Dwɔhyua 7:1-26
7 Noko Yizilayɛma anli nɔhalɛ wɔ ninyɛne mɔɔ ɔwɔ kɛ bɛsɛkye ye la anwo, ɔluakɛ Zila ara Zabedae ara Kaamae ara Ekan,+ mɔɔ vi Dwuda abusua nu la vale ninyɛne mɔɔ ɔwɔ kɛ bɛsɛkye ye la bie.+ Na Gyihova vale Yizilayɛma anwo ɛya kpole.+
2 Akee Dwɔhyua zoanle menli vi Gyɛleko kɛ bɛhɔ Eyae,+ mɔɔ bikye Bɛte-eevɛn na ɔwɔ Bɛtɛle+ aduduleɛ la, na ɔzele bɛ kɛ: “Bɛhɔnleɛnlea azɛlɛ ne azo.” Yemɔti menli ne hɔnleɛnleanle Eyae ɛkɛ.
3 Mɔɔ bɛziale bɛrale Dwɔhyua anwo ɛkɛ la, bɛzele ye kɛ: “Ɔngyia kɛ menli ne amuala kɛhɔ. Mrenyia kɛyɛ apenle nwiɔ anzɛɛ apenle nsa bahola ali Eyae anwo zo konim. Mmamaa menli ne amuala kɔfɛ mgbane, ɔluakɛ bɛ nwo anzo biala.”
4 Ɔti mrenyia kɛyɛ 3,000 hɔle ɛkɛ, noko bɛnriandile bɛvile Eyae mrenyia ne mɔ anyunlu.+
5 Eyae mrenyia ne mɔ hunle menli 36, na bɛvoanle bɛ wɔ suakpole ne anlenkɛ kpole ne anloa too bɛhɔdwule Hyɛbalem,* na bɛdoale zo bɛhunle bɛ wɔ boka ne ndololeɛ nu. Yemɔti menli ne annyia akɛnrasesebɛ bieko.*
6 Dwɔhyua suosuanle ye tɛladeɛ ne anu na ɔlale ɔbutule ɔ nyunlu aze wɔ Gyihova Ɛlɛka ne anyunlu hɔkpulale nɔsolɛ nu, ɔdaye nee Yizilayɛ mgbanyima ne mɔ, na bɛvulale ndɛtɛlɛ bɛguale bɛ ti zo.
7 Dwɔhyua hanle kɛ: “O Tumivolɛ Awulae Gyihova, duzu ati a ɛvale menli ɛhye mɔ kɔsɔɔti ɛpɛle Dwɔdan ne kɛ ɛfa yɛ wɔawula Amɔlema asa anu wɔamaa bɛazɛkye yɛ a? Saa yɛmaanle yɛ kunlu dwole kɛ yɛbadɛnla Dwɔdan ne anzi lɔ* a anrɛɛ ɔle kpalɛ!
8 O Gyihova, mebodo wɔ, kɛkala mɔɔ Yizilayɛma ɛnriandi* bɛ kpɔvolɛma la, duzu a menga a?
9 Saa Keenama nee menli kɔsɔɔti mɔɔ de azɛlɛ ne azo la te nwolɛ edwɛkɛ a, bɛbabɛnga yɛ bɛayia na bɛakyikyi yɛ duma bɛavi azɛlɛ ye azo, na duzu a ɛbayɛ ye wɔ wɔ duma kpole ne+ anwo a?”
10 Gyihova hanle hilele Dwɔhyua kɛ: “Dwazo! Duzu ati a wɔbutu ɛ nyunlu aze a?
11 Yizilayɛma ɛyɛ ɛtane. Bɛanli me ngyekyeleɛ+ mɔɔ menganle kɛ bɛli zo la azo. Bɛva ninyɛne mɔɔ ɔwɔ kɛ bɛsɛkye ye la bie,+ bɛwua+ bie bɛva bɛvea bɛ ninyɛne nu.+
12 Yemɔti, Yizilayɛma ɛnrɛhola ɛnrɛgyinla bɛ kpɔvolɛma anyunlu. Bɛbahakyi bɛ nzi na bɛanriandi bɛ kpɔvolɛma, ɔluakɛ ɔwɔ kɛ bɛsɛkye bɛ. Me nee bɛ ɛnrɛlua bieko kyesɛ bɛye deɛ mɔɔ ɔwɔ kɛ bɛsɛkye ye la bɛfi bɛ avinli.+
13 Dwazo na te menli ne anwo!+ Ka kile bɛ kɛ, ‘Bɛde bɛ nwo ɛhyema, ɔluakɛ edwɛkɛ mɔɔ Gyihova, Yizilayɛ Nyamenle ne ɛha la ɛne: “O Yizilayɛma, debie mɔɔ ɔwɔ kɛ bɛsɛkye ye la wɔ bɛ avinli. Bɛnrɛhola bɛnrɛgyinla bɛ kpɔvolɛma anyunlu kɔkpula kɛ bɛkɛye deɛ ne mɔɔ ɔwɔ kɛ bɛsɛkye ye la bɛkɛvi bɛ avinli la.
14 Ɛhyema nwonlomɔ bɛrɛla ye mbusua ekpunli ekpunli, na abusua ekpunli mɔɔ Gyihova kɛye ye la+ bara ye abusua abusua, na abusua mɔɔ Gyihova kɛye ye la bara ye awuke awuke, na awuke mɔɔ Gyihova kɛye ye la anu amra bara ye ngoko.
15 Ahenle mɔɔ bɛbanwu kɛ deɛ ne mɔɔ ɔwɔ kɛ bɛsɛkye ye la wɔ ye ɛkɛ la, bɛbayela ye+ nee ye debie biala mɔɔ ɔlɛ la ɔluakɛ yeanli Gyihova ngyekyeleɛ ne azo+ yɛɛ yebɔ anyiemgba ɛbɛla wɔ Yizilayɛ.”’”
16 Ɔti Dwɔhyua dwazole nwonlomɔ mangyee ne na ɔmaanle Yizilayɛma rale ye mbusua ekpunli ekpunli, na bɛyele Dwuda abusua ekpunli ne.
17 Ɔmaanle Dwuda mbusua ne mɔ rale na bɛyele Zila abusua ne; ɔmaanle Zila abusua ne+ anu amra rale ye ngoko na bɛyele Zabedae.
18 Akee ɔmaanle Zabedae sua nu amra rale ye ngoko, na bɛyele Zila ara Zabedae ara Kaamae ara Ekan mɔɔ vi Dwuda abusua ekpunli ne anu la.+
19 Akee Dwɔhyua zele Ekan kɛ: “Me ra, mesɛlɛ wɔ wula Gyihova, Yizilayɛ Nyamenle ne anyunlunyia na ka wɔ ɛtane ne kile ye. Mesɛlɛ wɔ, ka mɔɔ wɔyɛ la kile me. Mmafa ɛfea me.”
20 Ekan buale Dwɔhyua kɛ: “Nɔhalɛ nu, medame a meyɛ ɛtane metia Gyihova, Yizilayɛ Nyamenle ne a, na mɔɔ meyɛ la ɛne.
21 Mɔɔ menwunle tɛladeɛ kɛnlɛma bie mɔɔ bɛyɛle ye wɔ Hyaenaa+ nee dwɛtɛ fufule hyikɛle* 200 yɛɛ nvutuke kpɔma ko mɔɔ ye ɛlomboɛ le hyikɛle 50 la, me nye bolole bɛ yemɔti menvale. Mevu mevea me ɛdanlɛsua ne abo, na ezukoa ne vea ɔ bo.”
22 Ɛkɛ ne ala Dwɔhyua zoanle menli maanle bɛnriandile bɛhɔle ɛdanlɛsua ne anu na bɛnwunle kɛ tɛladeɛ ne vea ye ɛdanlɛsua ne anu na ezukoa ne wɔ ɔ bo.
23 Yemɔti bɛyele ninyɛne ne bɛvile ɛdanlɛsua ne anu na bɛvale bɛrɛlɛle Dwɔhyua nee Yizilayɛma kɔsɔɔti na bɛvale bɛguale Gyihova anyunlu ɛkɛ.
24 Akee Dwɔhyua nee Yizilayɛma kɔsɔɔti vale Zila ara Ekan,+ dwɛtɛ fufule ne, tɛladeɛ kɛnlɛma ne, nvutuke kpɔma ne+ yɛɛ ɔ mra mrenyia, ɔ mra mraalɛ, ye nlankɛ, ye asoaso, ye mboane, ye ɛdanlɛsua yɛɛ debie biala mɔɔ ɔlɛ la hɔle Ekɔ Bɔnza ne+ anu.
25 Dwɔhyua hanle kɛ: “Duzu ati a wɔmaa munzule* ɛdo yɛ a?+ Gyihova bamaa munzule ado wɔ ɛnɛ kenle ye.” Na Yizilayɛma kɔsɔɔti zile ye nee ye abusua ne awolɛ+ na bɛyelale bɛ.+ Yemɔti bɛzile bɛ muala awolɛ bɛhunle bɛ.
26 Na bɛhuohuanle awolɛ edukue wɔ ɔ nwo zo na ɔtɛbɔ ɛkɛ ne badwu ɛnɛ. Akee Gyihova ɛya kpole ne dwole.+ Ɛhye ati a bɛfɛlɛ ɛkɛ ne Ekɔ* Bɔnza badwu ɛnɛ la.
Ɔbodwɛkɛ
^ Ɔ bo kile “Kuma Mɔɔ Bɛtu Awolɛ Nu.”
^ Hibulu aneɛ nu, “menli ne ahonle holole na ɔyɛle kɛ nzule.”
^ Ɛhye kile, aduduleɛ afoa nu.
^ Anzɛɛ “ɛhakyi bɛ nzi ɛmaa.”
^ Anzɛɛ “ngyegyelɛ; esiane.”
^ Ɔ bo kile “Esiane; Munzule.”
