Ditilɔnomi 5:1-33
5 Akee Mosisi maanle Yizilayɛma amuala rayiale na ɔzele bɛ kɛ: “O Yizilayɛma, bɛdie mɛla nee ngyehyɛleɛ mɔɔ melɛfa meado bɛ nyunlu ɛnɛ la, bɛzukoa na bɛli zolɛ kpalɛ.
2 Gyihova yɛ Nyamenle ne nee yɛ yɛle ngyekyeleɛ wɔ Hɔlɛbe.+
3 Tɛ yɛ nenyia mɔ a Gyihova nee bɛ yɛle ngyekyeleɛ ɛhye a, emomu ɔ nee yɛdayɛ, yɛ muala mɔɔ yɛtɛte aze ɛnɛ la.
4 Gyihova vi senle ne anu nee bɛ dendɛle kɛ mɔɔ sonla nee ɔ gɔnwo tendɛ kile bɛ nwo la wɔ boka ne azo.+
5 Zɔhane mekɛ ne, ɛnee megyi bɛ nee Gyihova avinli+ kɛ meka edwɛkɛ mɔɔ Gyihova kɛha la meahile bɛ, ɔluakɛ senle ne ati ɛnee bɛsulo yɛɛ bɛangɔ boka ne azo.+ Ɔhanle kɛ:
6 “‘Medame a mele Gyihova wɔ Nyamenle ne mɔɔ yele wɔ vile Yigyibiti azɛlɛ zo, akɛlɛzonlenlɛ sua nu la.+
7 Mmasonle nyamenle gyɛne biala ɛboka me nwo.*+
8 “‘Mmayɛ ananze+ anzɛɛ debie biala mɔɔ wɔ anwuma anzɛɛ azɛlɛ nwo anzɛɛ azule nu wɔ azɛlɛ ye azo la ɛsaso* ɛmaa ɛ nwo.
9 Mmabɔ ɛ ti aze ɛmaa bɛ yɛɛ mmasonle bɛ,+ ɔluakɛ medame Gyihova wɔ Nyamenle ne, mele Nyamenle mɔɔ mekulo kɛ bɛsonle me ngomekye,+ mefa selɛma ɛtane nwo anzohwenlɛ meba bɛ mra nwo zo too ɔkɔdwu awolɛndoazo mɔɔ tɔ zo nsa nee nna ne mɔɔ kpɔ me la anwo zo,+
10 noko meda ɛlɔlɛ kpundii* ali mekile bɛdabɛ mɔɔ bɛkulo me na bɛdi me mɛla ne mɔ azo la awolɛndoazo mɔɔ tɔ zolɛ apenle ko la azo.
11 “‘Mmabɔ Gyihova wɔ Nyamenle ne duma mgbane mgbane,+ ɔluakɛ Gyihova ɛnrɛmaa awie mɔɔ bɔ ye duma mgbane mgbane la ɛnrɛva ɔ nwo dwɔɔ.+
12 “‘Di Ɛnwomenlelielɛ kenle ne na yɛ ye nwuanzanwuanza kɛ mɔɔ Gyihova wɔ Nyamenle ne hanle hilele wɔ la.+
13 Ɔwɔ kɛ ɛfa kenle nsia ɛyɛ wɔ gyima kɔsɔɔti,+
14 noko kenle ne mɔɔ tɔ zo nsuu la le Gyihova wɔ Nyamenle ne ɛnwomenlelielɛ kenle.+ Ɔnle kɛ ɛyɛ gyima biala,+ ɛdawɔ o, ɛ ra nrenyia o, ɛ ra raalɛ o, wɔ akɛlɛ nrenyia o, wɔ akɛlɛ bɛlɛra o, wɔ ɛnlankɛ o, wɔ asoaso o, wɔ ayɛmoa biala anzɛɛ wɔ ɛyɛvolɛ mɔɔ de wɔ suakpole zo* la,+ amaa wɔ akɛlɛ nrenyia nee wɔ akɛlɛ bɛlɛra ahola alie ɔ menle kɛ ɛdawɔ la.+
15 Kakye kɛ ɛnee ɛle akɛlɛ wɔ Yigyibiti azɛlɛ zo yɛɛ Gyihova wɔ Nyamenle ne vale ɛsalɛ mɔɔ tumi wɔ nu nee ɛsalɛ mɔɔ bɛdende la yele wɔ vile ɛkɛ a.+ Ɛhye ati a Gyihova wɔ Nyamenle ne hanle kɛ ɛli Ɛnwomenlelielɛ kenle ne la.
16 “‘Di wɔ papa nee wɔ mame eni,+ kɛ mɔɔ Gyihova wɔ Nyamenle ne ɛha ɛhile wɔ la, amaa wɔahyɛ na yeawie wɔ boɛ* wɔ azɛlɛ ne mɔɔ Gyihova wɔ Nyamenle ne ɛlɛfa amaa wɔ la azo.+
17 “‘Mmayɛ kodiawu.+
18 “‘Mmasɛkye agyalɛ.+
19 “‘Mmawua.+
20 “‘Mmadi daselɛ adalɛ ɛtia ɛ gɔnwo.+
21 “‘Mmamaa ɛ nye bolo ɛ gɔnwo aye.+ Mmamaa ɛ nye bolo ɛ gɔnwo sua anzɛɛ ye ɛya anzɛɛ ye akɛlɛ nrenyia anzɛɛ ye akɛlɛ bɛlɛra anzɛɛ ye ɛnlankɛ anzɛɛ ye asoaso anzɛɛ debie biala mɔɔ le ɛ gɔnwo ɛdeɛ la.’+
22 “Gyihova vi senle ne, amungu ne, nee awozinli kabii ne anu vale ɛnelɛ kpole vale mɛla* ɛhye mɔ maanle bɛ muala wɔ boka ne azo,+ na yeanva debie biala yeamboka nwo; akee ɔhɛlɛle bɛ wɔ awolɛ ndɛbandɛba nwiɔ azo na ɔvale ɔmaanle me.+
23 “Noko mɔɔ bɛdele ɛnelɛ ne wɔ awozinli ne anu wɔ mekɛ mɔɔ boka ne ɛlɛsɔ la,+ bɛ mbusua mgbanyinli nee mgbanyima ne mɔ kɔsɔɔti rale me nwo ɛkɛ.
24 Na bɛhanle kɛ, ‘Gyihova yɛ Nyamenle ne ɛla ye anyunlunyia nee ye kpoleyɛlɛ ne ali ɛhile yɛ wɔ ɛke, yɛɛ yɛde ɔ ne wɔ senle ne anu.+ Yɛnwu ye ɛnɛ kɛ Nyamenle kola nee sonla tendɛ na ɔkola ɔkɔ zo ɔtɛnla ngoane nu.+
25 Duzu ati a ɔwɔ kɛ yɛwu a? Ɔluakɛ bie a senle kpole ɛhye bayela yɛ. Saa yɛte Gyihova yɛ Nyamenle ne ane bieko a, yemɔ yɛbawu.
26 Ɔluakɛ nwane a wɔ alesama* avinli mɔɔ ɛde tease Nyamenle ne ane kɛ ɔlɛtendɛ wɔ senle nu kɛ mɔɔ yɛdele la na yehɔ zo yedɛnla ngoane nu a?
27 Ɛdawɔ mumua ne bikye nehane na kɔdie mɔɔ Gyihova yɛ Nyamenle ne kɛha la amuala, na baha mɔɔ Gyihova yɛ Nyamenle ne kɛha kɛhile wɔ la amuala kile yɛ, na yɛbadie na yɛayɛ.’+
28 “Ɔti Gyihova dele edwɛkɛ mɔɔ bɛhanle bɛhilele me la, na Gyihova zele me kɛ, ‘Mede edwɛkɛ mɔɔ menli ɛhye mɔ ɛha ɛhile wɔ la. Mɔɔ bɛha la amuala le kpalɛ.+
29 Saa bɛbanyia ahonle mɔɔ sulo me+ la dahuu na bɛali me mɛla ne mɔ amuala azo a,+ anrɛɛ ɔbawie bɛdabɛ nee bɛ mra boɛ dahuu!+
30 Kɔha kile bɛ kɛ: “Bɛzia bɛhɔ bɛ ɛdanlɛ azua ne mɔ anu.”
31 Noko gyinla me nwo ɛke na maa menga mɛla, adehilelɛ nee ngyehyɛleɛ ne mɔ amuala mɔɔ ɔwɔ kɛ ɛfa ɛkilehile bɛ na bɛdi zo wɔ azɛlɛ ne mɔɔ melɛfa meamaa bɛ kɛ bɛ agyapadeɛ la azo la mengile wɔ.’
32 Yemɔti ɔwɔ kɛ bɛnea boɛ na bɛyɛ mɔɔ Gyihova bɛ Nyamenle ne ɛha ɛhile bɛ la pɛpɛɛpɛ.+ Bɛmmamakyi bɛkɔ fema zo anzɛɛ bɛne zo.+
33 Bɛlua adenle ne mɔɔ Gyihova bɛ Nyamenle ne ɛha ɛhile bɛ kɛ bɛlua nu la amuala anu,+ amaa bɛadɛnla ngoane nu na yeawie bɛ boɛ na bɛahyɛ azɛlɛ ne mɔɔ bɛbava bɛayɛ bɛ agyapadeɛ la azo.+
Ɔbodwɛkɛ
^ Anzɛɛ “ɛfa ɛka me ahyi.” Hibulu aneɛ nu, “wɔ me nye zo.”
^ Anzɛɛ “sɔhovolɛ.”
^ Anzɛɛ “atiakunlukɛnlɛma.”
^ Hibulu aneɛ nu, “nlenkɛ mgbole ne anu.”
^ Anzɛɛ “wɔakpazi.”
^ Hibulu aneɛ nu, “edwɛkɛ agbɔkɛ.”
^ Hibulu aneɛ nu, “nwonane kɔsɔɔti.”
