Edwɛne 109:1-31
Kɔmaa edwɛndolɛma kpanyinli ne. Devidi edwɛne. Ayɛlɛyelɛ edwɛne.
109 O Nyamenle mɔɔ meye wɔ ayɛlɛ,+ mmayɛ koonwu.
2 Ɔluakɛ amumuyɛma nee mɛlɛbɛlama buke bɛ nloa tia me.
Bɛfa adalɛ ɛtafinlimalɛ bɛka me nwo edwɛkɛ;+
3 Bɛbɔ bɛyia me, bɛka edwɛkɛ nyane nyane bɛtia me,Bɛteta me mgbane gyɛne nu ala.+
4 Bɛfa dwazotia bɛtua me ɛlɔlɛ ne anwo kakɛ;+Noko mekɔ zo meyɛ asɔne.
5 Bɛfa ɛtane bɛtua me kpalɛyɛlɛ nwo kakɛ+Yɛɛ bɛfa ɛkpɔlɛ bɛtua me ɛlɔlɛ nwo kakɛ.+
6 Ye amumuyɛnli maa ɔnlea ɔ nwo zo;Maa dwazotiavolɛ* ɛgyinla ɔ sa fema zo.
7 Saa bɛbua ye ndɛne a, maa ɔli fɔlɛ;*Maa bɛbu ye asɔneyɛlɛ bɔbɔ kɛ ɔle ɛtane.+
8 Maa ye mekɛ ɛyɛ ezinra;+Ye neavolɛ gyima ne, maa awie fofolɛ ɛyɛ.+
9 Maa ɔ mra* ɛyɛ nrisa,Na ɔ ye ɛyɛ kunlavolɛ.
10 Maa ɔ mra ɛluolua nu ɛzɛlɛzɛlɛ debie,Maa bɛvi bɛ awuke mɔɔ ɛbɔ la anu bɛhɔkpondɛ aleɛ.
11 Maa bɛdabɛ mɔɔ ɔtua bɛ kakɛ la ɛlie ye debie biala,Na nyɛvolɛ ɛve ye ninyɛne.
12 Mmamaa awie biala da atiakunlukɛnlɛmayɛlɛ* ali kile ye,Yɛɛ mmamaa ye nrisa ne mɔ nyia awie biala anyunlu ɛlolɛ.
13 Maa bɛye ɔ bo zo amra bɛvi ɛkɛ;+Maa bɛ aluma ɛminli wɔ awolɛndoazo bieko anu.
14 Maa Gyihova ɛhakye ye nenyia mɔ nvonleɛ ne,+Yɛɛ mmamaa bɛkyikyi ye mame ɛtane ne.
15 Maa Gyihova ɛdwenle mɔɔ bɛyɛ la anwo dahuu;Na ɔye bɛ nwo ngakyelɛ biala ɔvi azɛlɛ ne azo.+
16 Ɔluakɛ yeangakye kɛ ɔkɛla atiakunlukɛnlɛma* ali,+Emomu ɔvoanle mɔɔ bɛsisi ye,+ ehyianli nee mɔɔ ye ahonle ɛbubu la ndinlizoKɛ ɔku ye.+
17 Ɔhulole amonle ɛwalɛ, ɔti yemɔ a rale ɔ nwo zo a;Ɛnee ɔnlɛ ɛhulolɛ kɛ ɔbayila awie, ɔti yeannyia nyilalɛ biala.
18 Ɔhedale amowa kɛ ɛdanlɛ.
Na bɛwolale bɛguale ɔ nwo kɛ nzule,Bɛwolale bɛguale ye mbowule nu kɛ nwole.
19 Maa ye amowa ne ɛyɛ kɛ tɛladeɛ mɔɔ ɔwula+Na ɔyɛ kɛ bɛlɛte mɔɔ ɔbɔ ye dahuu la.
20 Ahatualɛ mɔɔ Gyihova fa maa awie mɔɔ dwazo tia me+Nee bɛdabɛ mɔɔ bɛtendɛ ɛtane bɛtia me* la ɛne.
21 Noko wɔmɔ, Tumivolɛ Awulae Gyihova,Wɔ duma ne ati, di me edwɛkɛ maa me.+
Die me, ɔluakɛ wɔ ɛlɔlɛ kpundii ne le kpalɛ.+
22 Ɔluakɛ menlɛ boavolɛ yɛɛ mele ehyianli,+Yɛɛ bɛva debie bɛwɔ me ahonle nu.+
23 Melɛpɛ nu meahɔ kɛ ɛlawolɛ mɔɔ ɛlɛminli;Bɛkpɔla me bɛdo kɛ abɛbɛ la.
24 Ɛhɔnehyelɛ ti mengola me gyakɛ azo gyinla;Menwa, yɛɛ meyɛ bɛtɛɛ.*
25 Meyɛ tendɛtia debie memaa bɛ.+
Saa bɛnwu me a, bɛkpusu bɛ ti.+
26 O Gyihova me Nyamenle, boa me;Wɔ ɛlɔlɛ kpundii ne ati, die me.
27 Maa bɛnwu ye kɛ wɔva ɛ sa a wɔyɛ ɛhye a;Kɛ wɔmɔ, O Gyihova a wɔyɛ a.
28 Maa bɛwa me amonle, noko wɔmɔ yila me.
Saa bɛdwazo bɛtia me a, maa bɛ nyunlu ɛgua aze,Noko maa wɔ sonvolɛ ɛli fɛlɛko.
29 Maa bɛdabɛ mɔɔ bɛdwazo bɛtia me la ɛheda anyiemgba;Maa bɛwula nyiane kɛ tɛladeɛ la.+
30 Me nloa baye Gyihova ayɛlɛ kpole kpalɛ;Mebaye ye ayɛlɛ wɔ menli dɔɔnwo anyunlu.+
31 Ɔluakɛ ɔbagyinla ehyianli asa fema zoAmaa yealie ye* yeavi bɛdabɛ mɔɔ bɛbua ye fɔlɛ la asa anu.
Ɔbodwɛkɛ
^ Anzɛɛ “tendɛtiavolɛ.”
^ Anzɛɛ “ɔyɛ amumuyɛnli.”
^ Hibulu aneɛ nu, “ɔ mra mrenyia.”
^ Anzɛɛ “ɛlɔlɛ kpundii.”
^ Anzɛɛ “ɛlɔlɛ kpundii.”
^ Anzɛɛ “me ɛkɛla.”
^ Hibulu aneɛ nu, “Me nwonane ɛwie, ɛnlome (nwole) ɛnle me nu.”
^ Anzɛɛ “ye ɛkɛla.”
