɔdan+ ɛhye.
28 Ye Dwɔhyua+ na maa ye anwosesebɛ na si ye ahonle ɔluakɛ ɔdaye a ɔbali menli ɛhye anyunlu yeamaa bɛapɛ+ na yeamaa bɛava azɛlɛ ne mɔɔ ɛbanwu ye la a.’
29 Ɛhye mɔ amuala zile wɔ mekɛ mɔɔ ɛnee yɛde bɔnza ne mɔɔ nee Bɛte-piyɔ anye bɔ zolɛ la anu la.+
Ɔbodwɛkɛ
^ Anzɛɛ “Azudenle.”
^ Anzɛɛ ɔkola ɔkile, “bolɛ bile.”
^ Anzɛɛ “funli ɛlɛka.”
^ Anzɛɛ “Azudenle.”
^ Ɔ bo kile “Gyeeyɛ Ɛdanlɛsua Namunamu.”
^ Anzɛɛ “Azudenle.”
^ Ɛhye kile, Nyevile Wulera ne.
