Dwɔhyua 4:1-24
-
Awolɛ ngakyedeɛ ne (1-24)
4 Mekɛ mɔɔ maanle ne amuala pɛle Dwɔdan ne wiele la, Gyihova zele Dwɔhyua kɛ:
2 “Ye mrenyia 12 fi menli ne anu, abusua ko biala anu sonla ko,+
3 na ka kile bɛ kɛ: ‘Bɛsesa awolɛ 12 wɔ Dwɔdan ne anu, ɛleka mɔɔ ɛsɔfo ne mɔ gyigyi la,+ na bɛva bɛhɔgua ɛleka mɔɔ bɛbala ye nɔe ne la.’”+
4 Ɔti Dwɔhyua vɛlɛle mrenyia 12 ne mɔɔ yekpa bɛ wɔ Yizilayɛma anu la, abusua ko biala anu sonla ko,
5 na Dwɔhyua zele bɛ kɛ: “Bɛze bɛli Gyihova bɛ Nyamenle ne Ɛlɛka ne anyunlu bɛhɔ Dwɔdan ne avinli lɔ, na ɔwɔ kɛ bɛ nuhua ko biala fa bolɛ ko to ɔ kɔme zo, kɛ mɔɔ Yizilayɛ mbusua ne mɔ dodo de la,
6 amaa yeayɛ sɛkɛlɛneɛ yeamaa bɛ. Saa kenle bie bɛ mra* biza bɛ kɛ, ‘Duzu ati a awolɛ ɛhye mɔ gua ɛke a?’+
7 ɔwɔ kɛ bɛka bɛkile bɛ kɛ: ‘Mekɛ mɔɔ bɛlɛfa Gyihova ngyekyeleɛ ɛlɛka ne bɛapɛ Dwɔdan ne la, azule ne gyakyile ɛzenlɛ.+ Awolɛ ɛhye mɔ bayɛ ngakyedeɛ* amaa Yizilayɛma dahuu.’”+
8 Ɔti Yizilayɛma yɛle mɔɔ Dwɔhyua hanle la pɛpɛɛpɛ. Bɛsesale awolɛ 12 bɛvile Dwɔdan ne anu kɛ mɔɔ Gyihova zele Dwɔhyua la, bɛmaanle ɔ nee Yizilayɛ mbusua ne mɔ dodo yɛle ko. Bɛvale bɛhɔle ɛleka mɔɔ bɛbala ye nɔe ne la na bɛguale ye wɔ ɛkɛ.
9 Dwɔhyua eza vale awolɛ 12 guale Dwɔdan ne avinli, ɛleka mɔɔ ɛnee ɛsɔfo ne mɔ mɔɔ zo ngyekyeleɛ ɛlɛka ne gyigyi la,+ na awolɛ ne mɔ tɛgua ɛkɛ badwu ɛnɛ.
10 Ɛsɔfo ne mɔ mɔɔ zo Ɛlɛka ne la gyinlanle Dwɔdan ne avinli hɔkpulale kɛ menli ne yɛle debie biala mɔɔ Gyihova zele Dwɔhyua kɛ ɔha ɔhile bɛ kɛ bɛyɛ la wiele la, kɛ mɔɔ Mosisi hanle hilele Dwɔhyua la. Mekɛ zɔhane anu, menli ne yɛle ye ndɛndɛ pɛle.
11 Mɔɔ menli ne amuala pɛle azule ne la, ɛsɔfo ne mɔ nee Gyihova Ɛlɛka ne pɛle azule ne wɔ menli ne anye zo.+
12 Wulubɛnema, Gaadema nee Manasɛ abusua foa ko ne mɔɔ bɛhyehyɛ bɛ nwo bɛmaa konle+ la pɛle azule ne zenle lile Yizilayɛma mɔɔ ɛha la anyunlu, kɛ mɔɔ Mosisi zele bɛ la.+
13 Sogyama kɛyɛ 40,000 mɔɔ bɛziezie bɛ nwo bɛmaa konle la pɛle azule ne wɔ Gyihova anyunlu hɔle Gyɛleko ɛsɛlɛ ne azo.
14 Kenle zɔhane, Gyihova kpogyale Dwɔhyua zo wɔ Yizilayɛma kɔsɔɔti anyunlu,+ na bɛbule ye* kpole kpalɛ wɔ ye ngoane mekɛ kɔsɔɔti anu kɛ mɔɔ bɛbule Mosisi la.+
15 Akee Gyihova zele Dwɔhyua kɛ:
16 “Ka kile ɛsɔfo ne mɔ mɔɔ zo Daselɛlilɛ ɛlɛka+ ne la kɛ bɛvi Dwɔdan ne anu.”
17 Yemɔti Dwɔhyua zele ɛsɔfo ne mɔ kɛ: “Bɛvi Dwɔdan ne anu.”
18 Mekɛ mɔɔ ɛsɔfo ne mɔ mɔɔ zo Gyihova ngyekyeleɛ ɛlɛka ne+ vi Dwɔdan ne anu vole file zo na ɛsɔfo ne mɔ agyakɛ hanle azɛlɛ resee la, Dwɔdan azule ne bɔle ɔ bo kɛ ɔse na ɔyile ɔbule aze+ kɛ ye dɛba ne la.
19 Menli ne vile Dwɔdan ne anu wɔ siane ne mɔɔ limoa la kenle bulu ne azo na bɛyɛle bɛ azokoɛleɛ wɔ Gelegale+ mɔɔ wɔ Gyɛleko aduduleɛ ɛweɛne zo la.
20 Dwɔhyua hyehyɛle awolɛ 12 ne mɔɔ bɛsesale bɛvile Dwɔdan ne anu la wɔ Gelegale.+
21 Akee ɔhanle ɔhilele Yizilayɛma kɛ: “Saa kenle bie bɛ mra biza bɛ papa mɔ kɛ, ‘Awolɛ ɛhye mɔ kile duzu?’ a,+
22 ɔwɔ kɛ bɛkilehile nu bɛkile bɛ mra ne mɔ kɛ: ‘Yizilayɛma pɛle Dwɔdan ne wɔ azɛlɛ resee zo+
23 wɔ mekɛ mɔɔ Gyihova yɛ Nyamenle ne maanle Dwɔdan azule ne sesanle wɔ bɛ nyunlu hɔkpulale kɛ bɛpɛle la, kɛ mɔɔ Gyihova yɛ Nyamenle ne maanle Nyevile Kɔkɔlɛ ne sesanle wɔ yɛ nyunlu hɔkpulale kɛ yɛpɛle la.+
24 Ɔyɛle ɛhye amaa menli kɔsɔɔti mɔɔ wɔ azɛlɛ ye azo la anwu kɛzi tumi wɔ Gyihova asa anu la,+ na bɛazulo Gyihova bɛ Nyamenle ne dahuu.’”
