Dwɔn Edwɛkpa 13:1-38
13 Ɛnee Gyisɛse ze kolaa na Akpabɛnwo ɛvoyia ne adwu zo kɛ mekɛ ɛdwu+ kɛ ɔfi ewiade ɛhye anu na ɔkɔ Selɛ ne anwo lɔ,+ na kɛmɔ ɔhulole bɛdabɛ mɔɔ bɛle ye ɛdeɛ wɔ ewiade ye anu la ati, ɔhulole bɛ ɔhɔle awieleɛ.+
2 Mɔɔ bɛlɛdi nɔsolɛ aleɛ ne la, ɛnee Abɔnsam ɛva ɛwula Saemɔn ara Dwudase Yesekaleɔto+ ahonle nu dɛbadɛba kɛ ɔye ye ɔmaa.+
3 Na kɛmɔ Gyisɛse ze kɛ Selɛ ne ɛva ninyɛne kɔsɔɔti ɛwula ɔ sa nu yɛɛ ɔvi Nyamenle anwo lɔ a ɔrale na ɔlɛkɔ Nyamenle anwo lɔ la ati,+
4 ɔdwazole ɔvile ɛkponle ne anwo, ɔyele ye tɛladeɛ aguzo ne. Na ɔvale tohulu ɔpɛle ɔ bo.+
5 Akee ɔvale nzule ɔguale kyɛnze kpole bie anu na ɔbɔle ɔ bo ɔwowole ye ɛdoavolɛma ne agyakɛ anwo na ɔvale tohulu ne mɔɔ pɛ ɔ bo la ɔkyikyile.
6 Ɔradwule Saemɔn Pita anwo zo. Ɔzele ye kɛ: “Awulae, wɔmɔ a ɛwowo me gyakɛ anwo a?”
7 Gyisɛse buale ye kɛ: “Mɔɔ melɛyɛ la, ɛnrɛde ɔ bo kɛkala, noko nzinlii ɛbade ɔ bo.”
8 Pita zele ye kɛ: “Menrɛmaa ɛnrɛwowo me gyakɛ anwo ɛlɛ.” Gyisɛse buale ye kɛ: “Saa meanwowo ɛ gyakɛ anwo a,+ ɛnee ɛmboka me nwo.”
9 Saemɔn Pita zele ye kɛ: “Awulae, mmawowo me gyakɛ anwo ala, wowo me sa anwo nee me ti zo noko.”
10 Gyisɛse zele ye kɛ: “Awie biala mɔɔ ɛbia la ɛngyia debie biala kɛ ɔkɛwowo ɔ gyakɛ anwo ala, ɔluakɛ ɔ nwo ɛde bɔkɔɔ. Bɛmɛ bɛ nwo te, noko tɛ bɛ muala ɔ.”
11 Ɔluakɛ ɛnee ɔze ahenle mɔɔ baye ye amaa la.+ Ɛhye ati a ɔhanle kɛ: “Tɛ bɛ muala a bɛ nwo te” la.
12 Mekɛ mɔɔ ɔwowole bɛ gyakɛ anwo ɔwiele na ɔwulale ye tɛladeɛ aguzo ne la, ɔdɛnlanle ɛkponle ne anwo na ɔzele bɛ kɛ: “Bɛte mɔɔ meyɛ memaa bɛ la abo ɔ?
13 Bɛfɛlɛ me ‘Kilehilevolɛ’ nee ‘Awulae,’ na ɔle ye adenle zo, ɔluakɛ mele zɔhane.+
14 Yemɔti saa medame mɔɔ mele Awulae nee Kilehilevolɛ la mewowo bɛ gyakɛ anwo a,+ ɛnee ɔwɔ kɛ* bɛdabɛ noko bɛwowo bɛ gɔnwo mɔ agyakɛ anwo.+
15 Ɔluakɛ meyɛ neazo memaa bɛ amaa kɛ mɔɔ meyɛ bɛ la, bɛdabɛ noko bɛayɛ zɔ.+
16 Meka nɔhalɛ ne meahile bɛ, akɛlɛ ɛnle kpole ɛndɛla ɔ menle, yɛɛ mɔɔ bɛzoa ye la ɛndɛla mɔɔ zoanle ye la.
17 Saa bɛze ninyɛne ɛhye mɔ na bɛyɛ a, bɛ nye balie.+
18 Tɛ bɛ muala a melɛka bɛ nwo edwɛkɛ a; meze bɛdabɛ mɔɔ mekpa bɛ la. Noko ɛhye ɛra ye zɔ amaa ngɛlɛlera ne ara nu+ kɛ: ‘Mɔɔ nee me di aleɛ la ɛhakyi ɔ nzi ɛzi me.’+
19 Mekɛ ɛhye anu, melɛka meahile bɛ kolaa na yeazi, amaa saa ɔsi a bɛalie bɛali kɛ medame ɔ.+
20 Meka nɔhalɛ ne meahile bɛ, awie biala mɔɔ kɛlie awie mɔɔ mekɛzoa ye la ɛlie medame noko,+ yɛɛ awie biala mɔɔ kɛlie me la ɛlie Ahenle mɔɔ zoanle me la noko.”+
21 Gyisɛse hanle ɛhye la, nyane kpole hanle ye, na ɔhanle ye wienyi kɛ: “Nɔhalɛ nu meka meahile bɛ kɛ, bɛ nuhua ko baye me amaa.”+
22 Ɛdoavolɛma ne bɔle ɔ bo nleɛnleanle bɛ nyunlu, ɛnee bɛnnwu ahenle mɔɔ ɔlɛka ɔ nwo edwɛkɛ la.+
23 Ɛnee ɛdoavolɛma ne anu ko mɔɔ Gyisɛse kulo ye edwɛkɛ+ la de ɔ nwo ɛkɛ ne.*
24 Ɔti Saemɔn Pita bɔle ɔ nye hilele ye na ɔzele ye kɛ: “Kile yɛ ahenle mɔɔ ɔlɛka ɔ nwo edwɛkɛ la.”
25 Yemɔti ɛdoavolɛ ne lale Gyisɛse akɛnra anu bieko na ɔzele ye kɛ: “Awulae, nwane ɔ?”+
26 Gyisɛse buale kɛ: “Ahenle mɔɔ mebava paano sinli ne meabɔ ɛyɛba ne anu meamaa ye la ɔ.”+ Yemɔti ɔvale paano ne ɔbɔle ɛyɛba ne anu la, ɔvale ɔmaanle Dwudase, Saemɔn Yesekaleɔto ara ne.
27 Mɔɔ Dwudase liele paano sinli ne la, Seetan wolole ye.+ Yemɔti Gyisɛse zele ye kɛ: “Yɛ mɔɔ ɛlɛyɛ la ndɛndɛ.”
28 Noko, ɛnee bɛdabɛ mɔɔ bɛde ɛkponle ne anwo la anu biala ɛnze deɛmɔti ɔhanle ɛhye ɔhilele ye la.
29 Kɛmɔ Dwudase a lɛ ezukoa ɛlɛka ne la ati,+ ɛnee bie mɔ dwenle kɛ Gyisɛse ɛlɛka ahile ye kɛ, “Kɔtotɔ ninyɛne mɔɔ yɛhyia nwo wɔ ɛvoyialilɛ ne anu la,” anzɛɛ ɔva debie ɔhɔmaa ehyiavolɛma.
30 Ɔti mɔɔ ɔliele paano sinli ne la, ndɛndɛ ne ala ɔvindele. Na ɛnee aleɛ ɛdwo.+
31 Mɔɔ ɔvindele la, Gyisɛse hanle kɛ: “Kɛkala bɛwula sonla Ra ne anyunlunyia,+ na bɛbalua ɔ nwo zo bɛawula Nyamenle anyunlunyia.
32 Nyamenle mumua ne bawula ye anyunlunyia,+ na ɔbawula ye anyunlunyia ndɛndɛ ne ala.
33 Ngakula ngyikyi, me nee bɛ badɛnla mekɛ ekyi bie. Bɛbakpondɛ me; na kɛ mɔɔ menganle mengilele Dwuuma ne kɛ, ‘Ɛleka mɔɔ melɛkɔ la bɛnrɛhola bɛnrɛra ɛkɛ’+ la, akee meka meahile bɛdabɛ noko.
34 Melɛmaa bɛ mɛla fofolɛ kɛ bɛhulo bɛ nwo ngoko; kɛ mɔɔ mehulo bɛ la,+ bɛdabɛ noko bɛhulo bɛ nwo ngoko.+
35 Saa bɛkulo bɛ nwo a—menli kɔsɔɔti banwu kɛ bɛle me ɛdoavolɛma.”+
36 Saemɔn Pita bizale ye kɛ: “Awulae, nienwu a ɛlɛkɔ a?” Gyisɛse buale kɛ: “Ɛleka mɔɔ melɛkɔ la, ɛnrɛhola ɛnrɛdoa me kɛkala, noko nzinlii ɛbadoa me.”+
37 Pita zele ye kɛ: “Awulae, kɛmɔti a menrɛhola menrɛdoa wɔ kɛkala ɛ? Mebava me ngoane* meabɔ afɔle meamaa wɔ.”+
38 Gyisɛse buale kɛ: “Ɛbava wɔ ngoane* wɔabɔ afɔle wɔamaa me ɔ? Nɔhalɛ nu meka meahile wɔ kɛ, too mɔɔ akɔlɛ kabɔ la, ɛnee wɔkpo me fane nsa.”+
Ɔbodwɛkɛ
^ Anzɛɛ “ɔle bɛ gyima kɛ.”
^ Giliki aneɛ nu, “la ɔ kɛnra anu.”
^ Anzɛɛ “ɛkɛla.”
^ Anzɛɛ “ɛkɛla.”
