Dwɔhyua 18:1-28
18 Akee Yizilayɛma amuala yiale nu wɔ Hyaelo,+ na bɛzile nyianu ɛdanlɛsua ne wɔ ɛkɛ+ ɔluakɛ bɛvale azɛlɛ ne amuala.+
2 Noko ɛnee Yizilayɛma mbusua nsuu ɛha mɔɔ bɛtɛnyianle bɛ agyapadeɛ ɛdeɛ a.
3 Ɔti Dwɔhyua zele Yizilayɛma kɛ: “Bɛtwenlehwenle bɛ bo aze bɛahɔdwu kenlenzu na bɛahɔva azɛlɛ ne mɔɔ Gyihova, bɛ nenyia mɔ Nyamenle ne ɛva ɛmaa bɛ la?+
4 Bɛye mrenyia nsa bɛvi abusua ko biala anu bɛmaa menzoa bɛ; ɔwɔ kɛ bɛkɔduolua azɛlɛ ne azo na bɛsuzu na bɛyɛ agyapadeɛ mɔɔ abusua ko biala banyia la anwo kɛlɛtokɛ. Akee ɔwɔ kɛ bɛsia bɛba me nwo ɛke.
5 Ɔwɔ kɛ bɛkyɛ nuhua nsuu bɛmaa bɛ nwo.+ Dwuda bahɔ zo adɛnla ye azɛlɛ ne azo wɔ nyiakɛ,+ yɛɛ Dwosefi abozoamra bahɔ zo adɛnla bɛ ɛdeɛ ne anu wɔ sɔlɔ.+
6 Na bɛmɛ, bɛhɔzuzu azɛlɛ ne bɛyɛ nwolɛ kɛlɛtokɛ na bɛhyɛ nuhua nsuu na bɛva bɛrɛlɛ me, na mebagua nwolɛ ma*+ wɔ Gyihova yɛ Nyamenle ne anyunlu ɛke meamaa bɛ.
7 Noko Livaema ɛnlɛ kyɛfoa wɔ bɛ avinli,+ ɔluakɛ bɛ kyɛfoa a le kɛ bɛbayɛ Gyihova ɛsɔfoma;+ na Gaade, Wulubɛn yɛɛ Manasɛ abusua foa ko ne+ ɛlimoa ɛnyia bɛ agyapadeɛ ɛdeɛ mɔɔ Gyihova sonvolɛ Mosisi vale maanle bɛ la wɔ Dwɔdan ne aduduleɛ afoa nu.”
8 Mrenyia ne mɔ zieziele bɛ nwo kɛ bɛkɔ, na Dwɔhyua zele bɛdabɛ mɔɔ bɛkazuzu azɛlɛ ne na bɛayɛ nwolɛ kɛlɛtokɛ la kɛ: “Bɛhɔ na bɛhɔluolua azɛlɛ ne azo na bɛzuzu bɛyɛ nwolɛ kɛlɛtokɛ na bɛzia bɛrɛla me nwo ɛke, na mebagua ma wɔ Gyihova anyunlu wɔ Hyaelo+ ɛke meamaa bɛ.”
9 Ɔti menli ne hɔluoluale azɛlɛ ne azo na bɛzuzule ye azua azua na bɛhyɛle nuhua nsuu na bɛhɛlɛle ye wɔ buluku nu. Ɛhye anzi, bɛziale bɛrale Dwɔhyua ɛkɛ wɔ Hyaelo azokoɛleɛ ne.
10 Akee Dwɔhyua guale ma maanle bɛ wɔ Gyihova anyunlu+ wɔ Hyaelo. Ɛkɛ ne a Dwɔhyua hyɛle azɛlɛ ne maanle Yizilayɛma a.+
11 Bɛguale ma na bɛmaanle Bɛngyaman abusua ne azɛlɛ na bɛhyɛle bɛmaanle bɛ mbusua ne mɔ, na ɛnee bɛ azɛlɛ ne wɔ Dwudama+ nee Dwosefi abozoamra+ ne avinli.
12 Wɔ ye sɔlɔ afoa nu, bɛ ɛweɛne ne bɔ ɔ bo wɔ Dwɔdan ne anloa na ɔfo ɔkɔ Gyɛleko+ ndololeɛ nu wɔ sɔlɔ na ɔtoa zo ɔkɔ boka ne adɔleɛ afoa nu, yɛɛ ɔpɛ nu ɔkɔ Bɛte-eevɛn+ fienemgbole ne anu.
13 Na ɛweɛne ne vi ɛkɛ ne kɔ Lɛɛze, wɔ Lɛɛze nyiakɛ ndololeɛ nu, mɔɔ le Bɛtɛle;+ ɔtolo ɔkɔ Atalɔto-adaa+ mɔɔ wɔ boka ne mɔɔ wɔ Nyiakɛ Bɛte-hɔlɔn+ abo lɔ la azo.
14 Bɛpɛle ɛweɛne ne wɔ adɔleɛ afoa nu na ɔhɔvale nyiakɛ wɔ boka ne mɔɔ nee Bɛte-hɔlɔn anye bɔ zo la anwo; ɔhɔguale Dwuda suakpole Keleate-beeyale, mɔɔ le Keleate-gyialem+ la. Ɛhye a le ye adɔleɛ afoa nu a.
15 Ye nyiakɛ afoa nu bɔ ɔ bo wɔ Keleate-gyialem ɛweɛne zo na ɔtende ɔkɔ adɔleɛ; ɔfinde Nɛfetowa nzule ne anloa.+
16 Ɛweɛne ne kɔfa boka ne mɔɔ wɔ Relɛfeeyem+ Bɔnza ne sɔlɔ la na ɔ nye kile Henɛm Ara Ne Bɔnza+ ne la anloa na ɔtolo ɔkɔfa Henɛm Bɔnza ne anu ɔkɔ Gyibɛse+ ndololeɛ nu wɔ nyiakɛ too ɔkɔdwu Ɛn-logɛle.+
17 Bɛpɛle bɛhɔle sɔlɔ afoa nu na ɔhɔdwule Ɛn-hyimɛhye na akee ɔpɛle nu ɔhɔle Gɛlaelɔto mɔɔ la Adɛmem+ boka ne anyunlu la na ɔdoale zo ɔhɔle Wulubɛn ara Bohan bolɛ ne anwo.+
18 Na ɔtoa zo ɔkɔ sɔlɔ ndololeɛ nu wɔ Alaba anyunlu na ɔkɔdwu Alaba ne anu.
19 Na ɛweɛne ne toa zo kɔ Bɛte-hɔgela+ sɔlɔ ndololeɛ nu, na ɔkɔgua Ngyenle Nyevile ne*+ sɔlɔ ɛnweazo wɔ Dwɔdan ne nyiakɛ. Ɛhye a le nyiakɛ ɛweɛne ne a.
20 Na Dwɔdan ne rayɛle ye aduduleɛ afoa nu ɛweɛne ne. Ɛhye a le Bɛngyaman abozoamra agyapadeɛ ne mɔɔ bɛhyɛle bɛmaanle bɛ mbusua ne mɔ nee bɛ ɛweɛne ne anloa amuala a.
21 Bɛngyaman mbusua ne mɔ azuamgbole ne mɔ ɛne: Gyɛleko, Bɛte-hɔgela, Yimɛke-kizeze,
22 Bɛte-alaba,+ Zɛmaleeyem, Bɛtɛle,+
23 Avem, Peela, Ɔfela,
24 Kifal-amonae, Ɔfenae yɛɛ Giba+—azuamgbole 12 nee bɛ namunamu.
25 Gebɛyɔn,+ Releema, Biyɛlɔto,
26 Mezepɛ, Kɛfaela, Mozaa,
27 Rilikɛm, Yepeɛle, Talala,
28 Ziilaa,+ Ha-yilɛfe, Gyibɛse, mɔɔ le Gyɛlusalɛm,+ Gebeya+ yɛɛ Keleate—azuamgbole 14 nee bɛ namunamu.
Ɛhye a le Bɛngyaman abozoamra agyapadeɛ mɔɔ bɛhyɛle bɛmaanle bɛ mbusua ne mɔ la.
