Dwɔhyua 22:1-34
22 Akee Dwɔhyua vɛlɛle Wulubɛnema, Gaadema nee Manasɛ abusua foa ko ne
2 na ɔzele bɛ kɛ: “Bɛyɛ debie biala mɔɔ Gyihova sonvolɛ Mosisi hanle hilele bɛ la,+ yɛɛ bɛdie me ne wɔ debie biala mɔɔ menganle mengilele bɛ la anu.+
3 Bɛamkpo bɛ mediema ne mɔ wɔ mekɛ ɛhye amuala anu too badwu ɛnɛ;+ yɛɛ bɛli Gyihova bɛ Nyamenle ne mɛla zo.+
4 Kɛkala Gyihova bɛ Nyamenle ne ɛmaa bɛ mediema ne mɔ ɛlie bɛ menle kɛ mɔɔ ɔbɔle bɛ ɛwɔkɛ la.+ Ɔti akee bɛbahola bɛazia bɛahɔ bɛ ɛdanlɛ azua ne mɔ anu wɔ azɛlɛ ne mɔɔ Gyihova sonvolɛ Mosisi vale maanle bɛ kɛ bɛdɛnla zo wɔ Dwɔdan ne anzi lɔ* la azo.+
5 Bɛnlea boɛ na bɛli ngyehyɛleɛ nee Mɛla mɔɔ Gyihova sonvolɛ Mosisi vale maanle bɛ la azo;+ bɛhulo Gyihova bɛ Nyamenle ne,+ bɛlua ye ndenle ne mɔ anu,+ bɛli ye mɛla ne mɔ azo,+ bɛbeta ɔ nwo+ na bɛva bɛ ahonle muala+ nee bɛ ɛkɛla* muala bɛzonle ye.”+
6 Akee Dwɔhyua yilale bɛ na ɔmaanle bɛhɔle, na bɛhɔle bɛ ɛdanlɛ azua ne mɔ anu.
7 Mosisi maanle Manasɛ abusua foa ko ne agyapadeɛ wɔ Beehyan,+ yɛɛ Dwɔhyua maanle foa ko ne noko nee bɛ mediema ne mɔ azɛlɛ wɔ Dwɔdan adɔleɛ afoa nu.+ Mekɛ mɔɔ Dwɔhyua ɛlɛmaa bɛahɔ bɛ ɛdanlɛ azua ne mɔ anu la, ɔyilale bɛ
8 na ɔzele bɛ kɛ: “Bɛva anwonyia dɔɔnwo, nyɛmoa dɔɔnwo, dwɛtɛ fufule nee nvutuke, kɔbele nee bulalɛ yɛɛ adɛladeɛ dɔɔnwo kpalɛ bɛzia bɛhɔ bɛ ɛdanlɛ azua ne mɔ anu.+ Bɛva ninyɛne mɔɔ bɛnyianle+ bɛvile bɛ kpɔvolɛma ɛkɛ ne la bie bɛhɔ na bɛ nee bɛ mediema ne mɔ ɛhyɛ.”
9 Yemɔti Wulubɛnema, Gaadema yɛɛ Manasɛ abusua foa ko ne vile Yizilayɛma mɔɔ ɛha la anwo ɛkɛ hɔle, bɛvile Hyaelo wɔ Keena azɛlɛ zo na bɛziale bɛhɔle Geleade azɛlɛ zo,+ azɛlɛ ne mɔɔ Gyihova luale Mosisi anwo zo vale maanle bɛ kɛ bɛdɛnla zo la azo.+
10 Mɔɔ bɛdwule Dwɔdan maanzinli nu wɔ Keena azɛlɛ zo la, Wulubɛnema, Gaadema yɛɛ Manasɛ abusua foa ko ne zile afɔlemokyea kpole kɛnlɛma bie wɔ Dwɔdan ne anloa.
11 Nzinlii Yizilayɛma mɔɔ ɛha la dele+ kɛ bɛlɛka kɛ: “Bɛnlea! Wulubɛnema, Gaadema yɛɛ Manasɛ abusua foa ko ne ɛzi afɔlemokyea wɔ Keena azɛlɛ ne ɛweɛne zo wɔ Dwɔdan maanzinli ne anu ɛleka mɔɔ le yɛ ɛdeɛ la.”
12 Mɔɔ Yizilayɛma dele nwolɛ edwɛkɛ la, Yizilayɛma amuala boɔboale bɛ nloa wɔ Hyaelo+ kɛ bɛ nee bɛ kaho.
13 Akee Yizilayɛma zoanle ɛsɔfo Ɛlieza ara Fenɛhaze+ wɔ Wulubɛnema, Gaadema yɛɛ Manasɛ abusua foa ko ne anwo ɛkɛ wɔ Geleade azɛlɛ zo,
14 ɛnee mgbanyinli bulu boka ɔ nwo, Yizilayɛ abusua biala anu kpanyinli ko, ko biala le abusua kpanyinli mɔɔ gyi Yizilayɛ apenle apenle ati a.+
15 Mɔɔ bɛrale Wulubɛnema, Gaadema yɛɛ Manasɛ abusua foa ko ne ɛkɛ wɔ Geleade azɛlɛ zo la, bɛzele bɛ kɛ:
16 “Edwɛkɛ mɔɔ Gyihova menli ne amuala ɛha la ɛne: ‘Duzu ati a bɛyɛ deɛ ɛhye mɔɔ ɛngile nɔhalɛlilɛ+ la bɛtia Yizilayɛ Nyamenle ne ɛ? Ɛnɛ, bɛkpo Gyihova na bɛzi afɔlemokyea na bɛde atua bɛtia Gyihova.+
17 Asoo Piyɔ ɛtane ne le ekyi maa yɛ ɔ? Nwolɛ ewulenzane rale Gyihova menli ne anwo zo ɛdeɛ, noko yɛtɛnwu nwolɛ amaneɛ badwu ɛnɛ.+
18 Ɛnɛ noko bɛkulo kɛ bɛkpo Gyihova! Saa bɛte atua bɛtia Gyihova ɛnɛ a, ɛhyema ɔbava Yizilayɛma amuala anwo ɛya.+
19 Saa bɛnea na azɛlɛ ne mɔɔ bɛde zolɛ la anwo ɛgua evinli a, ɛnee bɛpɛ bɛrɛla Gyihova agyapadeɛ ne azo,+ ɛleka mɔɔ Gyihova ɛdanlɛsua ne gyi la+ na bɛradɛnla yɛ avinli, bɛmmate Gyihova anwo atua yɛɛ bɛmmasi afɔlemokyea fofolɛ bɛboka Gyihova yɛ Nyamenle ne afɔlemokyea ne anwo bɛmaa yɛyɛ atuadelɛma.+
20 Mekɛ mɔɔ Zila ara Ekan+ anli nɔhalɛ wɔ ninyɛne mɔɔ ɔwɔ kɛ bɛsɛkye ye la anwo la, asoo tɛ Yizilayɛma kɔsɔɔti a ɛyavalɛ ne rale bɛ nwo zo a?+ Tɛ ɔ ngomekye a ɔwule wɔ ye ɛtane ne anwo a.’”+
21 Na Wulubɛnema, Gaadema nee Manasɛ abusua foa ko ne buale mgbanyima mɔɔ gyigyi Yizilayɛma apenle apenle ti la kɛ:+
22 “Gyihova, nyamenle kɔsɔɔti Nyamenle!* Gyihova, nyamenle kɔsɔɔti Nyamenle!+ Ɔze deɛmɔti yɛyɛ ɛhye la yɛɛ Yizilayɛma noko banwu ye. Gyihova, saa yɛde atua yɛɛ yɛanli nɔhalɛ yɛammaa wɔ a, mmadie yɛ ɛnɛ kenle ye.
23 Saa yɛzile afɔlemokyea ne kɛ yɛfa yɛakpo Gyihova na yɛabɔ ɛyelalɛ afɔle, ma afɔle yɛɛ anzodwolɛ afɔle wɔ zo a, Gyihova bahwe yɛ nzo.+
24 Kyɛkyɛ, debie mɔɔ yɛsulo nwolɛ la ati a yɛyɛle ɛhye a, ɔluakɛ yɛhanle kɛ, ‘Kenle bie, bɛ mra baha ahile yɛ mra kɛ: “Duzu a wɔ bɛdabɛ nee Gyihova, Yizilayɛ Nyamenle ne avinli a?
25 Gyihova ɛva Dwɔdan ne ɛyɛ ɛweɛne ɛdo yɛdayɛ nee bɛmɛ Wulubɛnema yɛɛ Gaadema avinli. Bɛnlɛ kyɛfoa biala wɔ Gyihova anu.” Na bɛ mra ɛnrɛmaa yɛ mra ne mɔ ɛnrɛnyia adenle ɛnrɛzonle* Gyihova.’
26 “Yemɔti yɛhanle kɛ, ‘Bɛmaa yɛyɛ nwolɛ debie na yɛzi afɔlemokyea, tɛ kɛ yɛfa yɛabɔ ɛyelalɛ afɔle anzɛɛ afɔle gyɛne,
27 emomu ɔbayɛ daselɛ yeamaa bɛdabɛ nee yɛdayɛ+ yɛɛ yɛ bo zo amra* mɔɔ bara la kɛ yɛbazonle Gyihova na yɛabɔ yɛ ɛyelalɛ afɔle nee afɔle gyɛne yɛɛ anzodwolɛ afɔle wɔ ɔ nyunlu,+ amaa kenle bie bɛ mra anga angile yɛ mra kɛ: “Bɛnlɛ kyɛfoa biala wɔ Gyihova anu.”’
28 Ɔti yɛhanle kɛ, ‘Saa kenle bie bɛka ye zɔ bɛkile yɛdayɛ nee yɛ bo zo amra a, akee yɛbaha kɛ: “Bɛnlea Gyihova afɔlemokyea ne ɛsaso mɔɔ yɛ nenyia mɔ yɛle la, bɛanyɛ kɛ bɛfa bɛabɔ ɛyelalɛ afɔle anzɛɛ afɔle gyɛne, emomu bɛyɛle kɛ ɔbayɛ daselɛ yeamaa bɛdabɛ nee yɛdayɛ.”’
29 Ɔnrɛra ye ɛlɛ kɛ yɛkɛde atua yɛkɛtia Gyihova na yɛkɛkpo Gyihova+ ɛnɛ kɛ yɛsi afɔlemokyea na yɛabɔ ɛyelalɛ afɔle, ma afɔle yɛɛ afɔle gyɛne wɔ zolɛ na yɛagyakyi Gyihova yɛ Nyamenle ne afɔlemokyea ne mɔɔ gyi ye ɛdanlɛsua ne anyunlu lɔ la!”+
30 Mɔɔ ɛsɔfo Fenɛhaze, menli ne mgbanyima ne mɔ, yɛɛ mgbanyima mɔɔ gyigyi Yizilayɛma apenle apenle ti la dele edwɛkɛ mɔɔ Wulubɛn, Gaade nee Manasɛ abozoamra ne mɔ hanle la, bɛ kunlu dwole.+
31 Yemɔti ɛsɔfo Ɛlieza ara Fenɛhaze zele Wulubɛn, Gaade nee Manasɛ abozoamra ne kɛ: “Ɛnɛ, yɛnwu kɛ Gyihova wɔ yɛ avinli, ɔluakɛ bɛanyɛ debie mɔɔ ɛngile nɔhalɛlilɛ la bɛantia Gyihova, kɛkala bɛlie Yizilayɛma bɛvi Gyihova asa anu.”
32 Akee ɛsɔfo Ɛlieza ara Fenɛhaze nee mgbanyima ne mɔ vile Wulubɛnema nee Gaadema anwo ɛkɛ wɔ Geleade azɛlɛ zo ziale hɔle Keena azɛlɛ zo na bɛhɔbɔle Yizilayɛma mɔɔ ɛha la amaneɛ.
33 Yizilayɛma anye liele edwɛkɛ ne anwo. Akee Yizilayɛma yele Nyamenle ayɛlɛ, na bɛanga ye bieko kɛ bɛ nee Wulubɛnema nee Gaadema kaho na bɛazɛkye azɛlɛ ne mɔɔ bɛde zolɛ la.
34 Ɔti Wulubɛnema nee Gaadema donle afɔlemokyea ne duma,* ɔluakɛ bɛhanle kɛ: “Ɔle daselɛ wɔ yɛ avinli kɛ, Gyihova a le nɔhalɛ Nyamenle ne a.”
Ɔbodwɛkɛ
^ Ɛhye kile, aduduleɛ afoa nu.
^ Nea Edwɛkɛbohilelɛ.
^ Anzɛɛ “Gyihova, Nyamenle Tumivolɛ Bedevinli ne.”
^ Hibulu aneɛ nu, “ɛnrɛzulo.”
^ Hibulu aneɛ nu, “yɛ awolɛndoazo.”
^ Ngilenu mɔɔ bɛvale bɛmaanle la ati, bie a bɛdonle afɔlemokyea ne Daselɛ.
