Dwɔhyua 9:1-27
9 Mekɛ mɔɔ arelemgbunli mɔɔ wɔ Dwɔdan ne adɔleɛ afoa nu+ la kɔsɔɔti dele mɔɔ ɛzi la, bɛdabɛ mɔɔ bɛwɔ awoka ne mɔ azo wɔ Hyifɛla, wɔ Nyevile Kpole ne* ɛnweazo+ yɛɛ Lɛbanɔn anyunlu—Hɛtema, Amɔlema, Keenama, Pilɛzema, Havaema yɛɛ Gyibɛsema+—
2 bɛhanle bɛ nwo bɛbɔle nu kɛ bɛ nee Dwɔhyua nee Yizilayɛma kaho.+
3 Gebɛyɔnoma+ noko dele mɔɔ Dwɔhyua vale yɛle Gyɛleko+ nee Eyae+ la.
4 Ɔti bɛluale nrɛlɛbɛ adenle zo bɛvale aleɛ bɛguale ahodoku mɔɔ ɛtete la anu na bɛvale nwanye nwoma ahodoku mɔɔ ɛkpukekpuke na bɛkpomgba la na bɛvale bɛzoale bɛ asoaso ne mɔ;
5 eza bɛwulale mgbɔlaboa mɔɔ ɛtete na bɛsosɔ ye yɛɛ adɛladeɛ mɔɔ ɛtete la. Paano mɔɔ bɛvale la amuala ɛhete na ɔlɛbubu.
6 Akee bɛhɔle Dwɔhyua anwo ɛkɛ wɔ azokoɛleɛ ne wɔ Gelegale+ na bɛzele ɔdaye nee Yizilayɛ mrenyia ne mɔ kɛ: “Yɛvi moamoa a yɛra a. Ɔti bɛ nee yɛ ɛyɛ ngyekyeleɛ.”
7 Noko Yizilayɛ mrenyia ne mɔ zele Havaema+ ne kɛ: “Ɔbayɛ kɛ bɛde yɛ nwo ɛke ala. Ɔti kɛ ɔkɛyɛ na yɛ nee bɛ ayɛ ngyekyeleɛ ɛ?”+
8 Bɛbuale Dwɔhyua kɛ: “Yɛle wɔ sonvolɛma.”*
Akee Dwɔhyua bizale bɛ kɛ: “Bɛle nzɔne menli, na nienwu a bɛvi a?”
9 Na bɛzele ye kɛ: “Wɔ sonvolɛma ɛde Gyihova wɔ Nyamenle ne duma la ati a yɛvi moamoa yɛra a,+ ɔboalekɛ yɛde ɔ nwo edwɛkɛ nee mɔɔ ɔyɛle wɔ Yigyibiti la amuala+
10 nee mɔɔ ɔvale ɔyɛle Amɔlema arelemgbunli nwiɔ ne mɔɔ wɔ Dwɔdan ne anzi lɔ,* Hɛhyebɔn Belemgbunli Saehɔn+ yɛɛ Beehyan Belemgbunli Ɔɔgo+ mɔɔ wɔ Ahyetalɔto la.
11 Yemɔti yɛ mgbanyima nee yɛ maanlema kɔsɔɔti hanle hilele yɛ kɛ, ‘Bɛva aleɛ bɛzia bɛ nwo bɛhɔyia bɛ. Bɛha bɛhile bɛ kɛ: “Yɛbayɛ bɛ sonvolɛma;+ ɔti bɛ nee yɛ ɛyɛ ngyekyeleɛ.”’+
12 Kenle mɔɔ yɛvile sua nu kɛ yɛba bɛ nwo ɛke la, ɛnee paano ɛhye le wuluwulu. Noko bɛkola bɛnwu kɛ yehete na ɔlɛbubu.+
13 Ɛnee nwanye nwoma ahodoku ɛhye mɔ le fofolɛ wɔ mekɛ mɔɔ yɛvale nwanye yɛguale nu la, noko bɛkpukekpuke.+ Na kɛ mɔɔ adenle ne wale la ati, yɛ adɛladeɛ nee yɛ mgbɔlaboa ɛtete.”
14 Na Yizilayɛ mrenyia ne mɔ liele bɛ aleɛ ne bie nleanle, noko bɛambiza nwolɛ edwɛkɛ wɔ Gyihova ɛkɛ.+
15 Yemɔti Dwɔhyua nee bɛ yɛle anzodwolɛ ngyekyeleɛ+ na ɔ nee bɛ yɛle ngyekyeleɛ kɛ ɔbamaa bɛadɛnla ngoane nu, na bɛ mgbanyima ne mɔ hanle nwolɛ ndane+ hilele bɛ.
16 Mɔɔ bɛ nee bɛ yɛle ngyekyeleɛ ne wiele la, ye kenle nsa ne azo, bɛdele kɛ bɛde bɛ nwo ɛkɛ ne ala.
17 Akee Yizilayɛma hɔle bɛ azuamgbole ne mɔ azo wɔ kenle nsa ne azo; bɛ azuamgbole ne mɔ a le Gebɛyɔn,+ Kɛfaela, Biyɛlɔto yɛɛ Keleate-gyialem.+
18 Noko Yizilayɛma anva konle andoa bɛ ɔluakɛ bɛ mgbanyima ne mɔ vale Gyihova, Yizilayɛ Nyamenle ne hanle ndane hilele bɛ.+ Yemɔti menli ne amuala dendɛle bɛ nzo abo tiale mgbanyima ne mɔ.
19 Na mgbanyima ne mɔ amuala zele menli ne kɔsɔɔti kɛ: “Kɛmɔ yɛva Gyihova, Yizilayɛ Nyamenle ne duma yɛha ndane yɛhile bɛ la ati, yɛnrɛhola yɛnrɛva yɛ sa yɛnrɛha bɛ.
20 Mɔɔ yɛbayɛ la ɛne: Yɛbamaa bɛadɛnla ngoane nu, amaa Nyamenle anva yɛ nwo ɛya kɛ yɛhanle ndane yɛhilele bɛ la.”+
21 Na mgbanyima ne mɔ hanle zɔle zo kɛ: “Bɛmaa bɛdɛnla ngoane nu, noko bɛbazoa ɛyɛne nee nzule bɛamaa menli ne amuala.” Ɛwɔkɛ mɔɔ mgbanyima ne mɔ bɔle bɛ la ɛne.
22 Akee Dwɔhyua vɛlɛle bɛ na ɔzele bɛ kɛ: “Kɛmɔti a bɛbɛlɛbɛlale yɛ kɛ, ‘Yɛvi moa a yɛra a,’ wɔ mekɛ mɔɔ bɛde yɛ nwo ɛke ala la ɛ?+
23 Ɔvi ɛnɛ mɔɔ kɔ la munzule ɛha bɛ,+ na dahuu bɛbayɛ ngɛkɛlɛ bɛazoa ɛyɛne nee nzule bɛahɔ me Nyamenle ne sua nu.”
24 Bɛbuale Dwɔhyua kɛ: “Kɛ mɔɔ bɛhanle bɛhilele wɔ sonvolɛma wienyi kɛ Gyihova wɔ Nyamenle ne zele ye sonvolɛ Mosisi kɛ ɔva azɛlɛ ne amuala ɔmaa bɛ na bɛhu menli kɔsɔɔti mɔɔ wɔ zolɛ la ati ɔ.+ Yemɔti ɛnee yɛsulo kɛ bɛbahu yɛ,+ na ɛhye ati a yɛyɛle ye zɔ a.+
25 Kɛkala yɛwɔ bɛ sa nu.* Debie biala mɔɔ bɛnea a ɔle kpalɛ na ɔtenrɛ la bɛva bɛyɛ yɛ.”
26 Na kɛ ɔyɛle bɛ la ɛne; ɔliele bɛ ɔvile Yizilayɛma asa anu, na bɛangu bɛ.
27 Yemɔti kenle zɔhane Dwɔhyua yɛle bɛ menli mɔɔ bazoa ɛyɛne nee nzule amaa menli ne+ nee Gyihova afɔlemokyea ne wɔ ɛleka mɔɔ Nyamenle kɛhile la,+ na bɛtɛyɛ ye zɔ badwu ɛnɛ.+
Ɔbodwɛkɛ
^ Ɛhye kile, Mɛdetɛlenia ne.
^ Anzɛɛ “ngɛkɛlɛ.”
^ Ɛhye kile, aduduleɛ afoa nu.
^ Anzɛɛ “bɛze yɛ anwunvɔne.”
