Ditilɔnomi 9:1-29
9 “O Yizilayɛ, tie, ɛnɛ ɛlɛpɛ Dwɔdan ne+ wɔahɔvoa maanle mgbole mɔɔ anwo yɛ se tɛla wɔ,+ azuamgbole mɔɔ bɛlie nwolɛ bane bɛhɔ anwuma,*+
2 menli mgbole ndendenle, Anakema,+ mɔɔ ɛze bɛ na wɔde bɛ nwo edwɛkɛ kɛ, ‘Nwane a bahola agyinla Enake amra ne mɔ anyunlu a?’
3 Ɛhye ati, nwu ye ɛnɛ kenle ye kɛ Gyihova wɔ Nyamenle ne baze ali ɛ nyunlu.+ Ɔle sendɔlɔra,+ na ɔbazɛkye bɛ. Ɔbali bɛ nwo zo konim wɔ ɛ nye zo amaa wɔavoa bɛ ndɛndɛ na wɔazɛkye bɛ kɛ mɔɔ Gyihova vale bɔle wɔ ɛwɔkɛ la.+
4 “Saa Gyihova wɔ Nyamenle ne foa bɛ fi ɛ nyunlu a, mmaka ye wɔ wɔ ahonle nu kɛ, ‘Me tenleneyɛlɛ ti a Gyihova ɛva me ɛra kɛ membanva azɛlɛ ɛhye a.’+ Emomu maanle maanle ɛhye mɔ amumuyɛyɛlɛ ti+ a Gyihova ɛlɛfoa bɛ avi ɛ nyunlu a.
5 Tɛ wɔ tenleneyɛlɛ anzɛɛ kɛ mɔɔ wɔ ahonle di munli la ati a ɛlɛkɔ wɔahɔva bɛ azɛlɛ ne a. Emomu maanle maanle ɛhye mɔ amumuyɛyɛlɛ ti a Gyihova wɔ Nyamenle ne ɛlɛfoa bɛ avi ɛ nyunlu a,+ amaa yeali ndane mɔɔ Gyihova hanle hilele wɔ nenyia mɔ, Ebileham,+ Ayezeke+ nee Gyekɔbo+ la azo.
6 Yemɔti, bɛnwu ye kɛ, tɛ bɛ tenleneyɛlɛ ti a Gyihova bɛ Nyamenle ne ɛlɛfa azɛlɛ kpalɛ ɛhye amaa bɛadɛnla zolɛ a, ɔluakɛ bɛle menli mɔɔ ɛsolo.*+
7 “Bɛhakye, bɛmmamaa bɛ rɛle fi, kɛzi bɛhanle Gyihova bɛ Nyamenle ne ɛya wɔ fienemgbole ne anu la.+ Ɔvi kenle mɔɔ bɛvile Yigyibiti azɛlɛ zo too mɔɔ bɛradwu ɛke la, atua ala a bɛte bɛtia Gyihova a.+
8 Wɔ Hɔlɛbe bɔbɔ, bɛhanle Gyihova ɛya, na Gyihova vale bɛ nwo ɛya kpole mɔɔ anrɛɛ ɔsɛkye bɛ a.+
9 Mɔɔ mengɔle boka ne azo kɛ mekalie awolɛ ndɛbandɛba ne mɔ,+ awolɛ ndɛbandɛba ne mɔ mɔɔ bɛhɛlɛ ngyekyeleɛ mɔɔ Gyihova nee bɛ yɛle la wɔ zolɛ la,+ menlile alehyenlɛ nee aledwolɛ kenle 40 wɔ boka ne azo,+ meanli aleɛ yɛɛ meanno nzule.
10 Akee Gyihova vale awolɛ ndɛbandɛba nwiɔ ne mɔɔ Nyamenle vale ɔ sa ɛrɛlɛsɛka hɛlɛle zolɛ la maanle me, na ɛnee edwɛkɛ mɔɔ Gyihova vi senle ne anu hanle hilele bɛ wɔ boka ne azo wɔ kenle mɔɔ menli* ne yiale la wɔ zolɛ.+
11 Mɔɔ alehyenlɛ nee aledwolɛ kenle 40 ne rale awieleɛ la, Gyihova vale awolɛ ndɛbandɛba nwiɔ ne, mɔɔ le ngyekyeleɛ awolɛ ndɛbandɛba ne mɔ la maanle me,
12 na Gyihova zele me kɛ, ‘Dwazo, dwu aze kɔ ndɛndɛ, ɔluakɛ wɔ menli mɔɔ ɛyele bɛ ɛvile Yigyibiti la ɛbɛla ɛzɛkye.+ Bɛhwe bɛ nwo bɛvi adenle ne mɔɔ mengilele bɛ kɛ bɛlua zolɛ la azo ndɛndɛ. Bɛyɛ bulalɛ ananze.’*+
13 Akee Gyihova zele me kɛ, ‘Menwu menli ɛhye mɔ, na nea! bɛle menli mɔɔ ɛsolo.*+
14 Gyakyi me maa menzɛkye bɛ na menkyikyi bɛ duma menvi ewiade, na menyɛ wɔ maanle kpole mɔɔ anwo zonle tɛla bɛ la.’+
15 “Akee mengakyile me nwo na mevi boka ne azo mendwule wɔ mekɛ mɔɔ ɛnee senle ɛlɛsɔ wɔ boka ne azo la,+ na ɛnee melɛ ngyekyeleɛ awolɛ ndɛbandɛba nwiɔ ne wɔ me sa amu nwiɔ anu.+
16 Akee meneanle na menwunle kɛ bɛyɛ ɛtane bɛtia Gyihova bɛ Nyamenle ne! Bɛva bulalɛ bɛyɛ* ɛnlankɛ ralɛ bɛmaa bɛ nwo. Bɛhwe bɛ nwo bɛvi adenle ne mɔɔ Gyihova hanle kɛ bɛlua nu la azo ndɛndɛ.+
17 Yemɔti menvuandinle awolɛ ndɛbandɛba nwiɔ ne menguale aze memaanle bɛbubule wɔ bɛdabɛ bɛ nye zo.+
18 Akee membutule me nyunlu aze wɔ Gyihova anyunlu kɛ alimoa ne ala la alehyenlɛ nee aledwolɛ kenle 40. Meanli aleɛ yɛɛ meanno nzule,+ ɔlua ɛtane kɔsɔɔti mɔɔ bɛyɛle la ati, bɛyɛle debie mɔɔ le munzule wɔ Gyihova anye zo la bɛvale bɛhanle ye ɛya.
19 Kɛmɔ Gyihova vale bɛ nwo ɛya kpole la ati,+ ɛzulolɛ hanle me, ɔluakɛ ɛnee yeziezie ɔ nwo kɛ ɔsɛkye bɛ. Noko mekɛ zɔhane anu, Gyihova eza diele me.+
20 “Gyihova vale Aalɔn anwo ɛya kpole mɔɔ anrɛɛ ɔsɛkye ye a,+ noko mekɛ zɔhane anu, membodole memaanle Aalɔn noko.
21 Akee menvale munzudeɛ ne mɔɔ bɛyɛle la, ɛnlankɛ ralɛ ne,+ na mendole ye senle nu menyelale ye; membubule nu na mendinle ye motoo memaanle ɔyɛle kɛ munlutu, na menvuandinle munlutu ne menguale azule ne mɔɔ vi boka ne azo se la anu.+
22 “Eza bɛhanle Gyihova ɛya wɔ Tabɛla,+ Masaa+ yɛɛ Kibolɔto-hateeyava.+
23 Mɔɔ Gyihova zoanle bɛ kɛ bɛvi Keedɛhye-baanea+ bɛhɔ na ɔhanle kɛ, ‘Bɛhɔva azɛlɛ ne mɔɔ mebava meamaa bɛ la!’ bɛdele Gyihova bɛ Nyamenle ne anwo atua bieko,+ na bɛannyia diedi+ wɔ ye nu yɛɛ bɛandie ye.
24 Sumunli kɛ menwunle bɛ la, atua ala a bɛte bɛtia Gyihova a.
25 “Ɔti mengɔle zo membutule me nyunlu aze wɔ Gyihova anyunlu alehyenlɛ nee aledwolɛ kenle 40,+ menyɛle ɛhye ɔluakɛ ɛnee Gyihova ɛha kɛ ɔbazɛkye bɛ.
26 Membɔle ɔ bo membodole Gyihova kɛ, ‘O Tumivolɛ Awulae Gyihova, mmasɛkye wɔ menli ne. Bɛle wɔ agyapadeɛ+ mɔɔ ɛluale wɔ kpoleyɛlɛ zo ɛliele bɛ na ɛvale ɛsalɛ mɔɔ tumi wɔ nu la ɛyele bɛ ɛvile Yigyibiti a.+
27 Kakye wɔ azonvolɛ Ebileham, Ayezeke nee Gyekɔbo.+ Mmanea menli ɛhye mɔ anzosesebɛ ne, bɛ amumuyɛ ne nee bɛ ɛtane ne.+
28 Anrɛɛ menli mɔɔ ɛyele yɛ ɛvile bɛ maanle nu la baha kɛ: “Gyihova angola anva bɛ angɔ azɛlɛ ne mɔɔ ɔvale ɔbɔle bɛ ɛwɔkɛ la azo, na kɛmɔ ɔkpɔ bɛ la ati, ɔyele bɛ kɛ ɔkahu bɛ wɔ fienemgbole ne anu.”+
29 Ɔluakɛ bɛle wɔ menli nee wɔ agyapadeɛ+ mɔɔ ɛvale wɔ tumi kpole ne nee ɛ sa mɔɔ ɛdendenle la a ɛyele bɛ a.’+
Ɔbodwɛkɛ
^ Ɛhye kile, bane mgbole ndendenle.
^ Hibulu aneɛ nu, “ɛyɛ bɛ kɔme ketee.”
^ Anzɛɛ “asafo.”
^ Anzɛɛ “Bɛgua ananze.”
^ Hibulu aneɛ nu, “ɛyɛ bɛ kɔme ketee.”
^ Anzɛɛ “bɛgua.”
