Dwɔhyua 13:1-33
13 Ɛnee akee Dwɔhyua ɛyɛ kpanyinli na ye ɛvolɛ ɛhɔ ɔ nyunlu.+ Ɔti Gyihova zele ye kɛ: “Wɔyɛ kpanyinli yɛɛ wɔ ɛvolɛ ɛhɔ ɔ nyunlu; noko azɛlɛ dɔɔnwo tɛbɔ ɛkɛ mɔɔ ɔwɔ kɛ bɛfa* a.
2 Azɛlɛ mɔɔ ɛnee tɛbɔ ɛkɛ ne la ɛne:+ Filisitiama nee Gɛhyɛma+ maanzinli ne mɔ amuala
3 (ɔvi Naele ne foa ne mɔɔ wɔ Yigyibiti aduduleɛ kɔdwu Ɛkelɔn ɛweɛne zo wɔ sɔlɔ, mɔɔ ɛnee bɛsuzu kɛ ɔle Keenama azɛlɛ la)+ nee Filisitiama+ arelemgbunli nnu ne azɛlɛ ne—Gazama, Ahyedɔdoma,+ Ahyekɛlɔnoma,+ Gatema+ yɛɛ Ɛkelɔnoma;+ Avemma+ azɛlɛ ne
4 mɔɔ wɔ nyiakɛ; Keenama azɛlɛ ne kɔsɔɔti; Mahala mɔɔ le Saedɛnema+ ɛdeɛ too kɔdwu Efɛke mɔɔ kɔ Amɔlema ɛweɛne zo;
5 Gibalema+ azɛlɛ ne nee Lɛbanɔn kɔsɔɔti wɔ aduduleɛ, ɔvi Beeyale-gaade mɔɔ wɔ Hɛmɔn Boka ne abo kɔdwu Libo-heemate;*+
6 menli mɔɔ de awoka ne mɔ azo ɔvi Lɛbanɔn+ kɔdwu Mezelɛfɔto-meeyem;+ nee Saedɛnema+ amuala. Mebavoa* bɛ meavi Yizilayɛma anyunlu.+ Mɔɔ ɔwɔ kɛ ɛyɛ la ala a le kɛ ɛbava wɔamaa Yizilayɛma kɛ agyapadeɛ kɛ mɔɔ meha mehile wɔ la.+
7 Akee ɔwɔ kɛ ɛkyɛ azɛlɛ ɛhye ɛmaa mbusua ngɔnla ne nee Manasɛ abusua foa ko ne.”+
8 Manasɛ abusua foa ko ne mɔɔ ɛha la, Wulubɛnema nee Gaadema nyianle bɛ azɛlɛ ɛdeɛ ne mɔɔ Mosisi vale maanle bɛ la wɔ Dwɔdan ne aduduleɛ kɛ mɔɔ Gyihova sonvolɛ Mosisi vale maanle bɛ la:+
9 ɔvi Alowɛ+ mɔɔ wɔ Anɔn+ Bɔnza* ne anloa, nee suakpole ne mɔɔ wɔ bɔnza ne avinli nee Mɛdeba boka azo sɛsɛ ne amuala kɔdwu Daebɔn;
10 nee Amɔlema Belemgbunli Saehɔn mɔɔ lile tumi wɔ Hɛhyebɔn la azuamgbole ne mɔ kɔsɔɔti mɔɔ kɔdwu Amɔnoma ɛweɛne zo;+
11 yɛɛ Geleade nee Gɛhyɛma nee Meeyakatema+ azɛlɛ ne yɛɛ Hɛmɔn Boka ne kɔsɔɔti nee Beehyan+ amuala kɔdwu Salɛka;+
12 Beehyan Belemgbunli Ɔɔgo mɔɔ lile tumi wɔ Ahyetalɔto nee Ɛdelɛyae la belemgbunlililɛ ne amuala. (Ɔle Relɛfeeyemma+ mɔɔ ɛha la anu ko.) Mosisi lile bɛ nwo zo konim na ɔvoanle* bɛ ɔvile ɛkɛ.+
13 Noko Yizilayɛma anvoa+ Gɛhyɛma nee Meeyakatema ɔluakɛ Gɛhyɛma nee Meeyakatema de Yizilayɛma avinli too badwu ɛnɛ.
14 Livae abusua ne ala a yeammaa bɛ agyapadeɛ a.+ Afɔle mɔɔ bɛfa senle bɛbɔ bɛmaa Gyihova, Yizilayɛ Nyamenle ne la a le bɛ agyapadeɛ a,+ kɛ mɔɔ ɔbɔle bɛ ɛwɔkɛ la.+
15 Akee Mosisi maanle Wulubɛn mbusua ne mɔ agyapadeɛ,
16 na bɛ azɛlɛ ne vi Alowɛ mɔɔ la Anɔn Bɔnza* ne anloa la nee suakpole ne mɔɔ wɔ Bɔnza ne avinli yɛɛ Mɛdeba boka azo sɛsɛ ne amuala;
17 Hɛhyebɔn nee ye azua ne mɔ+ mɔɔ wɔ boka azo sɛsɛ ne azo la amuala, Daebɔn, Beemɔto-beeyale, Bɛte-beeyale-miyɔn,+
18 Gyeehaze,+ Kidɛmɔto,+ Mɛfeeyate,+
19 Keleateeyem, Sebemaa+ nee Zilɛte-hyeehaa mɔɔ wɔ boka ne mɔɔ bikye bɔnza ne la azo la,
20 Bɛte-piyɔ, Pesega ndololeɛ nu,+ Bɛte-gyɛhyemɔto,+
21 azuamgbole mɔɔ wɔ boka azo sɛsɛ ne azo amuala nee Amɔlema Belemgbunli Saehɔn mɔɔ lile tumi wɔ Hɛhyebɔn+ la belemgbunlililɛ ne amuala. Mosisi lile ɔdaye nee Medean mgbanyima Yivae, Rilikɛm, Zɛɛle, Hɛɛ yɛɛ Riliba,+ arelemgbunli mɔɔ ɛnee wɔ Saehɔn abo na bɛde azɛlɛ ne azo la anwo zo konim.+
22 Biyɔ ara Beelam+ mɔɔ ka mɔɔ bazi kenle bie+ la, boka menli mɔɔ Yizilayɛma vale konle dadeɛ hunle bɛ la anwo.
23 Ɛnee Wulubɛnema ɛweɛne ne a le Dwɔdan ne; na azɛlɛ ɛhye a ɛnee le Wulubɛn mbusua ne mɔ agyapadeɛ a, bɛ azuamgbole nee bɛ namunamu ne mɔ boka nwo.
24 Mosisi eza maanle Gaade abusua ne agyapadeɛ, na bɛhyɛle bɛmaanle bɛ mbusua ne mɔ,
25 Gyeezɛ+ nee Geleade azuamgbole ne mɔ yɛɛ Amɔnoma+ azɛlɛ ne foa ko mɔɔ kɔdwu Alowɛ, mɔɔ nee Relaba+ anye bɔ zo la boka bɛ azɛlɛ ne anwo;
26 ɔvi Hɛhyebɔn+ kɔdwu Releemate-mezepɛ nee Bɛtonem yɛɛ ɔvi Meehaneeyem+ kɔdwu Dibɛ ɛweɛne zo;
27 nee bɔnza ne anu, Bɛte-hɛlam, Bɛte-nemela,+ Sɛkɔto+ nee Zeefɔn, Hɛhyebɔn+ Belemgbunli Saehɔn belemgbunlililɛ ne mɔɔ ɛha la amuala, ye ɛweɛne kɔdwu Dwɔdan aduduleɛ mɔɔ kɔ Kyenɛlɛte+ Nyevile* ne anloa nehane la.
28 Ɛnee ɛhye a le Gaade mbusua ne mɔ agyapadeɛ a, bɛ azuamgbole nee bɛ namunamu ne mɔ boka nwo.
29 Mosisi eza maanle Manasɛ abusua foa ko ne agyapadeɛ, na bɛhyɛle bɛmaanle bɛ mbusua ne mɔ.+
30 Bɛ azɛlɛ ne bɔ ɔ bo wɔ Meehaneeyem+ kɔdwu Beehyan amuala, mɔɔ le Beehyan Belemgbunli Ɔɔgo belemgbunlililɛ ne amuala yɛɛ Gyeeyɛ+ ɛdanlɛ azua namunamu ne mɔ mɔɔ wɔ Beehyan la, ɔle azua 60.
31 Geleade foa ko nee Ahyetalɔto yɛɛ Ɛdelɛyae,+ Beehyan Belemgbunli Ɔɔgo belemgbunlililɛ ne anu azuamgbole ne mɔ yɛle Manasɛ ara Meekɛ+ abozoamra ne mɔ ɛdeɛ, na bɛhyɛle bɛmaanle Meekɛ abozoamra foa ko ne.
32 Ɛhye mɔ a le agyapadeɛ mɔɔ Mosisi vale maanle bɛ wɔ Mowabe ɛsɛlɛ ne azo wɔ Dwɔdan ne anzi lɔ wɔ Gyɛleko aduduleɛ a.+
33 Noko Mosisi ammaa Livae abusua ne agyapadeɛ.+ Gyihova, Yizilayɛ Nyamenle ne a le bɛ agyapadeɛ a, kɛ mɔɔ ɔbɔle bɛ ɛwɔkɛ la.+
Ɔbodwɛkɛ
^ Anzɛɛ “bɛko bɛfa.”
^ Anzɛɛ “Heemate adenle zo.”
^ Anzɛɛ “Mebadu.”
^ Anzɛɛ “Anɔn Azudenle.”
^ Anzɛɛ “ɔdule.”
^ Anzɛɛ “Anɔn Azudenle.”
^ Ɛhye kile, Gɛnɛzalɛte tandane ne, anzɛɛ Galeli Nyevile ne.
