Ditilɔnomi 8:1-20
8 “Bɛnlea boɛ na bɛli mɛla biala mɔɔ melɛfa meamaa bɛ ɛnɛ la azo, amaa bɛahɔ zo bɛadɛnla ngoane nu+ na bɛ nwo azo na bɛahɔva azɛlɛ ne mɔɔ Gyihova hanle nwolɛ ndane hilele bɛ nenyia mɔ la.+
2 Bɛhakye adenle tendenle ne mɔɔ Gyihova bɛ Nyamenle ne maanle bɛdiale wɔ ɛvolɛ 40 ɛhye anu wɔ fienemgbole+ ne anu kɛ ɔmaa bɛabɛlɛ bɛ nwo aze na yeazɔ bɛ yeanlea+ amaa yeanwu mɔɔ wɔ bɛ ahonle nu la,+ kɛ bɛbadie ye mɛla ne mɔ anzɛɛ bɛnrɛdie.
3 Yemɔti ɔmaanle bɛbɛlɛle bɛ nwo aze na ɛhɔne hunle bɛ+ na ɔmaanle bɛ mana+ mɔɔ bɛdabɛ anzɛɛ bɛ papa mɔ ɛtɛnwunle bie ɛlɛ la bɛlile, amaa bɛanwu kɛ tɛ paano angome a maa sonla tɛnla ngoane nu a, emomu edwɛkɛ biala mɔɔ vi Gyihova anloa anu la.+
4 Bɛ adɛladeɛ mɔɔ bɛwula la antete, yɛɛ bɛ gyakɛ annwunwu wɔ ɛvolɛ 40 ɛhye anu.+
5 Bɛdabɛ bɛze ye wɔ bɛ ahonle nu bɔkɔɔ kɛ, kɛ mɔɔ selɛ tenrɛ ɔ ra la, ɛnee Gyihova bɛ Nyamenle ne noko ɛlɛtenrɛ bɛ.+
6 “Yemɔti ɔwɔ kɛ bɛdi Gyihova bɛ Nyamenle ne mɛla ne mɔ azo ɔlua ye ndenle ne mɔ mɔɔ bɛbalua nu na bɛazulo ye la azo.
7 Ɔluakɛ Gyihova bɛ Nyamenle ne ɛlɛfa bɛ ahɔ azɛlɛ kpalɛ zo,+ azɛlɛ mɔɔ azudenle,* azule nee nzubula* wɔ ye mbɔnza ne mɔ anu yɛɛ awoka ne mɔ azo,
8 azɛlɛ mɔɔ hwiiti nee baale, vanye, feege mbaka nee pɔmegelanate wɔ zo,+ azɛlɛ mɔɔ ɔlivi nwole nee wolɛ wɔ zo,+
9 azɛlɛ mɔɔ aleɛ babu zolɛ mɔɔ bɛnrɛhyia ɛhwee, azɛlɛ mɔɔ bulalɛ wɔ zolɛ awolɛ ne mɔ anu yɛɛ bɛbadu kɔbele wɔ bɛ awoka ne mɔ anu la.
10 “Saa bɛdi aleɛ na bɛ ko yi a, ɔwɔ kɛ bɛye Gyihova bɛ Nyamenle ne ayɛlɛ wɔ azɛlɛ kpalɛ ne mɔɔ yeva yemaa bɛ la anwo.+
11 Bɛnlea boɛ na bɛ rɛle anvi Gyihova bɛ Nyamenle ne na bɛamkpo kɛ bɛbali ye mɛla, ye ngyehyɛleɛ nee ye adehilelɛ mɔɔ melɛfa meamaa bɛ ɛnɛ la azo.
12 Saa bɛdi aleɛ na bɛ ko yi na bɛsisi azua ngɛnlɛma bɛtɛnla nu,+
13 saa bɛ nlankɛ nee bɛ mboane yɛ dɔɔnwo na bɛ dwɛtɛ fufule nee bɛ nvutuke so na bɛnyia debie biala dɔɔnwo a,
14 bɛmmamaa anwomemaazo ba bɛ ahonle nu+ na ɔmaa bɛ rɛle fi Gyihova bɛ Nyamenle ne mɔɔ yele bɛ vile Yigyibiti azɛlɛ zo, wɔ akɛlɛzonlenlɛ sua nu,+
15 na ɔmaanle bɛluale fienemgbole anu ɛzulolɛ ne mɔɔ nwɔlɛ anwo ɛzulolɛ+ nee nyamenleakɛlɛ wɔ zo na zolɛ ɛyɛ resee mɔɔ nzule biala ɛnle zolɛ la anu la. Ɔmaanle nzule vile bodane ɛsesebɛ ne anu rale+
16 na ɔmaanle bɛ mana+ mɔɔ bɛ papa mɔ ɛtɛnwunle bie ɛlɛ la ɔmaanle bɛlile wɔ fienemgbole ne anu amaa bɛabɛlɛ bɛ nwo aze+ na yeazɔ bɛ yeanlea amaa yeaboa bɛ kenle bie.+
17 Saa bɛka ye wɔ bɛ ahonle nu kɛ, ‘Yɛdayɛ yɛ tumi nee yɛ sa nu anwosesebɛ a ɛmaa yɛnyia yɛ nwo’ a,+
18 bɛhakye kɛ Gyihova bɛ Nyamenle ne a maanle bɛ tumi ɔmaanle bɛnyianle bɛ nwo a,+ amaa yeali ye ngyekyeleɛ ne mɔɔ ɔhanle nwolɛ ndane ɔhilele bɛ nenyia mɔ la azo kɛ mɔɔ ɔde ye ɛnɛ la.+
19 “Saa bɛ rɛle fi Gyihova bɛ Nyamenle ne na bɛkɔdi nyamenle gyɛne nzi na bɛsonle bɛ na bɛbɔ bɛ ti aze bɛmaa bɛ a, mebɔ bɛ kɔkɔ ɛnɛ kɛ, bɛ bo zo baminli.+
20 Bɛ bo zo baminli kɛ maanle maanle ne mɔ mɔɔ Gyihova ɛlɛsɛkye bɛ avi bɛ nyunlu la, ɔluakɛ bɛandie Gyihova bɛ Nyamenle ne ane.+
