Dwɔn Edwɛkpa 3:1-36
3 Ɛnee Falasiinli bie mɔɔ bɛfɛlɛ ye Nekɔdimɛse+ la wɔ ɛkɛ, ɔle Dwuuma kpanyinli.
2 Nrenyia ɛhye rale ye ɛkɛ ne nɔɔzo+ na ɔzele ye kɛ: “Relabae,+ yɛze kɛ ɛle kilehilevolɛ mɔɔ Nyamenle ɛzoa wɔ a, ɔluakɛ awie biala ɛnrɛhola ɛnrɛyɛ nwanwane ninyɛne ɛhye mɔ+ mɔɔ ɛyɛ la kyesɛ Nyamenle nee ye lua.”+
3 Gyisɛse buale ye kɛ: “Nɔhalɛ nu meka meahile wɔ kɛ, saa bɛanwo awie fofolɛ* a,+ ɔnrɛhola ɔnrɛnwu Nyamenle Belemgbunlililɛ ne.”+
4 Nekɔdimɛse zele ye kɛ: “Kɛ ɔkɛyɛ na bɛawo awie fofolɛ wɔ mekɛ mɔɔ yeyɛ kpanyinli la ɛ? Ɔnrɛhola ɔnrɛwolo ye mame akunlu ɔnrɛmaa bɛnrɛwo ye fofolɛ, ɔnle zɔ ɔ?”
5 Gyisɛse buale kɛ: “Nɔhalɛ nu meka meahile wɔ kɛ, saa bɛanva nzule+ nee sunsum+ bɛanwo awie a, ɔnrɛhola ɔnrɛhɔ Nyamenle Belemgbunlililɛ ne anu.
6 Mɔɔ bɛwo ye nwonane nu la le nwonane, yɛɛ mɔɔ bɛwo ye sunsum nu la le sunsum.
7 Mmamaa ɔyɛ wɔ azibɛnwo kɛ menganle mengilele wɔ kɛ: Ɔwɔ kɛ bɛwo bɛ fofolɛ la.
8 Anwoma ne bɔ kɔ ɛleka mɔɔ ɔkulo la, bɛte ɔ ne noko bɛnze ɛleka mɔɔ ɔvi ɔba yɛɛ ɛleka mɔɔ ɔlɛkɔ a. Zɔhane ala a awie biala mɔɔ bɛwo ye sunsum nu la de a.”+
9 Nekɔdimɛse buale ye kɛ: “Kɛ ɔkɛyɛ na ɛhye mɔ ayɛ zɔ ɛ?”
10 Gyisɛse buale kɛ: “Ɛle Yizilayɛ kilehilevolɛ noko ɛnze ɛhye mɔ ɔ?
11 Nɔhalɛ nu meka meahile wɔ kɛ, mɔɔ yɛze la yɛka, yɛɛ yɛdi mɔɔ yɛnwu ye la anwo daselɛ noko bɛnlie yɛ daselɛlilɛ ne bɛndo nu.
12 Saa meha azɛlɛ ye azo edwɛkɛ mehile bɛ na bɛnlie bɛnli a, ɛnee kɛzi meka anwuma edwɛkɛ mekile bɛ a bɛbalie bɛali ɛ?
13 Eza noko awie biala ɛtɛfole ɛtɛkɔle anwuma+ kyesɛ mɔɔ vi anwuma rale la,+ sonla Ra ne.
14 Na kɛ mɔɔ Mosisi maanle ɛwɔlɛ ne zo wɔ fienemgbole ne anu la,+ zɔhane ala a ɔwɔ kɛ bɛmaa sonla Ra ne zo a,+
15 amaa awie biala mɔɔ kɛlie ye kɛli la anyia dahuu ngoane.+
16 “Na Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle,+ amaa awie biala mɔɔ kɛla ye ali kɛ ɔlɛ diedi wɔ ye nu la bɛanzɛkye ye na yeanyia dahuu ngoane.+
17 Ɔluakɛ Nyamenle anzoa ɔ Ra ne wɔ ewiade kɛ ɔrabua ewiade ne ndɛne, emomu, kɛ bɛlua ɔ nwo zo bɛlie ewiade ne ngoane.+
18 Awie biala mɔɔ kɛla ye ali kɛ ɔlɛ diedi wɔ ye nu la bɛnrɛbua ye ndɛne.+ Na awie biala mɔɔ anla ye ali kɛ ɔlɛ diedi wɔ ye nu la, bɛbua ye ndɛne dɛbadɛba, ɔluakɛ yeanla ye ali kɛ ɔlɛ diedi wɔ Nyamenle Ara kokye ne anu.+
19 Mɔɔ bɛbagyinla zo bɛabua ndɛne la ɛne: wienyi ne ɛra ewiade ye anu,+ noko menli ɛhulo awozinli ɛdɛla wienyi ne ɔluakɛ bɛ gyima ɛnle kpalɛ.
20 Na awie biala mɔɔ yɛ ninyɛndane la kyi wienyi ne yɛɛ ɔmba wienyi ne anwo na ye gyima ala ali.
21 Noko awie biala mɔɔ yɛ debie kpalɛ la ba wienyi ne anwo,+ amaa ye gyima ala ali kɛ ɔ nee Nyamenle ɛhulolɛdeɛ le ko.”
22 Ɛhye anzi, Gyisɛse nee ye ɛdoavolɛma ne hɔle Dwudiya namunamu bie mɔ azo, na ɔ nee bɛ dɛnlanle ɛkɛ mekɛ ekyi na ɔzɔnenle menli.+
23 Ɛnee Dwɔn noko ɛlɛsɔne menli wɔ Enɔn mɔɔ bikye Seelem la, ɔluakɛ ɛnee nzule dɔɔnwo wɔ ɛkɛ,+ na menli hɔle ɔ nwo ɛkɛ bɛmaanle ɔzɔnenle bɛ;+
24 ɛnee bɛtɛtole Dwɔn efiade.+
25 Dwɔn ɛdoavolɛma ne nee Dwuunli bie zule kpolera wɔ anwodelɛ nwo.
26 Yemɔti bɛrale Dwɔn ɛkɛ na bɛzele ye kɛ: “Relabae, nrenyia ne mɔɔ ɛnee wɔ ɛ nwo ɛkɛ wɔ Dwɔdan ne anzi mɔɔ ɛlile ɔ nwo daselɛ la,+ nea, ɔlɛsɔne menli na menli ne amuala ɛlɛkɔ ɔ nwo ɛkɛ.”
27 Dwɔn buale kɛ: “Awie ɛnrɛhola ɛnrɛnyia debie kyesɛ Nyamenle fa maa ye.
28 Bɛdabɛ mumua ne bɛdi me daselɛ kɛ menganle kɛ, ‘Tɛ medame a mele Kelaese ne a,+ emomu bɛzoa me kɛ menlimoa ɔ nyunlu.’+
29 Atɔfolɛ raalɛ ne le atɔfolɛ nrenyia ne ɛdeɛ.+ Noko atɔfolɛ nrenyia ne agɔnwo ne, saa ɔgyi na ɔte ɔ ne a, ɔ nye die kpole kɛ yede atɔfolɛ nrenyia ne ane a. Yemɔti me anyelielɛ ɛli munli.
30 Ɔwɔ kɛ ye gyima kɔ ɔ nyunlu, na me ɛdeɛ ne azo te.”
31 Mɔɔ vi anwuma+ la le kpole tɛla menli kɔsɔɔti. Mɔɔ vi azɛlɛ ye azo la vi azɛlɛ ye azo na ɔka azɛlɛ ye azo edwɛkɛ. Mɔɔ vi anwuma la le kpole tɛla menli kɔsɔɔti.+
32 Ɔdi mɔɔ yenwu ye nee mɔɔ yede la anwo daselɛ,+ noko awie biala ɛnlie ye daselɛlilɛ ne ɛndo nu.+
33 Awie biala mɔɔ ɛlie ye daselɛlilɛ ne ɛdo nu la ɛmaa yela ali kɛ Nyamenle le nɔhalɛ.+
34 Ɔluakɛ mɔɔ Nyamenle ɛzoa ye la ka Nyamenle anwo edwɛkɛ,+ ɔluakɛ Ɔnva* ye sunsum ne ekyi bie ala a ɔmaa a.
35 Selɛ ne kulo Ralɛ ne+ na yeva ninyɛne kɔsɔɔti yewula ɔ sa nu.+
36 Awie biala mɔɔ kɛla ye ali kɛ ɔlɛ diedi wɔ Ralɛ ne anu la lɛ dahuu ngoane;+ mɔɔ ɛndie Ralɛ ne la ɛnrɛnyia ngoane,+ emomu Nyamenle ɛyavalɛ wɔ ɔ nwo zo.+
