Edwɛne 106:1-48
106 Bɛye Gyaa* ayɛlɛ!
Bɛyɛ Gyihova mo, ɔluakɛ ɔle kpalɛ;+Ye ɛlɔlɛ kpundii ne wɔ ɛkɛ ne dahuu.+
2 Nwane a kɛhola kɛha Gyihova ninyɛne mgbole ne mɔ anwo edwɛkɛ kpalɛAnzɛɛ kɛhola kɛbɔ ye nyɛleɛ kɔsɔɔti mɔɔ fɛta ayɛlɛyelɛ la nolo a?+
3 Anyelielɛ a le bɛdabɛ mɔɔ bɛdi pɛlepɛle,Bɛdabɛ mɔɔ dahuu bɛyɛ mɔɔ tenrɛ la.+
4 O Gyihova, saa ɛmaa wɔ menli ne nyia ɛ nyunlu ɛlolɛ* a, kakye me.+
Nea me nwo zo na die me,
5 Amaa meanyia wɔ kpalɛyɛlɛ ne mɔɔ ɛda ye ali ɛkile bɛdabɛ mɔɔ wɔkpa nu wɔye bɛ la,+Amaa me nee wɔ maanle ne ali fɛlɛko,Na me nee wɔ agyapadeɛ ne adu yɛ nloa anu yɛaye wɔ ayɛlɛ.
6 Yɛyɛ ɛtane kɛ mɔɔ yɛ nenyia mɔ yɛle la;+Yɛvo; yɛyɛ amumuyɛ.+
7 Yɛ nenyia mɔ mɔɔ ɛnee wɔ Yigyibiti la angile wɔ nwanwane gyima ne mɔ anwo anyezɔlɛ.*
Bɛangakye wɔ ɛlɔlɛ kpundii bebelebe ne,Emomu, bɛdele atua wɔ nyevile ne, Nyevile Kɔkɔlɛ ne anloa.+
8 Noko ye duma ne ati ɔliele bɛ,+Amaa bɛanwu ye kpoleyɛlɛ ne.+
9 Ɔdeanle Nyevile Kɔkɔlɛ ne, na ɔsesanle;Ɔlile bɛ nyunlu bɛluale ye kuma ne anu kɛ asɛɛ bɛlua ɛsɛlɛ* zo la;+
10 Ɔliele bɛ ngoane ɔvile bɛdabɛ mɔɔ bɛkyi bɛ la asa anu+Na ɔliele bɛ ɔvile bɛ kpɔvolɛma asa anu.+
11 Nzule ne vale bɛ kpɔvolɛma ne;Bɛ nuhua ko bɔbɔ anga.+
12 Akee bɛnyianle ye ɛwɔkɛ ne anu diedi;+Bɛbɔle ɔ bo bɛdole ayɛlɛyelɛ edwɛne bɛmaanle ye.+
13 Noko yeangyɛ bɛ rɛle vile mɔɔ ɔyɛle la;+Bɛangendɛ ye folɛdulɛ ne.
14 Bɛlile bɛ angomedi atiakunluwɔzo nzi wɔ fienemgbole ne anu;+Bɛzɔle Nyamenle bɛnleanle wɔ ɛsɛlɛ ne azo.+
15 Ɔvale mɔɔ bɛbizale la ɔmaanle bɛ,Na akee ɔdele ewule ɔguale bɛ nwo na bɛ nwo golole bɛ.+
16 Wɔ azokoɛleɛ ɛkɛ ne, bɛ nye bolole Mosisi,Nee Aalɔn+ bɔbɔ mɔɔ ɔle nwuanzanwuanza ɔmaa Gyihova la.+
17 Akee azɛlɛ ne bukele ɔ nloa na ɔmenle DeetanNa ɔhedale bɛdabɛ mɔɔ bɛboka Abaelam anwo la anwo zo.+
18 Senle dɔle ekpunli ne avinli;Sendɔlɔra yelale amumuyɛma ne.+
19 Bɛyɛle ɛnlankɛ ralɛ wɔ HɔlɛbeNa bɛbɔle bɛ ti aze bɛmaanle bulalɛ ananze;*+
20 Bɛvale* me anyunlunyia neBɛmaanle ɛnlankɛ nyinli mɔɔ di ndile la ananze.+
21 Bɛ rɛle vile Nyamenle,+ bɛ Ngoanedievolɛ ne,Mɔɔ yɛle ninyɛne mgbole wɔ Yigyibiti la,+
22 Ɔyɛle nwanwane gyima wɔ Ham azɛlɛ ne azo,+Nee nyɛleɛ ɛzulolɛ wɔ Nyevile Kɔkɔlɛ ne anloa.+
23 Anrɛɛ ɔmaa bɛabɔ bɛ bo zo,Noko Mosisi mɔɔ ɔkpale nu ɔyele ye la bodole ye*Amaa yeagyakyi ye ɛya ne na yeanzɛkye bɛ.+
24 Akee bɛkpole azɛlɛ kɛnlɛma ne;+Bɛannyia ye ɛwɔkɛ ne anu diedi.+
25 Bɛdendɛle bɛ nzo abo wɔ bɛ ɛdanlɛ azua ne mɔ anu;+Bɛandie Gyihova ane.+
26 Ɔti ɔmaanle ɔ sa zo ɔhanle bɛ nwo ndaneKɛ ɔbamaa bɛawu fienemgbole ne anu;+
27 Ɔbamaa maanle maanle ne mɔ azɛkye bɛ bo zo amra,Na yeabɔ bɛ asande wɔ azɛlɛ ne kɔsɔɔti azo.+
28 Akee bɛbɔle nu bɛzonlenle* Beeyale wɔ Piyɔ,+Na bɛlile aleɛ mɔɔ bɛva bɛbɔ afɔle bɛmaa mowuamra la.*
29 Bɛvale bɛ nyɛleɛ bɛfutule Ye ahonle,+Na ewule dɔle bɛ avinli.+
30 Noko mɔɔ Fenɛhaze dwazole gyinlanle na ɔyɛle nwolɛ debie la,Ewule ne abo pɛle.+
31 Na bɛbule ye nyɛleɛ ne kɛ ɔle tenleneWɔ awolɛndoazo kɔsɔɔti anu dahuu.+
32 Bɛfutule Ye ahonle wɔ Mɛleba* nzule ne mɔ anwo,Na bɛdabɛ ti, ninyɛne angɔ ye boɛ ammaa Mosisi.+
33 Bɛhanle ye sunsum ne ɛya,Na ɔvale ɔ nloa ɔdendɛle mgbane mgbane.+
34 Bɛambɔ menli ne abo zo,+Kɛ mɔɔ Gyihova zele bɛ la.+
35 Emomu, bɛfonlanle maanle maanle ne mɔ anu+Na bɛzukoale bɛ ndenle ne mɔ bɛyɛle bie.+
36 Bɛhɔle zo bɛzonlenle bɛ awozonle ne mɔ,+Na ɛhye rayɛle ɛhane maanle bɛ.+
37 Bɛvale bɛ mra mrenyiaNee bɛ mra mraalɛ bɛbɔle afɔle bɛmaanle sunsum ɛtane ne mɔ.+
38 Bɛhanle menli mɔɔ ɛnze nwolɛ bie la mogya bɛguale,+Bɛ mra mrenyia nee bɛ mra mraalɛ mogyaMɔɔ bɛvale bɛbɔle afɔle bɛmaanle Keena awozonle ne mɔ la;+Na mogya mɔɔ bɛhanle bɛguale la maanle azɛlɛ ne anwo guale evinli.
39 Bɛ gyima maanle bɛ nwo guale evinli;Bɛ nyɛleɛ maanle bɛbɔle sunsum nu tuutuu ɛbɛla.+
40 Ɔti Gyihova vale ye menli ne anwo ɛya kpole,Na ɔhyile ye agyapadeɛ ne.
41 Ɔvale bɛ ɔwulale maanle maanle ne mɔ asa anu fane dɔɔnwo,+Amaa bɛdabɛ mɔɔ bɛkyi bɛ la anlea bɛ nwo zo.+
42 Bɛ kpɔvolɛma sisile bɛ,Na bɛbɛlɛle bɛ aze wɔ bɛ tumi bo.*
43 Ɔliele bɛ fane dɔɔnwo,+Noko bɛdele atua na bɛyɛle anzosesebɛ,+Na bɛ nvonleɛ ne ati, bɛbɛlɛle bɛ aze.+
44 Noko ɛnee ɔnwu bɛ anwongyelelɛ ne+Na ɔdiele bɛ ɛzunlɛ.+
45 Bɛdabɛ ti, ɔhakyele ye ngyekyeleɛ ne,Na ye ɛlɔlɛ kpundii ne bebelebe ne ati,* ɔ kunlu yelɛyelale ye.*+
46 Ɔmaanle menli mɔɔ hyele bɛ hɔle akɛlɛzonlenlɛ nu la kɔsɔɔtiZele bɛ anwunvɔne.+
47 O Gyihova yɛ Nyamenle, die yɛ,+Na boɔboa yɛ nloa fi maanle maanle ne mɔ anu+Amaa yɛayɛ wɔ duma nwuanzanwuanza ne moNa yɛava fɛlɛkolilɛ yɛaye wɔ ayɛlɛ*+
48 Ayɛlɛyelɛ ɛha Gyihova,Yizilayɛ Nyamenle ne dahuu.*+
Menli ne amuala ɛha kɛ, “Amen!”*
Bɛye Gyaa* ayɛlɛ!
Ɔbodwɛkɛ
^ Anzɛɛ “Hallelujah!” “Gyaa” le Gyihova duma ne mɔɔ bɛpɛ ye sinli.
^ Anzɛɛ “ɛyɛ bɛ boɛ.”
^ Anzɛɛ “ande ɔ bo.”
^ Anzɛɛ “fienemgbole.”
^ Anzɛɛ “ananze mɔɔ bɛgua.”
^ Anzɛɛ “Bɛhakyile.”
^ Hibulu aneɛ nu, “gyinlanle bɛ gyakɛ anu wɔ ɔ nyunlu.”
^ Anzɛɛ “bɛvale bɛ nwo bɛhɔbɔle.”
^ Ɛhye kile, afɔle mɔɔ bɛbɔle bɛmaanle menli mɔɔ bɛwu anzɛɛ nyamenle mɔɔ ngoane ɛnle bɛ nu la.
^ Ɔ bo kile “Butulelilɛ.”
^ Hibulu aneɛ nu, “bɛ sa abo.”
^ Hibulu aneɛ nu, “kpole ne ati.”
^ Anzɛɛ “ɔhakyile ye adwenle.”
^ Anzɛɛ “Na yɛ nye alie wɔ wɔ ayɛlɛyelɛ ne anu.”
^ Anzɛɛ “ɔvi mekɛ mɔɔ ɛnlɛ awieleɛ kɔdwu mekɛ mɔɔ ɛnlɛ awieleɛ.”
^ Anzɛɛ “Ɔyɛ ɛkɛ!”
^ Anzɛɛ “Hallelujah!” “Gyaa” le Gyihova duma ne mɔɔ bɛpɛ ye sinli.
