Dwɔhyua 8:1-35
8 Akee Gyihova zele Dwɔhyua kɛ: “Mmasulo yɛɛ mmamaa wɔ ahonle tu.+ Fa mrenyia kɔsɔɔti mɔɔ kɔ konle la na kɔ Eyae anwo zo. Nea, meva Eyae belemgbunli ne, ye menli, ye suakpole ne nee ye azɛlɛ ne mewula ɛ sa nu.+
2 Yɛ Eyae nee ye belemgbunli ne kɛ mɔɔ ɛyɛle Gyɛleko nee ye belemgbunli ne+ la, noko bɛbahola bɛava ninyɛne nee nyɛmoa mɔɔ bɛbanyia ye wɔ zolɛ la. Maa bɛhɔbu bɛzia suakpole ne anzi.”
3 Ɔti Dwɔhyua nee mrenyia kɔsɔɔti mɔɔ kɔ konle la hɔle Eyae anwo zo. Dwɔhyua vale konle nu katakyiema 30,000 na ɔmaanle bɛhɔle nɔɔzo.
4 Ɔzele bɛ kɛ: “Bɛnlea kɛ bɛbabu bɛazia bɛ wɔ suakpole ne anzi. Bɛmmamaa suakpole ne nee bɛ avinli twe, na bɛ muala bɛziezie bɛ nwo.
5 Me nee menli mɔɔ me nee bɛ lua la amuala babikye suakpole ne, na saa bɛfinde bɛtoa yɛ kɛ alimoa ne la a,+ yɛbanriandi yɛavi bɛ nyunlu.
6 Saa bɛtoa yɛ a, yɛbahwe bɛ yɛavi suakpole ne azo, ɔluakɛ bɛbaha kɛ, ‘Bɛlɛnriandi bɛavi yɛ nyunlu kɛ alimoa ne la.’+ Na yɛbanriandi yɛavi bɛ nyunlu.
7 Akee bɛvi ɛleka mɔɔ bɛbule bɛziale la na bɛhɔva suakpole ne; Gyihova bɛ Nyamenle ne bava sua ne awula bɛ sa nu.
8 Saa bɛfa sua ne a, bɛdo senle wɔ zo.+ Ɔwɔ kɛ bɛyɛ ye kɛ mɔɔ Gyihova hanle la. Bɛnlea, adehilelɛ mɔɔ meva memaa bɛ kɛ bɛli zo la ɛne.”
9 Akee Dwɔhyua maanle bɛhɔle, na bɛhɔle ɛleka mɔɔ bɛbabu bɛazia la; bɛhɔziale Bɛtɛle nee Eyae avinli, wɔ Eyae adɔleɛ, na Dwɔhyua nee menli mɔɔ hale la lale ɛkɛ ne nɔe ne.
10 Mɔɔ Dwɔhyua dwazole nwonlomɔ mangyee ne na ɔboɔboale ɛlɔne ne anloa ɔwiele la, ɔdaye nee Yizilayɛ mgbanyima ne mɔ lile bɛ nyunlu hɔle Eyae.
11 Mrenyia kɔsɔɔti mɔɔ kɔ konle+ mɔɔ nee ye lua la nee ye hɔle suakpole ne anyunlu. Bɛyɛle bɛ azokoɛleɛ wɔ Eyae sɔlɔ, ɛnee bɔnza ne la bɛ nee Eyae avinli.
12 Mekɛ zɔhane, ɛnee yeye mrenyia 5,000 yemaa bɛhɔbu bɛzia+ Bɛtɛle+ nee Eyae avinli, wɔ suakpole ne adɔleɛ.
13 Yemɔti menli ne yɛle bɛ azokoɛleɛ wɔ suakpole ne+ sɔlɔ yɛɛ ɛlɔne ne mɔɔ li bɛ nzi la noko wɔ suakpole ne+ adɔleɛ, na Dwɔhyua hɔle bɔnza ne anu nɔe ne.
14 Mekɛ mɔɔ Eyae belemgbunli ne nwunle ɛhye la, ɔ nee mrenyia mɔɔ wɔ sua ne azo la yɛle ye ndɛndɛ vale konle doale Yizilayɛma nwonlomɔ mangyee ne wɔ ɛleka bie mɔɔ anye kile ɛsɛlɛ ne azo la. Noko ɛnee ɔnze kɛ menli ɛbu ɛzia ye wɔ suakpole ne anzi lɔ.
15 Mɔɔ Eyae mrenyia ne mɔ rale bɛ nwo zo la, Dwɔhyua nee Yizilayɛma kɔsɔɔti nriandile vale adenle ne mɔɔ anye kile fienemgbole nu lɔ la azo.+
16 Akee bɛvɛlɛle menli kɔsɔɔti mɔɔ wɔ sua ne azo la kɛ bɛdoa bɛ; mekɛ mɔɔ bɛdoa Dwɔhyua la bɛvile suakpole ne azo.
17 Nrenyia ko bɔbɔ ɛnle Eyae anzɛɛ Bɛtɛle mɔɔ yeandoa Yizilayɛma a. Bɛgyakyile suakpole ne bɛdole ɛkɛ na bɛdoale Yizilayɛma.
18 Akee Gyihova zele Dwɔhyua kɛ: “Tende wɔ atwɛ ezinra* ne mɔɔ ɛlɛ ye ɛ sa nu la wɔ Eyae,+ ɔluakɛ mebava meawula ɛ sa nu.”+ Ɔti Dwɔhyua dendenle ye atwɛ ezinra ne wɔ suakpole ne azo.
19 Mekɛ mɔɔ ɔdendenle ɔ sa ala la yɛɛ bɛdabɛ mɔɔ bɛbu bɛzia la yɛle ye ndɛndɛ nriandile hɔle suakpole ne azo na bɛvale a. Ɛkɛ ne ala bɛdole senle wɔ suakpole ne azo.+
20 Mekɛ mɔɔ Eyae mrenyia ne mɔ dole bɛ nye bɛ nzi la, bɛnwunle kɛ esike vi suakpole ne azo ɛlɛkpu ahɔ anwuma, na bɛannyia anwosesebɛ bɛannriandi bɛangɔ ɛleka biala. Akee menli mɔɔ ɛnee bɛlɛnriandi bɛahɔ fienemgbole ne anu la hakyile bɛ nye na bɛrale menli mɔɔ doa bɛ la anwo zo.
21 Mekɛ mɔɔ Dwɔhyua nee Yizilayɛma kɔsɔɔti nwunle kɛ menli mɔɔ bule ziale la ɛva suakpole ne na esike ɛlɛkpu sua ne azo la, bɛhakyile bɛ nye na bɛhɔle Eyae mrenyia ne mɔ anwo zo.
22 Na bɛdabɛ mɔɔ bɛha la vi suakpole ne azo rayiale bɛ, ɔti Eyae mrenyia ne mɔ hale avinli, ɛnee Yizilayɛma bie mɔ wɔ bɛ nyunlu nee bɛ nzi, na bɛhunle bɛ hɔkpulale kɛ ko bɔbɔ anga anzɛɛ angola nriandi.+
23 Noko bɛhyele Eyae belemgbunli ne+ anyewɔzo na bɛvale ye bɛrɛlɛle Dwɔhyua.
24 Mekɛ mɔɔ Yizilayɛma hunle Eyaema kɔsɔɔti wɔ fienemgbole ne anu, ɛleka mɔɔ bɛdoale bɛ la wiele, mɔɔ bɛ nuhua ko biala dɔle dadeɛ nloa la, akee Yizilayɛma ziale hɔle Eyae na bɛvale konle dadeɛ bɛhɔhunle menli mɔɔ wɔ zolɛ la.
25 Bɛdabɛ mɔɔ bɛwule kenle zɔhane, Eyae mrenyia nee mraalɛ kɔsɔɔti le 12,000.
26 Dwɔhyua ando ɔ sa ne mɔɔ ɔvale ɔdendenle atwɛ ezinra* ne+ la aze hɔkpulale kɛ bɛhunle* Eyaema kɔsɔɔti bɛwiele la.+
27 Noko Yizilayɛma vale nyɛmoa nee ninyɛne mɔɔ bɛnyianle ye wɔ suakpole ne azo la, kɛ mɔɔ Gyihova zele Dwɔhyua la.+
28 Akee Dwɔhyua yelale Eyae na ɔmaanle ɔdɔle mgbane,+ na zɔhane ala a ɔde badwu ɛnɛ a.
29 Ɔhendanle Eyae belemgbunli ne wɔ baka zo too nɔsolɛ nu, na mekɛ mɔɔ sɛnzɛne ne ɛlɛkɔ ahɔdɔ la, Dwɔhyua zele bɛ kɛ bɛye ye funli ne bɛvi baka ne azo.+ Akee bɛhɔziele ye wɔ suakpole ne anlenkɛ kpole ne anuhɔlɛ na bɛhuohuanle awolɛ dɔɔnwo wɔ ɔ nwo zo, na ɔtɛbɔ ɛkɛ ne badwu ɛnɛ.
30 Akee Dwɔhyua zile afɔlemokyea wɔ Yibale Boka ne+ azo maanle Gyihova, Yizilayɛ Nyamenle ne,
31 kɛ mɔɔ Gyihova sonvolɛ Mosisi hanle hilele Yizilayɛma nee kɛ mɔɔ bɛhɛlɛ ye wɔ Mosisi Mɛla ne+ anu la kɛ: “Bɛva awolɛ mɔɔ bɛtɛfale bulalɛ bɛtɛtwɔlɔhwɔlɔle nwolɛ la+ bɛzi afɔlemokyea.” Na bɛbɔle ɛyelalɛ nee anzodwolɛ afɔle+ wɔ zolɛ bɛmaanle Gyihova.
32 Akee ɔhɛlɛle Mɛla ne+ mɔɔ Mosisi hɛlɛle ye+ wɔ Yizilayɛma anye zo la bie ɔguale awolɛ ne mɔ azo.
33 Ɛnee Yizilayɛma kɔsɔɔti, bɛ mgbanyima, bɛ menli titili nee bɛ ndɛnebuavolɛma ne gyi Ɛlɛka ne foa ko nee ye foa ko wɔ Livae ɛsɔfo ne mɔ mɔɔ zo Gyihova ngyekyeleɛ ɛlɛka ne la anyunlu. Ɛnee nyɛvolɛ nee ekulomeni wɔ ɛkɛ.+ Bɛ nuhua foa ko gyinlanle Gɛlaezem Boka ne anyunlu yɛɛ foa ko ne noko gyinlanle Yibale Boka ne+ anyunlu (kɛ mɔɔ Gyihova sonvolɛ Mosisi hanle hilele bɛ la),+ kɛ bɛyila Yizilayɛma.
34 Akee ɔmaanle ɔ ne zo ɔgengale Mɛla ne+ anu edwɛkɛ kɔsɔɔti, nyilalɛ+ nee amowa+ ɔhilele bɛ, kɛ mɔɔ bɛhɛlɛ ye wɔ Mɛla buluku ne anu la.
35 Edwɛkɛkpɔkɛ ko bɔbɔ ɛnle ɛkɛ mɔɔ Mosisi hanle mɔɔ Dwɔhyua ammaa ɔ ne zo angenga angile Yizilayɛ menli* ne+ kɔsɔɔti a, mraalɛ nee ngakula yɛɛ nyɛvolɛ+ mɔɔ de* bɛ avinli la+ amuala boka nwo.
Ɔbodwɛkɛ
^ Anzɛɛ “gyavelin.”
^ Anzɛɛ “bɛzɛkyele.”
^ Anzɛɛ “gyavelin.”
^ Hibulu aneɛ nu, “asafo.”
^ Hibulu aneɛ nu, “lua.”
