Dwɔn Edwɛkpa 17:1-26
17 Gyisɛse hanle ɛhye la, ɔnleanle anwuma na ɔhanle kɛ: “Egya, mekɛ ne ɛdwu. Wula ɛ ra ne anyunlunyia amaa ɛ ra ne noko awula wɔ anyunlunyia,+
2 kɛ mɔɔ wɔmaa ye tumi wɔ menli kɔsɔɔti* anwo zo la,+ amaa yeamaa bɛdabɛ mɔɔ ɛvale bɛ ɛmaanle ye+ la amuala dahuu ngoane.+
3 Ɛhye a le dahuu ngoane a,+ kɛ bɛkɛnwu wɔ,* nɔhalɛ Nyamenle kokye ne,+ nee mɔɔ ɛzoanle ye la, Gyisɛse Kelaese.+
4 Mewie gyima mɔɔ ɛvale ɛmaanle me kɛ menyɛ la yɛ,+ na ɔlua zo mewula wɔ anyunlunyia wɔ azɛlɛ ye azo.+
5 Yemɔti Egya, akee fa anyunlunyia ne mɔɔ ɛnee melɛ ye wɔ ɛ nwo lɔ kolaa na wɔabɔ ewiade ye la wula me anyunlunyia wɔ ɛ nwo nehane.+
6 “Mela wɔ duma ali mehile menli mɔɔ ɛnee wɔ ewiade mɔɔ ɛvale bɛ ɛmaanle me la.+ Ɛnee bɛle wɔ ɛdeɛ, yɛɛ ɛvale bɛ ɛmaanle me a, na bɛli wɔ edwɛkɛ zo.*
7 Kɛkala, bɛnwu kɛ debie biala mɔ ɛvale ɛmaanle me la vi wɔ ɛkɛ;
8 bɛze ɛhye ɔluakɛ meha debie biala mɔɔ ɛhanle ɛhilele me la mehile bɛ,+ na bɛlie bɛdo nu yɛɛ bɛnwu ye kɛ membale kɛ ɛ gyakɛ anu gyinlavolɛ,+ na bɛlie bɛli kɛ ɛdawɔ a ɛzoanle me a.+
9 Mesɛlɛ meamaa bɛ; menzɛlɛ memmaa ewiade ne, mesɛlɛ meamaa bɛdabɛ mɔɔ ɛvale bɛ ɛmaanle me la ɔluakɛ bɛle wɔ ɛdeɛ;
10 na me debie biala le wɔ ɛdeɛ, yɛɛ wɔ ɛdeɛ le me ɛdeɛ,+ na menyia anyunlunyia wɔ bɛ avinli.
11 “Menle ewiade bieko, bɛmɛ a bɛwɔ ewiade ye anu a,+ na melɛba ɛ nwo lɔ. Selɛ Nwuanzanwuanza, nea bɛ nwo zo+ ɔlua wɔ duma ne mɔɔ wɔva wɔdo me nwo zo la ati, amaa bɛayɛ ko kɛ mɔɔ yɛle ko la.+
12 Mekɛ mɔɔ me nee bɛ de la, ɛnee menea bɛ nwo zo+ ɔlua ɛdawɔ mumua ne wɔ duma ne mɔɔ wɔva wɔdo me nwo zo la ati; na membɔle bɛ nwo bane, yɛɛ bɛ nuhua ko bɔbɔ anzɛkye+ kyesɛ ɛzɛkyelɛ ralɛ ne ala,+ amaa ngɛlɛlera ne ara nu.+
13 Noko kɛkala melɛba ɛ nwo lɔ, na melɛka ɛhye mɔ wɔ ewiade ye anu, amaa me nwo anyelielɛ ne mɔɔ bɛnyia la ali munli wɔ bɛ nu.+
14 Meha wɔ edwɛkɛ ne mehile bɛ noko ewiade ne ɛkpɔ bɛ, ɔluakɛ bɛnle ewiade ne afoa,+ kɛ mɔɔ menle ewiade ne afoa la.
15 “Menzɛlɛ kɛ ɛye bɛ ɛvi ewiade ye anu, emomu mesɛlɛ kɛ ɛnlea bɛ nwo zo ɔlua amumuyɛnli ne ati.+
16 Bɛnle ewiade ne afoa+ kɛ mɔɔ menle ewiade ne afoa la.+
17 Dua nɔhalɛ ne azo te bɛ nwo;*+ wɔ edwɛkɛ le nɔhalɛ.+
18 Kɛ mɔɔ ɛzoanle me wɔ ewiade ye anu la, medame noko mezoa bɛ wɔ ewiade ye anu.+
19 Na melɛyɛ me nwo nwuanzanwuanza meamaa bɛ, amaa bɛdabɛ noko bɛalua nɔhalɛ ne azo bɛayɛ nwuanzanwuanza.
20 “Menzɛlɛ memmaa ɛhye mɔ angome, mesɛlɛ meamaa bɛdabɛ noko mɔɔ bɛlɛdua bɛ edwɛkɛ ne azo bɛanyia diedi wɔ me nu la,
21 amaa bɛ muala bɛayɛ ko,+ kɛ mɔɔ ɛdawɔ Egya, ɛ nee me le ko na me nee wɔ le ko la,+ amaa bɛdabɛ noko bɛ nee yɛ ayɛ ko, na ewiade ne alie ali kɛ ɛdawɔ a ɛzoanle me a.
22 Meva anyunlunyia ne mɔɔ ɛvale ɛmaanle me la memaa bɛ, amaa bɛayɛ ko kɛ mɔɔ yɛle ko la.+
23 Me nee bɛ le ko yɛɛ ɛ nee me le ko, amaa bɛ koyɛlɛ ne ali munli,* na ewiade ne anwu kɛ ɛdawɔ a ɛzoanle me a, na ɛkulo bɛ kɛ mɔɔ ɛkulo me la.
24 Egya, mekulo kɛ menli mɔɔ ɛvale bɛ ɛmaanle me la baboka me nwo wɔ ɛleka mɔɔ mewɔ la,+ amaa bɛanwu anyunlunyia ne mɔɔ wɔva wɔmaa me la, ɔluakɛ ɛnee ɛkulo me kolaa na ewiade ne abɔ ɔ bo.+
25 Pɛlepɛlelilɛ Egya, nɔhalɛ nu, ewiade ne ɛnze wɔ+ noko mame meze wɔ,+ yɛɛ ɛhye mɔ ze kɛ ɛdawɔ a ɛzoanle me a.
26 Memaa bɛnwu wɔ duma yɛɛ mebamaa bɛanwu ye,+ amaa ɛlɔlɛ ne mɔɔ ɛnyianle ye me nwo la adɛnla bɛ nu na me nee bɛ ayɛ ko.”+
Ɔbodwɛkɛ
^ Giliki aneɛ nu, “nwonane kɔsɔɔti.”
^ Anzɛɛ “bɛkɛnyia ɛ nwo ndelebɛbo.”
^ Anzɛɛ “bɛdie wɔ edwɛkɛ.”
^ Anzɛɛ “ye bɛ sie ahane; yɛ bɛ nwuanzanwuanza.”
^ Anzɛɛ “aha bɛ abɔ nu bɔkɔɔ.”
