Dwɔhyua 1:1-18
1 Mɔɔ Gyihova sonvolɛ Mosisi wule la, Gyihova zele Nɛn ara Dwɔhyua*+ mɔɔ le Mosisi sonvolɛ+ la kɛ:
2 “Me sonvolɛ Mosisi ɛwu.+ Ɔti siezie ɛ nwo na ɛ nee menli ɛhye mɔ amuala ɛpɛ Dwɔdan ne na bɛhɔ azɛlɛ ne mɔɔ melɛfa meamaa Yizilayɛma la azo.+
3 Mebava ɛleka biala mɔɔ bɛbadu bɛ gyakɛ bɛazie la meamaa bɛ, kɛ mɔɔ membɔle Mosisi ɛwɔkɛ la.+
4 Bɛ azɛlɛ ne badɛlɛ avi fienemgbole ne anu yeava Lɛbanɔn too yeahɔdwu azule kpole Yufileti ne anloa—Hɛtema+ azɛlɛ ne amuala—too kɔdwu Nyevile Kpole ne* anloa wɔ adɔleɛ.*+
5 Awie biala ɛnrɛhola ɛnrɛgyinla ɛ nyunlu wɔ mekɛ ala mɔɔ ɛde aze la.+ Kɛ mɔɔ me nee Mosisi luale la, zɔhane ala a me nee wɔ balua a,+ menrɛgyakyi wɔ yɛɛ menrɛkpo wɔ ɛlɛ.+
6 Nyia akɛnrasesebɛ na maa ɛ nwo ɛyɛ se,+ ɔluakɛ ɛdawɔ a ɛbamaa menli ɛhye mɔ ahɔva azɛlɛ ne mɔɔ membɔle bɛ nenyia mɔ ɛwɔkɛ kɛ mebava meamaa bɛ la a.+
7 “Wɔmɔ nyia akɛnrasesebɛ na maa ɛ nwo ɛyɛ se kpalɛ, na nea di Mɛla ne mɔɔ me sonvolɛ Mosisi vale maanle wɔ la kɔsɔɔti azo kpalɛ. Mmatwe ɛ nwo ɛfi nwolɛ ɛkɔ fema zo anzɛɛ bɛne zo,+ amaa wɔabɔ wɔ ɛbɛla nrɛlɛbɛ nu wɔ ɛleka biala mɔɔ ɛkɛhɔ la.+
8 Mmamaa Mɛla buluku ɛhye fi ɛ nloa anu,+ emomu ɔwɔ kɛ ɛkenga na ɛdwenledwenle nwo* alehyenlɛ nee aledwolɛ, amaa wɔanlea wɔali debie biala mɔɔ bɛhɛlɛ ye wɔ nu la azo;+ ɛhye bamaa yeawie wɔ boɛ na wɔabɔ wɔ ɛbɛla nrɛlɛbɛ nu.+
9 Metɛkanle metɛkilele wɔ kɛ ɛnyia akɛnrasesebɛ na ɛmaa ɛ nwo ɛyɛ se ɔ? Mmasulo yɛɛ mmamaa wɔ ahonle tu, ɔluakɛ Gyihova wɔ Nyamenle ne nee wɔ lua wɔ ɛleka biala mɔɔ ɛkɛhɔ la.”+
10 Akee Dwɔhyua hanle hilele menli ne mgbanyima ne mɔ kɛ:
11 “Bɛhɔ azokoɛleɛ ne na bɛha bɛhile menli ne kɛ, ‘Bɛkpondɛ aleɛ na bɛziezie bɛ nwo, ɔluakɛ yeha kenle nsa na bɛahɔpɛ Dwɔdan ne bɛahɔva azɛlɛ ne mɔɔ Gyihova bɛ Nyamenle ne ɛva ɛmaa bɛ la.’”+
12 Na Dwɔhyua zele Wulubɛnema, Gaadema nee Manasɛ abusua foa ko ne kɛ:
13 “Bɛhakye mɔɔ Gyihova sonvolɛ Mosisi hanle hilele bɛ la.+ Ɔse, ‘Gyihova bɛ Nyamenle ne ɛmaa bɛnyia anzodwolɛ na yeva azɛlɛ ɛhye yemaa bɛ.
14 Bɛ ye mɔ, bɛ mra nee bɛ nyɛmoa badɛnla azɛlɛ ne mɔɔ Mosisi ɛva ɛmaa bɛ wɔ Dwɔdan ne aduduleɛ afoa nu la azo,+ noko ɔwɔ kɛ bɛmɛ mɔɔ bɛle konle nu katakyiema+ la kɔsɔɔti hyehyɛ bɛ nwo na bɛse bɛdi bɛ mediema ne mɔ anyunlu.+ Ɔwɔ kɛ bɛboa bɛ
15 kɔkpula kɛ Gyihova kɛmaa bɛ mediema ne mɔ kɛnyia anzodwolɛ kɛ mɔɔ yemaa bɛnyia anzodwolɛ, na bɛdabɛ noko bɛkɛva azɛlɛ ne mɔɔ Gyihova bɛ Nyamenle ne ɛva ɛmaa bɛ la. Akee bɛzia bɛrava bɛ azɛlɛ ne mɔɔ bɛva bɛmaa bɛ kɛ bɛdɛnla zolɛ, azɛlɛ ne mɔɔ Gyihova sonvolɛ Mosisi vale maanle bɛ wɔ Dwɔdan ne aduduleɛ la.’”+
16 Bɛbuale Dwɔhyua kɛ: “Yɛbayɛ debie biala mɔɔ wɔha wɔhile yɛ la, na ɛleka biala mɔɔ ɛkɛzoa yɛ la yɛbahɔ.+
17 Kɛ mɔɔ yɛdiele edwɛkɛ biala mɔɔ Mosisi hanle la, zɔhane ala a yɛbadie wɔ a. Gyihova wɔ Nyamenle ne nee wɔ ɛlua kɛ mɔɔ ɔ nee Mosisi luale la.+
18 Awie biala mɔɔ kɛde wɔ edwɛkɛ nwo atua na yeandie edwɛkɛ biala mɔɔ ɛkɛha la bɛbahu ye.+ Wɔmɔ nyia akɛnrasesebɛ na maa ɛ nwo ɛyɛ se.”+
Ɔbodwɛkɛ
^ Anzɛɛ “Gyɛhɔhyua,” ɔ bo kile “Gyihova Le Ngoanelielɛ.”
^ Ɛhye kile, Mɛdetɛlenia ne.
^ Anzɛɛ “wɔ adɔleɛ afoa nu.”
^ Hibulu aneɛ nu, “kenga ye bɛtɛɛ.”
