Edwɛne 102:1-28
Awie mɔɔ bɛkɛsisi ye la asɔneyɛlɛ wɔ mekɛ mɔɔ yeyɛ bɛtɛɛ na ɔlɛka ye adwenleadwenle ne anwo edwɛkɛ yeahile Gyihova la.+
102 O Gyihova, tie me asɔneyɛlɛ;+Maa me ɛzunlɛ ɛdwu ɛ nyunlu.+
2 Mmafa ɛ nye ɛfea me wɔ me anwongyelelɛ mekɛ nu.+
Yɛ ɛnzolɛ tie* me;Saa mefɛlɛ wɔ a, bua me ndɛndɛ.+
3 Ɔluakɛ me mekɛ ɛlɛminli kɛ esike,Yɛɛ me mbowule nu ɛlɔ kɛ fonlomo.+
4 Me ahonle ɛyɛ bɛtɛɛ kɛ nya mɔɔ ɛnwoso,+Ɔluakɛ me rɛle vile kɛ mebali aleɛ.
5 Me nyanelilɛ kpole ne ati,+Me nwo nane ɛbetɛbeta me mbowule.+
6 Mezɔho fienemgbole nu bɔngɔbɔngɔ;Mele kɛ kpadule ekyi bie wɔ ɛleka mɔɔ ɛdɔ mgbane la.
7 Meda a menlafe;*Mele kɛ aloma mɔɔ ɔ ngome ɔgyi sua ti zo la.+
8 Me kpɔvolɛma tendɛ tia me alehyenlɛ biala.+
Bɛdabɛ mɔɔ bɛgolo me nwo* la fa me duma wa amonle.
9 Medi nzonle kɛ aleɛ,+Yɛɛ me monle ɛfonla me nzule* nu,+
10 Ɔlua wɔ ɛya nee wɔ ahonle mɔɔ ɛfutu la ati,Wɔmaa me zo kɛ ɛfuandi me wɔado.
11 Me mekɛ le kɛ ɛlawolɛ mɔɔ ɛlɛminli,*+Yɛɛ melɛnwoso kɛ ndile.+
12 Na wɔmɔ ɛwɔ ɛkɛ ne dahuu, O Gyihova,+Yɛɛ wɔ duma* badɛnla ɛkɛ ne wɔ awolɛndoazo kɔsɔɔti anu.+
13 Nɔhalɛ nu, ɛbadwazo na wɔaze Zayɔn anwunvɔne,+Ɔluakɛ mekɛ ɛdwu kɛ ɛmaa ɔnwu wɔ ɛlolɛ ne;+Mekɛ ne mɔɔ ɛhilele la ɛdwu.+
14 Ɔluakɛ wɔ azonvolɛ anye die ye awolɛ ne mɔ anwo+Yɛɛ bɛ nye die ye munlutu ne bɔbɔ anwo.+
15 Maanle maanle bazulo Gyihova duma ne,Yɛɛ azɛlɛ ye azo arelemgbunli kɔsɔɔti bazulo wɔ anyunlunyia ne.+
16 Ɔluakɛ Gyihova bakyekye Zayɔn bieko;+Ɔbavinde ye anyunlunyia ne anu.+
17 Ɔbayɛ ɛnzolɛ yeadie ehyiavolɛma asɔneyɛlɛ;+Ɔnrɛkpo bɛ asɔneyɛlɛ.+
18 Bɛhɛlɛ ɛhye bɛmaa awolɛndoazo mɔɔ bara kenle bie la,+Amaa menli mɔɔ bɔ zo mɔɔ bɛbawo* bɛ la aye Gyaa ayɛlɛ.
19 Ɔluakɛ Gyihova fi ye ɛleka nwuanzanwuanza ne mɔɔ wɔ anwuma lɔ la na ɔto ɔ nye ɔnea aze,+Ɔvi anwuma lɔ ɔnea azɛlɛ ye,
20 Kɛ ɔtie pilizanli nyanelilɛ,+Kɛ ɔdie bɛdabɛ mɔɔ bɛkahu bɛ la,+
21 Amaa bɛabɔ Gyihova duma ne wɔ Zayɔn+Na bɛaye ye ayɛlɛ wɔ Gyɛlusalɛm,
22 Wɔ mekɛ mɔɔ menli nee arelemgbunlililɛKɛboɔboa bɛ nloa kɛ bɛsonle Gyihova la.+
23 Ɔmaanle me anwosesebɛ wiele wɔ me mgbavolɛ nu;Ɔpɛle me mekɛ ne azo.
24 Menganle kɛ: “O me Nyamenle,Mmapɛ me ngoane zo wɔ me mgbavolɛ nu,Wɔmɔ mɔɔ ɛwɔ ɛkɛ ne wɔ awolɛndoazo kɔsɔɔti anu la.+
25 Tete ne, yɛɛ ɛwulale azɛlɛ ne adiabo a,Yɛɛ anwuma le ɛ sa anloa gyima.+
26 Bɛ bo zo baminli, noko wɔmɔ ɛwɔ ɛkɛ ne dahuu;Bɛ muala bɛbatete kɛ tɛladeɛ la.
Ɛbahakyi bɛ kɛ ɛdanlɛ, na bɛapɛ nu bɛahɔ.
27 Noko wɔmɔ ɛngakyi, yɛɛ wɔ ɛvolɛ ɛnrɛra awieleɛ ɛlɛ.+
28 Wɔ azonvolɛ ne mɔ amra badɛnla aze wɔ banebɔlɛ nu,Na bɛ bo zo amra badɛnla ɛkɛ ne dahuu wɔ ɛ nyunlu.”+
Ɔbodwɛkɛ
^ Anzɛɛ “Ka ɛ nwo aze tie.”
^ Anzɛɛ ɔkola ɔkile, “Menwa yɛɛ meyɛ bɛtɛɛ.”
^ Anzɛɛ “bɛsele me.”
^ Anzɛɛ “nza.”
^ Anzɛɛ “Me ɛlawolɛ ɛlɛyɛ tendenle.”
^ Hibulu aneɛ nu, “ngakyelɛ.”
^ Hibulu aneɛ nu, “bɛbabɔ.”
