Edwɛne 114:1-8
114 Mɔɔ Yizilayɛ vile Yigyibiti,+Gyekɔbo abozoamra vile menli mɔɔ ka aneɛ gyɛne la avinli la,
2 Dwuda rayɛle ye ɛzonlenlɛsua,*Na Yizilayɛ rayɛle ɛleka mɔɔ ɔdi tumi.+
3 Nyevile ne nwunle ye na ɔnriandile;+Dwɔdan ne ziale ɔ nzi.+
4 Awoka mgbole wuluwulule kɛ mboane nyinli,+Awoka ngyikyi wuluwulule kɛ mboane mralɛ.
5 O nyevile, duzu a maanle ɛnriandile a?+
O Dwɔdan, duzu ati a ɛziale ɛ nzi a?+
6 O awoka mgbole, duzu ati a bɛwuluwulule kɛ mboane nyinli a?O awoka ngyikyi, duzu ati a bɛwuluwulule kɛ mboane mralɛ a?
7 O azɛlɛ, maa ɛ nwo ɛwoso wɔ ɔlua Awulae ati,Ɔlua Gyekɔbo Nyamenle ne ati,+
8 Ɔluakɛ ɔmaa bodane kakyi nzubula,Na bodane ɛsesebɛ noko kakyi nzule ɛvileka.+
Ɔbodwɛkɛ
^ Anzɛɛ “ɛleka nwuanzanwuanza.”
